1. ¿Jas utzalaj bʼantajik kkikʼut ri upatanelabʼ ri Jehová?

 OJER kanoq, ri Biblia xuya kan ubʼixik che ri utinamit ri Jehová rukʼ rutzil kanimaʼ kkiya kitobʼanik rech kkesaj uwach ri uKʼojol (Sal. 110:3). Kimik riʼ, tajin ktzʼaqatisax wajun profecía. Ronojel taq junabʼ rukʼ rutzil kanimaʼ ri upatanelabʼ ri Dios kʼi taq horas kiyaʼom che utzijoxik ri utzij ri Dios y kʼo ta rajil kkita che wajun chak riʼ. Xuqujeʼ kkiya ri kitiempo rech kekitoʼ ri e qachalal pa ri kikojonik y pa nikʼaj chi jastaq che kajwataj chke. Ri kʼamal taq bʼe y ri siervos ministeriales kkikoj kʼi horas che utijoxik kibʼ rech kkiya chʼabʼal, y kekisolij ri qachalal rech kkiya kichuqʼabʼ. Ri loqʼoqʼebʼal che kkinaʼ che ri Jehová y ri kajil kitzʼaqat kubʼano che kkibʼan wariʼ (Mat. 22:37-39).

2. Junam rukʼ ri kubʼij Romanos 15:1-3, ¿jas utzalaj kʼutbʼal xuya kan ri Jesús?

² Ri Jesús are más xrilij ri kajwataj chke ri e nikʼaj chik chuwach ri rech areʼ. Y ri oj cristianos kqakoj qachuqʼabʼ rech kqesaj uwach (chasikʼij uwach Romanos 15:1-3). We jeʼ kqabʼano, kqariq kʼi utzilal. Ri Jesús xubʼij: «Are sibʼalaj utz na re ri kyanik chuwach ri kkʼamowik» (Hech. 20:35).

3. ¿Jas kqil na pa wajun kʼutunem?

³ Pa wajun kʼutunem kqetaʼmaj na ri xubʼan ri Jesús che kitoʼik ri e nikʼaj chik y kqil na jas kqabʼan che resaxik  uwach. Xuqujeʼ kqetaʼmaj na ri rajawaxik kqabʼano rech kqaya más tobʼanik chke ri e nikʼaj chik.

4. ¿Jas xubʼan ri Jesús che ukʼutik che are nabʼe xrilij ri kajwataj chke ri e nikʼaj chik chuwach ri rech areʼ?

⁴ Ri Jesús xeʼutoʼ ri nikʼaj chik paneʼ sibʼalaj kosinaq. Chojchomanampeʼ chrij ri xubʼano are chiʼ e kʼi winaq xebʼe che rilik chunaqaj jun juyubʼ, weneʼ naqaj che Capernaúm. Ri Jesús jun aqʼabʼ xubʼan uchʼawem, weneʼ rumal wariʼ sibʼalaj kosinaq. Are kʼu, are chiʼ xeril ri winaq che e mebʼaʼ y e yawabʼ xutoqʼobʼisaj kiwach. Xaq xiw ta xeʼukunaj y xeʼutoʼo, xaneʼ xuqujeʼ xuya chke ri jeʼlalaj chʼabʼal: ri Sermón del Monte (Luc. 6:12-20).

5. ¿Jas kkibʼan ri e kʼamal bʼe pa ri familia che resaxik uwach ri Jesús are chiʼ e kosinaq?

⁵ Ri kkibʼan ri e kʼamal taq bʼe re ri familia che resaxik uwach ri Jesús. Chojchoman chrij jun tat che xopan cho ja che sibʼalaj kosinaq lo che jun qʼij chak y rajawaxik kubʼan ri qʼijilanik pa ri familia. Weneʼ kuchomaj che kʼateʼ kkibʼan chi pa jun chi qʼij, are kʼu kutaʼ uchuqʼabʼ che ri Jehová. Ri Jehová kutzalij uwach ri uchʼawem y kkibʼan ri qʼijilanik pa ri familia. Pa ri qʼij riʼ, ri e kalkʼwal kketaʼmaj che chkiwach ri kitat kinan más nim ubʼanik ri jastaq re ri kikojonik.

6. Chabʼijampeʼ jas xubʼan ri Jesús che uyaʼik utiempo che kitoʼik e nikʼaj chik.

⁶ Jesús xuya utiempo che kitoʼik ri e nikʼaj chik. Chojchomanampeʼ chrij wariʼ: ri Jesús kʼateʼ xretaʼmaj che xkamisax ri Juan el Bautista, qastzij riʼ che sibʼalaj xbʼisonik. Ri Biblia kubʼij: «Xetaʼmataj kʼut rumal ri Jesús ri xkʼulmatajik, xel bʼik chilaʼ pa jun jukubʼ man kʼo ta jun xnabʼenik, xbʼe pa ri chaqiʼj uwo saq pa utukel wi» (Mat. 14:10-13). Weneʼ ri Jesús kraj che xaq utukel kkʼojiʼk, junam che kkibʼan e jujun winaq chiʼ kkam jun kachalaxik. Are kʼu ri Jesús kkun taj kubʼan wariʼ, rumal che sibʼalaj e kʼi e winaq keyem chi pa ri lugar che kraj kopan wi. ¿Jas xubʼano? Xchoman chrij ri kajwataj chke ri e winaq riʼ y «xel ukʼuʼx chke». Xuchomaj ta na  we keʼutoʼo, xaneʼ xrilo che rajawaxik kubʼsal kʼuʼx chke. Rumal laʼ, «xuchaplej kitijoxik chke kʼi jastaq» (Mar. 6:31-34; Luc. 9:10, 11).

7, 8. Chayampeʼ jun kʼutbʼal chrij ri kkibʼan ri e kʼamal taq bʼe che resaxik uwach ri Jesús are chiʼ kkiya tobʼanik che jun qachalal.

⁷ Ri kkibʼan ri kʼamal taq bʼe che resaxik uwach ri uloqʼoqʼebʼal ri Jesús. ¿La mat qastzij che sibʼalaj nim kqil ri chak che kkibʼan ri kʼamal taq bʼe pa ri congregación? Oj kʼi qetaʼm taj jas nikʼaj chi chak kkibʼano. Jun kʼutbʼal, are chiʼ kʼo jun qachalal aninaq kkʼam bʼi pa jun hospital, ri e kʼo pa ri Comités de Enlace con los Hospitales aninaq kebʼe che kitoʼik ri qachalal che kʼo kajwataj chke, y kʼi taq mul nikʼaj aqʼabʼ kebʼek. Are kʼu rumal che kel kikʼuʼx chke ri qachalal, ri kʼamal taq bʼe riʼ y ri kifamilias are más kkilij na ri kajwataj chke ri e nikʼaj chik chuwach ri kech e areʼ.

⁸ Ri e kʼamal taq bʼe xuqujeʼ ketobʼan che uyakik Ja rech Ajawbʼal y nikʼaj chi kʼolbʼal ri kyaʼ wi uqʼij ri Dios, xuqujeʼ kkiya tobʼanik chke ri qachalal che kkiriq kʼax rumal jun kabʼraqan, jun nimalaj jabʼ o jun chi kʼax. Y kkiya kʼi taq horas che kitijoxik, kitoʼik y uyaʼik kichuqʼabʼ ri e qachalal pa ri congregación. Taqal chke ri e kʼamal taq bʼe y ri kifamilias che kqabʼij utz taq tzij chke rukʼ ronojel qanimaʼ. Are ta bʼaʼ ri Jehová chyaʼow kichuqʼabʼ che ubʼanik ronojel ri kkibʼano. Y junam kukʼ ri e nikʼaj chi cristianos, ri e kʼamal taq bʼe rajawaxik kkʼojiʼ jun utzalaj kichomanik chrij ri kkibʼan che ukojik ri kitiempo. Utz taj che mat kekilij chi ri kifamilias rumal ri keqelen pa ri congregación.

9. Junam che kubʼij Filipenses 2:4, 5, ¿jas chomanik rajawaxik kkʼojiʼ qukʼ ri oj cristianos?

⁹ (Chasikʼij uwach Filipenses 2:4, 5). Qastzij wi che qonojel taj oj kʼamal taq bʼe, are kʼu qonojel kojkunik kqesaj uwach ri Jesús che kitoʼik e nikʼaj chik. Ri Biblia kubʼij che ri «areʼ xukʼam ri uwachbʼal jun loqʼom pataninel» (Filip. 2:7). ¿Jas kqetaʼmaj chrij ri e tzij riʼ? Jun utzalaj pataninel kraj che kubʼan jastaq che kqaj chuwach ri rajaw. Rumal che oj upatanelabʼ ri Jehová y keqapatanij ri e qachalal, kqaj kqanimarisaj más ri qachak che kipatanexik. ¿Jas kqabʼan che ubʼanik? Chqilampeʼ.

10. ¿Jas chrij rajawaxik kojchoman wi?

¹⁰ Chanikʼoj ri abʼantajik. Chachomaj: «Paneʼ kʼo kʼi kinbʼano, ¿la kwaj kentoʼ ri e nikʼaj chik? ¿Jas kinbʼan riʼ we kbʼix chwe che kinbʼe che usolixik jun qachalal nim chi ujunabʼ o che kinkʼam bʼi jun qachalal ixoq che nim chi ujunabʼ pa ri riqbʼal ibʼ? ¿La kwaj kinya nutobʼanik che ujosqʼixik ri lugar che kbʼan wi ri nim riqbʼal ibʼ o ri Ja rech Ajawbʼal?». Are chiʼ xqajach ri qakʼaslemal che ri Jehová, xqabʼij che, che kqaya ronojel che rech kqapatanij, chupam wariʼ kʼo ri qatiempo y ri jastaq qech. Rumal laʼ ri areʼ sibʼalaj kkikotik are chiʼ kqakoj ri jastaq riʼ che kitoʼik e nikʼaj chik. Are kʼu, ¿jas rajawaxik kqabʼano chiʼ kqilo che kʼo jun jastaq rajawaxik kqakʼexo?

11. ¿Jas kubʼan ri chʼawem che qatoʼik rech kqaj keqatoʼ ri e nikʼaj chik?

¹¹ Rukʼ ronojel awanimaʼ chabʼanaʼ achʼawem che ri Jehová. We kanaʼo che kʼo jun jastaq rajawaxik kakʼexo chataʼ che ri Jehová che katkunik kakʼexo. Chabʼij ri kanaʼo y chataʼ che, che kuya chawe «ri urayixik ubʼanik ri kqaj chuwach» (Filip. 2:13).

12. ¿Jas kkibʼan ri alabʼom che kibʼanom chi kiqasanjaʼ che uyaʼik tobʼanik pa ri congregación?

¹² We at ala y abʼanom chi aqasanjaʼ, utz che kataʼ che ri Jehová che katutoʼ rech kawaj kabʼan más chak pa ri congregación. Pa jujun taq lugares kʼo na más e kʼamal taq bʼe y e kʼi chke ri siervos ministeriales nim chi kijunabʼ. Rumal che xa más tajin knimar ri utinamit ri Jehová, kajwataj más kitobʼanik e alabʼom rech kekitoʼ ri e kʼamal taq bʼe che kichajixik ri qachalal pa ri congregación. We rukʼ ronojel awanimaʼ kaya ri atobʼanik jawiʼ más kajwataj wi, sibʼalaj katkikot na riʼ rumal che kabʼan ri utz kril ri Jehová, kkʼojiʼ jun utzalaj abʼantajik chuwach y kawaj keʼatoʼ ri e nikʼaj chik.

13, 14. ¿Jas kojkunik kqabʼano rech keqatoʼ ri e qachalal? (Chawilaʼ ri wachbʼal re ri uwach ri wuj).

¹³ Qas chawilij ri kajwataj chke ri e nikʼaj chik. Ri apóstol Pablo xuya wajun pixabʼ pa ri ucarta che xutaq bʼi chke ri Hebreos: «Chibʼanaʼ utzil. Chijachalaʼ ri jastaq iwech chbʼil iwibʼ. Masach waʼ pa ijolom. Je taq sipanik waʼ keqaj chuwach ri Dios» (Heb. 13:16). ¡Xaq are le pixabʼ xyaʼ chke ri cristianos riʼ! Are chiʼ majaʼ naj kisikʼim wajun carta, ri cristianos re Judea rajawaxik xkiya kan ri kachoch, ri kikʼay, ri kifamiliares che e cristianos taj, y xeʼanimaj bʼik rech kebʼe pa taq ri kʼachelaj (Mat. 24:16). Qastzij che pa riʼ ri qʼij rajawaxik riʼ che xkitolaʼ kibʼ. We nabʼe kanoq kibʼanom chi ri pixabʼ xuya ri Pablo chke, nim xeʼutoʼ wi riʼ are chiʼ xeʼanimaj bʼik rech xkitolaʼ kibʼ.

¹⁴ Weneʼ ri e qachalal amaqʼel taj kkibʼij  chqe jas kajwataj chke. Chojchomanampeʼ chrij ri kukʼulmaj jun qachalal che xkam ri rixoqil. ¿La kajwataj tobʼanik che rech kubʼan ri urikil, rech kkʼam bʼi pa ri riqbʼal ibʼ o weneʼ kʼo jujun taq chak kbʼan pa ri rachoch? Weneʼ kʼo ta kubʼij rumal che kraj taj kuya jun eqaʼn chkij ri e nikʼaj chi qachalal. Are kʼu sibʼalaj kumaltyoxij riʼ we kqabʼij che, che kqaj kqatoʼo. Kqachomaj taj che kʼo jun chik ktoʼwik o kʼateʼ kqatoʼo we kubʼij chqe. Chqataʼ wariʼ chbʼil qibʼ: «We ta in tajin kinkʼulmaj ri tajin kukʼulmaj, ¿jas jastaq riʼ kinmaltyoxij kbʼan chwe?».

15. ¿Jas rajawaxik kqabʼano we kqaj keqatoʼ ri e nikʼaj chik?

¹⁵ Chakʼutuʼ che amaqʼel kawaj keʼatoʼ ri e nikʼaj chik. Qastzij riʼ che pa ri qacongregación e kʼo e qachalal achijabʼ ixoqibʼ che amaqʼel kkaj kekitoʼ ri e nikʼaj chik. Ni ta jumul kkibʼij o kkibʼano che xa jun eqaʼn kqaya chkij we kqataʼ tobʼanik chke. Xaneʼ amaqʼel e kʼo che qatoʼik y kqaj kqesaj uwach ri kibʼantajik. Jun kʼamal bʼe che kʼo 45 ujunabʼ, Alan ubʼiʼ, amaqʼel keʼutoʼ ri e nikʼaj chik. Rumal che kchoman chrij ri ukʼutbʼal ri Jesús, ri areʼ kubʼij: «Ri Jesús sibʼalaj latzʼ uwach, are kʼu konojel taq ri e winaq jalajoj kijunabʼ xkaj xekʼojiʼ rukʼ y xubʼan ta kebʼ kikʼuʼx che utaʼik tobʼanik che. Ketaʼm che qastzij kok il chke. Ri qas kwaj are che kinux junam rukʼ ri Jesús y ri e nikʼaj chik kkilo che, amaqʼel kwaj kentoʼo, kenloqʼoqʼej y qas kwil ri kajwataj chke».

16. ¿Jas tobʼanik kuya chqe ri Salmo 119:59, 60 rech qas utz kqabʼan che resaxik uwach ri Jesús?

¹⁶ Rajawaxik che kubʼan ta kebʼ qakʼuʼx we kojkun ta che resaxik uwach ri Jesús rukʼ tzʼaqatil (Sant. 3:2). Jun tijoxel kkun taj kresaj uwach ri rajtij rukʼ tzʼaqatil,  are kʼu we kʼo ksach wi y kukoj ronojel uchuqʼabʼ che usukʼumaxik rech kresaj uwach ri rajtij, qas utz kel ri kubʼano. Xaq junam, we kqabʼan ronojel ri qetaʼmam pa ri Biblia y kqakoj qachuqʼabʼ che usukʼumaxik ri utz taj xqabʼan kan ojer, kojkunik kqesaj uwach ri ukʼutbʼal ri Jesús (chasikʼij uwach Salmo 119:59, 60).

17, 18. ¿Jas utzilal kqariqo we kqesaj uwach ri xubʼan ri Jesús che kitoʼik ri e nikʼaj chik?

¹⁷ Paneʼ kʼo kʼi kqabʼano are kʼu kqaj keqatoʼ ri e nikʼaj chik, kkil ri e nikʼaj chik y jeʼ kkibʼano. Jun kʼamal bʼe Tim ubʼiʼ kubʼij: «Pa ri qacongregación e kʼo alabʼom che nimarinaq ri kikojonik y xeʼux siervos ministeriales. Jun jastaq che xetowik are che xekil e nikʼaj chik che qas kkaj kekitoʼ ri e qachalal y xkimaj ubʼanik ke ri xkilo. Ri kkibʼan waʼ taq siervos ministeriales che kkaj kekitoʼ ri e kʼo pa ri congregación are jun nimalaj tobʼanik chke ri e kʼamal taq bʼe».

¹⁸ Pa ri uwach Ulew más e kʼi ri winaq che xaq xiw kechoman chbʼil taq kibʼ, are kʼu ri kqapatanij ri Jehová oj junam ta kukʼ. Sibʼalaj nim kqil wi ri kʼutbʼal re ri Jesús che paneʼ kʼo kʼi xubʼano, xeʼutoʼ konojel ri e winaq y kqaj kqesaj uwach. Qastzij che kojkun taj kqesaj uwach rukʼ tzʼaqatil, are kʼu kojkunik kqaterenej «ri retal raqan» (1 Ped. 2:21). We kqakoj ronojel qachuqʼabʼ che resaxik uwach ri Jesús kojqaj riʼ chuwach ri Jehová y kuya nimalaj kikotemal chqe.