Ri Biblia kubʼij che pa taq ri qaqʼij kilitaj na chʼoj, kabʼraqan, yabʼil y nikʼaj chi xibʼibʼal taq jastaq (Lucas 21:10, 11). Pa ri junabʼ re servicio 2022 a qas xqilo che xtzʼaqat wajun profecía riʼ. Jun kʼutbʼal, e kʼi winaq tajin kkiriq kʼax rumal ri chʼoj pa Ucrania. Y e kʼi winaq cho ronojel ri uwach Ulew tajin kkiriq na kʼax rumal ri COVID-19. Xuqujeʼ, e kʼi xkiriq kʼax rumal ri desastres naturales, junam rukʼ ri e kabʼraqan che xubʼan pa Haití y ri kaqiqʼ jabʼ che xubʼan pa Centroamérica, pa Filipinas y pa ri sureste re África. ¿Jas xkibʼan ri testigos rech Jehová che kitoʼik ri xkiriq kʼax rumal ri desastres naturales?

 Pa ri junabʼ re servicio 2022, ri utinamit ri Jehová xubʼan kʼi chak rech xeʼutoʼ ri xkiriq kʼax rumal 200 desastres naturales. Ri pwaq che xsachik, jubʼiqʼ kraj che 12 millones de dólares. b Chqilampeʼ jas tajin kbʼan che ukojik ri kuchuj che kitoʼik ri winaq che xkiriq kʼax rumal kebʼ desastres naturales.

 Pa ri 14 re agosto 2021, xkʼulmataj jun nimalaj kabʼraqan che 7,2 unimal (magnitud) pa ri sur re Haití. Pa ri kabʼraqan riʼ e kebʼ qachalal ixoqibʼ y jun qachalal achi xekamik. Wajun kabʼraqan riʼ xaq xiw ta xuya bʼis chke ri qachalal xaneʼ xuqujeʼ xkiriq kʼax pa ri kicuerpo. Jun Testigo Stephane ubʼiʼ kubʼij wariʼ: «E kʼi winaq xekam pa ri tinamit, pa kebʼ ikʼ ronojel taq semanas e kʼi kaminaq kemuqik». Jun chi Testigo, Éliézer, ubʼiʼ kubʼij: «E kʼi Testigos rech Jehová kʼo ta chi kachoch, katzʼyaq, kixajabʼ y nikʼaj chi jastaq che kajwataj chke. Y e kʼi pa kʼi taq ikʼ xkinaʼ xibʼin ibʼ rumal che amaqʼel kubʼan kabʼraqan».

 Ri utinamit ri Jehová, aninaq xumajij uyaʼik tobʼanik. Ri sucursal re Haití xuya tiendas de campaña, lonas, colchones, cargadores solares re celulares y xuya más che 53 toneladas re jastaq che ktijowik. Xuqujeʼ, xesukʼumax o xebʼan más che 100 ja. Xkoj más che jun millón de dólares che uyaʼik tobʼanik.

 Ri e qachalal sibʼalaj xkimaltyoxij ri tobʼanik che xyaʼ chke. Lorette kubʼij wariʼ: «Ri kabʼraqan xusach uwach ri qachoch y ri qakʼay. Kʼo ta chi kqatijo. Are kʼu ri utinamit ri Jehová amaqʼel xuya ri xajwataj chqe». Micheline kubʼij: «Ri in y ri e kebʼ wal xa pa jun kʼim ja oj kʼo wi, rumal laʼ xuchʼij ta ri kabʼraqan. Xaq xiw ri nuchʼawem xinkunik xinbʼano, ri Jehová xutzalij uwach ri nuchʼawem are chiʼ xukoj ri utinamit che nutoʼik. Rumal ri kitobʼanik ri qachalal, kimik más utz chi ri qachoch kʼolik. Ri Jehová kʼi ubʼanom che nutoʼik y kwaj kinkʼut che ronojel taq qʼij che kimaltyoxij ronojel ri ubʼanom».

 Ri tobʼanik che xuya ri labores de socorro xilitaj kumal ri qʼatal taq tzij re ri tinamit. Jun kʼamal bʼe re ri qʼatbʼal tzij re L’Asile xubʼij: «Kwaj kinbʼij chiwe che sibʼalaj utz che aninaq xixpe che uyaʼik ri tobʼanik. ¡Y xaq xiw ta laʼ! Xuqujeʼ, amaqʼel kikʼutu che nim kiwil wi ri e qʼatal taq tzij. Sibʼalaj utz kinwilo che are ta nim kiwil ri pwaq, xaneʼ are kel ikʼuʼx chke ri winaq. Qas qʼalaj che rumal loqʼoqʼebʼal kibʼan ronojel».

 Pa ri 24 re enero 2022, ri kaqiqʼ jabʼ Ana xopan pa Mozambique tekʼuriʼ xqʼax pa Malaui. Xubʼan nimalaj taq jabʼ y kaqiqʼ che 100 kilómetros (62 millas) por hora xubʼinibʼej. Xubʼan kʼax che ri luz, chke ri qʼaʼm y xubʼano che xok jaʼ pa taq ri kachoch ri winaq.

 Más che 30,000 testigos rech Jehová pa Malaui y pa Mozambique xkiriq kʼax rumal ri kaqiqʼ jabʼ. Charles, jun chke ri qachalal che xtobʼan pa ri labores de socorro, xubʼij: «Sibʼalaj xinbʼisonik. Are chiʼ xwil ri kʼax che tajin kkiriq ri qachalal y che kʼo ta chi jastaq ke, wariʼ xubʼano che xinnaʼ jun nimalaj bʼis pa ri wanimaʼ». Xuqujeʼ, ri ktijowik y ri e tikoʼn xsach uwach rumal ri kaqiqʼ jabʼ. E kʼi xuqujeʼ kʼo ta chi kachoch. Y, sibʼalaj bʼisobʼal rumal che jun chke ri qachalal xkam ri rixoqil y ri alaj taq kebʼ umiʼal; xejiqʼik are chiʼ ri lancha che kkoj che kitoʼik ri winaq xwolqotij pa ri jaʼ.

 Ri kaqiqʼ jabʼ sibʼalaj xuya xibʼin ibʼ. A la una de la mañana, ri familia Sengeredo che kʼo pa Nchalo, Malaui, sibʼalaj xkixeʼj kibʼ rumal che kjinin ri jaʼ che tajin knaqajin che ri kachoch. ¡Rumal che kebʼ nimaʼ xenimarik y xel lo ri jaʼ! Ri qachalal Sengeredo xubʼij chke ri ufamilia che rajawaxik keʼel bʼi pa ri kachoch. Y utz ri xkichaʼ ubʼanik, rumal che majaʼ naj e elenaq bʼik, ri jaʼ xuwulij ri kachoch y ronojel ri jastaq ke ri qachalal che kʼo pa ri kachoch xuriq kʼax o xkʼam bʼi rumal ri jaʼ. Ri familia riʼ xebʼe pa ri Ja rech Ajawbʼal, che 30 minutos kʼo wi che ri kachoch, are kʼu pa ri chaqʼabʼ riʼ kebʼ horas xkibʼano rech xeʼopan chilaʼ. Sibʼalaj e kosinaq y chʼaqal ri katzʼyaq, are kʼu utz kiwach.

 Ri sucursales pa Malaui y pa Mozambique aninaq xkitaq bʼi tobʼanik. Xkibʼij chke ri solinelabʼ re circuito y ri kʼamal taq bʼe che kkil ri kajwataj chke ri qachalal y che kkiya ri kajwataj chke pa ri kikojonik y kkikubʼsaj kikʼuʼx. Xebʼan kʼi Comités de Socorro rech kkikʼam ubʼe ri tobʼanik che kyaʼik. Rumal ri kitobʼanik, pa naj ta tiempo xyaʼ ri kajwataj chke ri qachalal, ri kiwa y nikʼaj chi jastaq che kajwataj chke. Xsach 33,000 dólares rech kyaʼ ri kajwataj chke ri qachalal y más che 300,000 dólares rech kbʼan kachoch o ksukʼumaxik.

 Ri Comités de Socorro utz xkibʼan che ukojik ri kuchuj, wariʼ nim ubʼanik rumal che xpaqiʼ rajil ronojel ri jastaq. Jun kʼutbʼal, are chiʼ siete ikʼ chik kimajim uyaʼik tobʼanik ri labores de socorro, xpaqiʼ rajil ri kʼaj re ixim —che are más ktijow pa Malaui— xpaqiʼ 70%. Xuqujeʼ xpaqiʼ ri rajil ri gasolina. Rech ksach ta más pwaq, ri qachalal pa kʼi xkiloqʼ ri jastaq chke ri ajkʼayibʼ che e kʼo pa ri tinamit. Je wariʼ xqasax rajil ri jastaq y nim ta pwaq xkitojo are chiʼ xejach kan chke.

 Ronojel wariʼ xuya kichuqʼabʼ ri upatanelabʼ ri Jehová. Felisberto, jun qachalal che kel pa Mozambique, kubʼij: «Man kʼo ta kjunamataj wi ri utinamit ri Dios che sibʼalaj ksipanik: xuya ri kajwataj chqe rech kqabʼan ri qachoch, ri transporte, ri ajchakibʼ, ri kqatijo y rukʼ loqʼoqʼebʼal kukʼam qabʼe. Are jun kʼutbʼal che ri loqʼoqʼebʼal che xubʼij kan ri Jesús pa Juan 13:34, 35». Ester, jun qachalal pa Malaui che kʼo ta chi rachajil y che kʼo ta chi rachoch, kubʼij chqe: «¡Kinriq taj jas kinbʼano! Kʼo ta chi nupwaq rech kinbʼan chi jun wachoch. Rumal laʼ, are chiʼ xeʼopan ri qachalal y xkibʼan jun chi wachoch, xinnaʼo che jetaneʼ in kʼo chi pa ri kotzʼiʼjalaj uwach Ulew».

 Ri desastres naturales amaqʼel kekʼulmataj na, kʼa kbʼan na kʼakʼ che ri uwach Ulew (Mateo 24:7, 8). Are kʼu, rumal ri kuchuj che tajin kiyaʼo, qas qetaʼm che ri utinamit ri Jehová amaqʼel kyaʼ ri tobʼanik che are chiʼ kajwatajik. Pa donate.jw.org kiwetaʼmaj na jas kbʼan che uyaʼik ri kuchuj. ¡Sibʼalaj kqamaltyoxij ri kuchuj che kiyaʼo!