1, 2. a) ¿Jasche are utz taq tzij chke ri winaq ri upetik ri Armagedón? b) ¿Jas preguntas kqil na pa wajun kʼutunem riʼ?

E KʼI winaq kkijunamaj ri Armagedón rukʼ e jastaq che kuya xibʼin ibʼ, junam rukʼ jun nimalaj chʼoj o jun nimalaj kʼax kuriq ri uwach Ulew. Are kʼu, ri Biblia kubʼij utz taq tzij chrij ri Armagedón che kuya kikotemal chqe (Apoc. 1:3). Pa Armagedón ksachisax ta kiwach ri e winaq; xaneʼ, kekolotaj na. ¿Jas kkʼulmataj na?

² Ri Biblia kubʼij che pa ri Armagedón ksachisax kiwach ri e qʼatal taq tzij re ri uwach Ulew, ksachisax kiwach ri e itzel winaq are kʼu ri e sukʼ kekolotaj kanoq xuqujeʼ kyaʼ ta bʼe che kbʼan kʼax che ri uwach Ulew (Apoc. 11:18). Rech kqachʼobʼ wariʼ, chqanikʼoj kajibʼ preguntas: ¿Jas riʼ ri Armagedón? ¿Jas jastaq kkʼulmatajik are chiʼ majaʼ kumajij? ¿Jas rajawaxik kqabʼano rech kojkolotaj kanoq? Xuqujeʼ ¿jas rajawaxik kqabʼano rech kojux sukʼ chiʼ más naqaj chi kʼo wi?

3. a) ¿Jas kraj kubʼij ri tzij Armagedón? b) Junam rukʼ ri kubʼij Apocalipsis 16:14, 16, ¿jasche qetaʼm che Armagedón are ta jun lugar che qastzij kʼolik?

³ (Chasikʼij uwach Apocalipsis 16:14, 16). Ri tzij Armagedón xa jumul kriqitaj pa ri Biblia che are jun tzij hebreo che kraj kubʼij «Juyubʼ re Meguidó» (Apoc. 16:16). Meguidó are jun tinamit re ri ojer Israel (Jos. 17:11). Are kʼu Armagedón are ta jun lugar che qastzij kʼolik. Xaneʼ, are ri kkʼulmatajik chiʼ «ri ajawinelabʼ re ronojel ri uwach ulew» junam kubʼan ri kichomanik rech kechʼojin rukʼ ri Jehová (Apoc. 16:14). Are kʼu pa wajun kʼutunem riʼ, xuqujeʼ kqakoj na ri tzij Armagedón are chiʼ  kojchʼaw chrij ri chʼoj kbʼanik are chiʼ e mulim chi ri e qʼatal taq tzij re ronojel ri uwach Ulew. ¿Jasche qetaʼm che Armagedón are jun lugar che qastzij taj kʼolik? Nabʼe, rumal che ri juyubʼ re Meguidó qastzij taj kʼolik. Ukabʼ, rumal che xa nitzʼ ri lugar che kʼo wi ri tinamit Meguidó, rumal laʼ kuya taj kemulix chilaʼ «ri ajawinelabʼ re ronojel ri uwach ulew», ri e kajchʼojabʼ xuqujeʼ kikamisabʼal. Urox, rumal che, junam rukʼ ri kqil na pa wajun kʼutunem riʼ, ri chʼoj re Armagedón kumajij are chiʼ ri «ajawinelabʼ» re ronojel ri uwach Ulew kkaj kkibʼan kʼax chke ri e upatanelabʼ ri Dios, che e kʼo pa ronojel ri uwach Ulew.

4. ¿Jasche xujunamaj Jehová ri nimalaj uchʼoj rukʼ Meguidó?

⁴ ¿Jasche xujunamaj Jehová ri nimalaj uchʼoj rukʼ Meguidó? Rumal che Meguidó xuqujeʼ ri bʼeyaʼ che kʼo naqaj che Jezreel are lugares che xebʼan wi kʼi chʼoj. Jujun taq mul, Jehová kʼo xubʼan pa ri e chʼoj riʼ. Jun kʼutbʼal, «chuchiʼ ri jaʼ aj Meguidó», xutoʼ ri Barac jun qʼatal tzij israelita rech keʼuchʼak ri chʼojinelabʼ cananeos che kʼamom bʼi kibʼe rumal Sísara. Barac xuqujeʼ ri profetisa Débora xkimaltyoxij che ri Jehová rumal che xechʼakanik. Pa jun bʼixonem, xkibʼij: «Qas pa ri kaj, [...] ri chʼumil xkitij wi uloq kichuqʼabʼ che uchʼakik ri Sisara; ri nimaʼ re Cisón xeʼumes bʼik konojel» (Juec. 5:19-21).

5. ¿Jasche junam ta ri Armagedón rukʼ ri chʼoj che xubʼan Barac?

⁵ Barac xuqujeʼ Débora xkikʼis ri kibʼixonem rukʼ ri e tzij riʼ: «¡Ajawaxel jeʼ ta usachik kiwach waʼ, konojel ri e kʼulel la, kejulqʼin ta kʼu na ri keloqʼoqʼen che la, jachaʼ ri qʼij are taq sibʼalaj katununik!» (Juec. 5:31). Pa ri Armagedón, ri e ukʼulel ri Jehová xuqujeʼ ksachisax kiwach are kʼu ri keloqʼoqʼen che kekolotaj na. Are kʼu, junam ta ri Armagedón rukʼ ri chʼoj che xubʼan Barac. Pa ri Armagedón, ri upatanelabʼ ri Dios kechʼojin taj. Xuqujeʼ kʼo ta qʼaqʼ re chʼoj kkikojo. Kkiriq kichuqʼabʼ rumal che kkixibʼij ta kibʼ xuqujeʼ kkikubʼsaj kikʼuʼx chrij Jehová xuqujeʼ chkij ri rajchʼojabʼ che e kʼo pa ri kaj (Is. 30:15; Apoc. 19:11-15).

6. ¿Jas kukoj ri Jehová che kichʼakik ri e ukʼulel pa Armagedón?

⁶ ¿Jas kubʼan Jehová che kichʼakik ri ukʼulel pa ri Armagedón? Jalajoj kubʼan che ubʼanik. Jun kʼutbʼal, weneʼ keʼukoj kabʼraqan, saqbʼach xuqujeʼ qʼaqʼ o rayos (Job 38:22, 23; Ezeq. 38:19-22). Xuqujeʼ weneʼ kubʼano che kechʼojin ri ukʼulel chbʼil kibʼ (2 Crón. 20:17, 22, 23). Xuqujeʼ weneʼ keʼukoj ri ángeles rech kekikamisaj ri e itzel taq winaq (Is. 37:36). Apastaneʼ ri kukoj che ubʼanik, qastzij che kchʼakanik. Konojel ri e ukʼulel ksach na kiwach, are kʼu konojel ri e sukʼ kekolotaj kanoq (Prov. 3:25, 26).

7, 8. a) Junam rukʼ ri kubʼij 1 Tesalonicenses 5:1-6, ¿jas e tzij kkiya ubʼixik ri kʼamal taq bʼe? b) ¿Jasche are jun molom tzij che sibʼalaj kuya kʼax?

⁷ Ri e tzij «utz uj kʼolik, man kʼo ta kqakʼulmaj», kyaʼ ubʼixik are chiʼ xa jubʼiqʼ chi kraj kopan «ri uqʼij ri» Jehová (chasikʼij uwach 1 Tesalonicenses 5:1-6). Pa 1 Tesalonicenses 5:2, «ri uqʼij ri» Jehová kchʼaw chrij ri «nimalaj kʼaxkʼolil» (Apoc. 7:14). ¿Jas kqabʼan che retaʼmaxik che xa jubʼiqʼ chi kraj kumaj ri nimalaj kʼaxkʼolil? Ri Biblia kubʼij che kyaʼ ubʼixik jujun taq tzij che kukʼutu che naqaj chi kʼo wi.

⁸ Ri e kʼamal taq bʼe cho ronojel ri uwach ulew kkibʼij «utz uj kʼolik, man kʼo ta kqakʼulmaj». ¿Jasche kkibʼij wariʼ? ¿La ketobʼan ri e kʼamal taq bʼe re ri e kojonem? Weneʼ. Are kʼu ri e tzij kkiya ubʼixik are jun subʼunik kech ri demonios. Tekʼuriʼ wajun molom tzij riʼ sibʼalaj kuya kʼax, rumal che kuya chke ri winaq jun kubʼsal kʼuʼx re jamaril che qastzij taj chiʼ  xa jubʼiqʼ chi kraj kumaj ri nimalaj kʼaxkʼolil. Jeriʼ, xaq «kʼateʼ riʼ kpe na ri sachbʼal wachaj pa kiwiʼ», junam rukʼ ri kʼaxkʼolil kunaʼ jun yawabʼ ixoq. ¿Jas kkʼulmataj kukʼ ri e sukʼ upatanelabʼ ri Jehová? Paneʼ ketaʼm ta ri tiempo che kumaj ri nimalaj kʼaxkʼolil are kʼu ketaʼm ri kkibʼano.

9. ¿Jas kubʼan Jehová che usachisaxik uwach ri uqʼatoj tzij ri Satanás?

⁹ Jehová xa ta jun kubʼan che usachisaxik uwach ri uqʼatoj tzij ri Satanás, junam che xubʼan pa taq uqʼij ri Noé. Pa wajun chʼoj riʼ, kebʼ kubʼan che ubʼanik. Nabʼe, kusachisaj uwach ri Nimalaj Babilonia, che are konojel ri e qastzij taj kojonem che e kʼo cho ronojel ri uwach Ulew. Tekʼuriʼ, pa ri Armagedón, kusachisaj uwach ri nikʼaj chi uqʼatoj tzij ri Satanás, che are ri política, ri ajchʼojabʼ xuqujeʼ ri nimaʼq taq kʼayij. Chqilaʼ más ri kyaʼ ubʼixik chrij ri kebʼ jastaq riʼ che nim kibʼanik.

10. Junam rukʼ kubʼij Apocalipsis 17:1, 6 xuqujeʼ 18:24, ¿jasche Jehová kusachisaj uwach ri Nimalaj Babilonia?

¹⁰ Ri uqʼatik tzij pa uwiʼ «ri ajmakalaj ixoq» (chasikʼij uwach Apocalipsis 17:1, 6; 18:24). Ri Nimalaj Babilonia sibʼalaj utzʼilobʼisam ri ubʼiʼ ri Dios. Ukʼutum molom tzij chrij areʼ xuqujeʼ uxnaq junam rukʼ jun ajmakalaj ixoq o prostituta pa uxlabʼal, rumal che uyaʼom tobʼanik chke ri qʼatal taq tzij cho ri uwach Ulew. Ukojom ri chuqʼabʼ kʼo rukʼ xuqujeʼ ri kukʼutu rech keʼusubʼ ri winaq. Xuqujeʼ uyaʼom tobʼanik che kikamisaxik e kʼi winaq, e kʼi chke are ri upatanelabʼ ri Dios (Apoc. 19:2). ¿Jas kubʼan Jehová che usachisaxik uwach ri Nimalaj Babilonia?

11. ¿Jachin riʼ ri «kaq rij itzel awaj», xuqujeʼ jas kubʼan Jehová che ukojik rech kusachisaj uwach ri Nimalaj Babilonia?

¹¹ Jehová kukoj ri «lajuj rukʼaʼ» jun «kaq rij itzel awaj» rech kkisachisaj uwach ri ajmakalaj ixoq. Wajun itzel awaj kraj kubʼij ri Organización de las Naciones Unidas, xuqujeʼ ri lajuj rukʼaʼ kraj kubʼij ri qʼatal taq tzij che kkiya kitobʼanik che wajun organización kimik. Are chiʼ kopan ri qʼij Dios kubʼano che ri e qʼatal taq tzij riʼ kkisachisaj uwach ri Nimalaj Babilonia. «Kkiya na kanoq xaq utukel chʼanal kʼut» kkisachisaj  uwach ri uqʼinomal xuqujeʼ ri nimalaj itzelal ubʼanom (Apoc. 17:3, 16). Ri usachik uwach «xa pa jun qʼij» kubʼano che sibʼalaj kkimay ri keyaʼow tobʼanik che, más na rumal che areʼ amaqʼel ubʼanom nimal che ribʼ, kubʼij: «In tʼuyul che chuchuʼ ajawinel, in malkaʼn taj, kinwil ta na bʼis» (Apoc. 18:7, 8).

12. ¿Jas kuya ta bʼe Jehová che kkibʼan ri qʼatal tzij xuqujeʼ jasche?

¹² Ri Dios kuya ta bʼe che ri qʼatal taq tzij kkisachisaj kiwach ri e upatanelabʼ, rumal che e areʼ kkiqʼalajisaj ri ubʼiʼ rukʼ kikotemal xuqujeʼ kinimam ri taqanik che uyaʼom chke che kkixutuj kan ri nimalaj Babilonia (Hech. 15:16, 17; Apoc. 18:4). Xuqujeʼ, kikojom kichuqʼabʼ che kitoʼik nikʼaj chik rech kkixutuj kan ri Babilonia. Rumal wariʼ, kkiriq ta kech «ri kʼax ri kuriqo» are kʼu kyaʼ na pa kʼax ri kikojonik.

13. a) ¿Jachin riʼ ri Gog? b) Junam rukʼ ri kubʼij Ezequiel 38:2, 8, 9, ¿jas kkʼamow bʼi Gog pa Armagedón, ri lugar che xa jun etal?

¹³ Ri chʼoj kubʼan Gog (chasikʼij uwach Ezequiel 38:2, 8, 9). Are chiʼ konojel ri e qastzij taj kojonem sachisam chi kiwach, ri utinamit ri Jehová kux kan junam rukʼ jun cheʼ che kkolotaj kan chuwach jun nimalaj kaqiqʼ jabʼ. Qastzij riʼ che Satanás sibʼalaj kpe royowal. Rumal wariʼ, keʼukoj —«e kuxlabʼal itzel taq uxlabʼal»— rech kubʼano che jun jupuq qʼatal taq tzij kech jalajoj taq tinamit kkaj kkibʼan kʼax chke ri upatanelabʼ ri Jehová (Apoc. 16:13, 14). Ri bʼiʼaj che kkoj chke waʼ ri e qʼatal taq tzij kech ri tinamit riʼ are Gog re ri «ulew re Magog». Are chiʼ wajun jupuq winaq riʼ kkaj kkibʼan kʼax chke ri upatanelabʼ ri Dios, kukʼut riʼ che xeʼopan pa ri lugar che xa jun etal ubʼiʼ Armagedón (Apoc. 16:16).

14. ¿Jas kril na ri Gog?

¹⁴ Gog kukubʼsaj ukʼuʼx chrij ri «kichuqʼabʼ ri achijabʼ», kraj kubʼij, ri ajchʼojabʼ keʼukojo (2 Crón. 32:8). Are kʼu oj kqakubʼsaj qakʼuʼx chrij ri qaDios, Jehová. Wariʼ kʼo ta upatan chkiwach ri e qʼatal taq tzij kech ri e tinamit. Rumal che, kkichomaj che, ri  Nimalaj Babilonia xkʼojiʼ nim uchuqʼabʼ, are kʼu ri e udioses xekun taj xkikol chuwach ri «itzel awaj» xuqujeʼ chuwach ri «lajuj rukʼaʼ» (Apoc. 17:16). Rumal laʼ Gog kuchomaj che qas kchʼakanik. Junam rukʼ jun nimalaj sutzʼ ri sibʼalaj qʼeq che kuchʼuq ri ulew, kraj kubʼan kʼax che ri utinamit ri Jehová (Ezeq. 38:16). Are kʼu aninaq krilo che qajinaq chi pa jun chapabʼal. Junam rukʼ xuriq ri faraón pa ri mar Rojo, kril kʼut che rukʼ ri Jehová tajin kchʼojin wi (Éx. 14:1-4; Ezeq. 38:3, 4, 18, 21-23).

15. ¿Jas kubʼan ri Jesús pa ri chʼoj re Armagedón?

¹⁵ Cristo xuqujeʼ ri uchʼojinelabʼ che e rachiʼl pa ri kaj kekitoʼ ri upatanelabʼ ri Dios xuqujeʼ kkisachisaj kiwach ri chojinelabʼ rech Gog (Apoc. 19:11, 14, 15). Are kʼu ¿jas kkʼulmataj rukʼ, Satanás, ri qas ukʼulel ri Jehová, che are xbʼanowik che ri e winaq kech jalajoj taq tinamit xechʼojin pa ri Armagedón? Jesús kukʼaq bʼi ri Satanás xuqujeʼ ri udemonios pa jun qʼequʼmalaj jul, chilaʼ ketzʼapix wi mil junabʼ (Apoc. 20:1-3).

16. a) ¿Jas rajawaxik kqabʼano rech kqakʼutu che qetaʼm uwach ri Dios? b) ¿Jas kkikʼulmaj pa Armagedón ri ketaʼm uwach ri Jehová?

¹⁶ Weneʼ kʼi chi tiempo o majaʼ naj oj kʼo pa ri utinamit ri Jehová, rech kojkolotaj kan pa ri Armagedón, rajawaxik kqakʼutu che qetaʼm uwach ri Dios xuqujeʼ che kqanimaj «ri utzij ri Qajaw Jesús re kolobʼal ibʼ» (2 Tes. 1:7-9). Qetaʼm uwach ri Dios are chiʼ qetaʼm ri utz krilo xuqujeʼ ri utz taj, xuqujeʼ ri e utaqanik. Xuqujeʼ kqakʼutu che qetaʼm uwach are chiʼ kqaloqʼoqʼej, kqanimaj xuqujeʼ xaq xiw are kqaya uqʼij (1 Juan 2:3-5; 5:3). Are chiʼ jun winaq kukʼutu che retaʼm uwach ri Dios, xuqujeʼ areʼ ketaʼmax uwach rumal ri Dios, wariʼ kubʼano che kkolotaj kan pa ri Armagedón (1 Cor. 8:3). ¿Jasche? Rumal che kqaj chuwach ri Dios.

17. ¿Jas kraj kubʼij unimaxik «ri utzij ri Qajaw Jesús re kolobʼal ibʼ»?

¹⁷ «Ri utzij ri Qajaw Jesús re kolobʼal ibʼ» kchʼaw chrij ronojel ri xukʼut kanoq che kqariq pa ri Biblia. Kqanimaj are chiʼ kqabʼan pa qakʼaslemal  ri kubʼij. Wariʼ kraj kubʼij che are nabʼe kqapatanij ri Jehová chuwach apachike jastaq, nim kqil wi ri e sukʼ taq utaqanik xuqujeʼ kqaya ubʼixik chrij ri uQʼatbʼal tzij (Mat. 6:33; 24:14). Xuqujeʼ kraj kubʼij che keqatoʼ ri e rachalal ri Cristo che e chaʼom are chiʼ kkibʼan ri kichak che nim ubʼanik (Mat. 25:31-40).

18. ¿Jas kkibʼan riʼ ri e chaʼom rumal ri Cristo che uyaʼik tewchibʼal chke ri nikʼaj chi chij rumal ri utzilal che xkibʼan chke?

¹⁸ Xa jubʼiqʼ chi kraj, ri upatanelabʼ ri Dios che e chaʼom kkiya tewchibʼal chke ri nikʼaj chi chij rumal ri utzilal che xkibʼan chke (Juan 10:16). ¿Jas kkibʼan che kitewchixik? Are chiʼ majaʼ kumaj ri Armagedón, konojel ri 144.000 kiriqom chi riʼ ri kikʼaslemal che kʼo ta ukʼisik pa ri kaj. Kekʼojiʼ chkixoʼl ri rajchʼojabʼ ri Dios pa ri kaj che kkisachisaj uwach ri Gog xuqujeʼ kekichajij ri e «kʼiʼalaj winaq», che kkimachʼ kibʼ junam kukʼ e chij (Apoc. 2:26, 27; 7:9, 10). Qastzij riʼ che jun nimalaj tewchibʼal chke ri kʼiʼalaj winaq xekitoʼ ri e chaʼom rumal ri Jehová are chiʼ e kʼo na cho ri uwach Ulew.

19, 20. Apastaneʼ ri kʼax kqariqo, ¿jas kojutoʼ rech kqaya ta kan ukʼutik sukʼilal más na chiʼ naqaj chi kʼo wi ri Armagedón?

¹⁹ Pa we kʼisbʼal taq qʼij riʼ, oj kʼi ri upatanelabʼ ri Jehová kqariq kʼax. Are kʼu kojkunik kqachʼijo xuqujeʼ kojkikotik (Sant. 1:2-4). Jun jastaq che kojutoʼ are kqaya ta kan ubʼanik qachʼawem rukʼ ronojel qanimaʼ (Luc. 21:36). Xuqujeʼ, rajawaxik che ronojel qʼij kqatijoj qibʼ che ri Biblia xuqujeʼ kojchoman chrij ri kqetaʼmaj, junam rukʼ ri profecías che kʼo ubʼanik rukʼ ri tajin kkʼulmataj kimik (Sal. 77:12). We kqabʼan wariʼ xuqujeʼ kqakoj ronojel qachuqʼabʼ che utzijoxik ri utzij ri Dios, kubʼan más ko ri qakojonik xuqujeʼ ri qeyebʼal.

²⁰ Chojchoman chrij ri kikotemal kqanaʼo are chiʼ sachisam chi uwach ri Nimalaj Babilonia xuqujeʼ chi qʼaxinaq chi ri Armagedón. Ri más nim ubʼanik are ri kikotemal kqanaʼo chiʼ chʼajchʼojisam chi ri ubʼiʼ ri Dios xuqujeʼ chiʼ kumaj uqʼatik tzij pa uwiʼ ronojel ri uwach Ulew (Ezeq. 38:23). Qastzij che, are chiʼ kpe ri Armagedón are utzalaj taq tzij riʼ chke ri ketaʼm uwach ri Dios, ri keniman che ri uKʼojol xuqujeʼ ri keʼux sukʼ kʼa pa ri kʼisbʼal (Mat. 24:13).