Ri nabʼeʼal ukʼojol ri ajawinel Saúl ubʼiʼ Jonatán, xuqujeʼ are jun kowilaj chʼojinel. David xubʼij che Jonatán are más aninaq chuwach jun xik xuqujeʼ más kʼo uchuqʼabʼ chuwach jun koj. Jun qʼij, Jonatán xeril jujun ajchʼojabʼ filisteos pa uwiʼ jun juyubʼ. Xubʼij che ri ajtoʼl re, ri ajtobʼanel che ukʼamom bʼi ri uʼespada: «Kojbʼe chkij we Jehová kuya jun etal chqawach. We ri filisteos kkibʼij che kojpaqik, qetaʼm che kojchʼojin kukʼ». Ri filisteos xkiraq kichiʼ xkibʼij: «¡Chixpaqal loq rech kojchʼojinik!». Tekʼuriʼ ri Jonatán xuqujeʼ rajtobʼanel xepaqiʼ pa uwiʼ ri juyubʼ xechʼakan pa kiwiʼ 20 ajchʼojabʼ.

Rumal che Jonatán are ri nabʼeʼal ukʼojol ri Saúl, rajawaxik che areʼ kux ajawinel are chiʼ ri utat kkamik. Are kʼu Jonatán retaʼm che Jehová xuchaʼ David rech areʼ kux ri jun chi ajawinel pa Israel, xuqujeʼ itzel ta krilo. Are kʼu, Jonatán rukʼ David xeʼux utz taq achiʼl. Xkibʼij chbʼil kibʼ  che kkitoʼ kibʼ xuqujeʼ kkichajij kibʼ. Rech kkikʼut che kachiʼl kibʼ, Jonatán xuya ri ratzʼyaq, ri uʼespada, ri uʼarco xuqujeʼ ri ucinturón che David.

Are chiʼ David tajin kanimaj chuwach ri Saúl, Jonatán xbʼe che rilik rech kubʼij che: «Rajawaxik kkʼojiʼ achuqʼabʼ xuqujeʼ ko awanimaʼ. Jehová xatuchaʼ rech at katux ajawinel. Xuqujeʼ ri nutat qas retaʼm». ¿La kawaj kkʼojiʼ jun utzalaj awachiʼl junam rukʼ Jonatán?

Jonatán xuya ri ukʼaslemal pa kʼax rech kutoʼ ri rachiʼl. Areʼ retaʼm che ri utat, ri ajawinel Saúl, kraj kukamisaj ri David, rumal laʼ xubʼij che: «We kakamisaj David, kabʼan jun nimalaj mak. Kʼo ta jun itzelal ubʼanom chawe». Saúl xpe royowal rukʼ Jonatán. Qʼaxinaq chi jujun junabʼ, Saúl xuqujeʼ Jonatán junam xekam pa jun chʼoj.

Are chiʼ kaminaq chi ri Jonatán, David xutzukuj Mefibóset, che are ukʼojol ri Jonatán. Are chiʼ xuriqo, xubʼij che: «Katinchajij pa ronojel ri akʼaslemal rumal che ri atat are jun utzalaj wachiʼl. Katkanaj pa ri wachoch katwa wukʼ». David xsach ta ri Jonatán pa ujolom, ri rachiʼl.