Loqʼalaj taq qachalal:

Ri kqaloqʼoqʼej ri Jehová kqaloqʼoqʼej ri Utzij, ri Biblia. Qas qetaʼm che kqariq tzʼaqatalaj taq bʼantajik chupam, pixabʼ che kukubʼsaj qakʼuʼx pa ri kʼaslemal xuqujeʼ kʼutbʼal re ri uloqʼoqʼebʼal ri Jehová chke konojel winaq (Salmo 119:105; Lucas 1:3; 1 Juan 4:19). Ri kqaj are che nikʼaj chik kketaʼmaj chrij ri utzalaj taq tzij che kʼo pa ri Utzij ri Dios. Rukʼ wajun chomanik riʼ, rukʼ kikotemal kqakʼut wajun wuj riʼ: E kʼutunem che kwetaʼmaj pa ri Biblia. Kqaj kqabʼij chiwe jujun chke ri jastaq che kʼo chupam.

Wajun wuj riʼ xbʼanik rech ketoʼ ri akʼalabʼ. Are kʼu, xuqujeʼ ktobʼan chke ri tzʼaqat chi kijunabʼ che kkaj kketaʼmaj más chrij ri Biblia. Xuqujeʼ, rumal che ri Biblia are jun wuj che utz kkikoj konojel winaq, qas qetaʼm che qonojel kojutoʼ are chiʼ kqanikʼoj ri e kʼutunem che kʼo chupam, rumal che kubʼano che kqanaʼ qastzij kikotemal.

Ri e kʼutunem che kʼo pa wajun wuj riʼ esam pa ri Biblia. Kuya ubʼixik ri xkikʼulmaj ri winaq ojer, kumaj lo are chiʼ xebʼanik. Qas xchomax ri e kʼutunem che e kʼo chupam rech qas qʼalaj, kʼax ta uchʼobʼik xuqujeʼ, are chiʼ kuya, ktzʼibʼax pa ri cholajil che xebʼanik.

Are kʼu, wajun wuj riʼ xiw ta kuya ubʼixik ri xebʼantaj ojer che kʼo pa ri Biblia. Ri e textos xuqujeʼ ri e wachbʼal e bʼanom rech ri e kʼutunem re ri Biblia qas kchʼobʼtajik xuqujeʼ kukʼut ri kibʼantajik ri e winaq che e kʼo chupam.

Ri wuj riʼ kkunik kukʼut chqawach che ri Biblia are jun wuj kchʼaw chkij winaq: ri xkinimaj ri Jehová xuqujeʼ ri xkinimaj taj. Xuqujeʼ kojutoʼ rech kqetaʼmaj chrij ri kʼutbʼal che xkiya ri e winaq riʼ (Romanos 15:4; 1 Corintios 10:6). Ri wuj jachom pa 14 secciones. Are chiʼ kumaj jun jupuq, kʼo jun resumen che kojutoʼ che retaʼmaxik chrij ri e kʼutunem che e kʼo chupam.

 We e kʼo awalkʼwal, katkunik kasikʼij uwach jun kʼutunem kukʼ, xuqujeʼ junam kiya ubʼixik chrij ri e wachbʼal. Tekʼuriʼ, kixkunik kisikʼij uwach jun texto re ri Biblia che esam wi ri kʼutunem. Chatoʼ ri awalkʼwal rech kril ri kjunamataj ri kusikʼij uwach pa ri Biblia rukʼ ri e kʼutunem che kʼo pa ri wuj. Xuqujeʼ utz che je kabʼan waʼ rukʼ jun winaq che nim chi ujunabʼ rech kabʼij che ri kutzijoj ri Biblia.

Ri qas kqaj are che wajun wuj riʼ keʼutoʼ ri e winaq che kʼo utz kanimaʼ, junam kukʼ ri alabʼom alitomabʼ xuqujeʼ ri nim chi kijunabʼ, che retaʼmaxik ri kubʼij ri Utzij ri Dios xuqujeʼ kkikoj pa ri kikʼaslemal ri ukʼutunem. Rech e areʼ xuqujeʼ kkiya uqʼij ri Jehová xuqujeʼ kekʼojiʼ pa ri loqʼalaj ufamilia.