1. ¿Jasche kqanaʼ kikotemal y nim kqil wi che oj testigos rech Jehová?

¡SIBʼALAJ kojkikotik rumal che oj testigos rech Jehová! Kqakʼutu che oj uTestigos rumal che qukʼam ri ubʼiʼ y kqakʼut chkiwach ri e winaq. Kuya kikotemal chqe are chiʼ kqatoʼ jun winaq che kraj «kkʼojiʼ junalik [u]kʼaslemal», rumal laʼ kux testigo rech Jehová (Hech. 13:48). Kqanaʼ junam rukʼ ri Jesús che «sibʼalaj xkikot [...] rumal ri ruxlabʼal ri Dios» are chiʼ ri utijoxelabʼ xetzalij lo che utzijoxik ri utzij ri Dios y xkibʼij che ri utz taq jastaq xkikʼulmaj (Luc. 10:1, 17, 21).

2. ¿Jas kqabʼan che ukʼutik che nim kqil utzijoxik ri utzij ri Dios?

² Ri utzijoxik ri utzij ri Dios are jun jastaq che nim ubʼanik chqawach. Ri apóstol Pablo xuya wajun pixabʼ che ri Timoteo: «Chawilaʼ awibʼ, xuqujeʼ chawilij ri atijonik, mayaʼ kanoq». Xuqujeʼ xutzʼaqatisaj ubʼixik: «We kabʼan kʼu waʼ, kakol na awibʼ, xuqujeʼ keʼakol ri katkitatabʼej» (1 Tim. 4:16). Waʼ taq tzij kukʼut chqawach che nim ubʼanik ri chak tajin kqabʼano, rumal che kʼo ubʼanik rukʼ ri kikʼaslemal ri e winaq. Kqilij jas ubʼanik ri qabʼantajik rumal che ri uQʼatbʼal tzij ri Dios kuqʼat tzij pa qawiʼ. Amaqʼel kqaj kqaya uqʼij ri Jehová rumal ri qabʼantajik y rukʼ wariʼ qas kqakojo che kojkojon chrij ri utzalaj taq jastaq che kqaya ubʼixik chke ri e winaq (Filip. 1:27). Xuqujeʼ, qas kqil ri kqabʼan che kitijoxik ri winaq, rumal laʼ kqatijoj qibʼ y kqataʼ tobʼanik che ri Jehová.

3. ¿Jas weneʼ kkibʼan ri winaq are chiʼ kqatzijoj ri utzij ri Dios chke y jas jun kʼutbʼal kkʼutuw wariʼ?

³ Xuqujeʼ, paneʼ sibʼalaj kqakoj qachuqʼabʼ che utzijoxik ri utzij ri Dios, ri e winaq weneʼ kkaj taj kojkitatabʼej. Chojchoman chrij ri ukʼutbʼal ri qachalal Georg Lindal, che utukel xutzijoj ri utzij ri Dios pa ri tinamit Islandia, xumaj lo pa ri junabʼ 1929 kʼa pa ri junabʼ 1947. Sibʼalaj kʼi ri wuj xuya kan chke ri e winaq, are kʼu kʼo ta jun xux Testigo. Ri qachalal  xubʼij: «Jujun chke ri e winaq qas xkibʼan kikʼulel chwe y e nikʼaj chik paneʼ in kikʼulel taj are kʼu kʼo ta upatan chkiwach ri xintzijoj». Are chiʼ xqʼax ri tiempo xeʼopan jujun misioneros re Galaad che utoʼik ri qachalal che utzijoxik ri utzalaj taq tzij, are kʼu ri e winaq xuqujeʼ xkitatabʼej taj. Tekʼuriʼ, are chiʼ xqʼax nueve junabʼ jujun taq winaq utz xkitaʼ ri utzij ri Dios, xkijach ri kikʼaslemal che ri Jehová y xkibʼan kiqasanjaʼ. *

4. ¿Jas weneʼ kqanaʼo are chiʼ ri winaq kkaj taj kkitatabʼej ri utzij ri Dios?

⁴ Kojbʼisonik are chiʼ ri e winaq kkitatabʼej ta ri kqabʼij chke. Weneʼ kqakʼulmaj ri xukʼulmaj ri Pablo, xubʼij: «Ronojel qʼij kʼo nimalaj nubʼis, sibʼalaj kqʼoxow ri wanimaʼ». ¿Jasche xubʼij wariʼ? Rumal che e kʼi judíos xkikoj taj che ri Jesús are ri Mesías (Rom. 9:1-3). ¿E kʼu we kqilo che rajawaxik kqaya kan uyaʼik etaʼmanik che jun winaq rumal che kkʼiy ta pa ri ukojonik paneʼ sibʼalaj qayaʼom tobʼanik che? O ¿jas kqabʼano we kʼo ta jun winaq qayaʼom tobʼanik che rech kubʼan uqasanjaʼ? ¿La utz kqachomaj che xa utz ta kqabʼan che ri qachak y che ri Jehová tajin ta kojutewchij? Pa wajun kʼutunem riʼ kqatzalij na uwach kebʼ chomanik: ¿jas kqabʼan che retaʼmaxik we utz tajin kel ri qachak? y ¿jas kqaj kqariqo are chiʼ kqatzijoj ri utzij ri Dios?

5. ¿Jasche ri kqabʼan che upatanixik ri Jehová amaqʼel taj utz kel chqawach?

⁵ Are chiʼ ri Biblia kchʼaw chrij ri winaq ri kubʼan ri kraj ri Dios, kubʼij: «¡Ronojel ri kubʼano, utz kelik!» (Sal. 1:3). Are kʼu, wariʼ kraj taj kubʼij che ronojel ri kqaj kqabʼan che upatanixik ri Jehová utz kel chqawach. Rumal che qonojel xa oj ajmakibʼ, ri qakʼaslemal «nojinaq kʼu che chʼujirisabʼal» o kʼaxkʼolil (Job 14:1). Xuqujeʼ weneʼ ri e qakʼulel kojkiqʼatej che utzijoxik ri utzij ri Dios (1 Cor. 16:9; 1 Tes. 2:18). Rumal laʼ, ¿jas kubʼan ri Jehová che ukʼutik chqawach che utz kril ri qachak? Chqilampeʼ jujun pixabʼ re ri Biblia che kojutoʼ che utzalixik uwach wajun pregunta.

6. ¿Jas kubʼan ri Jehová che ukʼutik chqawach che utz kril ri qachak?

⁶ Ri Jehová are kril ri chuqʼabʼ kqakojo y ri jastaq che kqachʼijo. Chuwach areʼ sibʼalaj nim ubʼanik ri qachak we aninaq y rukʼ loqʼoqʼebʼal kqabʼano, apastaneʼ ri kkibʼij ri e winaq. Ri Pablo xutzʼibʼaj: «Sukʼ ri Dios, man ksach ta pa ujolom ri chak ri ibʼanom chi xiloqʼoqʼej ri ubʼiʼ are taq xeʼipatanij ri kojonelabʼ, xuqujeʼ ne kʼa kamik» (Heb. 6:10). Ksach ta che ri Jehová ri chuqʼabʼ xqakojo y ri xqabʼan rukʼ loqʼoqʼebʼal, paneʼ kʼo ta jun winaq xkʼiy pa ri ukojonik. Rumal laʼ, kojkunik kqabʼan qe che ri tzij xutzʼibʼaj ri Pablo chke ri cristianos re Corinto: «Ri ichak pa ri Ajawaxel man  xaq ta loqʼ» (1 Cor. 15:58). Y wariʼ qastzij paneʼ kʼo ta jun winaq kqariqo che kʼo utz ranimaʼ.

7. ¿Jas kqetaʼmaj chrij ri xubʼij ri Pablo chrij ri uchak?

⁷ Ri apóstol Pablo are jun utzalaj tzijol re ri utzij ri Dios y xtobʼan che kibʼanik congregaciones pa kʼi tinamit. Are kʼu, are chiʼ e jujun cristianos xkichomaj che más nim kibʼanik chuwach areʼ y xkibʼij che utz ta kubʼan che kitijoxik ri winaq, ri Pablo are ta xchʼaw chrij e jampaʼ winaq e utoʼm rech xkibʼan kiqasanjaʼ. Xaneʼ, xaq xiw wariʼ xubʼij: «Sibʼalaj nubʼanom [...] taq chak chkiwach ri e areʼ» (2 Cor. 11:23). Chqesaj uwach ri Pablo y chnaʼtaj chqe che ri más nim ubʼanik chuwach ri Jehová are ri chuqʼabʼ kqakojo y ri jastaq che kqachʼijo.

8. ¿Jas rajawaxik knaʼtaj chqe are chiʼ kqatzijoj ri utzij ri Dios?

⁸ Ri qachak kuya kikotemal che ri Jehová. Jumul, ri Jesús xeʼutaq bʼi 70 chke ri utijoxelabʼ rech kekitzijoj ri utzij ri Dios. Are chiʼ xkitanabʼaʼ, ri Biblia kubʼij che «xetzelej uloq [...] rukʼ kikotemal». ¿Jasche sibʼalaj xekikotik? E areʼ xkibʼij: «Xuqujeʼ ne ri itzel taq uxlabʼal kkiya kibʼ pa taqik chqe pa ri bʼiʼ la». Are kʼu ri Jesús xeʼupixbʼej rukʼ waʼ taq tzij: «Mixkikot rumal waʼ, chi ri uxlabʼal kkiya kibʼ pa taqik chiwe. Xaneʼ chixkikotoq chi ri ibʼiʼ e tzʼibʼam chilaʼ chikaj» (Luc. 10:17-20). Ri Jesús retaʼm che amaqʼel taj kekun che ubʼanik mayibʼal taq jastaq are chiʼ kkitzijoj ri utzij ri Dios. Xuqujeʼ oj, qetaʼm taj jampaʼ chke riʼ ri e winaq che xkitaʼ ri xkibʼij ri utijoxelabʼ ri Jesús xeʼux cristianos. Xajwatajik che ri tijoxelabʼ xekikotik, are kʼu xa ta rumal che xtatabʼex ri xkitzijoj xaneʼ rumal che ri Jehová kkikotik rumal ri chuqʼabʼ xkikoj che ubʼanik ri kichak.

9. Junam rukʼ ri kubʼij Gálatas 6:7-9, ¿jas tewchibʼal kqariqo we kqaya ta kan utzijoxik ri utzij ri Dios?

⁹ We kqaya ta kan utzijoxik ri utzij ri Dios, kqariq ri kʼaslemal kʼo ta ukʼisik. Are chiʼ kqakoj qachuqʼabʼ che utikik ri ijaʼ re ri qastzij pa kanimaʼ ri e winaq, xuqujeʼ tajin kqatik «ri kraj ri uxlabʼixel», rumal che tajin kqaya bʼe che ri uxlabʼixel kchakun pa qakʼaslemal. «We man kujtuqarik», ri Jehová kutzujuj jun kʼaslemal kʼo ta ukʼisik chqe, paneʼ kojkun ta che utoʼik jun winaq rech kubʼan uqasanjaʼ (chasikʼij uwach Gálatas 6:7-9).

10. ¿Jas kbʼanowik che jun winaq kutatabʼej o kutatabʼej ta ri utzij ri Dios?

¹⁰ Ri kkibʼan ri winaq che utzalixik uwach ri kqakʼut chkiwach, kukʼut ri qas kʼo pa kanimaʼ. Ri Jesús xuya ubʼixik chrij wariʼ pa ri kʼutbʼal re ri achi che ktikonijik. Pa ri kʼutbʼal, ri achi xutik ri ijaʼ pa jalajoj taq uwach ulew, are kʼu xaq xiw xuya uwach ri ijaʼ che xtzaq pa ri utzalaj ulew (Luc. 8:5-8). Ri Jesús xubʼij che ri jalajoj taq uwach ulew kraj kubʼij ri kanimaʼ ri e winaq che jalajoj kkibʼan che utzalixik uwach ri utzij ri Dios (Luc. 8:11-15). Junam rukʼ ri achi che ktikonijik, oj kojkun taj kqabʼano che kuya uwach ri qachak, rumal che qetaʼm taj jas ubʼanik ri kanimaʼ ri e winaq che kojkitatabʼej. Ri qachak are che kqaya ta kan utikik ri qastzij re ri uQʼatbʼal tzij ri Dios. Junam rukʼ ri xubʼij ri apóstol Pablo, «chkijujunal kʼut kkikʼam na ri tojbʼal ke, jas ri chak ri kibʼanom», are ta rumal ri winaq che xekunik xekitoʼo (1 Cor. 3:8).

11. ¿Jasche kqabʼij che utz xel ri uchak ri Noé, ri «tzijol re ri sukʼil»? (Chawilaʼ ri wachbʼal re ri uwach ri wuj).

¹¹ Pa kʼi taq junabʼ e kʼi upatanelabʼ ri Dios kitzijom ri utzij ri Dios chke e kʼi winaq che kkaj taj kkitatabʼej. Jun kʼutbʼal re,  ri Noé xux «tzijol re ri sukʼil» weneʼ pa kʼi taq junabʼ (2 Ped. 2:5). Qastzij riʼ che ri Noé xraj che ri winaq kkitatabʼej ri kutzijoj, are kʼu ri Jehová xubʼij taj che kkʼulmataj wariʼ. Xaneʼ are chiʼ xubʼij che ri Noé jas kubʼan che ubʼanik ri nimalaj jukubʼ, xubʼij che: «Keʼok na ri e akʼojol pa ri jukubʼ, ri awixoqil, ri e awalibʼ xuqujeʼ ri at» (Gén. 6:18). Y, rumal ri unimal ri jukubʼ weneʼ ri Noé xuchʼobʼo che e kʼi ta winaq kkitatabʼej ri utzij ri Dios (Gén. 6:15). Y je xkʼulmatajik. Kʼo ta jun winaq pa ri uqʼij che xutatabʼej ri utzij ri Dios (Gén. 7:7). ¿La xuchomaj ri Jehová che ri Noé utz ta xubʼan che ri uchak? Xuchomaj taj. Chuwach ri Jehová utz xel ri uchak ri Noé rumal che xubʼan ronojel ri xbʼix che (Gén. 6:22).

12. ¿Jas xubʼan ri Jeremías paneʼ ri e winaq xkaj taj xkitatabʼej?

¹² Ri qʼaxal tzij Jeremías xuqujeʼ pa kʼi taq junabʼ xutzijoj ri utzij ri Dios y ri winaq xkaj taj xkitaʼ, rumal laʼ xbʼisonik (Jer. 20:8, 9). Are kʼu xubʼan ta kebʼ ukʼuʼx. ¿Jas xyaʼow tobʼanik che rech are ta xutaʼ ri xkibʼij ri winaq y xuya ta kan utzijoxik ri utzij ri Dios? Xchoman chrij kebʼ jastaq nim ubʼanik. Nabʼe, che ri utzijoxik ri utzij ri Dios keʼutoʼ ri e winaq. ¿Jasche? Rumal che keʼutoʼ che uriqik «jun eyebʼal kʼuxaj ri kpe na» (Jer. 29:11). Y ukabʼ, xchaʼik rech kuqʼalajisaj ri ubʼiʼ ri Jehová (Jer. 15:16). Oj xuqujeʼ kojkunik kqaya ubʼixik utz taq tzij chke ri winaq che jetaneʼ e kʼo pa qʼequʼm y kqaqʼalajisaj ri ubʼiʼ ri Jehová rumal che oj uTestigos. Are chiʼ kojchoman chrij waʼ kebʼ jastaq nim ubʼanik, kqaya ta kan utzijoxik ri utzij ri Dios paneʼ ri e winaq kkaj taj kojkitatabʼej.

13. ¿Jas kukʼut chqawach ri bʼantajik che xubʼij ri Jesús pa Marcos 4:26-29?

¹³ Rajawaxik nim tiempo rech jun winaq kkʼiy pa ri ukojonik. Ri Jesús xuya ubʼixik wariʼ pa jun bʼantajik re ri achi che ktikonijik y kwarik (chasikʼij uwach Marcos 4:26-29). Ri achi riʼ xrilo che ri xutiko nojimal chi nojimal xuya uwach y xkun taj kʼo xubʼano rech aninaq kkʼiyik. Xa junam ri kkʼulmataj rukʼ jun tijoxel, kajwataj nim tiempo rech kqilo che kukoj pa ri ukʼaslemal ri tajin kretaʼmaj, rumal che nojimal chi nojimal kkʼiy pa ri ukojonik. Jun winaq ktikonijik kkun taj kʼo kubʼano rech aninaq kkʼiy ri utikoʼn, oj xuqujeʼ kojkun taj kqabʼano che jun tijoxel aninaq kkʼiy pa ri ukojonik. Rumal laʼ makʼistaj qakʼuʼx we kqilo che nojimal chi nojimal kkʼiy pa ri ukojonik. Kajwataj qapaciencia are chiʼ keqatoʼ ri winaq (Sant. 5:7, 8).

14. ¿Jas kʼutbʼal kkʼutuwik che weneʼ rajawaxik kqʼax nim tiempo rech ri winaq kkitaʼ ri utzij ri Dios?

¹⁴ Pa jujun taq tinamit ktzijox ri utzij ri Dios pa kʼi taq junabʼ y kʼo ta jun kraj kutatabʼej. Chqilampeʼ ri xkikʼulmaj kebʼ qachalal ixoqibʼ, Gladys y Ruby Allen kachalal kibʼ che keʼel Canadá. Pa ri junabʼ 1959, xeʼux precursoras regulares pa jun chke ri tinamit re Quebec. * Ri e winaq re ri tinamit riʼ kkixeʼj kibʼ chke ri e kʼamal bʼe re ri Iglesia católica y chuwach ri kkichomaj ri winaq, rumal laʼ xekitatabʼej ta ri e kebʼ qachalal riʼ. Ri qachalal Gladys kubʼij: «Pa kebʼ junabʼ, ocho horas pa jun qʼij kqatzijoj ri utzij ri Dios cho kachoch ri e winaq y kʼo ta jun xraj xojutatabʼej. Ri e winaq xaq xiw kekaʼy lo pa ri ventana re ri uchiʼ ri kachoch y kkitzʼapij loq. Are kʼu xubʼan ta kebʼ qakʼuʼx». Are chiʼ xqʼax ri tiempo, ri winaq xkikʼex ri kibʼantajik y wariʼ xubʼano che xkita ri utzij ri Dios. Kimik, kʼo oxibʼ congregaciones pa wajun tinamit riʼ (Is. 60:22).

15. ¿Jas kukʼut chqawach ri kubʼij 1 Corintios 3:6, 7 chrij ri kbʼan che kitoʼik ri e winaq rech kekʼiy pa ri kikojonik?

 ¹⁵ Ubʼanik tijoxelabʼ are jun chak che xaq ta qatukel kqabʼano. Kbʼixik che kajwataj jun congregación rech ktoʼ jun winaq rech kubʼan uqasanjaʼ (chasikʼij uwach 1 Corintios 3:6, 7). Jun kʼutbʼal, weneʼ jun qachalal kuya jun revista o jun tratado che jun winaq che kraj kretaʼmaj más chrij ri Biblia. Tekʼuriʼ ri qachalal krilo che kkun taj ktzalij pa ri hora che kkun ri winaq, kutaʼ tobʼanik che jun chi qachalal. Ri jun chi qachalal kumaj jun etaʼmanik re ri Biblia rukʼ ri winaq y keʼukʼam bʼi jalajoj taq qachalal che uyaʼik ri etaʼmanik. Y ri e qachalal che kebʼe rukʼ kkibʼij utz taq tzij che ri winaq y kkitoʼ rech qas kopan ri utzij ri Dios pa ranimaʼ. Wariʼ kjunamataj rukʼ ri xubʼij ri Jesús, che ri ktzijon nabʼe mul ri utzij ri Dios y ri ksolin ri winaq junam kekikotik (Juan 4:35-38).

16. Paneʼ kʼo ta chi achuqʼabʼ o kʼo jun yabʼil chawe, ¿jasche katkunik katkikot rukʼ ri kabʼan che utzijoxik ri utzij ri Dios?

¹⁶ ¿E kʼu we katkun ta chik katzijoj ri utzij ri Dios rumal che kʼo ta chi achuqʼabʼ o rumal jun yabʼil? Paneʼ je wariʼ, katkunik katkikot rukʼ ri katkun che ubʼanik. Chqilampeʼ ri xkʼulmataj rukʼ ri David y ri e rachiʼl are chiʼ xekichʼak ri amalequitas y xekikʼamaʼ lo ri kifamilias y ri jastaq ke kukʼ. Doscientos achijabʼ sibʼalaj e kosinaq rumal laʼ xebʼe ta pa ri chʼoj, xaneʼ xekanaj che uchajixik ri jastaq. Are chiʼ xetzalij lo pa ri chʼoj, ri David xubʼij che junam kbʼan che ujachik ri jastaq chkiwach (1 Sam. 30:21-25). Kimik junam kkʼulmataj rukʼ ri kqabʼan che utzijoxik ri utzij ri Dios pa ronojel uwach Ulew. Qonojel ri kqakoj qachuqʼabʼ che upatanixik ri Jehová, sibʼalaj kojkikotik are chiʼ kok jun winaq pa ri utinamit ri Jehová y kuriq ri kʼaslemal kʼo ta ukʼisik.

17. ¿Jasche kojmaltyoxin che ri Jehová?

¹⁷ Sibʼalaj kqamaltyoxij che ri Jehová rumal che nim kril wi ri chak kqabʼano. Paneʼ kʼo ta jun winaq kojkunik kqatoʼo rech kkʼiy pa ri ukojonik, ri Jehová are kril ri chuqʼabʼ y ri loqʼoqʼebʼal che kqakoj che ri qachak, rumal laʼ kojutewchij. Xuqujeʼ kukʼut chqawach che kojkunik kojkikot che utzijoxik ri utzij ri Dios we kʼo jun winaq kqatoʼ o kʼo taj (Juan 14:12). Qastzij che ri Dios kojutewchij na we kubʼan ta kebʼ qakʼuʼx.