Pa enero 2021, ri Jupuq Ajkʼamal bʼe cho ronojel uwach Ulew xuqʼalajisaj che kʼo chi jun kʼakʼ wuj (libro) che kkoj che uyaʼik etaʼmanik re ri Biblia ubʼiʼ Kʼaslemal kʼo ta ukʼisik. a ¿Jas xanaʼo are chiʼ xata wariʼ? Ri qachalal Matthew, che kel pa Canadá, xubʼij ri xunaʼo: «¡Sibʼalaj xinmayo! Y, are chiʼ xinta ri e chʼabʼal y xinwil ri video jasche xbʼan wajun kʼakʼ wuj riʼ y che ri e qachalal kikojom chi kukʼ ri winaq, más xinkikotik. ¡Xwaj che ya taneʼ kʼo chi wukʼ y che kinmaj ukojik!»

 Wajun wuj riʼ kukoj jun kʼakʼ método che kitijoxik ri winaq, are kʼu xuwi ta wariʼ kbʼanowik che junam ta kukʼ ri nikʼaj chi wuj che qakojom ojer kanoq. We kʼo chi ri wuj awukʼ, awilom riʼ che kʼo jun jastaq che kjunamataj ta wi kukʼ ri e nikʼaj chik. ¿La kawaj kawetaʼmaj jas riʼ? Are ri kbʼan che ubʼanik ri wuj Kʼaslemal kʼo ta ukʼisik.

 Ri upimal ri wuj che xkoj che. Rech xbʼan ri wuj Kʼaslemal kʼo ta ukʼisik xajwataj jun wuj che más pim. ¿Jasche? Rumal che wajun wuj riʼ kʼo más che 600 wachbʼal chupam, 10 mul más kʼi chuwach ri kʼo pa ri wuj Jas kukʼut. Xuqujeʼ chuchiʼ kʼo wuj che kʼo ta tzʼibʼam chuwach ni wachbʼal. Ri kebʼ jastaq riʼ kuya kʼax che ri wuj. ¿Jasche? Rumal che we xax ri wuj, ri e wachbʼal keʼilitaj lo pa ri jun chi uxaq ri wuj, paneʼ xa jubʼiqʼ. Rech kkʼulmataj ta wariʼ, ri e qachalal re ri Departamento Internacional re Impresión pa Wallkill (Nueva York) xkikoj kajibʼ wuj che tajin chi kekoj pa ri qimprentas rech kkilo jachin ri más utz. Ri Comité re Redacción re ri Jupuq Ajkʼamal bʼe cho ronojel uwach Ulew xkinikʼoj wariʼ y xuchaʼ ri wuj che más pim. Qastzij wi che ri wuj riʼ más che 16% paqal rajil chuwach ri nikʼaj chi qawuj. Are kʼu, wariʼ kubʼano che ri winaq che kkojow ri wuj Kʼaslemal kʼo ta ukʼisik qas kchoman chrij ri tajin kril pa ri uxaq che ujaqom uwach y xa ta are kril ri wachbʼal o ri e tzij che keqʼalajin lo pa ri jun chi uxaq.

 Ri forro che xkoj chrij ri rij ri wuj. Ri rij ri wuj Kʼaslemal kʼo ta ukʼisik jun wi ubʼanik rumal che xkoj jun forro chrij rech kuriq ta kʼax. Ri rij ri e nikʼaj chi wuj kpilpitik, are kʼu wajun wuj riʼ xbʼan forrar rukʼ mate ri rij rech qas qʼalaj ri wachbʼal che kʼo chuwach. Xuqujeʼ, ri forro riʼ ktobʼanik rech aninaq ta kqʼelobʼ ri wuj rumal che amaqʼel kkojik. Are kʼu ri rajil ri forro mate 5 mul más paqal chuwach ri rajil ri kpilpitik. Rumal laʼ kʼi chke ri sucursales pa junamam xechakunik rech xkiriq jun forro mate che qas ta paqal rajil.

 Are kʼu we más paqal rajil ri mate, ¿jas kʼu che are xkoj wariʼ? Jun qachalal che kchakun pa ri Departamento Internacional re Impresión kubʼij wariʼ chqe: «Rumal che wajun wuj riʼ amaqʼel kkojik, rajawaxik qas utz kbʼan che rech chanim ta kqʼelobʼik». Ri qachalal Eduardo, che kchakun pa ri Oficina re ri Imprenta pa ri sucursal re Brasil, kubʼij wariʼ: «Sibʼalaj kojkikotik rumal che ri utinamit ri Jehová tajin kukoj ri jastaq che más utz kibʼanik, wariʼ kojutoʼo rech sibʼalaj utz kqanaʼ ukojik wajun jeʼlalaj wuj riʼ y naj tiempo kuchʼijo, xuqujeʼ utz tajin kubʼan che ukojik ri e kuchuj».

 Xqamajij lo ubʼanik imprimir ri wuj Kʼaslemal kʼo ta ukʼisik pa marzo 2021, pa ri nimalaj yabʼil COVID-19, rumal laʼ kʼo jujun taq kʼax che xojqʼatenik. Rumal che xtzʼapix ri Betel, xuya ta chik xeʼopan ri e qachalal che kechakun pa ri imprentas y kuya taj che kesikʼix chi nikʼaj qachalal rech keʼux betelitas. Rumal laʼ, pa jujun taq sucursales e kʼo ta chi qachalal che ketobʼanik, y pa nikʼaj chik, rajawaxik xetzʼapixik ri imprentas rumal ri e taqanik che xkiya ri e qʼatbʼal tzij.

 ¿Jas xbʼan chuwach ri e kʼax ri’? Are chi’ xejaq chi jumul ri imprentas, xbʼix chke jujun betelitas re nikʼaj chi departamentos che ketobʼan jubʼiqʼ tiempo pa wa’ chak ri’. Ri qachalal Joel, che kchakun pa ri Departamento Internacional re Impresión, kubʼij: «Ri utz taq kibʼantajik y rumal che kkaj kketaʼmaj kʼakʼ taq jastaq xojutoʼo rech kojkunik kqabʼan ronojel ri chak che rajawaxik».

 Paneʼ xqariq ri e kʼax riʼ, sibʼalaj e kʼi wuj Kʼaslemal kʼo ta ukʼisik qabʼanom chi imprimir, y kojom kʼi jastaq che ubʼanik wariʼ, junam rukʼ ri impresoras, forros, wuj, tinta y nakʼbʼal wuj. Pa ri nabʼe 5 ikʼ che xqamajij ubʼanik, sachom chi más che 2,3 millones dólares chrij ronojel waʼ jastaq riʼ. Rech más ta kʼi pwaq ksachik, xaq xiw tajin kqesaj bʼi ri wuj che qas kkikoj ri congregaciones.

 ¿Jas kkinaʼ ri ajtijabʼ y ri tijoxelabʼ are chiʼ kkikoj wajun kʼakʼ wuj riʼ? Jun qachalal achi re Australia ubʼiʼ Paul kubʼij: «Sibʼalaj utz kwil ukojik wajun wuj riʼ che uyaʼik etaʼmanik re ri Biblia. Sibʼalaj jeʼl kkaʼyik y kubʼano che kojtzijon más rukʼ ri tijoxel, kʼax ta uchʼobʼik ri kʼo chupam y kʼo preguntas che kubʼano che qas kchoman ri winaq, videos, wachbʼal, recuadros xuqujeʼ kubʼij jujun jastaq che rajawaxik kubʼan ri tijoxel. Sibʼalaj utz bʼanom che; rukʼ wajun wuj riʼ kwaj kinux más jun utz ajtij».

 Jun tijoxel re ri Biblia che kel pa Estados Unidos xubʼij: «Sibʼalaj utz kwil ri kʼakʼ wuj, ri e wachbʼal kinutoʼ che uchʼobʼik ri chomanik nim kibʼanik, y rilik ri videos qas kopan pa wanimaʼ y kubʼano che kwaj kinbʼan pa nukʼaslemal ri tajin kwetaʼmaj». Wajun tijoxel riʼ kbʼe pa ronojel ri e riqbʼal ibʼ y kebʼ mul pa jun semana kyaʼ ri etaʼmanik re ri Biblia che.

 Rajawaxik na kebʼan imprimir kʼi wuj Kʼaslemal kʼo ta ukʼisik pa kʼi taq chʼabʼal. Rumal laʼ, ri Jupuq Ajkʼamal bʼe cho ronojel uwach Ulew xubʼij che pa 710 chʼabʼal keʼesax wi loq, 340 más chuwach ri wuj Jas kukʼut.

 ¿Jawiʼ kekʼam wi ri pwaq che kkojik? Are ri kuchuj che kyaʼ pa ri obra mundial. Kʼi chke waʼ taq kuchuj riʼ are ri kebʼan pa donate.jw.org. Sibʼalaj nim kqil ri kuchuj che kiya. Rumal wariʼ, kojkunik keqabʼan wuj rech kqaya etaʼmanik chke ri winaq, jeriʼ kketaʼmaj más uwach ri Jehová y kkiriq ri kʼaslemal che kʼo ta ukʼisik (Salmo 22:26).