Jutsa rurëqa, Dios mandakunqampa contran imatapis ruranqantsik, pensanqantsik y sientinqantsikmi (1 Juan 3:4; 5:17). Bibliachömi willakun jutsa rurëqa, Diospa rikënimpaq mana allikunata o mana alli kaqta rurë, o alli kaqta mana rurë kanqanta (Santiägu 4:17).

 Bibliata qellqayanqan idiömakunapita “jutsa” nir traduciyanqan palabraqa, imatapis mana kaqman chätsi o imatapis mana logrëmi. Maslla musyarinapaq, Bibliachömi willakun warakata alli manejëta yachaq israelïta soldädukunapaq. Tsë grüpuchö kaqkunaqa, rumiwan warakarqa “manam ichikllapis fallayaqtsu y alli precïsum chätsiyaq”. Tsënö ninqanta palabra por palabra traduciyaptinqa, “manam jutsata rurayaqtsu” ninmanmi (Juëces 20:16). Tsëmi jutsa rurëqa, Teyta Dios mandakunqanta mana cumplita puëdinqantsikta rikätsikun.

 Kamamaqnintsik karmi, Teyta Diosqa imanö kawanapaq kaqta nimënintsikta puëdin (Apocalipsis 4:11). Y imanö portakunqantsikpitam, cada ünuta juzgamäshun (Romänus 14:12).

¿Kanku pillapis mana jutsata ruraq?

 Manam. Bibliachömi kënö nin: “Llapankuna jutsata rurashqa karmi, Teyta Dios imanö kanqanta cläru rikätsikuyta puëdiyantsu” (Romänus 3:23; 1 Rëyes 8:46; Eclesiastes 7:20; 1 Juan 1:8). ¿Imanirtan tsëqa pasakun?

 Kikin niraqta y jutsannaqta Teyta Dios kamashqa kaptinmi, qallananllachöqa Adanwan Ëvaqa jutsata rurayarqantsu (Genesis 1:27). Peru Kamakoq Diosta mana cäsukurmi, jutsa ruraq tikrayarqan (Genesis 3:5, 6, 17-19). Jutsa ruraq këta qeshyatanö pasashqa kayaptinmi, wamrankunaqa jutsannaqtsu kayarqan sinöqa jutsata ruraqna (Romänus 5:12). Tsëpaq parlarmi gobernanti Davidpis kënö nirqan: “Yurikurpis jutsayoqllanam karqä” (Salmus 51:5).

¿Llapan jutsa rurëku igual-lla?

 Manam. Maslla musyarinapaq, Bibliachömi willakun Sodömachö nunakunaqa, “alläpa mana alli” kayanqanta y jutsata rurëkäyanqanqa ‘alläpa mana alli’ kanqanta (Genesis 13:13; 18:20). Jutsa rurë igual-lla mana kanqanta musyanapaq kimallata rikärishun.

1.   Rurayanqan jutsa grävi o mana grävi kanqan. Bibliachömi willakun, oqllanakur melanëpaqkunata rurë, santukunata adorë, suwakuy, machakuy, pitapis engañar suwapë, pitapis wanutsi y brujerïata rurë alläpa grävi jutsa kanqanta. Tsëkunataqa manam ruranantsiktsu (1 Corintius 6:9-11; Apocalipsis 21:8). Bibliachömi cläru rikätsikun, tsë jutsakunaqa, mana pensashpa o mana cuentata qokushpa, imatapis ninqantsikwan o ruranqantsikwan pitapis llakitsinqantsikpita jukläya kanqanta (Proverbius 12:18; Efesius 4:31, 32). Tsënö kaptimpis, Bibliachömi cläru willakun, ima jutsatapis mana kaqpaq mana churanapaq. Tsëkunaqa mas grävi jutsa rurëmanmi chäratsimashwan (Mateu 5:27, 28).

2.   Imanir jutsata rurayanqan. Wakin nunakunaqa, Teyta Dios mandakunqanta mana musyarmi jutsata rurayan (Hëchus 17:30; 1 Timoteu 1:13). Bibliachöqa manam nintsu, tsënö jutsakunaqa allilla kanqanta. Tsënö kaptimpis, Teyta Dios mandakunqanta musyëkar jutsa rurayanqampitaqa jukläya kanqantam rikätsikun (Nümerus 15:30, 31). Bibliachömi willakun, ima alli kanqanta musyëkar juk nuna mana allita ruraptinqa, ‘mana alli shonquyoq’ kanqanta (Jeremïas 16:12).

3.   Ëka kuti tsë jutsata rurayanqan. Bibliachömi willakun, juk kutilla ima jutsatapis rurëqa, kutin kutin tsë jutsallata rurëpita jukläya kanqanta (1 Juan 3:4-8). Ima alli kanqanta musyëkarpis, kutin kutin jutsa ruraqtaqa Teyta Diosmi juzganqa (Hebrëus 10:26, 27).

 Alläpa grävi jutsata ruraqkunaqa, capazchi mana allita rurayanqampita alläpa llakikuyan. Maslla musyarinapaq, gobernanti Davidmi kënö nir qellqarqan: “Mëtsika jutsatam rurarqö, tsëmi lasaq qepinö nitiräman” (Salmus 38:4). Tsënö kaptimpis, Bibliachöqa kënömi nimantsik: “Mana allita ruraq nuna imanö kawanqanta dejatsun, y mana alli kaq nuna ama mana allikunaman pensatsunnatsu. Tsëpa rantinqa Teyta Jehoväman kutiyätsun, y pëqa pëkunata llakipanqam” (Isaïas 55:7).