1, 2. Chabʼij rukʼ jun kʼutbʼal ri kqabʼan che ukojik pa ri qakʼaslemal ri kubʼij Proverbios 4:25.

CHOJCHOMAN chrij ri e oxibʼ bʼantajik riʼ. Jun qachalal ixoq che nim chi ujunabʼ tajin kchoman chrij ri utz taq jastaq ukʼulmam pa ri ukʼaslemal. Kimik kʼax chi kuriq che ubʼanik ri jastaq, are kʼu tajin na kubʼan ronojel ri kkunik rech kupatanij ri Jehová (1 Cor. 15:58). Ronojel taq qʼij kuchomaj che kʼo pa ri Kotzʼiʼjalaj uwach Ulew kukʼ ri e winaq che keraj. Jun qachalal chik knaʼtaj ri kʼax che xbʼan che rumal jun qachalal re ri congregación, are kʼu kuchomaj che kukʼol ta oyowal pa ranimaʼ chrij ri qachalal (Col. 3:13). Y jun qachalal achi ksach ta che ri umak xubʼan kan ojer, are kʼu kimik kraj kux sukʼ (Sal. 51:10).

² ¿Pa jas jastaq kejunamataj wi ri e qachalal riʼ? Konojel knaʼtaj chke ri xkibʼan ojer, are kʼu xaq xiw ta kechoman chrij. Xaneʼ are kechoman chrij ri petinaq (chasikʼij uwach Proverbios 4:25).

3. ¿Jasche are nim ubʼanik che are kojchoman chrij ri petinaq?

³ ¿Jasche are nim ubʼanik che kojchoman chrij ri petinaq? Rumal che, junam rukʼ jun winaq che kkun taj kbʼin sukʼ we kkaʼy chrij oj xuqujeʼ kojkun taj kqabʼan kʼi jastaq che upatanexik ri Jehová we xaq xiw kojchoman chrij ri xqabʼan kan ojer (Luc. 9:62).

4. ¿Jas chrij kojchʼaw wi pa wajun kʼutunem riʼ?

⁴ Pa wajun kʼutunem riʼ kojchʼaw chrij oxibʼ jastaq che kubʼano che are kojchoman chrij ri xqabʼan ojer: * ri urayixik  ri jastaq ojer, ukʼolik oyowal pa ri animaʼ y ubʼisoxik más ri qamak. Pa kijujunal ri e kʼax riʼ, kqil ri kubʼan ri e pixabʼ re ri Biblia che qatoʼik rech kqaya kan unaʼtasaxik «ri kanajinaq kanoq» y uchomaxik ri kʼo chqawach (Filip. 3:13).

5. ¿Jas pixabʼ kuya Eclesiastés 7:10 chqe?

⁵ (Chasikʼij uwach Eclesiastés 7:10). Kqilo che ri versículo kubʼij taj che mat utz kojchoman chrij ri utzilal xqariq ojer, xaneʼ are che kqachomaj che más utz na ri ojer chuwach ri kimik. Rumal che, ri utz taq jastaq che knaʼtaj chqe e usipanik ri Jehová. Ri utz taj are che kqajunamisaj ri xqakʼulmaj ojer rukʼ ri tajin kqakʼulmaj kimik y kqachomaj che más kʼax na ri tajin kqakʼulmaj kimik. Jun chi Biblia kukoj ri e tzij riʼ che ri versículo riʼ: «Kachomaj taj jasche más utz na ri jastaq xkʼulmataj ojer, rumal che wariʼ are ta jun utz chomanik».

6. ¿Jasche utz taj che amaqʼel kqachomaj che más utz na ri qakʼaslemal ojer? Chayaʼ jun kʼutbʼal.

⁶ ¿Jasche utz taj che amaqʼel kqachomaj che are más utz ri qakʼaslemal ojer? Rumal che ubʼisoxik ri jastaq ojer kubʼano che xaq xiw kojchoman chrij ri utz xqariqo y kojchoman ta chrij ri kʼax xqariqo. Chojchoman chkij ri israelitas ojer: are chiʼ kʼateʼ xeʼel lo pa Egipto xsach chke ri kʼax che xkiriq chilaʼ y xaq xiw xechoman chrij ri jeʼl taq jastaq che xkitij chilaʼ. Kkibʼij: «¡Kenaʼtaj kʼu ne ri kar chqe ri xaq keqakochiʼj ri keqatij pa Egipto! Xuqujeʼ keqatij kʼut pepino, melón, alaj sebʼoy, xanakat xuqujeʼ axux» (Núm. 11:5). Are kʼu ¿la qastzij che kʼax ta kkichʼak wi ri kiwa? Jeʼ taj. Kʼax kkichʼak wi, rumal che bʼanom esclavos chke pa Egipto (Éx. 1:13, 14; 3:6-9). Are kʼu aninaq xsach ri kʼax che xkiriq chilaʼ y are xkirayij ri jastaq re ojer. Are ta xechoman chrij ri kʼateʼ xuya ri Jehová chke, xaneʼ are xechoman chrij jastaq  ojer. Wariʼ utz ta xril ri Jehová (Núm. 11:10).

7. ¿Jas xtoʼw jun qachalal ixoq rech kurayij ta ri ukʼaslemal ojer?

⁷ ¿Jas kojtowik rech are ta kqarayij ri qakʼaslemal ojer? Chqilaʼ ri xukʼulmaj jun qachalal che xumaj upatanexik ri Jehová pa Betel re Brooklyn pa 1945. Chiʼ xqʼax ri junabʼ, xkʼuliʼ rukʼ jun betelita y chilaʼ xkipatanij wi ri Jehová pa kʼi décadas. Pa 1976, ri rachajil ri qachalal xyawajik. Are chiʼ ri qachalal xrilo che xa jubʼiqʼ chi kraj kkamik, xuya kan jujun pixabʼ che ri rixoqil are chiʼ kkanaj kan malkaʼn. Xubʼij che: «Amaqʼel xojkikot pa ri qakʼulanem. E kʼi winaq ketaʼm ta wariʼ». Xuqujeʼ xubʼij: «Paneʼ amaqʼel knaʼtaj chawe ri xqakʼulmaj, are ta katchoman chrij. Are chiʼ kqʼax ri tiempo ksach ri bʼis kanaʼ. Xaq xiw ta katchoman chrij ri ojer rech kuqasaj ta achuqʼabʼ. Chamaltyoxij ri kikotemal y ri tewchibʼal che ariqom. [...] Ri utz taq jastaq che knaʼtaj chqe e usipanik ri Jehová». ¡Jun utzalaj pixabʼ!

8. ¿Jas tewchibʼal xuriq ri qachalal rumal che xaq xiw ta xchoman chrij ri xukʼulmaj ojer?

⁸ Ri qachalal xunimaj ri pixabʼ xyaʼ che. Rukʼ sukʼilal xupatanij ri Jehová kʼa chiʼ xkamik, are chiʼ kʼo 92 ujunabʼ. Chiʼ kʼasal na xubʼij: «Are chiʼ kinchoman chrij ri más che sesenta y tres junabʼ xinpatanij ri Jehová pa ri tiempo completo, kinkunik kinbʼij rukʼ ronojel wanimaʼ, che nuriqom kikotemal pa ri nukʼaslemal». ¿Jasche? Areʼ kubʼij: «Ri más kyaʼow kikotemal chwe are konojel ri e qachalal y ri kubʼsal kʼuʼx che kojkʼojiʼ na kukʼ ri e qachalal pa jun kotzʼiʼjalaj uwach Ulew y kqapatanij ri qaDios, Jehová, chbʼe qʼij saq». * ¡Are jun utzalaj kʼutbʼal re jun winaq che amaqʼel are xchoman chrij ri petinaq!

9. Junam che kubʼij Levítico 19:18, ¿jampaʼ are más kʼax resaxik ri oyowal pa ri animaʼ?

⁹ (Chasikʼij uwach Levítico 19:18). Amaqʼel kʼax kqabʼan che ukuyik umak jun winaq che kubʼan kʼax chqe más we are jun qachalal, jun qachiʼl o jun qafamiliar. Jumul, jun qachalal ixoq xuqʼabʼaj urajil chrij jun qachalal chik. Chiʼ xqʼax ri tiempo xutaʼ sachbʼal umak, are kʼu ri qachalal che xqʼabʼax ri pwaq chrij amaqʼel kchoman chrij ri xkʼulmatajik. Weneʼ ri oj qakʼulmam ta wariʼ, are kʼu qastzij riʼ che jujun taq mul qanaʼom che kojkun taj kqesaj pa ri qajolom.

10. ¿Jas kojtowik rech kqakʼol ta oyowal pa ri qanimaʼ?

¹⁰ ¿Jas kojtowik rech kqesaj pa qajolom jun jastaq che xkʼulmatajik? Rech kojkunik kqabʼano, rajawaxik knaʼtaj chqe che Jehová kril ronojel. Areʼ retaʼm ronojel ri uwach kʼax che kqariqo (Heb. 4:13). Kʼax kbʼe pa ri ranimaʼ are chiʼ krilo kqariq kʼax (Is. 63:9). Y kutzujuj che pa ri petinaq kresaj na ronojel jastaq che ubʼanom kʼax chqe (Apoc. 21:3, 4).

11. ¿Jas utzilal kuya che kqesaj ri oyowal pa qanimaʼ?

¹¹ Xuqujeʼ rajawaxik knaʼtaj chqe che kuya utzilal we kqakʼol ta oyowal pa qanimaʼ. Are laʼ ri xukʼulmaj jun qachalal che xqʼabʼax jun jastaq chrij. Are chiʼ xqʼax ri tiempo, xkunik xresaj ri oyowal kʼo pa ranimaʼ. Xuchʼobʼo che we kqakuy kimak ri e nikʼaj chik Jehová kukuy ri qamak oj (Mat. 6:14). Retaʼm che utz ta ri xubʼan ri qachalal che, are kʼu xkunik xukuy umak. Rumal che xubʼan wariʼ xuriq más kikotemal y xaq xiw kuchomaj chi upatanexik ri Jehová.

12. ¿Jas kukʼut 1 Juan 3:19, 20 chqawach?

¹² (Chasikʼij uwach 1 Juan 3:19, 20). Qonojel kojbʼisonik rumal jun jastaq che utz taj xqabʼano. Weneʼ rumal ri xqabʼano are chiʼ majaʼ kqetaʼmaj uwach ri Jehová o are chiʼ qabʼanom chi qaqasanjaʼ (Rom. 3:23). Qastzij che, paneʼ sibʼalaj kqakoj qachuqʼabʼ rech amaqʼel kqabʼan ri utz are kʼu qonojel «kujqaj pa kʼi kiwach sachinaqil» (Sant. 3:2; Rom. 7:21-23). Ubʼisoxik más ri qamak kubʼan kʼax chqe are kʼu rajawaxik che kqachʼobʼo che utz ta ri xqabʼano. ¿Jasche? Rumal che kojutoʼ rech kqakʼex ri qakʼaslemal y kqabʼan ta chi jumul ri makaj (Heb. 12:12, 13).

13. ¿Jasche utz taj che amaqʼel kojchoman chrij ri qamak?

¹³ Are kʼu, weneʼ amaqʼel kojchoman chrij ri qamak are chiʼ qakʼexom chi ri qakʼaslemal y Jehová ukuyum chi ri qamak. Uchomaxik más ri qamak kubʼan kʼax chqe (Sal. 31:10; 38:3, 4). ¿Jasche kqabʼij? Chqilaʼ ri xukʼulmaj jun qachalal. Areʼ amaqʼel kubʼisoj ri umak che xubʼan ojer. Kubʼij: «Kinchomaj che kʼo ta upatan kinkoj nuchuqʼabʼ che upatanexik ri Jehová rumal che weneʼ kʼo ta jun weyebʼal». Weneʼ oj kʼi junam kqachomaj rukʼ ri qachalal. Are kʼu rajawaxik che xaq xiw ta kqabʼisoj ri qamak. Ri Satanás sibʼalaj kkikotik we kqachomaj che kʼo ta qapatan, paneʼ ri Jehová usachom chi ri qamak (chajunamisaj rukʼ 2 Corintios 2:5-7, 11). 

14. ¿Jasche qetaʼm che Jehová kukuy ri qamak?

¹⁴ Are kʼu, weneʼ kqachomaj: «¿Jas kinbʼan che retaʼmaxik che Jehová qas ukuyum chi ri numak?». Pa nikʼaj chi tzij, are chiʼ kqachomaj wariʼ tajin kqaya urespuesta ri pregunta. ¿Jasche kqabʼij? Qʼaxinaq chiʼ kʼi décadas, La Atalaya xubʼij  wariʼ: «Jun chi jastaq che kkʼulmatajik weneʼ amaqʼel kojqaj pa ri makaj y weneʼ are chiʼ majaʼ oj Testigos kʼo jujun qabʼantajik che utz taj y weneʼ oj kuninaq taj qakʼexom». Y kubʼij: «Kubʼan ta kebʼ akʼuʼx, kachomaj taj che ri makaj xabʼano kkuy ta chik. Rumal che are laʼ ri kraj ri Satanás che kachomaj. Are chiʼ kabʼisoj ri xabʼano y kpe awoyowal awukʼ kukʼutu che at itzel winaq taj y Jehová kkunik kukuy ri amak. Amaqʼel rukʼ machʼachʼem y rukʼ ronojel awanimaʼ chataʼ che ri Jehová che kukuy amak, katux chʼajchʼoj y katutoʼo. Chatchʼaw rukʼ junam che kubʼan jun alaj akʼal rukʼ ri utat chiʼ kʼo pa kʼax, paneʼ sibʼalaj kʼi mul kojchʼaw chrij ri makaj, Jehová amaqʼel kuya ri utobʼanik chqe rumal che areʼ jun Dios che kutoqʼobʼisaj wachaj».

15, 16. ¿Jas kinaʼom e jujun qachalal are chiʼ kketaʼmaj che nim keʼil wi rumal ri Jehová?

¹⁵ E kʼi qachalal uyaʼom kubʼsal kʼuʼx chke retaʼmaxik che nim kibʼanik chuwach ri Jehová. Jun kʼutbʼal, qʼaxinaq chi jujun junabʼ jun qachalal xopan pa ranimaʼ jun bʼantajik che xusikʼij pa ri sección «La Biblia les cambió la vida». Ri kʼutunem, kchʼaw chrij jun qachalal che rumal ri xubʼan ojer, kʼax kubʼan che ukojik che kloqʼoqʼex rumal ri Jehová. Wajun chomanik riʼ sibʼalaj xubʼan kʼax che xuqujeʼ are chiʼ qʼaxinaq chi jujun junabʼ ubʼanom uqasanjaʼ. Are kʼu xchoman chrij ri tojbʼal mak y wariʼ xutoʼ rech xukʼex ri uchomanik. *

¹⁶ ¿Jas tobʼanik xuya wajun bʼantajik riʼ che ri qachalal? Areʼ kubʼij: «Are chiʼ in ala na sibʼalaj xwil pornografía, are kʼu xinkunik xinya kan rilik. Sibʼalaj bʼisobʼal, xinqaj chi jumul che rilik. Xintaʼ tobʼanik chke ri e kʼamal bʼe pa ri nucongregación, y jeriʼ xinkunik xinya kan rilik. E areʼ kibʼim chwe che ri Dios kinuloqʼoqʼej y kutoqʼobʼisaj nuwach. Paneʼ wetaʼm wariʼ, jujun taq mul kinchomaj che kʼo ta nupatan y che ri Dios kinraj taj». Areʼ kubʼij che ri xubʼij ri qachalal ixoq qastzij xutoʼ: «Kimik kinchʼobʼo che are chiʼ kinchomaj che Jehová kukuy ta ri numak, jetaneʼ tajin  kinkʼutu che nim ta kwil ri tojbʼal mak che xuya ri uKʼojol rech kkuyutaj ri numak. Xinqopij wajun kʼutunem riʼ rech kinsikʼij y kinchoman chrij are chiʼ kinchomaj che Jehová kukuy ta ri numak».

17. ¿Jas xubʼan ri Pablo rech amaqʼel ta xchoman chrij ri umak?

¹⁷ E bʼantajik junam rukʼ wariʼ kubʼano che kojchoman chrij ri apóstol Pablo. Areʼ xubʼan itzel taq jastaq are chiʼ majaʼ kux cristiano. Knaʼtaj che ri xubʼano, are kʼu xaq xiw ta kchoman chrij ronojel qʼij (1 Tim. 1:12-15). Xuchʼobʼo che ri tojbʼal mak are jun sipanik xuya ri Dios che (Gál. 2:20). Wariʼ xubʼano che xchoman ta chi más chrij ri umak y are xchoman más chrij upatanexik ri Jehová.

18. ¿Jas xqetaʼmaj pa wajun kʼutunem riʼ?

¹⁸ ¿Jas xqetaʼmaj pa wajun kʼutunem riʼ? Nabʼe, unaʼtasaxik ri utz taq jastaq xqabʼan ojer are jun sipanik re ri Jehová; are kʼu paneʼ qariqom kʼi utzilal pa ri qakʼaslemal, ri kʼaslemal pa ri petinaq are más utz na. Ukabʼ, weneʼ kbʼan jun kʼax chqe, are kʼu we kqakuy ri makaj kuya utzilal chqe. Urox, are chiʼ xaq xiw kojchoman chrij ri qamak kubʼano che kqapatanij ta ri Jehová rukʼ kikotemal. Rumal laʼ, junam rukʼ ri Pablo, rajawaxik kqakojo che ri Jehová xukuy ri qamak.

19. ¿Jasche qetaʼm che pa ri kʼakʼ uwach Ulew knaʼtaj ta chi ri xubʼan kʼax chqe?

¹⁹ Pa ri kʼakʼ ulew che qeyem, jawiʼ kqariq wi kʼaslemal kʼo ta ukʼisik, knaʼtaj ta chi ri jastaq che xubʼan kʼax chqe. Ri Biblia kubʼij che pa ri tiempo riʼ «ri re ojer man knaʼtax ta chi na» (Is. 65:17). E jujun chqe qapatanim ri Jehová pa kʼi junabʼ y ya nim chi qajunabʼ; are kʼu, chichomaj, pa ri kʼakʼ uwach ulew kojux chi na jumul alabʼom alitomabʼ (Job 33:25). Rumal laʼ, are ta kojchoman chrij ri xqakʼulmaj ojer, are chojkikot rukʼ ri qakʼaslemal kimik y chojchoman chrij ri petinaq.