CHKIWACH ri hebreos che xekʼojiʼ ojer kanoq pa ri Tzujum Ulew, ri junabʼ seglar kumajij are chiʼ kkimaj utajixik y utikik ri ulew pa taq ri ikʼ septiembre-octubre.

Are kʼu chnaʼtaj chqe che jun junabʼ lunar che rukʼam 12 ikʼ che kʼo 29 o 30 qʼij chkipam, más kʼi ta qʼij kʼo chupam chuwach ri junabʼ solar. Rumal riʼ, kʼo rajawaxik kbʼanik rech ktzʼaqatisax ri kraj na pa jun junabʼ lunar. Pa uwiʼ ri 12 ikʼ re 29 o 30 qʼij, keya chi jujun qʼij o kyaʼ chi jun ikʼ uwiʼ are chiʼ majaʼ kumajij ri jun chi junabʼ rech ktzʼaqat pa jun junabʼ solar. Kkibʼan wariʼ rech junam kuriq ri qʼij che kkitik ri tikoʼn y kkiyak uwach.

Are kʼu pa taq uqʼij ri Moisés, ri Jehová xubʼij chke ri israelitas che ri junabʼ sagrado kumaj pa ri ikʼ abib (o nisán), che kimik riʼ are marzo-abril (Éx. 12:2; 13:4). Pa wajun ikʼ riʼ ri israelitas kkimaj jun nimalaj nimaqʼij rech kkisipaj che ri Jehová ri nabʼe taq uwach ri cebada (Éx. 23:15, 16).

Ri historiador Emil Schürer kubʼij: «Man kʼax ta uchʼobʼik ri kbʼan che rilik jampaʼ qʼij kbʼe pa jun ikʼ. Ri nimaqʼij re ri Pascua rajawaxik kbʼanik are chiʼ tikʼil chi ri Ikʼ (luna llena) pa ri ikʼ re Nisán (14 re Nisán) wajun nimaqʼij riʼ kbʼanik are chiʼ qʼaxinaq chi ri equinoccio re primavera […]. We ri Pascua kukʼaqaʼ pa jun tiempo che majaʼ kumaj ri equinoccio re primavera, kyaʼ chi jun ikʼ uwiʼ rech kopan pa ri tiempo che rajawaxik kbʼanik» (Historia del pueblo judío en tiempos de Jesús 175 a. C. - 135 d. C., traducción de J. Cosgaya y A. Piñero).

Ri oj testigos rech Jehová je wariʼ kqabʼan che rajilaxik ri qʼij rech kqilo jampaʼ kqanaʼtasaj ri ukamikal ri Jesús, che amaqʼel kopan pa ri ikʼ marzo y abril, che are ri 14 de nisán re ri calendario hebreo. Ri e qachalal kkiya ubʼixik chke konojel ri congregaciones pa ronojel uwach Ulew jampaʼ knaʼtasax ri ukamikal ri Jesús. a

Are kʼu, ¿jas xkibʼan ri hebreos che retaʼmaxik jampaʼ kkʼis jun ikʼ y jampaʼ kumaj chi jun? Kimik, ri oj kojkunik kqetaʼmaj rumal ri calendario che kʼo qukʼ o jun aplicación che kkoj pa ri celular. Are kʼu ojer kanoq, kʼax kbʼan che retaʼmaxik jampaʼ kumaj jun chi ikʼ.

Pa taq ri uqʼij ri Noé, ronojel ri ikʼ kʼo 30 qʼij chupam (Gén. 7:11, 24; 8:3, 4). Are kʼu chiʼ xmajtaj ukojik ri calendario hebreo, ronojel ta chi ri ikʼ 30 qʼij kʼo chkipam. Ri ikʼ kmajix rajilaxik are chiʼ tajin kel lo ri Ikʼ, kraj kubʼij, che kmajix rajilaxik pa 29 o 30 qʼij re ri jun ikʼ kanoq.

Jumul, ri David y Jonatán xkibʼij che e kʼo pa ri kʼisbʼal qʼij re jun ikʼ, are chiʼ xkibʼij: «Chweʼq ri nimaqʼij re ri kʼakʼ ikʼ» (1 Sam. 20:5, 18). Rumal laʼ, pa ri siglo once a.C., ri e winaq qas kenaw chi che rilik jampaʼ kumaj jun kʼakʼ ikʼ. Y, ¿jas xkibʼan ri israelitas che retaʼmaxik jampaʼ kumaj jun kʼakʼ ikʼ? Kqariq ri urespuesta pa jun wuj che kbʼix Misná che, che kchʼaw chrij ri naqʼatisabʼal y taqanik judía. Chilaʼ kubʼij wi che are chiʼ ri judíos e tzalijinaq chi lo pa Babilonia, ri e kʼo pa ri Sanedrín ronojel 30 re 7 ikʼ pa jun junabʼ kkimulij kibʼ aqʼabʼil rech kkilo jampaʼ kumajij ri jun chi ikʼ. ¿Jas xkibʼan che retaʼmaxik jampaʼ kumaj ri jun chi ikʼ?

Ri Sanedrín kekitaq bʼi jujun achijabʼ chaqʼabʼ chrij Jerusalén rech kekilaʼ ri kaj. Are chiʼ kqʼalajin chik che tajin kel lo jun kʼakʼ Ikʼ, ri achijabʼ kekiyalaʼ ubʼixik chke ri e kʼo pa ri Sanedrín. Are chiʼ kilom chik jampaʼ kumaj ri kʼakʼ ikʼ kkiya ubʼixik chke ri winaq. ¿E kʼu we ri achijabʼ kekun taj kkil ri Ikʼ rumal ri sutzʼ? Ri e kʼo pa ri Sanedrín kkibʼij che 30  qʼij kʼo chupam ri ikʼ che e kʼo wi y chukabʼ qʼij kumaj ri jun chi ikʼ.

Ri Misná kubʼij che ri Sanedrín ketaqan che utzijik qʼaqʼ pa uwiʼ ri juyubʼ Olivos, che kʼo chunaqaj ri Jerusalén y pa nikʼaj chi lugares re Israel rech kkiya ubʼixik che xumajij ri jun chi ikʼ. Are chiʼ xqʼax ri tiempo, xkoj ta chi wariʼ, xaneʼ xaq xiw ketaq bʼi winaq rech kekiya ubʼixik jampaʼ kumaj jun kʼakʼ ikʼ. Y jeriʼ paneʼ e kʼo pa Jerusalén o pa jun chi lugar konojel ri judíos kketaʼmaj jampaʼ kumaj ri jun chi ikʼ rech junam kkibʼan ri e nimaqʼij.

Ri wachbʼal che kʼo pa wajun kʼutunem kojutoʼ che uchʼobʼik jas ubʼanik ri calendario hebreo rukʼ taq ri ikʼ, ri e nimaqʼij y ri estaciones re ri junabʼ.