RI Dios xubʼano che ri Ukʼojol che kkunik kubʼan jastaq che ri winaq kekun ta che ubʼanik rumal laʼ xubʼan kʼi milagros, kʼi chike xubʼan chkiwach kʼi winaq. Rukʼ waʼ, ri Jesús xukʼutu che kkunik kusach kiwach ri e kikʼulel ri winaq. Chqilaʼ jujun kʼutbʼal.

Ri wiʼjal. Ri nabʼe milagro che xubʼan ri Jesús —xubʼan vino che ri joron— xukʼutu che kkunik kuya sibʼalaj kiwa xuqujeʼ kukʼyaʼ ri winaq. Kʼo kebʼ mul xubʼan kʼi che kebʼ oxibʼ kaxlanwa xuqujeʼ kar rech xuya kiwa sibʼalaj kʼi winaq. Pa ri kebʼ mul riʼ ri winaq xkikʼis ta ri ktijowik.

Ri yabʼil. Ri Jesús xukunaj «ronojel ri kiyabʼilal xuqujeʼ ri kiqʼoxomal» ri winaq (Mateo 4:23). Xeʼukunaj ri kekaʼy taj, ri tzʼapal kixikin, ri ubʼanom kʼax kaqan, ri kʼo chʼaʼk chikij xuqujeʼ ri kʼo yabʼil chike che keʼutzaqisaj. Qastzij, ri uchuqʼabʼ sibʼalaj nim kʼot jun yabʼil che mat kkun che ukunaxik.

Ri nimaʼq taq kaqiqʼ. Pa jun aqʼabʼ, chiʼ ri Jesús xuqujeʼ ri apóstoles e bʼenaq pa jun jukubʼ puwiʼ ri plo, o mar, rech Galilea, xpe jun nimalaj kaqiqʼ puwiʼ ri plo. Ri rajtijoxelabʼ sibʼalaj xkixibʼij kibʼ, are kʼu ri Jesús xaq xiw xkaʼy chikaj xuqujeʼ xubʼij: «Chattanaloq, xa jun chatkʼol wi». Xtaniʼ kʼu ri kaqiqʼ puwiʼ ri plo (Marcos 4:37-39). Pa jun qʼij chik xbʼin puwiʼ ri plo chiʼ kʼo nimalaj kaqiqʼ puwiʼ (Mateo 14:24-33).

Ri itzel taq uxlabʼal. Ri uxlabʼal riʼ, che kbʼix demonios chike, ri e areʼ kʼo más kichuqʼabʼ chqawach oj. Rumal laʼ kibʼanom kʼax chike kʼi winaq, kʼi chike ri winaq kekun taj kkesaj kibʼ pa kiqʼabʼ. Are kʼu ri Jesús kuxibʼij ta ribʼ chkiwach. Ri e areʼ kkixibʼij kibʼ chiʼ kkilo xuqujeʼ aninaq kkinimaj chiʼ kubʼij chike che kkibʼan ta chi kʼax chike ri winaq.

Ri kamikal. Ri Utzij ri Dios kubʼij «ri kʼisbʼal kʼulel» che, weneʼ kimik o chweʼq kabʼij kqariqo qonojel (1 Corintios 15:26). Tekʼuriʼ, ri kamikal xkun taj xutakʼabʼa ribʼ chuwach ri Cristo, rumal che areʼ xuya chi jumul ri ukʼaslemal ri ral jun malkaʼn ixoq xuqujeʼ ri ukʼaslemal jun alaj ali. Are kʼu ri qas nim ubʼanik are ri xbʼan rukʼ ri rachiʼl ubʼiʼ Lázaro, che kajibʼ qʼij chik kaminaq chiʼ Jesús xuwalajisaj chkiwach kʼi winaq. Ri winaq pa neʼ e itzel xkichʼobʼ ri nimalaj uchuqʼabʼ ri Jesús (Juan 11:38-48; 12:9-11).

Tekʼuriʼ, chiʼ xeqʼax ri qʼij, ri winaq che Jesús xeʼutoʼ xeyawajik xuqujeʼ xekam chi jumul. ¿Jas xupatanij ri milagro? Sibʼalaj kʼi upatan, xukʼutu che ri bʼim kan chirij ri Ajawbʼal rech ri Mesías qastzij. Ri Ajawinel che ri Jehová xukojo qastzij kukʼis na tzij puwiʼ ri wiʼjal, ri yabʼil, ri qʼeqal jabʼ o kabʼraqan, ri itzel taq uxlabʼal xuqujeʼ ri kamikal. Qastzij qetaʼm che ri Jehová kubʼano che kkun ri Jesús che kubʼanik.

(Esam chupam Mateo, Marcos, Lucas xuqujeʼ Juan.)