Ri israelitas weneʼ 40 junabʼ chik e kʼo pa desierto. Xuqujeʼ kichʼakom chi kʼi nimaʼq taq tinamit. Kimik e kʼo pa taq ri juyubʼ re ri tinamit Moab, pa umox ri nimaʼ Jordán, xa jubʼiqʼ chi kraj che keʼok pa ri ulew che tzujum chke. Balac, ajawinel re Moab, kuxibʼij ribʼ che ri israelitas kkesaj ri rulew. Rumal laʼ xubʼij che jun achi ubʼiʼ Balaam che kbʼe pa Moab rech keʼuyoqʼ ri israelitas, o pa nikʼaj chi tzij, rech kuraq uchiʼ che ubʼixik che kkiriq itzel taq jastaq.

Are kʼu ri Jehová xubʼij che Balaam: «Taqal taj che kasikʼij kʼax pa kiwiʼ ri israelitas». Rumal laʼ Balaam xraj taj xbʼe pa Moab. Ri ajawinel Balac xubʼij che pa ukamul xuqujeʼ xubʼij che kuya ronojel ri kraj, are kʼu Balaam jumul chik xuxutuj ri xtzujux che. Tekʼuriʼ Dios xubʼij: «Kinya bʼe chawe katbʼek. Are kʼu xaq xiw kabʼij ri kinbʼij chawe».

Balaam xbʼe pa Moab chrij ri ubʼur, pa ri uqajbʼal kaqiqʼ. Ri uchomanik are che kusikʼij kʼax pa kiwiʼ ri israelitas, pa neʼ Jehová xubʼij che, che kubʼan taj. Tekʼuriʼ ri ángel re ri Jehová oxibʼ mul xukʼut ribʼ chuwach pa ri bʼe. Balaam kril ta ri ángel, are kʼu ri ubʼur xrilo. Nabʼe, ri bʼur xel pa ri bʼe xbʼe pa jun ulew. Tekʼuriʼ, ri bʼur xqebʼ rukʼ jun nim abʼaj che xubʼano che ri raqan Balaam xuya chuwach ri abʼaj. Kʼisbʼal re, ri bʼur xutzaq ribʼ pa ri bʼe. Ronojel mul, Balaam xuchʼay ri bʼur rukʼ jun cheʼ.

Tekʼuriʼ, Jehová xubʼano che ri bʼur xchʼawik. Ri bʼur xutaʼ che ri Balaam: «¿Jasche kinachʼayo?». Balaam xubʼij che: «Rumal che kabʼan chwe che kinchoman taj. We ta kʼo jun wespada, katinkamisaj ri». Ri bʼur xubʼij: «At kejenaq chwij kʼiʼalaj junabʼ. ¿La kʼo jumul nubʼanom wariʼ chawe?».

Tekʼuriʼ, Jehová xubʼano che Balaam xril ri ángel. Ri ángel xubʼij che: «Jehová xubʼij chawe che katbʼe ta che usikʼixik kʼax pa uwiʼ ri tinamit Israel». Balaam xubʼij: «Xinsachik. Kintzalij pa wachoch». Are kʼu ri  ángel xubʼij che: «Katkunik katbʼe pa Moab, are kʼu xaq xiw kabʼij ri kubʼij ri Dios chawe».

¿La kachomaj che Balaam xusukʼumaj ri uchomanik? Xusukʼumaj taj, rumal che oxmul xusikʼij kʼax pa uwiʼ ri tinamit Israel. Are kʼu, ri oxibʼ mul, Jehová xubʼano che xutaʼ tewchibʼal are ta ri kʼax. Kʼisbʼal re, ri israelitas xkisach uwach Moab, Balaam xkamik. Are utz riʼ wet Balaam are xubʼan ri xubʼij Jehová che nabʼe, ¿pa qastzij?