Diospa Palabran Bibliataqa, kikin Teyta Diosmi noqantsikpaq qellqatsirqan. Teyta Diosta alli reqinapaqqa Bibliatam estudianantsik (Juan 17:3; 2 Timoteu 3:16). Teyta Jehoväqa Bibliachömi willakun, nunakuna imanö kawayänampaq kaqta y kë patsa imanö kanampaq kaqta munanqanta (Genesis 3:15; Apocalipsis 21:3, 4).

Bibliapita yachakuyanqan nunakunata yanapanqannöqa, manam ni ima librupis yanapantsu. Bibliapita yachakunqantsikqa yanapamantsik Diosnintsiknö kuyakoq, llakipäkoq y ankupäkoq kanapaqmi. Shamoq tiempupaq willakunqanmi, mana aguantëpaqnö sufrimientukunata pasarpis, alli tsarakunapaq yanapamantsik. Manam tsëllatsu, kë munduchö kaqkuna, Diosnintsik munanqannö mana kanqantam cläru rikätsikun (Salmus 119:105; Hebrëus 4:12; 1 Juan 2:15-17).

Bibliataqa hebreu, arameu y griëgu idiömachömi qellqayarqan, y kananyaqqa llapanta o pullanllata karpis, 3.000 idiömapitapis masmanmi traduciyashqa. Bibliataqa wakin librupitapis mas idiömakunamanmi traduciyashqa, y mas nunakunam katsiyan. Tsënö kanqanqa manam espantakuypaqtsu, Bibliachö mas väleq willakunqampaq parlarmi, kikin Bibliachö puntallapitana kënö willakurqan: “Llapan nacionpita nunakuna musyayänampaqmi, Teyta Diospa Gobiernumpita alli noticiakunata entëru patsachö willakuyanqa, y tsëpitanam ushakë chämunqa” (Mateu 24:14).

Bibliachö willakunqan alläpa väleq kanqanta musyarmi, kë Bibliata traducirqa, puntata qellqayanqanchö ninqannölla kanampaq, y cläru y fäcil leyinan kanampaq kallpachakuyarqö. “Masllata musyanapaq A” ninqanchömi, “Bibliata traducir imakunaman yarpäyänampaq”, “Kë Biblia imanö kanqan” y “Kanan witsanyaq Biblia imanö chämunqan” ninqanta tarinki. Tsëchömi willakun, kë Bibliata traducir imakunata cuentaman churayanqanta y kë Biblia imanö kanqanta.

Jehovä Diosta kuyaqkuna y adoraqkunaqa, puntata qellqayanqanchö ninqanta cläru rikätsikoq, y fäcil entiendina Bibliatam leyita munayan (1 Timoteu 2:4). Tsëmi Mushoq Patsachö Kawaqkunapaq Bibliata, llapan puëdiyanqä idiömakunaman traducita munar, Quechua Ancashïnu idiömaman traduciyämurqö. Noqakunaqa munayä y Teyta Diosmanmi mañakuyä, kë Bibliata leyeqkuna “Teyta Diosta ashiyänampaq, y imëkanöpa ashirqa rasumpa tariyänampaqmi” (Hëchus 17:27).