Sibʼalaj bʼisobʼal rumal che are chiʼ xinux qʼapoj ali utz ta chi kwilo kinpatanij ri Jehová. Xwilo che ri e wachiʼl pa ri tijobʼal kkibʼan ri kkaj kkibʼano, rumal laʼ xwaj xinux junam kukʼ. Xinchomaj che ri kitaqanik ri nunan nutat y ri Jehová sibʼalaj kʼax kinimaxik. Paneʼ amaqʼel xinkojo che kʼo Dios are kʼu kinkikot ta chi pa ri nukojonik.

Paneʼ xinya ta kan ri Jehová are kʼu rech kʼo ta kbʼix chwij xinya ta kan ubʼanik ri nuchak che, xaq xiw che rukʼ ta chi ronojel wanimaʼ xinbʼano. Kintijoj ta wibʼ are chiʼ kinbʼe che utzijoxik utzij ri Dios, rumal laʼ kinriq taj jas kinbʼij chke ri e winaq. Rumal wariʼ kʼo ta jun winaq kinya etaʼmanik re ri Biblia che, keʼinsolij ta ri e winaq y utz ta chi kwilo kintzijoj utzij ri Dios. Xinchomaj: «¿Jachin kkunik kubʼan wariʼ ronojel semanas y ronojel ikʼ?».

Are chiʼ xtzʼaqat 17 nujunabʼ, kwaj ta chik che ri nutat nunan ketaqan pa nuwiʼ. Rumal laʼ, xinbʼe pa Australia. Ri nutat nunan  sibʼalaj xebʼisonik, are kʼu xkikubʼsaj kikʼuʼx che chilaʼ kintaqej ubʼanik ri jastaq re ri nukojonik.

Are chiʼ in kʼo chi pa Australia sibʼalaj xinqaj pa ri nukojonik. Qas ta chi kinbʼe pa ri e riqbʼal ibʼ, xeʼinriq wachiʼl che xaq e junam wukʼ, kojbʼe pa ri riqbʼal ibʼ y chukabʼ qʼij kojbʼe pa qʼabʼarik y pa xojowem. Xwilo che tajin kinbʼan kebʼ jastaq, jubʼiqʼ pa ri nukojonik y jubʼiqʼ re ri uwach ulew, xinnaʼo che kʼo ta chi kyaʼow kikotemal chwe.

Qʼaxinaq chi kebʼ junabʼ, xwetaʼmaj uwach jun qachalal che xinutoʼ che uchʼobʼik che utz ta ri tajin kinbʼan pa ri nukʼaslemal. Oj jobʼ alitomabʼ oj kʼo pa jun ja, y xqabʼij che ri solinel re circuito y ri rixoqil Tamara ubʼiʼ che kekanaj kan qukʼ. Are chiʼ ri qachalal kril ri jastaq re ri congregación, ri rixoqil kkanaj kan qukʼ y sibʼalaj kojjajatik y kojkikotik rumal kʼi jastaq kqabʼano. Wariʼ sibʼalaj utz xwilo. Paneʼ jun winaq nim ri ukojonik, kraj ta kubʼij che mat ktzeʼnik y kkikotik.

Tamara sibʼalaj utz krilo kutzijoj ri utzij ri Dios y wariʼ xubʼano che oj xqabʼan qe. Xwilo che areʼ tajin kukoj ronojel ri ukʼaslemal che upatanexik ri Jehová y sibʼalaj kkikotik. Are kʼu ri in che kʼi ta tajin kinbʼano kinkikot taj. Rukʼ ri ubʼantajik kʼo xwetaʼmaj chrij: xwetaʼmaj che ri Jehová kraj kqapatanij rukʼ nimalaj kikotemal y rukʼ ronojel qanimaʼ (Sal. 100:2).

Xwaj xinnaʼ ri kikotemal junam rukʼ ri qachalal Tamara, are kʼu rech kinkunik kinbʼano rajawaxik kinkʼex jujun jastaq pa ri nukʼaslemal. Wariʼ xukʼam bʼi tiempo are kʼu nojimal xinmaj chi jumul utijoxik wibʼ che utzijoxik utzij ri Dios y xinbʼan jujun taq mul ri precursorado auxiliar. Wariʼ sibʼalaj xinutoʼ rech xinxibʼij ta chi wibʼ che utzijoxik utzij ri Dios. Rumal che amaqʼel tajin kinkoj chi ri Biblia xuya kikotemal chwe. Xinmaj ubʼanik ri precursorado auxiliar ronojel taq ikʼ.

 Xeʼinriq wachiʼl che e ko pa ri kikojonik y rukʼ kikotemal tajin kkipatanij ri Jehová. Ri utz kikʼutbʼal xinutoʼ rech kwilo jas ri qas nim ubʼanik pa ri nukʼaslemal y xinmaj ukowirisaxik ri nukojonik. Sibʼalaj utz kwil chik are chiʼ kinel che utzijoxik utzij ri Dios rumal laʼ xinmaj ubʼanik ri precursorado regular. Xinmaj unaʼik nimalaj kikotemal pa ri congregación che kʼo ta jumul nunaʼom.

Are chiʼ qʼaxinaq chi jun junabʼ xwetaʼmaj uwach ri a Alex, are jun qachalal che sibʼalaj utz krilo kutzijoj ri utzij ri Dios y sibʼalaj kuloqʼoqʼej ri Jehová. Siervo ministerial y seis junabʼ chik precursor regular. Xuqujeʼ petinaq jujun ikʼ pa Malaui che utzijoxik utzij ri Dios jachiʼ rajawaxik wi más tobʼanik. Chilaʼ xeʼuriq wi jujun misioneros che xkiya kan jun utzalaj kʼutbʼal chuwach rech qas are krilij upatanexik ri Dios.

Pa ri 2003 xinkʼuliʼ rukʼ ri a Alex y qakojom ronojel ri qatiempo che upatanexik ri Jehová. Kʼo kʼi qetaʼmam y ri Jehová sibʼalaj oj utewchim.

Pa ri 2009, xojux misioneros y xojtaq bʼi pa ri tinamit Timor Oriental, are jun alaj tinamit che kʼo naqaj che Indonesia. Sibʼalaj xqamayo, xojkikotik are kʼu xuqujeʼ xqaxibʼij qibʼ. Are kʼu chiʼ qʼaxinaq chi jobʼ ikʼ xojopan pa Dili, ri unimal ri tinamit.

Rajawaxik xukʼam qawach chilaʼ rumal che jalan ri rikil, ri chʼabʼal y nikʼaj chi jastaq. Are chiʼ kqatzijoj utzij ri Dios, keqariq winaq che sibʼalaj e mebʼaʼ, xebʼe ta pa tijobʼal y sibʼalaj kiriqom kʼax rumal ri chʼoj che xbʼanik. *

¡Sibʼalaj utz utzijoxik ri utzij ri Dios chilaʼ! Rumal che ri e winaq kiriqom kʼax, jun kʼutbʼal,  jumul xinriq jun alaj ali che kʼo 13 ujunabʼ, María ubʼiʼ. * Sibʼalaj kbʼisonik rumal che kaminaq chi ri unan y qas ta kril uwach ri utat pa ri tiempo riʼ. Ri alaj ali kuriq taj jas kubʼan pa ri ukʼaslemal, jumul rukʼ oqʼej xumaj ubʼixik chwe ri kunaʼo. Are kʼu ri in qas ta xinchʼobʼ ri xubʼij, rumal che kʼa majaʼ qas kwetaʼmaj ri uchʼabʼal, rumal laʼ xinta che ri Jehová che kinutoʼ che uyaʼik uchuqʼabʼ ri alaj ali. Xinsikʼij jujun textos chuwach rech kinkubʼsaj ukʼuʼx. Are chiʼ xqʼax kebʼ oxibʼ junabʼ xwilo che nojimal xkʼextaj ri ukʼaslemal ri alaj al María, xubʼan uqasanjaʼ y kimik tajin keʼutoʼ nikʼaj chi winaq rech kketaʼmaj ri kukʼut ri Biblia. Kunaʼo che are ri e qachalal ri nimalaj ufamilia y qas kajawax kumal.

Qastzij wi che ri Jehová utewchim ri kbʼan che utzijoxik ri utzij pa Timor Oriental. Paneʼ más e kʼi chke ri winaq kʼateʼ xkibʼan kiqasanjaʼ pa ri kʼisbʼal taq 10 junabʼ, e kʼo kʼi siervos ministeriales chik, e kʼamal taq bʼe y precursores. E nikʼaj chik tajin ketobʼan pa ri oficinas che kiqʼaxexik ri e wuj pa ri chʼabʼal re ri tinamit ri e kʼo wi. Sibʼalaj kuya kikotemal rilik che pa ri e riqbʼal ibʼ konojel kebʼixon rukʼ ronojel kanimaʼ, kekikotik y kekʼiy más pa ri kikojonik.

Ri e jastaq pa Timor Oriental, e junam ta rukʼ ri e kʼo pa Australia. Are kʼu sibʼalaj xinkikot chilaʼ. Jujun taq mul kojbʼe pa jun alaj bus che nojinaq bʼi chke e kʼi winaq che kʼateʼ xetzalij lo pa ri kʼaybʼal che uloqʼik chaqiʼj taq kar y kʼi uwach ichaj. Ri kachoch ri winaq che kqaya etaʼmanik chke sibʼalaj nitzʼ y sibʼalaj kubʼan qʼaqʼ chupam, xaq ulew ri upa kachoch y kkoqatala kibʼ ri akʼ chqanaqaj. ¡Sibʼalaj xinkikotik xinkʼojiʼ chilaʼ! Paneʼ xqariq jujun kʼax are kʼu sibʼalaj kʼi jastaq utz xwilo.

Are chiʼ kinchoman chrij ri nukʼaslemal ojer sibʼalaj kinmaltyoxij chke ri nunan nutat che xkikʼut chnuwach chrij ri Jehová más na are chiʼ in qʼapoj ali chik. Xkʼulmataj wukʼ ri kubʼij Proverbios 22:6, ri nutat nunan sibʼalaj kekikot wukʼ y rukʼ ri a Alex, rumal che ri Jehová uyaʼom kʼi eqeleʼn chqe pa ri utinamit. Xumaj lo pa ri 2016 ri a Alex are ri solinel re circuito pa ri territorio che krilij ri sucursal re Australasia.

Kinkoj taj che jun tiempo sibʼalaj xinqaj pa ri nukojonik, rumal che ¡kimik sibʼalaj utz chi kwilo kintzijoj ri utzij ri Dios! Wilom che ri qas kuya kikotemal are upatanixik ri Jehová rukʼ ronojel qanimaʼ paneʼ kʼo kʼax kqariqo. Ri 18 junabʼ che nupatanim ri Jehová rukʼ ri a Alex uyaʼom nim kikotemal chwe, kimik qas kinchʼobʼ chik ri xubʼij ri David che ri Jehová: «Chekikot ri kkitzukuj ri uchʼuqik kibʼ ukʼ la; amaqʼel chebʼixon rumal kikotemal [...]. Ri keloqʼoqʼen che la kekikot rumal ech la» (Sal. 5:11).