KʼUTUNEM 7
BʼIXONEM 51 Qajachom ri qakʼaslemal che ri Dios
¿Jas kqetaʼmaj chrij ri kikʼutbʼal ri nazareos?
«Ronojel ri qʼijol ri kbʼeytaj ri uchiʼnik kkanaj tastalik che uternexik ri Ajawaxel Dios» (NÚM. 6:8).
KYAʼ UBʼIXIK
Jas kojutoʼ wi ri kikʼutbʼal ri nazareos rech kqaxiʼj ta qibʼ y rech kqaya kan ubʼanik jujun jastaq che utz kqilo y rech kqapatanij más ri Dios.
1. ¿Jas kikʼutum ri upatanelabʼ ri Jehová pa kʼi taq junabʼ?
¿LA NIM kawil ri awachilanik rukʼ ri Dios? ¡Qastzij riʼ che nim kawil wi! Y xaq xiw ta at kanaʼ wariʼ. Pa kʼi taq junabʼ e kʼi winaq kinaʼom wariʼ (Sal. 104:33, 34). E kʼi kiyaʼom kan ubʼanik jujun taq jastaq che utz kkilo rech kkipatanij más ri Dios, jun chke are ri nazareos re ri ojer Israel. Are kʼu ¿e jachin riʼ ri nazareos y jas kqetaʼmaj chkij?
2. a) ¿E jachin riʼ ri nazareos? (Números 6:1, 2). b) ¿Jas xbʼanow chke jujun israelitas rech xkaj xeʼux nazareos?
2 Ri tzij nazareo petinaq pa ri chʼabʼal hebreo y kraj kubʼij «chaʼom» o «tastalik». Rumal che ri sukʼalaj taq israelitas riʼ xkiya kan ubʼanik jujun taq jastaq che utz kkilo rech qas utz kkibʼan che upatanexik ri Dios, qas taqal waʼ taq tzij ri chke. Ri Taqanik che xyaʼ che ri Moisés kuya bʼe che jun achi o jun ixoq kutzujuj che ri Dios che kraj kupatanij y rech kux nazareo pa jun tiempo (chasikʼij Números 6:1, 2). a Ri winaq che kraj kux nazareo, kunimaj na jujun taq taqanik che konojel taj rajawaxik kkinimaj. ¿Jasche jun winaq kraj kux nazareo? Qastzij riʼ che xa rumal kuloqʼoqʼej ri Jehová y che kumaltyoxij ronojel ri tewchibʼal che yaʼom che (Deut. 6:5; 16:17).
3. ¿Jas kojjunamataj wi kukʼ riʼ nazareos?
3 Are chiʼ «ri upixabʼ ri Cristo» xkanaj che ukʼexwach ri Taqanik che xyaʼ che ri Moisés, rajawaxik ta chik che ri upatanelabʼ ri Dios keʼux nazareos (Gál. 6:2; Rom. 10:4). Are kʼu, junam kukʼ ri nazareos ri oj kqaj kqapatanij ri Jehová rukʼ ronojel qanimaʼ, qachuqʼabʼ y qachomanik (Mar. 12:30). Y are chiʼ kqajach ri qakʼaslemal che ri Dios tajin kqatzujuj che che kqaj kqapatanij. Rech kqabʼan ri xqabʼij che rajawaxik kqabʼan ri urayibʼal pa ri qakʼaslemal xuqujeʼ kqaya kan ubʼanik jujun jastaq che utz kqilo. Chqilaʼ jas xkibʼan ri nazareos rech utz xkibʼan che ubʼanik ri xkitzujuj y jas kqabʼan oj che resaxik kiwach (Mat. 16:24). b
CHQAPATANIJ MÁS RI JEHOVÁ
4. Junam rukʼ kubʼij Números 6:3, 4, ¿jas jastaq xkibʼan ta ri nazareos rech xkipatanij más ri Jehová?
4 (Chasikʼij Números 6:3, 4). Ri nazareos kekun taj kkitij tzam o nikʼaj chik junam rukʼ ri uvas y ri pasas. Ronojel wariʼ kkitij ri nikʼaj chi winaq y awas ta utijik. Ri Biblia kubʼij che ri tzam o vino are jun sipanik che kuya ri Dios y che «kuya kikotemal che ri ukʼaslemal» jun winaq (Sal. 104:14, 15). Paneʼ je wariʼ are kʼu ri nazareos kekun taj kkitijo. c
Junam rukʼ ri xkibʼan ri nazareos ¿la kqaj kqaya kan ubʼanik jujun jastaq che utz kqilo? (Chawilaʼ ri párrafos 4 a 6).
5. ¿Jas xkibʼan ri qachalal Madián y Marcela y jasche?
5 Ri oj xuqujeʼ weneʼ kʼo jujun jastaq kqaya kan ubʼanik, xa rumal che kqaj kqapatanij más ri Jehová. Chqilaʼ ri kikʼutbʼal ri qachalal Madián y Marcela. d Wajun kʼulaj riʼ re Colombia kʼo kiqʼinomal. Ri qachalal Madián kuchʼak kʼi pwaq, rumal laʼ kʼo ta kajwataj chke. Are kʼu rumal che kkaj kkipatanij más ri Jehová, xkikʼex jujun jastaq pa ri kikʼaslemal. Ri e areʼ kkibʼij: «Xqatzukuj jun alaj qachoch che más nitzʼ y xqakʼayij ri qacarro». Madián y Marcela xetaqchiʼx ta che ubʼanik wariʼ; xkibʼano rumal che kkaj kkitzijoj más ri utzij ri Dios. Sibʼalaj kekikot rukʼ ri xkichaʼ ubʼanik.
6. ¿Jasche ri oj cristianos kqaya kan ubʼanik jujun taq jastaq che utz kqilo? (Xuqujeʼ chawilaʼ ri wachbʼal).
6 Ri oj cristianos utz kqilo che kqaya ri qatiempo che unimarisaxik más ri qakojonik (1 Cor. 9:3-6). Ri Jehová kojutaqchiʼj ta che ubʼanik wariʼ y ri jastaq che kqaya kan ubʼanik kraj ta kubʼij che xa utz ta kibʼanik. Jun kʼutbʼal, jujun qachalal weneʼ kkikʼex ri kachoch, kkiloqʼ jun más nitzʼ, kkiya kan jun chak che paqal e tojom wi o weneʼ kkaj kkʼojiʼ jun kimascota are kʼu kkiloqʼ taj rumal che kkaj kkipatanij más ri Jehová. Jujun chi qachalal e kʼulan taj o e kʼo ta kalkʼwal rumal che kkaj kkipatanij más ri Jehová. Nikʼaj chik naj e bʼenaq wi jawiʼ kajwataj tobʼanik y e kiyaʼom kan ri kifamilia. Kʼi chqe qabʼanom wariʼ rumal che kqaj kqapatanij más ri Jehová. Qas qetaʼm che ri Jehová nim kril wi ri kqabʼan che upatanexik, paneʼ nim o nitzʼ (Heb. 6:10).
CHQAKʼUTUʼ CHE OJ JUNAM TA KUKʼ RI NIKʼAJ CHIK
7. ¿Jasche weneʼ xuriq kʼax jun nazareo che upatanexik ri Jehová? (Números 6:5; xuqujeʼ chawilaʼ ri wachbʼal).
7 (Chasikʼij Números 6:5). Ri nazareos kekun taj kkisokaj ri kiwiʼ. Je wariʼ qas kkikʼutu che keniman che ri Jehová. We jun israelita pa kʼi tiempo uxnaq nazareo más kenimaqir ri uwiʼ. We ri e rachiʼl kkitoʼo rech kupatanij más ri Jehová kuriq ta kʼax riʼ. Are kʼu kʼo jun tiempo che xkʼulmataj pa Israel che nim ta xeʼil wi ri nazareos. Jun kʼutbʼal, pa ri utiempo ri profeta Amós, ri israelitas che e apóstatas kkiya «rukʼiʼaxik uwaʼl uva» chke ri nazareos, weneʼ xkibʼan wariʼ rumal che kkaj che kkiya kan upatanexik ri Jehová (Amós 2:12). Jujun taq mul ri nazareos kʼax xkiriqo rech xkiya ta kan upatanexik ri Jehová.
Ri nazareos rajawaxik xkikoj kichuqʼabʼ rech xkikʼutu che e junam ta kukʼ ri nikʼaj chik. (Chawilaʼ ri párrafo 7).
8. ¿Jas utz xawil che ri ukʼutbʼal ri alaj a Benjamin?
8 Ri oj xuqujeʼ kojkunik kqabʼan qe junam kukʼ ri nazareos che kqaj taj kqaya kan upatanexik ri Jehová, paneʼ jujun chqe qas ta kojchʼawik. Chqilaʼ ri xkʼulmataj rukʼ ri a Benjamin, che kel pa Noruega y che kʼateʼ 10 ujunabʼ. Pa ri escuela che kʼo wi xbʼan jun riqbʼal ibʼ che kʼo ubʼanik rukʼ ri tobʼanik che xyaʼ pa ri chʼoj re Ucrania. Ri akʼalabʼ xkibʼan jun bʼix y xkikoj atzʼyaq che kʼo ri bandera chuwach. Ri a Benjamin naj xkʼojiʼ wi chke rumal che kraj taj kbʼixon kukʼ. Are kʼu ri umaestra xrilo y xubʼij che: «¡Chakowij! ¡Chatpet qukʼ, at qeyem chik!». Ri a Benjamin xuxiʼj ta ribʼ, xqebʼ rukʼ ri umaestra y xubʼij che: «Ri in xaq xiw kintoʼ uwiʼ ri uQʼatbʼal tzij ri Dios. Kinya ta ri nutobʼanik che ni jun qʼatbʼal tzij. E kʼo kʼi testigos rech Jehová che e kʼo pa cárcel rumal che kkaj taj kebʼe pa chʼoj». Ri maestra xuchʼobʼ ri xubʼij ri a Benjamin che, rumal laʼ kʼo ta chi xubʼij che. Are kʼu ri e rachiʼl pa ri escuela xkitaʼ che jasche kraj taj kbʼixonik. Ri a Benjamin xuxiʼj ribʼ y xa jubʼiqʼ xraj che xutzoqopij oqʼej. Are kʼu xkʼojiʼ ukowil ukʼuʼx y xubʼij chke ri rachiʼl ri xubʼij che ri maestra nabʼe kanoq. Tekʼuriʼ ri a Benjamin xubʼij chke ri unan utat che xtoʼ rumal ri Jehová.
9. ¿Jas kqabʼan che uyaʼik kikotemal che ri Jehová?
9 Rumal che oj testigos rech Jehová, ri winaq kkilo che oj junam ta kukʼ. Kajwataj chuqʼabʼ chqe rech kqabʼij che oj testigos rech Jehová pa ri escuela o pa ri qachak. Ri kkibʼan ri winaq o ri kibʼantajik más knimataj na y wariʼ kubʼano che más kʼax kqabʼan che unimaxik ri Jehová y che utzijoxik ri utzij chke ri nikʼaj chik (2 Tim. 1:8; 3:13). Are kʼu utz che knaʼtaj chqe che are chiʼ kqakoj qachuqʼabʼ che upatanexik ri Jehová y che kojjunamataj ta kukʼ ri nikʼaj chik, kqakikotemaj ri Jehová (Prov. 27:11; Mal. 3:18).
ARE NABʼE CHQAYAʼ UPATANEXIK RI JEHOVÁ PA RI QAKʼASLEMAL
10. ¿Jasche kʼax xkibʼan ri nazareos che unimaxik ri kubʼij Números 6:6, 7?
10 (Chasikʼij Números 6:6, 7). Ri nazareos kekun taj keqebʼ rukʼ jun kaminaq. Weneʼ kchomaxik che wariʼ nim ta ubʼanik, are kʼu che jun nazareo kʼax ubʼanik wariʼ más na we ri kaminaq are jun ufamiliar. ¿Jasche? Rumal che ojer kanoq ri winaq rajawaxik kkichap ri kaminaq rech kkibʼan ri e naqʼatal che ubʼanik rukʼ ri kaminaq (Juan 19:39, 40; Hech. 9:36-40). Rumal laʼ ri nazareos kekun taj kkibʼan wariʼ. Are chiʼ kkinimaj ri Jehová kkikʼutu che nim ri kikojonik chrij. Are kʼu xaq ta kitukel e kʼolik; qas qetaʼm che ri Jehová xuya ri tobʼanik che xajwataj chke.
11. ¿Jas rajawaxik kqabʼano are chiʼ kqasukʼumaj jun jastaq che kʼo ubʼanik rukʼ ri qafamilia? (Xuqujeʼ chawilaʼ ri wachbʼal).
11 Ri oj cristianos qas kqabʼan ri xqabʼij che ri Jehová. Che kqapatanij pa ronojel ri qakʼaslemal. Wariʼ kilitaj rukʼ ri kqachaʼ ubʼanik pa ri qakʼaslemal y ri kqabʼan chuwach ri kʼax che weneʼ kkʼulmataj pa ri qafamilia. Kqakoj qachuqʼabʼ rech kqaya ri kajwataj chke ri qafamilia are kʼu kqabʼan ta nijun jastaq che utz ta kril ri Jehová (Mat. 10:35-37; 1 Tim. 5:8). Weneʼ jujun taq mul utz ta kojkil ri qafamilia rumal che are kqabʼan ri kubʼij ri Jehová.
¿La kqakoj qachuqʼabʼ che upatanexik ri Jehová paneʼ kqariq kʼax? (Chawilaʼ ri párrafo 11). e
12. ¿Jas xubʼan ri qachalal Alexandru are chiʼ xbʼan kʼax che rumal ri rixoqil y jas ri xubʼan taj?
12 Chojchoman chrij ri xkikʼulmaj ri qachalal Alexandru y ri rixoqil Dorina. Are chiʼ jun junabʼ chik tajin kketaʼmaj chrij ri Biblia, Dorina xuya kan ri etaʼmanik y xraj che xuqujeʼ ri rachajil kuya kanoq. Are kʼu ri qachalal Alexandru rukʼ utzilal xubʼij che che kraj taj kuya kan ri etaʼmanik. Dorina utz ta xuta ri xubʼij ri rachajil che, rumal laʼ xutzukuj ri xubʼano rech ri Alexandru kuya kan ri etaʼmanik re ri Biblia. Paneʼ ri Alexandru xraj xutoʼ ri rixoqil rech xukʼex ri uchomanik, are kʼu xkun taj. Ri qachalal Alexandru xuchomaj uyaʼik kan ri etaʼmanik are chiʼ Dorina kubʼan kʼax che y kubʼij kʼax taq tzij che. Are kʼu xuya ta kan ri etaʼmanik y xukʼut loqʼoqʼebʼal che ri rixoqil. Ri chuqʼabʼ che xukoj ri qachalal Alexandru xtobʼan che ri rixoqil rech xraj xretaʼmaj chi jumul chrij ri Biblia. (Chawilaʼ ri video Alexandru y Dorina Văcar: «Ri kʼo loqʼoqʼebʼal ukʼuʼx are ri kuqʼiʼ ri kʼax, chʼuchʼuj» pa ri sección «Ri qastzij kukʼex ri kikʼaslemal winaq», pa jw.org).
13. ¿Jas kqabʼan che ukʼutik che qas kqaloqʼoqʼej ri Jehová y ri qafamilia?
13 Ri Jehová xeʼubʼan ri familias y kraj che kkiriq kikotemal (Efes. 3:14, 15). We kqaj kojkikotik, rajawaxik kqabʼan ri ktaqan wi ri Jehová. Ri areʼ nim kril wi ri kqabʼan che upatanexik y ri kqabʼan che kilik ri qafamilia (Rom. 12:10).
CHQATOʼLAʼ QIBʼ RECH KOJUX JUNAM KUKʼ RI NAZAREOS
14. ¿E jachin taq ri rajawaxik keqatoʼo?
14 Qonojel ri tajin kqapatanij ri Jehová rajawaxik qas kqaj kqaya kan ubʼanik jujun jastaq che utz kqilo rumal che kqaj kqapatanij más ri Jehová. Jujun taq mul kʼax kqabʼan che ubʼanik wariʼ. ¿Jas kqabʼan che qatoʼik qibʼ rech kqapatanij más ri Jehová? Rukʼ ri e qatzij (Job 16:5). ¿La kʼo jun qachalal pa ri congregación che tajin kukoj uchuqʼabʼ rech kubʼan más pa ri utinamit ri Jehová? ¿La kachʼobʼ uwach jun ala o ali che tajin kukoj uchuqʼabʼ che ukʼutik pa ri escuela che testigo rech Jehová? ¿La kʼo jun qachalal o tijoxel che itzel kil kumal ri ufamilia rumal che tajin kupatanij ri Jehová? Chqatzukuj ri kqabʼan che kitoʼik y chqabʼij chke che nim kqil ri chuqʼabʼ che kkikojo (Filem. 4, 5, 7).
15. ¿Jas kibʼanom jujun qachalal che kitoʼik ri tajin kepatanin pa tiempo completo?
15 Weneʼ jujun taq mul kojkunik keqatoʼ ri qachalal rech amaqʼel kepatanin pa tiempo completo (Prov. 19:17; Heb. 13:16). Are waʼ ri xubʼan jun qachalal che 76 ujunabʼ che kel pa Sri Lanka. Che xeʼutoʼ kebʼ qachalal alitomabʼ rukʼ ri pwaq che tajin kyaʼ che rumal ri gobierno, rumal che kʼax kkibʼan che uriqik ri kajwataj chke rech kkiya ta kan upatanexik ri Jehová pa tiempo completo. Rumal laʼ ronojel taq ikʼ kuya jubʼiqʼ pwaq chke rech kekunik kkitoj ri teléfono. ¡Sibʼalaj utz ri xuchaʼ ubʼanik wajun qachalal riʼ!
16. ¿Jas kqetaʼmaj chrij ri kikʼutbʼal ri nazareos?
16 ¡Kʼo kʼi qetaʼmam chrij ri xkibʼan ri nazareos! Are kʼu xuqujeʼ kʼo kqetaʼmaj chrij ri loqʼalaj qaTat Jehová. Ri areʼ retaʼm che rukʼ ronojel qanimaʼ kqaj kqapatanij y che xuqujeʼ kqaj kqaya kan ubʼanik jujun jastaq rumal che kqaj kqanimarisaj ri qachak pa ri utinamit. Xuqujeʼ kuya ri utzilal chqe che kqakʼut chuwach che sibʼalaj kqaloqʼoqʼej (Prov. 23:15, 16; Mar. 10:28-30; 1 Juan 4:19). Ri kikʼutbʼal ri nazareos kukʼut chqawach che ri Jehová nim kril ri tajin kqabʼan che upatanexik, rumal laʼ amaqʼel chqapatanij ri Jehová rukʼ ronojel qanimaʼ y chqabʼanaʼ ri kojkun che ubʼanik.
¿JAS KAYA UBʼIXIK?
-
¿Jas kkibʼan ri nazareos che ukʼutik che kkixiʼj ta kibʼ y che kkaj kkipatanij más ri Jehová?
-
¿Jas kqabʼan che kitoʼik nikʼaj chik rech keʼux junam kukʼ ri nazareos?
-
¿Jas kqetaʼmaj chrij ri Jehová rumal ri xkibʼan ri nazareos?
BʼIXONEM 124 Amaqʼel oj sukʼ
a Paneʼ jujun taq mul are ri Jehová keʼuchaʼ ri nazareos are kʼu kʼi chke kitukel kkaj keʼux nazareos (chawilaʼ ri recuadro « Nazareos che e chaʼom rumal ri Jehová»).
b Jujun taq mul ri e qawuj keʼujunamaj ri qachalal che kepatanin pa tiempo completo kukʼ ri nazareos. Are kʼu pa wajun kʼutunem riʼ kqetaʼmaj na che konojel ri upatanelabʼ ri Jehová kekunik keʼux nazareos.
c Ri kkibʼij che keʼux nazareos weneʼ rajawaxik taj kkibʼan jun chi chak che nim ubʼanik, rech kkitzʼaqatisaj ri xkibʼij che ri Jehová.
d Chawilaʼ ri kʼutunem «Elegimos una vida sencilla», re ri sección «Experiencias de los testigos de Jehová», pa jw.org.
e RI KUKʼUT RI WACHBʼAL: Jun nazareo che kkun taj kqebʼ rukʼ ri ufamiliar che kaminaq. Rumal laʼ, tajin koqʼ lo puwiʼ jun ja.
