1. ¿Jas preguntas weneʼ kojchoman chrij?

ARE chiʼ katchoman chrij ri jastaq che kkʼulmataj na, junam rukʼ ri usachisaxik uwach ri qastzij taj kojonem, are chiʼ ri Gog re Magog kubʼan kʼax chqe y chiʼ kpe ri Armagedón, weneʼ kaxiʼj awibʼ. Jujun taq mul weneʼ kachomaj, ¿la kinux sukʼ are chiʼ kkʼulmataj wariʼ? We at chomanaq chrij wariʼ, utz riʼ we kanikʼoj ri xubʼij ri Jesús, che are ri texto temático re wajun kʼutunem riʼ. Ri Jesús xubʼij chke ri utijoxelabʼ: «Masach ri ikʼuʼx. Chixkojon[oq]» (Juan 14:1). We ko ri qakojonik, kojkunik kqachʼij ri kʼax che kqariq pa ri petinaq.

2. ¿Jas kqabʼan che ukowirisaxik ri qakojonik y jas kqil na pa wajun kʼutunem riʼ?

² Jun ubʼanik rech kqakowirisaj ri qakojonik rech kqachʼij ri kʼax pa ri petinaq, are ri kqabʼan chuwach ri kʼax che kqariq kimik. Rukʼ wariʼ kqilo jas jastaq rajawaxik kqasukʼumaj rech ko ri qakojonik. Are chiʼ kqachʼij jun kʼax kkowir más ri qakojonik y wariʼ kojutoʼ rech kqachʼij ri kʼax pa ri petinaq. Pa wajun kʼutunem riʼ kqil na kajibʼ jastaq che xukʼutu che ri utijoxelabʼ ri Jesús xajwataj más kikojonik. Xuqujeʼ kqil na jas kqabʼan che uchʼijik ri kʼax kimik junam kukʼ e areʼ y jas kojutoʼ wi wariʼ pa ri petinaq.

3. Junam rukʼ ri xubʼij ri Jesús pa Mateo 6:30, 33, ¿jas qas ubʼanik ri kojonik kajwataj chqe?

³ Qastzij riʼ che ri achi che kukʼam bʼe pa ri ufamilia kraj kuya ri kajwataj chke, kiwa, kachoch xuqujeʼ ri katzʼyaq. Pa ri tiempo che oj kʼo wi kʼax ubʼanik wariʼ. Kʼo qachalal che kʼo ta chi kichak y paneʼ kkikoj kichuqʼabʼ che uriqik jun chik, kkiriq taj. E nikʼaj chik kixutum jun chak rumal  che utz taj kubʼan jun cristiano. Pa ronojel ri taq bʼantajik riʼ, kajwataj nim kojonik chqe rech kqakojo che ri Jehová kuya ri kajwataj chqe. Ri Jesús xuya ubʼixik wariʼ chke ri utijoxelabʼ pa ri Sermón del Monte (chasikʼij uwach Mateo 6:30, 33). We qas kqakojo che Jehová kuya ri kajwataj chqe, kubʼano che are más kojchoman chrij ri uQʼatbʼal tzij. Y are chiʼ kqil ri kubʼan che uyaʼik ri kajwataj chqe, kojqebʼ más rukʼ y ri qakojonik kubʼan más ko.

4, 5. ¿Jas yaʼowinaq tobʼanik che jun familia rech kkibʼisoj ta más ri kajwataj chke?

⁴ Chqilaʼ ri xkikʼulmaj ri familia Castro, che e kʼo pa ri tinamit Venezuela. E areʼ kinaʼom ri utobʼanik ri Jehová rumal che kebʼison ta chrij ri jastaq che kajwataj chke. Ri kichak wajun familia riʼ are che kkitik uwach ri ulew rech kʼo ronojel ri kajwataj chke. Are kʼu, jun qʼij, xeʼopan jujun taq pandilleros y xkibʼij chke che keʼel bʼi pa ri kachoch. Ri tatixel re ri familia, Miguel ubʼiʼ, xubʼij che xaq xiw kkitik chi uwach jun chʼaqap ulew che xyaʼ chke pa qajomal rech kʼo ri kajwataj chke: «Ri nabʼe kinbʼano are chiʼ ksaqarik are che kintaʼ che ri Jehová che kuya ri kajwataj chqe pa ri qʼij riʼ». Sibʼalaj kʼax xkiriq ri familia Castro, are kʼu ri e areʼ kkikojo che ri loqʼalaj qaTat Jehová kuya ri kajwataj chke. Rumal laʼ amaqʼel kebʼe pa ri riqbʼal ibʼ xuqujeʼ kkitzijoj ri utzij ri Dios. Are nabʼe kkikoj ri uQʼatbʼal tzij ri Dios pa ri kikʼaslemal y ri Jehová keʼuchajij.

⁵ Pa ronojel ri tiempo riʼ, ri qachalal Miguel xuqujeʼ ri rixoqil Yurai, are kechoman chrij ri ubʼanom ri Jehová che kichajixik. Jujun taq mul ri Jehová e ukojom ri qachalal che uyaʼik ri kajwataj chke o che utoʼik ri qachalal Miguel rech kuriq ri uchak. Xuqujeʼ ukojom ri labores de socorro che uyaʼik ri kajwataj chke. Ri Jehová e uwonobʼam ta kanoq. Rumal laʼ ri kikojonik wajun familia riʼ xkowir más. Are chiʼ qas xkil ri xubʼan ri Jehová che kitoʼik, ri nabʼeʼal chke ri kalkʼwal, al Yoselin ubʼiʼ, kubʼij: «Sibʼalaj xopan pa wanimaʼ ri xubʼan ri Jehová che qachajixik. Wariʼ kinutoʼ rech kinwil ri Jehová junam che jun wachiʼl». Xuqujeʼ kubʼij: «Ri kʼax che qariqom pa ri qafamilia kojutoʼo rech kqachʼij ri kʼax che kqariq pa ri petinaq».

6. We tajin kariq kʼax che uriqik ri pwaq, ¿jas kabʼan che ukowirisaxik ri akojonik?

⁶ ¿La tajin kariq kʼax che uriqik ri pwaq? We jeʼ wariʼ, sibʼalaj kʼax riʼ ariqom. Are kʼu, paneʼ jeʼ wariʼ akʼulmam katkunik kakoj a tiempo rech kakowirisaj ri akojonik. Chabʼanaʼ achʼawem che ri Jehová, chasikʼij ri xubʼij ri Jesús pa Mateo 6:25-34 y chatchoman chrij. Chatchoman chrij ri kikʼutbʼal ri winaq che Jehová e uchajim rumal che are kkikoj nabʼe pa kikʼaslemal ri uQʼatbʼal tzij (1 Cor. 15:58). Wariʼ  kukowirisaj ri akojonik che ri Jehová xuqujeʼ katutoʼ at. Areʼ retaʼm ri kajwataj chawe y retaʼm jas kubʼan che uyaʼik. Are chiʼ kawil che ri Jehová katutoʼ, kkowir ri akojonik y katkunik kachʼij ri kʼax che kariq pa ri petinaq (Hab. 3:17, 18).

7. Junam rukʼ ri kubʼij Mateo 8:23-26, ¿jas xubʼan ri kaqiqʼ jabʼ che ukʼutik we ko ri kikojonik ri utijoxelabʼ ri Jesús?

⁷ Jumul are chiʼ ri Jesús xuqujeʼ ri utijoxelabʼ e bʼenaq pa jun barco, xpe jun nimalaj kaqiqʼ jabʼ. Rukʼ ri xkiriqo Jesús xubʼij chke che kajwataj más kikojonik (chasikʼij uwach Mateo 8:23-26). Sibʼalaj nim ri kaqiqʼ jabʼ che ri joron xok pa ri barco, are kʼu ri Jesús kaminaq che waram. Sibʼalaj xkixibʼij kibʼ ri utijoxelabʼ ri Jesús rumal laʼ aninaq xkikʼasuj rech keʼutoʼ. Rukʼ utz taq tzij ri Jesús xubʼij chke: «¿Jasche kixeʼj iwibʼ, ri ix xa jubʼiqʼ ri ikojonik?». Ri utijoxelabʼ rajawaxik kketaʼmaj che ri Jehová kkunik kuchajij ri Jesús y ri e areʼ. ¿Jas kqetaʼmaj chrij wariʼ? Che we ko ri qakojonik kojkunik kqachʼij ri kʼax, paneʼ qastzij jun kaqiqʼ jabʼ o nikʼaj chi jastaq.

8, 9. ¿Jas jastaq xkojow pa kʼax ri ukojonik ri al Anel, y jas xtoʼwik?

⁸ Chqilaʼ che ri ukojonik jun qachalal re Puerto Rico al Anel ubʼiʼ, xubʼan más ko are chiʼ xqʼax pa jun kʼax. Ri huracán María, xubʼan kʼax pa ri tinamit re Puerto Rico pa ri junabʼ 2017, ri al Anel kʼo ta chi rachoch y ri uchak. Ri qachalal xubʼij: «Pa we taq qʼij riʼ, sibʼalaj xinxibʼij wibʼ. Are kʼu xinbʼan nuchʼawem che ri Jehová rech kinutoʼo».

⁹ Ri qachalal Anel xubʼij che kʼo chi jun jastaq xtoʼwik: are che xnimanik. Xubʼij: «Are chiʼ xinbʼan ronojel ri xubʼij ri utinamit ri Jehová xinutoʼ rech xinxibʼij ta más wibʼ. Ri qachalal xkiya nuchuqʼabʼ xuqujeʼ xkiya ri kajwataj chwe, rukʼ wariʼ xinwilo che ri Jehová xinutoʼo». Xuqujeʼ xubʼij: «Ri Jehová sibʼalaj nim ri tobʼanik xuya chwe, xaq xiw ta ri xintaʼ che, rukʼ wariʼ xkowir ri nukojonik».

10. ¿Jas katkunik kabʼano we tajin kariq jun nimalaj kʼax pa ri akʼaslemal?

¹⁰ ¿La tajin kariq jun nimalaj kʼax pa ri akʼaslemal? Weneʼ tajin kariq kʼax rumal ri xubʼan kan jun kabʼraqan, jun kaqiqʼ jabʼ o weneʼ rumal jun yabʼil, rumal laʼ awetaʼm ta chik jas kabʼano. Weneʼ sibʼalaj katbʼisonik, are kʼu kaya taj che wariʼ kubʼano che kakubʼsaj ta chi akʼuʼx chrij ri Jehová. Chabʼij che ri Jehová ronojel ri kanaʼo, chatchoman chrij ri ubʼanom che atoʼik nabʼe kanoq rech kkowir ri akojonik (Sal. 77:11, 12). Chakojoʼ che Jehová kʼo ta jumul katuya kanoq.

11. ¿Jasche qas rajawaxik kojniman chke ri kkikʼam bʼe pa qawiʼ?

¹¹ ¿Jas más katutoʼ rech kachʼij ri kʼax?  Junam rukʼ ri xubʼij ri al Anel, are ri nimanik. Chakubʼsaj akʼuʼx chkij ri winaq che ri Jehová y ri Jesús kikubʼsam kikʼuʼx chkij. Jujun taq mul weneʼ kqachomaj che kʼo ta ubʼeʼal ri pixabʼ che kkiya ri kʼamal taq bʼe re ri congregación. Are kʼu chnaʼtaj chawe che ri Jehová keʼutewchij ri winaq ri kenimanik. Ri uTzij y ri kikʼulmam ri sukʼ taq upatanelabʼ kkikʼutu che ri nimanik kukol ri qakʼaslemal (Éx. 14:1-4; 2 Crón. 20:17). Chatchoman chrij ri kʼutbʼal riʼ, jeʼ wariʼ amaqʼel katniman che ri kubʼij ri utinamit ri Jehová kimik y pa ri petinaq (Heb. 13:17). Rukʼ wariʼ kʼo ta rumal che kqaxibʼij qibʼ chuwach ri nimalaj kʼax che kpe na (Prov. 3:25).

12. Junam rukʼ ri kubʼij Lucas 18:1-8, ¿jas ubʼanik ri kojonik rukʼ ri uchʼijik ri kʼax kbʼan chqe?

¹² Ri Jesús retaʼm che are chiʼ kkiriq kʼax ri utijoxelabʼ kuriq kʼax ri kikojonik. Rech xeʼutoʼo, xchʼaw chrij jun bʼantajik che kqariq pa ri wuj re Lucas. Ri Jesús xchʼaw chrij jun malkaʼn ixoq che kʼi mul kutaʼ toqʼobʼ rech ktoʼ rumal jun qʼatal tzij che kubʼan ta ri sukʼil. Ri ixoq retaʼm che we kuxlan ta che utaʼik toqʼobʼ, ktoʼ riʼ rumal ri qʼatal tzij. Y jeʼ xkʼulmatajik. ¿Jas kqetaʼmaj chrij wariʼ? Ri Jehová itzel winaq taj. Rumal laʼ ri Jesús xubʼij: «¿La ma ta ri Dios kuqʼat na tzij pa kiwiʼ ri kikʼulel ri winaq ri e uchaʼom, we ri e areʼ kkiraq kichiʼ, kebʼochiʼn che chi pa qʼij chi chaqʼabʼ?» (chasikʼij uwach Lucas 18:1-8). Tekʼuriʼ ri Jesús xuqujeʼ xubʼij: «Are taq kʼu kpe ri Rijaʼl Winaq, ¿la keʼuluriqaʼ lo winaq cho ri uwach ulew ri kekojon che [ri jeriʼ ri kikojonik]?». We kbʼan jun kʼax chqe, rajawaxik che kkʼojiʼ qapaciencia y kqakoj qachuqʼabʼ rech kqakʼut jun koʼalaj qakojonik junam rukʼ ri xubʼan ri malkaʼn ixoq. Ri qakojonik kuya qachuqʼabʼ rech pa apachike tiempo kqakubʼsaj qakʼuʼx che ri Jehová kojutoʼo. Xuqujeʼ rajawaxik kqakojo che ri chʼawem kuya nim tobʼanik chqe. Jujun taq mul weneʼ jalan kbʼan che utzalixik uwach ri qachʼawem.

13. ¿Jas tobʼanik xuya ri chʼawem che jun familia che xbʼan kʼax chke?

¹³ Chqilampeʼ ri xukʼulmaj jun qachalal Vero ubʼiʼ, che kel pa ri tinamit República Democrática del Congo y ri rachajil Testigo taj y kʼo jun ral 15 ujunabʼ. Ri e oxibʼ xeʼel bʼi pa ri alaj tinamit e kʼo wi, rumal che jujun taq militares xkaj xkibʼan kʼax chke. Pa ri bʼe, xeqʼatex kumal jumulaj militares y xbʼix chke che kekamisaxik. Ri qachalal Vero xumaj oqʼej, are kʼu xkubʼsax ukʼuʼx rumal ri ral xuqujeʼ ri ral xumaj ubʼanik uchʼawem y kʼi mul xubʼij ri ubʼiʼ ri Jehová. Are chiʼ xbʼantaj ri uchʼawem, ri oficial xutaʼ che: «Alaj ali, ¿jachin xkʼutuw chawach kabʼan achʼawem?». Ri alaj ali xubʼij:  «Are numamá xkʼutuw chnuwach rukʼ ri kubʼij Mateo 6:9-13». Ri achi xubʼij che: «Cheʼakʼamaʼ bʼi ri anan atat y are ta bʼaʼ ri Jehová ri iDios chixchajinik».

14. ¿Jas kkojow pa kʼax ri qakojonik y jas kojtoʼwik rech kqachʼijo?

¹⁴ Wariʼ kukʼut chqawach che rajawaxik nim kqil wi ri uchuqʼabʼ ri chʼawem. ¿E kʼu we ri achʼawem aninaq taj ktzelex uwach o kbʼan ta jun mayibʼalalaj jastaq che utzalixik uwach? Junam rukʼ ri xubʼan ri malkaʼn ixoq re ri kʼutbʼal che xubʼij ri Jesús, kaya ta kan ubʼanik, chakubʼsaj akʼuʼx che ri qaDios katuwonobʼaʼ ta kanoq y che kutzalij uwach ri achʼawem qas pa ri qʼij che kajwataj chawe. Matanabʼaʼ kan utaʼik ri ruxlabʼixel ri Jehová (Filip. 4:13, TYOXLAJ WUJ). Chnaʼtaj chawe che pa kebʼ oxibʼ qʼij ri areʼ kuya na kʼi tewchibʼal chawe y kesachan kan ronojel taq ri kʼax che xariq ojer. We kachʼij ronojel taq ri kʼax che kariqo, rukʼ ri utobʼanik ri Jehová katkunik kachʼij ronojel ri e kʼax pa ri petinaq (1 Ped. 1:6, 7).

15. Junam rukʼ ri kubʼij Mateo 17:19, 20, ¿jas jun kʼax xeriqitaj wi ri utijoxelabʼ ri Jesús?

¹⁵ Ri Jesús xukʼut chkiwach ri utijoxelabʼ che ri kojonik keʼutoʼo rech kkiqʼaxej ri e kʼax (chasikʼij uwach Mateo 17:19, 20). Paneʼ ri utijoxelabʼ ri Jesús kʼi mul xekesaj bʼi itzel taq uxlabʼal chke ri e winaq, kʼo jumul xekun ta che ubʼanik. ¿Jasche xekun taj? Xbʼix chke rumal ri Jesús che xajwataj más kikojonik. Xubʼij chke che wet kʼo nim kikojonik, kekun riʼ che uslabʼisaxik jastaq che kejunamataj rukʼ nimaʼq taq juyubʼ. Kimik, xuqujeʼ oj kojkunik kqaqʼaxej ri e kʼax che weneʼ kqachomaj che kojkun taj kqaqʼaxej.

16. ¿Jas ubʼanom ri ukojonik ri al Geydi che utoʼik chuwach jun nimalaj kʼax?

¹⁶ Chqilampeʼ ri xukʼulmaj ri qachalal Geydi, aj Guatemala. Xkamisax kan ri rachajil a Edi ubʼiʼ, are chiʼ kʼateʼ xetzalij lo pa ri riqbʼal ibʼ. Ri qachalal kubʼij che ri ukojonik uyaʼom tobʼanik che rech kbʼison taj: «Ri chʼawem kinutoʼo rech kinbʼij ronojel ri kinnaʼo che ri Jehová y wariʼ kuya jamaril chwe. Kwilo che kukoj ri nufamilia y ri e qachalal che nuchajixik. Upatanexik más ri Jehová kinutoʼo rech kinbʼison taj y kinchoman ta chrij jastaq che kʼulmatajinaq taj. Ri kʼax nuriqom kukʼut chnuwach che apastaneʼ ri kʼaxkʼolil kinriq na pa ri petinaq, kinkunik kinchʼij rukʼ ri utobʼanik ri Jesús, ri Jehová y ri utinamit».

17. ¿Jas kojkunik kqabʼano are chiʼ kqariq jun kʼax che kjunamataj rukʼ jun nimalaj juyubʼ?

¹⁷ ¿La kaminaq jun awachalal o awachiʼl? Chakojoʼ atiempo che usikʼixik uwach kʼutbʼal re ri Biblia kech winaq che xekʼastajisaxik rech kakowirisaj ri akojonik chrij ri kʼastajibʼal. ¿La sibʼalaj katbʼisonik  rumal che xelesax bʼi jun awachalaxik pa ri congregación? Chakojoʼ achuqʼabʼ che unikʼoxik más ri Biblia rech qas kakojo che ri kʼajisabʼal wachaj kuya ri Dios, are ri más utz na. Apastaneʼ ubʼanik ri kʼaxkʼolil tajin kariqo chakowirisaj ri akojonik. Chabʼij che ri Jehová ronojel ri kʼo pa awanimaʼ. Katas ta awibʼ, xaneʼ cheʼawachilaj ri e qachalal (Prov. 18:1). Paneʼ rukʼ oqʼej, chabʼanaʼ ri jastaq che kʼo ubʼanik rukʼ ri akojonik rech kachʼij ri kʼax (Sal. 126:5, 6). Chatkʼol pa ronojel ri e riqbʼal ibʼ, chatzijoj ri utzij ri Dios y chasikʼij uwach ri Biblia. Y amaqʼel chatchoman chrij ri utz taq jastaq utzujum ri Jehová chawe. We katchoman chrij ri kubʼan ri Jehová che atoʼik, sibʼalaj kkowir ri akojonik.

18. We kawilo che kʼo jun jastaq rajawaxik kasukʼumaj che ri akojonik, ¿jas kabʼano?

¹⁸ We xawilo che kʼo rajawaxik kasukʼumaj pa ri akojonik are chiʼ xariq jun kʼax ojer o kimik, katbʼison taj. Chayaʼ bʼe che, rech katutoʼ che ukowirisaxik más ri akojonik. Chataʼ pa achʼawem ri xkitaʼ ri utijoxelabʼ ri Jesús, xkibʼij: «Chbʼanaʼ la chqe chi kujkowir pa ri qakojonik» (Luc. 17:5). Xuqujeʼ chatchoman chrij ri kʼutbʼal che qanikʼom pa wajun kʼutunem riʼ. Junam rukʼ ri xkibʼan ri qachalal Miguel y ri qachalal Yurai ri rixoqil, chnaʼtaj chawe ri at utoʼm wi ri Jehová. Junam rukʼ ri qachalal Anel y ri ral ri qachalal Vero chabʼanaʼ achʼawem rukʼ ronojel awanimaʼ che ri Jehová, más na are chiʼ tajin kaqʼaxej jun kʼax. Y junam rukʼ ri qachalal Geydi, chayaʼ bʼe che ri Jehová keʼukoj ri afamilia o ri e qachalal che atoʼik. We kaya bʼe che ri Jehová katutoʼ chuwach taq ri e kʼax kimik, knimar ri akojonik y kakubʼsaj akʼuʼx che katutoʼ na pa ronojel ri e kʼax pa ri petinaq.

19. ¿Jas qas xuchʼobʼ ri Jesús y jas katkunik kabʼano rumal ri rutzilal ri Jehová?

¹⁹ Ri Jesús xchʼaw chrij jujun jastaq che rajawaxik kkisukʼumaj ri utijoxelabʼ che ri kikojonik, are kʼu qas xukubʼsaj ukʼuʼx che ri Jehová keʼutoʼ pa ronojel ri kʼax che kkiriqo (Juan 14:1; 16:33). Xuqujeʼ, qas xuchʼobʼo che kʼo e kʼiʼalaj winaq kekunik kkiqʼaxej ri nimalaj kʼaxkʼolil rumal ri kikojonik (Apoc. 7:9, 14). ¿La katkʼojiʼ at chkixoʼl riʼ ri e kʼiʼalaj winaq? Rumal ri rutzilal ri Jehová, katkun riʼ katkʼojiʼ chkixoʼl we kakowirisaj ri akojonik (Heb. 10:39).