Ri Pablo xubʼij rukʼ ri utobʼanik ri Ajawaxel che kʼo jujun mul ri ixoqibʼ rajawaxik kkichʼuq ri kijolom chiʼ kkipatanej ri Jehová. ¿Jampaʼ rajawaxik kkibʼano, xuqujeʼ jasche? Chqilaʼ ri xubʼij ri Pablo pa 1 Corintios 11:3-16 rech kkilo ri rajawaxik kkibʼano rech kkiya uqʼij ri Ajawaxel. Pablo xukʼut oxibʼ jastaq che rajawaxik kqilo: 1) ri kkibʼano chiʼ rajawaxik kkichʼuq ri kijolom; 2) ri jachiʼ kbʼan wi wa täq chak riʼ, xuqujeʼ 3) ri rumal kbʼan wajun taqonik riʼ.

Ri kkibʼano. Ri Pablo xubʼij kebʼ jastaq: ri ubʼanik ri chʼawem xuqujeʼ ri uqʼaxexik tzij (versículos 4, 5). Rumal che, junam rukʼ ri kqachʼobʼo, ri chʼawem are jun jastaq rech kqaya uqʼij ri Jehová; xuqujeʼ, ri uqʼaxexik tzij kraj kubʼij kimik ri ukʼutik chirij ri Loqʼalaj Pixabʼ che kibʼan ri cristianos achijabʼ xuqujeʼ ixoqibʼ. Tekʼuriʼ, ¿la xraj xubʼij ri Pablo che ri e qachalal ixoqibʼ kkichʼuq ri kijolom chiʼ kkibʼan chʼawem o kkikʼut chirij ri Loqʼalaj Pixabʼ? Are ta xraj kubʼij. Ri qastzij, are rajawaxik ri ukabʼ bʼantajik: ri jachiʼ kbʼan wi wa täq chak riʼ.

Ri jachiʼ kbʼan wi. Ri apóstol Pablo xubʼij kebʼ jachiʼ kbʼan wi: pa ri familia xuqujeʼ pa ri congregación. Xutzʼibʼaj: «Ri achi areʼ ujolom ri rixoqil, [...] ronojel kʼu ixoq ri kubʼan chʼawem rukʼ Dios, o kuqʼaxej tzij chke ri winaq ri yoʼm che rumal ri Dios, we man chʼuqutal ri ujolom, karesaj ukʼixbʼal ri ujolom» (versículos 3, 5). Pa ri familia, Jehová uyaʼom ri taqonik che are ri achi ri ajkʼamal bʼe puwiʼ ri ixoq. Rumal laʼ, ¿jas rajawaxik kbʼanik chiʼ ri ixoq kubʼan ri chak che Jehová uyaʼom che ri achi? We kukʼut täj che kunimaj ri taqoʼn che are ri achi ajkʼamal bʼe, kresaj ukʼixbʼal. Chqilaʼ kʼi kʼutbʼal re. Chiʼ jun ixoq rajawaxik kukʼut chuwach jun winaq ri  kubʼij ri Loqʼalaj Pixabʼ tekʼuriʼ kʼo ri rachajil che unaqaj. Rumal ri taqonik che yaʼom che are ri achi ajkʼamal bʼe, rajawaxik ri ixoq kuchʼuq ri ujolom. Wariʼ utz kbʼanik pa neʼ ri achi ubʼanom uqasanjaʼ o ubʼanom täj, rumal che are ajkʼamal bʼe puwiʼ ri familia. * ¿Jas kbʼanik we jun ixoq rajawaxik kubʼan ri chʼawem o kukʼut chirij ri Utzij ri Ajawaxel chiʼ kʼo ri ral ala che ubʼanom chi uqasanjaʼ? Pa neʼ ri ala are ta ajkʼamal bʼe puwiʼ ri familia, ri nan rajawaxik kuchʼuq ri ujolom. ¿Jasche? Rumal che are kunimaj ri taqonik yaʼom pa ri congregación chikij ri achijabʼ che kibʼanom chi kiqasanjaʼ.

Ri Pablo xchʼaw chirij ri ukabʼ, ri congregación, chiʼ xutzʼibʼaj: «We kʼo jun karaj kubʼan chʼoj chrij waʼ, chretamaj chi ri uj xuqujeʼ konojel ri komon kojonelabʼ aj Dios, man uj kʼo ta chuxeʼ jun naqaʼtisabʼal chik» (versículo 16). Ri ukʼamik ubʼe ri congregación, Jehová uyaʼom chike ri achijabʼ che kibʼanom kiqasanjaʼ (1 Timoteo 2:11-14; Hebreos 13:17). Rumal laʼ, xaq xiw uyaʼom chike ri achijabʼ che kkibʼan ajkʼamal bʼe puwiʼ ri congregación xuqujeʼ ri ketobʼan kukʼ ri ajkʼamal bʼe (Hechos 20:28). Tekʼuriʼ kʼo jujun mul rajawaxik che jun ixoq kubʼan ri chak che are rajawaxik jun achi che ubʼanom chi uqasanjaʼ xuqujeʼ kkun che ubʼanik kbʼanowik. Jun kʼutbʼal re, weneʼ ri ixoq rajawaxik kubʼan ri riqbʼal ibʼ rech ktzijox ri utzij ri Ajawaxel rumal che kʼo ta jun qachalal achi che kkunik kubʼano. Wajun riqbʼal ibʼ riʼ are jun chike ri tijonik che kuya ri congregación, che rajawaxik jun qachalal achi kbʼanowik. Xuqujeʼ je waʼ kbʼanik we jun ixoq kbʼe che uyaʼik jun etaʼmanik chirij ri Loqʼalaj Pixabʼ, tekʼuriʼ kʼo jun qachalal achi che ubʼanom chi uqasanjaʼ rukʼ. * Rumal laʼ, ri ixoq rajawaxik kuchʼuq ri ujolom rumal che kubʼan ri chak che are jun achi rajawaxik kbʼanowik.

Tekʼuriʼ, ri cristiana rajawaxik täj kuchʼuq ri ujolom chiʼ kubʼan nikʼaj chik jastaq che kʼo ubʼanik rukʼ ri uqʼijilaxik ri Jehová. Jun kʼutbʼal re, chiʼ kubʼij kebʼ oxibʼ tzij pa ri riqbʼal ibʼ, o chiʼ kubʼij chirij ri Ajawaxel chuchiʼ täq ja (pa neʼ bʼenaq rukʼ ri rachajil o  rukʼ jun qachalal achi) xuqujeʼ chiʼ kubʼan ri uchʼawem o kukʼut chirij ri Loqʼalaj Pixabʼ chuwach ri ral ala che ubʼanom ta uqasanjaʼ. Tekʼuriʼ, ¿jas rajawaxik kubʼan ri ixoq we kʼo jastaq che kuchʼobʼ ta chirij? Nabʼe, rajawaxik kutzukuj nikʼaj chik etaʼmabʼal chirij. * Tekʼuriʼ we kuchʼobʼ täj jampaʼ kuchʼuq ri ujolom, xuqujeʼ ri retaʼmabʼal ukʼuʼx kubʼij che utz kubʼano, utz we kraj kuchʼuq ri ujolom junam rukʼ ri ubʼanom che uchʼuqik ri ujolom ri qachalal che kʼo pa ri wachbʼal.

Ri rumal. Pa ri versículo 10 kqariq kebʼ jastaq che kutoʼ ri cristiana che ubʼanik wajun taqonik riʼ: «Rumal riʼ, rajawaxik chi ri ixoq kakʼojiʼ jun etal che ri ujolom chi kʼo chuxeʼ taqanik, rumal kech ri taqoʼnibʼ ajchikaj [o ángeles]». Ri nabʼe rumal are ri xbʼix rukʼ waʼ tzij riʼ «jun etal che ri ujolom chi kʼo chuxeʼ taqanik». Qastzij wi, ri jastaq che kuya ri ixoq pa ujolom are jun etal che kunimaj ri taqoʼn che uyaʼom ri Jehová pa ri congregación chike ri achijabʼ che kibʼanom chi kiqasanjaʼ. Rukʼ wariʼ, ri ixoqibʼ kkikʼut ri kiloqʼoqʼenik xuqujeʼ ri kisukʼilal che ri Ajawaxel. ¿Jas ri ukabʼ rumal? Junam rukʼ ri kubʼij ri versículo, «rumal kech ri taqoʼnibʼ ajchikaj». Tekʼuriʼ ¿jas kubʼan chike ri ángeles che nim kichoqʼabʼ chiʼ kkilo che ri ixoq kuchʼuq ri ujolom?

Ri ángeles kkil ronojel ri kkibʼan ri e rajpatanel ri Jehová, ri e kʼo pa ri kaj xuqujeʼ ri e kʼo pa ri uwach Ulew, xuqujeʼ qas kkilo ri kbʼan che unimaxik ri utaqonik ri Jehová. Xuqujeʼ, chiʼ keniman ri winaq che e ajmakibʼ are jun kʼutbʼal chkiwach ri e areʼ. Rumal che, ri e ángeles riʼ rajawaxik kkikʼutu che keniman che ri utaqonik ri Jehová, ojer kanoq konojel täj xenimanik (Judas 6). Kimik kkil utz kʼutbʼal chiʼ jun qachalal ixoq rukʼ ronojel ranimaʼ kniman che kitaqanik ri achijabʼ che kibʼanom chi kiqasanjaʼ, pa neʼ areʼ kʼo más nim retaʼmabʼal. Xuqujeʼ areʼ qas nim ubʼanik ri kʼutbʼal we  ri qachalal ixoq che kubʼan wariʼ are jun chike ri e chaʼom che kebʼe pa ri kaj. ¿Jasche? Rumal che wajun qachalal ixoq riʼ kkʼejeʼ na che kixoʼl ri keʼajawin rukʼ ri Cristo pa ri kaj, wariʼ sibʼalaj nim ubʼanik chuwach ri kibʼantajik ri e ángeles. Rukʼ wariʼ, kqilo che ri ixoqibʼ kekun che ubʼanik jun jastaq che nim ubʼanik. Rukʼ ri kisukʼilal xuqujeʼ chiʼ keniman rukʼ ronojel ri kanimaʼ kkiya jun utz kʼutbʼal chkiwach ri ángeles rech kbʼan ta nim che ibʼ xuqujeʼ nimanik.