Ri Biblia xukʼex ri kikʼaslemal

¿JAS xubʼan jun ali che xuriq kʼax pa unitzʼal rech xkikot pa ri ukʼaslemal? ¿Jas xbʼanowik che jun kʼanalaj político xux jun machʼalik winaq? Chqilampeʼ ri kkiya ubʼixik.

«Xintzukuj loqʼoqʼebʼal» (INNA LEZHNINA)

XALAX PA RI JUNABʼ: 1981

TINAMIT: RUSIA

NIKʼAJ CHIK: XURIQ KʼAX CHIʼ XKʼIYIK

RI OJER NUKʼASLEMAL: Ri nutat nunan kkita taj, xuqujeʼ in. Ri nabʼe seis junabʼ re ri nukʼaslemal sibʼalaj xinkikotik, are k’u ri nutat nunan xkijach kibʼ. Paneʼ k’a in nitzʼ na, xinchʼobʼ ri xkibʼano y sibʼalaj kʼax xinnaʼo. Are chi’ xkijach kibʼ, ri nutat y ri wachalal che más nim xekanaj kan pa Troick, y ri nunan xinukʼam bʼi rukʼ ri areʼ pa Cheliabinsk. Chiʼ xqʼax ri tiempo xkʼuliʼ chi jumul. Ri rachajil ri nunan sibʼalaj kqʼabʼarik y amaqʼel kojuchʼayo.

Pa 1993 ri watz xjiqʼik. Wariʼ sibʼalaj xuya bʼis chqe. Ri nunan xumajij qʼabʼarik y xubʼan kʼax chwe. Xwaj che xqariq utzilal pa ri qakʼaslemal. Rumal laʼ, xintzukuj kubʼsal kʼuʼx pa kʼi taq iglesias, are kʼu xinriq taj.

RI BIBLIA XUKʼEX RI NUKʼASLEMAL: Are chiʼ trece nujunabʼ, jun wachiʼl pa ri clase che testigo rech Jehová xutzijoj jujun taq kʼutbʼal re ri Biblia chwe. Sibʼalaj utz xinto are chiʼ xchʼaw chrij ri Noe y Job, che xkipatanij ri Dios paneʼ xkiriq kʼax pa ri kikʼaslemal. Naj ta tiempo qʼaxinaq are chiʼ xinmajij jun etaʼmanik chrij ri Biblia kukʼ ri testigos rech Jehová y xinbʼe pa taq ri e riqbʼal ibʼ.

Pa ri uTzij ri Dios xwetaʼmaj kʼi jastaq che sibʼalaj utz xwilo. Xinkikotik are chiʼ xwetaʼmaj che ri Dios kʼo ubʼiʼ (Salmo 83:18). Xuqujeʼ sibʼalaj xinmayo chiʼ xwil ri kubʼij ri Biblia chrij ri «kʼisbʼal taq qʼijol» (2 Timoteo 3:1-5). Xuya kikotemal ri eyebʼal re ri kʼastajibʼal chwe. Chichomajampeʼ: ¡kinwil chi na jumul ri wachalal! (Juan 5:28, 29).

Are kʼu, konojel taj xekikot wukʼ. Ri nunan y ri rachajil utz ta xekil ri testigos rech Jehová xkikoj kichuqʼabʼ rech xinya kan ri etaʼmanik rech ri Biblia. Are kʼu xinya ta kanoq rumal che sibʼalaj utz kwil ri tajin kwetaʼmaj.

Xinriq kʼax rumal che ri nufamilia itzel xinkilo. Tekʼuriʼ xqariq chi jun kʼax: ri nuchaqʼ che xbʼe wukʼ jujun taq mul pa ri e riqbʼal ibʼ kech ri testigos rech Jehová, xuqujeʼ xjiqʼik. Are kʼu ri Testigos xinkiya ta kanoq. Kukʼ e areʼ xinriq wi ri loqʼoqʼebʼal che amaqʼel nutzukum pa ri nukʼaslemal. Rukʼ wariʼ xinwilo che are ri qastzij kojonem, rumal laʼ pa 1996 xinbʼan nuqasanjaʼ y xinux testigos rech Jehová.

RI TEWCHIBʼAL CHE NURIQOM: Seis junabʼ chik in kʼulan rukʼ jun utzalaj achi ubʼiʼ Dmitry. Oj kebʼ kojchakun pa ri sucursal kech ri testigos rech Jehová pa San Petersburgo. Chiʼ xqʼax ri tiempo ri nutat nunan qas ta kkibʼan chi kʼax chwe rumal ri nukojonik.

¡Sibʼalaj kinmaltyoxij che xwetaʼmaj uwach ri Jehová! Upatanixik uyaʼom kikotemal pa ri nukʼaslemal.

«Kinchoman chrij kʼi taq preguntas» (RAUDEL RODRÍGUEZ RODRÍGUEZ)

XALAX PA RI JUNABʼ: 1959

TINAMIT: CUBA

NIKʼAJ CHIK: POLÍTICO CHE KNIMAN TAJ

RI OJER NUKʼASLEMAL: Xinalax pa La Habana (Cuba) y xinkʼiy pa jun barrio che kʼo wi mebʼayil, amaqʼel kʼo chʼoj pa taq ri bʼe. Chiʼ kʼa in ala na utz xwil ri yudo y nikʼaj chi deportes che kʼo chʼoj chupam.

Rumal che in utz tijoxel, ri nutat xubʼij chwe che kinbʼe pa ri universidad. Chilaʼ xwil wi che ri sistema político re ri nutinamit rajawaxik kkʼexik rumal laʼ xinniman ta chke ri qʼatal taq tzij. Oj kebʼ rukʼ ri wachiʼl pa ri clase xqabʼan kʼax che jun policía, xqelaqʼaj ri upistola y xqasok ri ujolom. Rumal wariʼ xojkʼam bʼi pa ri cárcel y xbʼix chqe che kojkamisaxik. ¡Kʼateʼ 20 nujunabʼ y ya kinkamisaxik!

Pa ri cárcel xintijoj wibʼ rech kinkʼut ta xibʼin ibʼ chuwach ri pelotón de fusilamiento. Are kʼu xuqujeʼ kinchoman chrij kʼi preguntas, junam rukʼ jasche kʼo kʼi kʼax pa ri uwach Ulew o la xaq xiw waʼ jun kʼaslemal kʼolik.

RI BIBLIA XUKʼEX RI NUKʼASLEMAL: Are chiʼ xqʼax ri tiempo xinkamisax taj, are xintzʼapix treinta junabʼ pa cárcel. Chilaʼ xwetaʼmaj wi kiwach jujun testigos rech Jehová che e yaʼom pa cárcel rumal ri kikojonik. Xinmay ri ukowil kikʼuʼx xuqujeʼ che kkixiʼj ta kibʼ, xaq ta koyowal paneʼ kʼo ta kimak e yaʼom pa ri cárcel.

Ri Testigos xkibʼij chwe che kʼo jun rumal che ri Dios xeʼubʼan ri winaq. Xkikʼut chnuwach rukʼ ri Biblia che kusukʼumaj na ri uwach Ulew y kubʼan na kotzʼiʼj che y che kʼo ta chi itzelal, ri utz taq winaq kkiriq na jun kʼaslemal che kʼo ta ukʼisik (Salmo 37:29).

Utz kwil ri tajin kkikʼut chnuwach are kʼu ri nubʼantajik junam ta kukʼ ri e areʼ. Xinchomaj che kinkun ta riʼ kinya kan ri política o kinbʼan ta chʼoj, rumal laʼ nutukel xinsikʼij ri Biblia. Are chiʼ xinkʼis usikʼixik, xwilo che ri testigos rech Jehová kejunamataj kukʼ ri nabʼe taq cristianos.

Ri wetaʼmanik chrij ri Biblia xukʼut chnuwach che rajawaxik kinkʼex jujun taq jastaq pa ri nukʼaslemal. Rajawaxik kinya kan ubʼixik itzel taq tzij. Xuqujeʼ rajawaxik kinya kan utijik ri sikʼ y kinnim ta chi wibʼ pa ri política. Kʼax xinbʼan kan che uyaʼik are kʼu rukʼ ri utobʼanik ri Jehová nojimal chi nojimal xinya kanoq.

Jun jastaq che kʼax nuriqom che uyaʼik kanoq are ri oyowal. Kimik kʼa kinta na che ri Dios che kinutoʼ chuwach wariʼ. Ri inutoʼom are ri kubʼij Proverbios 16:​32: «Are kʼo na uqʼij ri kochʼonik chuwach ri chuqʼabʼ; are kʼo na uqʼij ri uchʼakik ribʼ jun pa re wi che ukʼexwach ri kichʼakik taq tinamit».

Pa 1991 xinbʼan nuqasanjaʼ pa ri cárcel, pa jun barril. Qʼaxinaq chi jun junabʼ xojesax bʼik y xojtaq bʼi pa España, rumal che chilaʼ e kʼo wi jujun qafamiliares. Are chiʼ xinopanik xinbʼe pa ri riqbʼal ibʼ kech ri testigos rech Jehová, y ri qachalal utz nukʼulaxik xkibʼano xinnaʼo che jetaneʼ ojer chik wetaʼm kiwach wariʼ xinutoʼo rech xinriq kikotemal pa ri ukʼaslemal.

RI TEWCHIBʼAL CHE NURIQOM: Kimik sibʼalaj kinkikot chik y tajin kinpatanij ri Dios rukʼ ri wixoqil y ri e numiʼal. Yaʼom ri nimalaj eqele’n chwe che kinkunik kintzijoj ri utzij ri Dios chke nikʼaj chi winaq. Jujun taq mul kinchoman chrij ri xinkʼulmaj ojer kanoq are chiʼ xa jubʼiqʼ xraj xinkamisaxik, kinmaltyoxij ronojel ri tewchibʼal che yaʼom chwe. Xaq xiw ta in kʼaslik, xuqujeʼ kʼo jun weyebʼal. qas kweyeʼj na ri kotzʼiʼjalaj uwach Ulew rumal che chilaʼ kʼo sukʼilal y «man kʼo ta chi kamikal» (Apocalipsis 21:​3, 4).

[Comentario]

«Sibʼalaj xinkikotik chiʼ xwetaʼmaj che ri Dios kʼo ubʼiʼ»

[Comentario]

Oj kebʼ rukʼ ri wachajil sibʼalaj kojkikotik keqatoʼ ri winaq che kkita taj rech kketaʼmaj chrij ri Biblia