WE TA xatbʼe pa ri alaj isla re Sangir Besar (Indonesia) ojer kanoq, weneʼ xachʼobʼ kiwach riʼ ri oxibʼ qachalal pa ri playa. Xetaʼmax kiwach rumal che kkitzijoj ri utzij ri Dios y kekitoʼ ri winaq, are kʼu are chiʼ e kʼo pa ri playa are ta waʼ ri xkibʼano. ¿Jas riʼ ri xkibʼan chilaʼ?

Nabʼe, keʼok chupam ri mar y kkitzukuj abʼaj che kjunamataj ri unimal rukʼ jun pelota y kkesaj lo chuchiʼ ri mar. Tekʼuriʼ ketʼuyiʼk y kkipaxij ri abʼaj rukʼ jun martillo. Tekʼuriʼ kkikʼol bʼi pa taq plásticos, kkikʼam bʼik y keʼaqʼan bʼi cho ri gradas rech keʼopan cho ri kachoch. Kkikʼol ri abʼaj pa nimaʼq taq costal. Tekʼuriʼ keqʼax ri camiones rech kkikʼam bʼi ri abʼaj y kekoj che kisukʼumaxik ri carreteras.

Jun chke ri qachalal ixoq ubʼiʼ Hulda. Ri areʼ kkunik kkʼojiʼ más tiempo che utzukuxik abʼaj pa ri playa chkiwach ri nikʼaj chik. Ronojel ri pwaq che kuchʼako kukoj che kitoʼik ri ufamilia. Are kʼu xuchomaj chik che ri pwaq kuchʼako kukoj che uloqʼik jun utablet rech kkunik kubʼan descargar ri aplicación JW Library^®. Hulda retaʼm che ri videos y ri información che kʼo pa ri aplicación ktobʼan che rech más utz kubʼan che utzijoxik ri utzij ri Dios y rech kuchʼobʼ más ri kubʼij ri Biblia.

Pa jun mes y medio, ronojel taq aqʼabʼil kchakun kebʼ horas. Rukʼ ri abʼaj che xupaxij xkun che unojisaxik pa nikʼaj che jun camión. ¡Rukʼ wariʼ xkunik xuloqʼ ri utablet!

Hulda kubʼij: «Qastzij riʼ che sibʼalaj xinkosik y xqʼaxow ri nucuerpo che upaxixik ri abʼaj. Y xinnaʼ ta chi ri qʼoxom, are chiʼ xinkun che uloqʼik ri nutablet rumal che kinutoʼo rech utz kinbʼan che utzijoxik ri utzij ri Dios y kintijoj wibʼ che ri e riqbʼal ibʼ». Xuqujeʼ xubʼij che ri utablet xtobʼan che are chiʼ xumajij ri pandemia, rumal che ronojel ri riqbʼal ibʼ pa zoom xbʼan wi. ¡Sibʼalaj kojkikotik che ri qachalal Hulda xkun che uloqʼik ri utablet!