Jehová xubʼij che ri Moisés: «Chatpaqal jawiʼ in kʼo wi, pa ri juyubʼ. Kintzʼibʼaj ri nutaqanik chuwach tzʼalam re abʼaj tekʼuriʼ kinya chawe». Moisés xpaqiʼ xuqujeʼ xkʼojiʼ 40 qʼij xuqujeʼ 40 chaqʼabʼ pa ri juyubʼ. Are chiʼ kʼo chilaʼ, Jehová xutzʼibʼaj ri Lajuj Taqanik chuwach kebʼ abʼaj tekʼuriʼ xuya che Moisés.

Xa jubʼiqʼ tiempo qʼaxinaq, ri israelitas xkimaj uchomaxik che Moisés xeʼuya kanoq. Rumal laʼ xkibʼij che Aarón: «¡Kqaj che kʼo kukʼam qabʼe. Chabʼanaʼ jun qadios!». Aarón xubʼij chke: «Chikʼamaʼ lo ri qʼan pwaq kʼo iwukʼ». Tekʼuriʼ xujarisaj ri qʼan pwaq rech kubʼan jun tyox junam rukʼ jun alaj wakax. Ri winaq xkibʼij: «¡Wajun alaj wakax riʼ are ri qadios ri xojesan pa Egipto!» Xkibʼan jun nimaqʼij xuqujeʼ xkimaj uqʼijilaxik ri alaj wakax re qʼan pwaq. ¿La utz wariʼ? Utz taj, rumal che ri tinamit xutzujuj che xaq xiw kuqʼijilaj ri Jehová. Are kʼu kimik tajin ta kubʼan ri xutzujuj.

Jehová xril ri tajin kkʼulmatajik xuqujeʼ xubʼij che  Moisés: «Chatqaj bʼi jachiʼ kʼo wi ri tinamit, rumal che tajin ta kinkinimaj. Tajin kkiqʼijilaj jun dios che qastzij taj». Xqaj lo ri Moisés pa ri juyubʼ rukʼam lo ri e kebʼ tzʼalam re abʼaj pa uqʼabʼ.

Are chiʼ ri Moisés tajin kqebʼik, xuta che ri winaq tajin kebʼixonik. Are chiʼ xopanik, xrilo che tajin kexajowik xuqujeʼ tajin kkiqʼijilaj ri alaj wakax re qʼan pwaq. Moisés sibʼalaj xpe royowal, xukʼaq ri kebʼ tzʼalam re abʼaj pa ri ulew, wariʼ xubʼano che xepaxik. Chanim xbʼe che usachik uwach ri tyox tekʼuriʼ xutaʼ che Aarón: «¿Jasche xkikoj akʼuʼx rech kabʼan wajun jun jastaq riʼ che utz taj?». Ri Aarón xubʼij: «Kpe ta awoyowal, at awetaʼm ri kkibʼano. Kkaj jun dios, rumal laʼ xinya ri qʼan pwaq pa ri qʼaqʼ tekʼuriʼ xel wajun alaj wakax riʼ». Utz taj che Aarón xubʼan wariʼ. Moisés xpaqiʼ chi jumul pa ri juyubʼ, sibʼalaj xutaʼ che ri Jehová che kusach umak ri tinamit.

Jehová xusach kimak ri israelitas che kkaj kkinimaj. Sibʼalaj rajawaxik che kkibʼan ri kubʼij ri Jehová xuqujeʼ ri Moisés chke, ¿pa qastzij?