Jun chke ri tinamit rech Asiria ubʼiʼ Nínive, ri e winaq sibʼalaj e itzel. Jehová xutaq bʼi ri ajqʼaxal tzij Jonás rech kbʼe pa Nínive xuqujeʼ kubʼij chke ri winaq che kkikʼex ri kikʼaslemal. Are kʼu xbʼe ta pa Nínive, Jonás xanimaj bʼi pa jun chi tinamit xbʼe pa jun barco che kbʼe pa jun tinamit ubʼiʼ Tarsis.

Are chiʼ ri barco kʼo pa uwiʼ ri mar, xpe jun nimalaj kaqiqʼ, ri kebʼinisan ri barco sibʼalaj xkixibʼij kibʼ. Xkibʼan kichʼawem che ri e kidios xuqujeʼ xkichomaj: «¿Jasche kqakʼulmaj wariʼ?». Matam, Jonás xubʼij chke: «Numak in. Xa tajin kinanimajik rech kinbʼan ta ri xunutaq Jehová che ubʼanik. Chinikʼaqaʼ bʼi pa ri jaʼ rech ktaniʼ ri kaqiqʼ». Ri kebʼinisan ri barco kkaj taj kkikʼaq bʼi Jonás pa ri jaʼ, are kʼu areʼ xuya ta kan ubʼixik chke. Rumal laʼ xkikʼaq bʼi pa ri mar, ri kaqiqʼ xtanik.

Jonás xuchomaj che kkamik. Are chiʼ tajin kqaj bʼi más pa ri mar, xubʼan uchʼawem che Jehová. Tekʼuriʼ Jehová xutaq bʼi jun nimalaj kar rech kubʼiqʼ bʼi Jonás, are kʼu kukamisaj taj. Chupam ri kar, Jonás xubʼan uchʼawem che Jehová: «Qas kinbʼij chawe che amaqʼel katinnimaj». Jehová xubʼano che Jonás xkam ta chupam ri kar pa oxibʼ qʼij tekʼuriʼ xubʼano che ri kar xresaj lo chuchiʼ ri mar.

Jehová xukol Jonás, are kʼu ¿la kraj kubʼij wariʼ che kbʼe ta chi pa Nínive? Kraj taj. Jehová jumul chik xutaq bʼik, pa waʼ jumul riʼ Jonás  xnimanik. Xbʼe chilaʼ xuqujeʼ xubʼij chke ri itzel taq winaq: «Jehová kusachisaj uwach ri tinamit pa 40 qʼij». Tekʼuriʼ xkʼulmataj jun jastaq che kʼo ta jun winaq uchomam. Ri e ninivitas xkita ri xubʼij xuqujeʼ xkikʼex ri kikʼaslemal. Ri ajawinel re Nínive xubʼij chke ri e winaq: «Chitaʼ toqʼobʼ che ri Dios xuqujeʼ chikʼexaʼ ikʼuʼx, weneʼ jeʼ wariʼ kusach ta qawach». Are chiʼ Jehová xrilo che ri winaq xkikʼex kibʼ, xusach ta kiwach.

Jonás xpe royowal rukʼ Jehová rumal che xusach ta uwach ri tinamit. Chachomaj jubʼiqʼ: Jehová xukʼut paciecia rukʼ Jonás xuqujeʼ xutoqʼobʼisaj uwach. Are kʼu Jonás xutuqʼobʼisaj ta kiwach ri e winaq re ri tinamit Nínive. Pa ukʼaxel waʼ, xpe chrij ri tinamit xtʼuyiʼ chuxeʼ jun cheʼ ubʼiʼ calabaza vinatera petinaq royowal. Tekʼuriʼ ri cheʼ xchaqijik, jumul chik Jonás sibʼalaj xpe royowal. Rumal laʼ Jehová xubʼij che: «Are más nim ubʼanik jun cheʼ chawach chkiwach ri ninivitas. In xintoqʼobʼisaj kiwach e areʼ rumal laʼ xinsach ta kiwach». ¿Jas ri kraj kukʼut ri Dios chuwach Jonás? Are che ri winaq re Nínive más nim na kibʼanik chuwach apachike cheʼ.