1. Chayaʼ ubʼixik jasche nim ubʼanik che kojniman che ri Jehová.

 CHACHOMAJAMPEʼ che xatsach pa jun kʼachelaj. E kʼo awaj che kexibʼinik, qʼayes che e venenosas y jalajoj kiwach chikop. Xuqujeʼ weneʼ kachaqʼij awaqan cho jun abʼaj y kattzaqik. ¿La mat qastzij che kamaltyoxij riʼ che kʼo jun winaq che retaʼm ri tajin kakʼulmaj y kuya tobʼanik chawe? Wajun uwach Ulew riʼ kjunamataj rukʼ ri kʼachelaj. Kqariq kʼi kʼax y más na pa ri qakojonik. Are kʼu ri Jehová are kukʼut chqawach ri rajawaxik kqabʼano rech kqariq ta kʼax y kojopan pa ri kotzʼiʼjalaj uwach Ulew, ri kqariq wi ri kʼaslemal che kʼo ta ukʼisik.

2. ¿Jas kubʼan ri Jehová che ukʼamik qabʼe?

² ¿Jas kubʼan ri Jehová che ukʼamik qabʼe? Nabʼe, are ukojom ri utzij ri Biblia. Xuqujeʼ e ukojom winaq rech kkikʼam qabʼe. Jun kʼutbʼal, ukojom ri «jikalaj pataninel utz uchomanik» rech kuya ri kajwataj chqe pa ri qakojonik rech utz ri kqachaʼ ubʼanik pa ri qakʼaslemal (Mat. 24:45). Xaq xiw ta waʼ ukojom ri Jehová che ukʼamik qabʼe. Ri e solinel re circuito y ri kʼamal taq bʼe pa ri congregaciones kkiya qachuqʼabʼ y kkibʼij chqe ri kqabʼan chuwach jujun taq kʼax. Sibʼalaj kqamaltyoxij che ri Jehová che e uyaʼom ri tobʼanik riʼ chqe, rumal che oj kʼo pa kʼaxalaj taq qʼij. Je wariʼ amaqʼel kojux rachiʼl y kqaya ta kan ukojik qachuqʼabʼ rech kqariq ri kʼaslemal che kʼo ta ukʼisik

3. ¿Jas kqanikʼoj na pa wajun kʼutunem riʼ?

³ Paneʼ je wariʼ, are kʼu jujun taq mul kʼax kqabʼan che ubʼanik ri kubʼij ri Jehová, más na are chiʼ xaq winaq che e ajmakibʼ ri kebʼin chqe. ¿Jasche? Rumal che  weneʼ ri kkibʼij chqe are ta ri kqaj kqato. Weneʼ kqachomaj che ri kkibʼij chqe qas ta kʼo upatan y weneʼ kqabʼij, rukʼ ta ri Jehová petinaq wi. Are chiʼ kqakʼulmaj wariʼ rajawaxik che más kqakubʼsaj qakʼuʼx chrij ri Jehová che are kkʼamow ubʼe ri utinamit y ri rajawaxik kqabʼano are ukʼutik nimanik. Rech más kqakubʼsaj qakʼuʼx chrij, pa wajun kʼutunem riʼ kqanikʼoj na oxibʼ jastaq: 1) ¿jas xubʼan ri Jehová che ukʼamik ubʼe ri utinamit ojer kanoq?, 2) ¿jas tajin kubʼan che ukʼamik qabʼe kimik? y 3) ¿jas tewchibʼal kqariqo are chiʼ kojnimanik?

¿JAS XUBʼAN RI JEHOVÁ CHE UKʼAMIK KIBʼE RI ISRAELITAS?

4, 5. ¿Jas xubʼan ri Jehová che ukʼutik che are tajin kukoj ri Moisés che ukʼamik kibʼe ri israelitas? (Chawilaʼ ri wachbʼal re ri uwach ri wuj).

⁴ Ri Jehová xukoj ri Moisés rech xeresaj lo ri israelitas pa Egipto y xukʼut chkiwach che areʼ tajin kkʼamow kibʼe. Jun chke ri e kʼutbʼal che xukojo are ri sutzʼ che xukʼam kibʼe paqʼij y ri qʼaqʼ che xukʼam kibʼe chaqʼabʼ (Éx. 13:21). Ri Moisés xutereneʼj ri sutzʼ y ri qʼaqʼ, wariʼ xubʼano che ri israelitas xeʼopan chuchiʼ ri mar Rojo. Are chiʼ ri israelitas e kʼo chi chupam ri mar Rojo, xkichomaj che ri Moisés utz ta ri xubʼano rumal che xeʼukʼam bʼi chilaʼ. Are kʼu qastzij ta wariʼ rumal che are ri Jehová xbʼin che ri Moisés che keʼukʼam bʼi chilaʼ (Éx. 14:2). Tekʼuriʼ xeʼutoʼ rukʼ jun milagro rech xekam taj (Éx. 14:26-28).

⁵ Pa 40 junabʼ, ri Moisés xuya ta kan uterenexik ri sutzʼ pa ri desierto rech kukʼam kibʼe ri israelitas. a Jujun taq mul ri Jehová xubʼano che ri sutzʼ xkʼojiʼ puwiʼ ri lugar che kʼo wi ri Moisés rech konojel kkilo (Éx. 33:7, 9, 10). Ri Jehová kchʼaw lo pa ri sutzʼ y ri Moisés kuya ubʼixik che ri tinamit ri xbʼix che rumal ri Jehová (Sal. 99:7). Rumal laʼ ri israelitas kekunik kkilo che are ri Jehová ri tajin kkʼamow kibʼe.

6. ¿Jas xkibʼan ri israelitas are chiʼ xkʼam kibʼe rumal ri Jehová? (Números 14:2, 10, 11).

⁶ Are kʼu, e kʼi chke ri israelitas xeniman taj y nim ta xkil wi che ri Jehová are chaʼowinaq ri Moisés (chasikʼij Números 14:2, 10, 11). Rumal che xkikoj taj che are ri Jehová kojowinaq ri Moisés, xekun taj xeʼok chupam ri Tzujum Ulew (Núm. 14:30).

7. ¿E jachin xkiya bʼe che kkʼam kibʼe rumal ri Jehová? (Números 14:24; xuqujeʼ chawilaʼ ri wachbʼal).

⁷ Are kʼu, e kʼo jujun taq israelitas che xeniman che ri Jehová. Jun kʼutbʼal ri Jehová xubʼij: «Ri pataninel wech Caleb [...] nimaninaq kʼu chwe rukʼ jikil» (chasikʼij Números 14:24). Ri Jehová xutewchij y xuya bʼe che are xchaʼowik jawi kkʼojiʼ wi pa Canaán (Jos. 14:12-14). Junam rukʼ ri Caleb, xekʼojiʼ nikʼaj chi israelitas che xuqujeʼ xeniman che ri Jehová. Y konojel ri israelitas nim xkil wi ri Josué, che xchaʼ rumal ri Jehová che ukʼexwach ri Moisés che ukʼamik ubʼe ri utinamit (Jos. 4:14). Rumal laʼ, ri Jehová xeʼutewchij y xekunik xeʼok chupam ri Tzujum Ulew (Jos. 21:43, 44).

8. ¿Jas xubʼan ri Jehová che ukʼamik ubʼe ri utinamit are chiʼ e ukojom qʼatal taq tzij? (Xuqujeʼ chawilaʼ ri wachbʼal).

⁸ Qʼaxinaq chi kʼi junabʼ, ri Jehová xeʼukoj qʼatal taq tzij (jueces) rech kkikʼam ubʼe ri utinamit. Pa ri kiqʼij ri qʼatal taq tzij (reyes) xeʼukoj profetas. Ri qʼatal taq tzij che xkikʼut sukʼilal che ri Dios xkibʼan ri xkibʼij ri profetas. Jun kʼutbʼal, ri qʼatal  tzij David xunimaj ri xbʼix che rumal ri profeta Natán (2 Sam. 12:7, 13; 1 Crón. 17:3, 4). Ri qʼatal tzij Jehosafat xubʼan ri xbʼix che rumal ri profeta Jahaziel y xubʼij chke ri winaq re Judá che kkikubʼaʼ kikʼuʼx chkij ri profetas che ukojom ri Dios (2 Crón. 20:14, 15, 20). Y are chiʼ ri qʼatal tzij Ezequías xuriq kʼax, xutaʼ tobʼanik che ri profeta Isaías (Is. 37:1-6). Are chiʼ ri qʼatal taq tzij keniman che ri Jehová ri areʼ keʼutewchiʼj y kuchajij ri tinamit (2 Crón. 20:29, 30; 32:22). Qas qʼalaj che ri Jehová xeʼukoj ri profetas che ukʼamik ubʼe ri utinamit. Are kʼu e kʼi chke ri qʼatal taq tzij y ri israelitas xeniman ta che (Jer. 35:12-15).

¿JAS XUBʼAN RI JEHOVÁ CHE UKʼAMIK KIBʼE RI CRISTIANOS RE RI NABʼE SIGLO?

9. ¿Jas xubʼan ri Jehová che ukʼamik kibʼe ri cristianos re ri nabʼe siglo? (Xuqujeʼ chawilaʼ ri wachbʼal).

⁹ Pa ri nabʼe siglo, ri Jehová xubʼano che xekʼojiʼ congregaciones. ¿Jas xubʼan ri Jehová che ukʼamik kibʼe pa ri tiempo riʼ? Xukoj ri Jesús che ukʼamik ubʼe ri congregación (Efes. 5:23). Are kʼu, ri Jesús xubʼij ta chke ri cristianos chkijujunal jas kkibʼano, xaneʼ xeʼukoj ri apóstoles y ri kʼamal taq bʼe re Jerusalén rech kkikʼam ubʼe ri congregación (Hech. 15:1, 2). Xuqujeʼ xekʼojiʼ kʼamal taq bʼe pa ri congregaciones rech kkikʼam kibʼe ri qachalal (1 Tes. 5:12; Tito 1:5).

10. a) ¿Jas xkichomaj ri cristianos re ri nabʼe siglo chrij ri xbʼan che ukʼamik kibʼe? (Hechos 15:30, 31). b) ¿Jasche e jujun ojer kanoq xeniman ta chke ri xeʼuchaʼ ri Jehová che ukʼamik kibʼe? (Chawilaʼ ri recuadro « ¿Jasche jujun kekixutuj ri e uchaʼom ri Jehová che ukʼamik ubʼe ri utinamit?»).

¹⁰ ¿Jas xkichomaj ri cristianos re ri nabʼe siglo chrij ri xbʼan che ukʼamik kibʼe? E kʼi chke utz xkilo. Rumal laʼ «xekikotik rumal rech chi xkubʼiʼ kikʼuʼx rumal» ri utz taq tzij che xbʼix chke (chasikʼij Hechos 15:30, 31). Are kʼu, ¿jas tajin kubʼan ri Jehová che ukʼamik ubʼe ri utinamit kimik?

¿JAS KUBʼAN RI JEHOVÁ CHE UKʼAMIK QABʼE KIMIK?

11. Chayaʼ jun kʼutbʼal che kukʼut ri tajin kubʼan ri Jehová che kitoʼik ri tajin kekʼamow qabʼe kimik.

¹¹ Kimik, ri Jehová tajin kukoj ri Biblia y ri Jesús che ukʼamik ubʼe ri utinamit. ¿La xuqujeʼ keʼukoj e winaq che ukʼamik  qabʼe? Keʼukojo. Chojchoman chrij ri xkʼulmataj pa ri siglo diecinueve. Charles Russell y nikʼaj chi achijabʼ xketaʼmaj che ri junabʼ 1914 are ri junabʼ che kʼo ubʼanik rukʼ ri uQʼatbʼal tzij ri Dios (Dan. 4:25, 26). ¿Jasche xketaʼmaj wariʼ? Xkinikʼoj ri profecías re ri Biblia. Y ri Jehová qas xeʼutoʼ che retaʼmaxik wariʼ. Ri xkʼulmataj pa ri uwach Ulew pa ri 1914 xuqʼalajisaj che ri uQʼatbʼal tzij ri Dios xumajij uqʼatik tzij: xmajtaj ri Primera Guerra Mundial y xkʼojiʼ nimaʼq taq yabʼil, kabʼraqan y wiʼjal (Luc. 21:10, 11). Qastzij riʼ che xqʼalajinik che are ri Jehová xekojow ri achijabʼ riʼ rech kutoʼ ri utinamit.

12, 13. ¿Jas xbʼan pa ri Segunda Guerra Mundial rech más xtzijox ri utzij ri Dios y rech más ketaʼmax chrij ri kubʼij ri Biblia?

¹² Chojchoman chrij ri xkʼulmataj pa ri Segunda Guerra Mundial. Ri e qachalal che e kʼo pa ri central mundial xkinikʼoj ri kubʼij pa Apocalipsis 17:8 y xketaʼmaj che kpe ta ri Armagedón are chiʼ kqʼax ri Segunda Guerra Mundial, xaneʼ kkʼojiʼ na jamaril, wariʼ kuya bʼe che ktzijox ri utzij ri Dios chke ri winaq. Rumal laʼ, ri utinamit ri Jehová xumajij ri Colegio Superior Bíblico de la Watchtower de Galaad, b rech ketijox ri misioneros rech kekunik kekitzijoj ri utzij ri Dios pa nikʼaj chi tinamit. Are chiʼ majaʼ kkʼis ri chʼoj, xetaq bʼi e kʼi qachalal pa jalajoj taq tinamit. Xuqujeʼ ri Jupuq Ajkʼamal bʼe cho ronojel uwach Ulew xubʼano che kkʼojiʼ jun curso che kbʼix Ministerio Teocrático c che, rech ketoʼ konojel ri publicadores rech qas utz kkibʼan che utzijoxik ri utzij ri Dios. Ronojel wariʼ xtobʼan chke ri upatanelabʼ ri Jehová che kkitzijoj na ri utzij.

¹³ Qas qʼalaj che are ri Jehová xkʼamow ubʼe ri utinamit pa ri kʼaxalaj taq qʼij riʼ. Are chiʼ xkʼis ri Segunda Guerra Mundial, ri upatanelabʼ ri Jehová xekunik xkitzijoj ri utzij ri Dios pa jalajoj taq tinamit. E kʼi winaq xketaʼmaj uwach ri Jehová y kimik tajin ktzijox ri utzij ri Dios pa ronojel ri uwach Ulew.

14. ¿Jasche kqakubʼsaj qakʼuʼx chrij ri utinamit ri Jehová y chkij ri kʼamal taq bʼe? (Apocalipsis 2:1; xuqujeʼ chawilaʼ ri wachbʼal).

¹⁴ Kimik, ri Jupuq Ajkʼamal bʼe cho ronojel uwach Ulew amaqʼel kkitzukuj ri utobʼanik ri Cristo. Kkaj che rojonel ri kkiya ubʼixik chke ri qachalal qas kqaj chuwach ri Jehová y ri Jesús. Xuqujeʼ kekikoj ri solinelabʼ re circuito y ri kʼamal taq bʼe rech kkibʼij chke ri qachalal ri rajawaxik kkibʼano. d Ri e kʼamal taq bʼe che kebʼe pa ri kaj —xuqujeʼ ri kʼamal taq bʼe pa ri congregaciones— e kʼo «pa uqʼabʼ re uwikiʼaqʼabʼ» ri Cristo (chasikʼij Apocalipsis 2:1). Rumal che ri kʼamal taq bʼe e ajmakibʼ, weneʼ jujun taq mul kesachik junam rukʼ ri xubʼan ri Moisés, ri Josué y ri apóstoles (Núm. 20:12; Jos. 9:14, 15; Rom. 3:23). Are kʼu qas qetaʼm che are ri Jesús kkʼamow kibʼe ri Jupuq Ajkʼamal bʼe cho ronojel uwach Ulew y ri kʼamal taq bʼe pa ri congregación y kuya ta kan ubʼanik wariʼ «ronojel qʼij kʼa pa ri ukʼistajik ri uwach ulew» (Mat. 28:20). Rumal laʼ, qas chqakubʼaʼ qakʼuʼx chkij ri qachalal che ukojom ri Jehová che ukʼamik qabʼe.

RI TEWCHIBʼAL CHE KQARIQO ARE CHIʼ AMAQʼEL KOJNIMAN CHE RI JEHOVÁ

15, 16. ¿Jas kawetaʼmaj chkij ri kiyaʼom bʼe che kkʼam kibʼe rumal ri Jehová?

¹⁵ Are chiʼ kojniman che ri Jehová kqariq kʼi tewchibʼal. Jun kʼutbʼal, Andy y ri rixoqil, Robyn, xkibʼan pa kikʼaslemal ri pixabʼ che kkʼojiʼ ta kʼi jastaq ke (chawilaʼ ri ukabʼ nota de estudio re Mateo 6:22, pa ri Biblia de estudio re La Biblia. Traducción del Nuevo Mundo). Wariʼ xubʼano che xekunik xkiya ri kitobʼanik pa construcción. Ri qachalal Robyn kubʼij: «Oj kʼolinaq pa nitzʼaq taq ja y jujun taq mul kʼo ta cocina chupam, xuqujeʼ sibʼalaj utz kinwilo kinwesaj fotos, are kʼu xenkʼayij kan ri nucámaras y nikʼaj chi jastaq we. Paneʼ rukʼ oqʼej xenkʼayij kanoq, are kʼu xwaj xinbʼan we junam rukʼ ri Sara ri rixoqil ri Abrahán, are ta chi xinchoman chrij ri jastaq we, xaneʼ are ri kinbʼan na che upatanixik ri Jehová» (Heb. 11:15). ¿La kekikot ri qachalal rukʼ ri xkichaʼ ubʼanik? Ri areʼ kubʼij chik: «Sibʼalaj kojkikotik rumal che qetaʼm che tajin kqabʼan ri kojkun che  ubʼanik che upatanixik ri Jehová. Are chiʼ kojchakun rukʼ ri Jehová kubʼano che kojchoman chrij ri kʼaslemal pa ri kotzʼiʼjalaj uwach Ulew». ¿Y jas kuchomaj ri qachalal Andy? Ri are kubʼij: «Kʼo ta kjunamataj wi ri kikotemal che kqanaʼo rumal che tajin kqaya ronojel qachuqʼabʼ che upatanixik ri Jehová».

¹⁶ ¿Jas jun chi utzilal kqariqo are chiʼ kqanimaj ri Jehová? Chqilaʼ ri ukʼutbʼal ri qachalal ixoq ubʼiʼ Marcia. Are chiʼ xel pa ri tijobʼal xumajij ubʼanik ri precursorado (Mat. 6:33; Rom. 12:11). Ri areʼ kubʼij: «Jun chke ri universidad xutzujuj jun beca chwe che kinutoʼ pa kajibʼ junabʼ. Are kʼu, ri kwaj kinbʼan in are che kinpatanij más ri Jehová, rumal laʼ xinwetaʼmaj jun chak rech kinriq ri kajwataj chwe y je riʼ kinbʼan ri precursorado. Wariʼ are jun chke ri sibʼalaj utz che xinchaʼ ubʼanik pa ri nukʼaslemal. Chanim riʼ in precursora regular chik y ri nuchak kuya bʼe chwe che kinya tobʼanik pa Betel y ubʼanik nikʼaj chi eqeleʼn».

17. ¿Jas nikʼaj chi utzilal kqariqo we kqaya bʼe che ri Jehová kukʼam qabʼe? (Isaías 48:17, 18).

¹⁷ Ri utinamit ri Jehová kuya pixabʼ chqe rech kbʼe ta qakʼuʼx chrij ri qʼinomal y nikʼaj chi jastaq che kubʼano che kqanimaj ta chi ri Jehová. Ubʼanik ri kubʼij ri Jehová kuya utzilal chqe, kubʼano che kkʼojiʼ jun utz retaʼmabʼal qakʼuʼx y rech xaq ta kqʼoxow qajolom (1 Tim. 6:9, 10). Y wariʼ kubʼano che kqapatanij ri Jehová rukʼ ronojel qanimaʼ. Xaq xiw upatanixik ri Jehová kuya utzilal y jamaril chqe (chasikʼij Isaías 48:17, 18).

18. ¿Jasche kawaj at che kukʼam abʼe ri Jehová?

¹⁸ Ri Jehová kuya ta kan kikojik achijabʼ che ukʼamik ubʼe ri utinamit pa ri nimalaj kʼaxkʼolil y are chiʼ kuqʼat tzij ri Jesús pa Mil Junabʼ (Sal. 45:16). Pa ri tiempo riʼ, ¿la kojniman chke paneʼ rajawaxik kqaya kan ubʼanik ri e jastaq che utz kqilo? We kimik tajin kojnimanik kʼax ta riʼ kbʼan che ukʼutik nimanik are chiʼ kopan ri qʼij riʼ. Rumal laʼ, amaqʼel chqanimaj ri Jehová, xuqujeʼ ri achijabʼ che tajin keʼukoj che ukʼamik qabʼe (Is. 32:1, 2; Heb. 13:17). Kʼo kʼi rumal che kqaj kqakubʼsaj qakʼuʼx chrij ri Jehová, ri kʼamal qabʼe che kojutoʼ chuwach ri kʼax, rech kojopan pa ri kotzʼiʼjalaj uwach Ulew jawiʼ kqariq wi ri kʼaslemal che kʼo ta ukʼisik.