Jun achi che kkun taj kbʼinik ktʼuyiʼ chuchiʼ ri rachoch Dios ronojel taq qʼij rech kutaʼ limosna. Jun bʼenaq qʼij xeril Pedro xuqujeʼ Juan che xeʼopan pa ri rachoch Dios, xubʼij chke: «Chibʼanaʼ toqʼobʼ, kʼo chisipaj chwe». Pedro xubʼij che: «Kʼo kinkunik kinya chawe che más nim ubʼanik chuwach ri pwaq. Pa ri ubʼiʼ ri Jesús, ¡chatwalijoq chatbʼinoq!». Tekʼuriʼ Pedro xutoʼ rech kwalijik, ri achi xumaj bʼinem. Ri e winaq che xeʼilow wajun milagro riʼ xkimayo, kʼi chke xekojonik.

Are kʼu ri e kojol taq tabʼal toqʼobʼ xuqujeʼ ri e saduceos sibʼalaj xpe koyowal. Xekichap ri e apóstoles, xekikʼam bʼi chkiwach ri e kʼamal taq bʼe re ri kojonem, che kbʼix Sanedrín chke, e areʼ xkitaʼ chke: «¿Jachin xyaʼow ri kunem chiwe rech kikunaj wajun achi riʼ?». Pedro xubʼij chke: «Ri kunem xuya Jesucristo, ri achi che ix xikamisaj». Ri kʼamal taq bʼe re ri kojonem, xkibʼij: «¡Chiyaʼ kan tzijonem chrij Jesús!». Ri e apóstoles xkibʼij: «Rajawaxik kojchʼaw chrij areʼ. Kqaya ta kan tzijonem chrij».

Tekʼuriʼ xekitzoqopij bʼi Pedro xuqujeʼ Juan, e areʼ chanim xebʼe che ubʼixik chke ri nikʼaj chi ajtijoxelabʼ ri xkʼulmatajik. Konojel xkibʼan chʼawem che Jehová, xkibʼij: «Chabʼanaʼ toqʼobʼ, chayaʼ qachuqʼabʼ rech kqaya ta kan atzijoxik». Jehová xuya ri uxlabʼixel chke, rukʼ wariʼ xekunik xkiya ta kan utzijoxik ri utzij Dios xuqujeʼ xkibʼan kunanik. Más winaq xekojonik. Ri e saduceos sibʼalaj kʼo itzelal pa kanimaʼ rumal laʼ xekikoj ri apóstoles pa cárcel. Are kʼu pa ri chaqʼabʼ riʼ, Jehová xutaq lo jun ángel xujaq ri uchiʼ ri cárcel tekʼuriʼ xubʼij chke ri apóstoles: «Jix chi jumul pa ri rachoch Dios chitzijoj ri utzij chilaʼ».

Chukabʼ qʼij, kʼo xbʼe che ubʼixik chke ri Sanedrín: «¡Ri cárcel tzʼapil rukʼ llave, are kʼu ri achijabʼ che ix xeʼitzʼapij e kʼo ta chi chupam! ¡E kʼo chi pa ri rachoch Dios tajin kkitzijoj ri utzij chilaʼ!». Rumal laʼ jumul chik xekichap bʼi ri apóstoles xekikʼam bʼi chkiwach ri Sanedrín.  Ri kinimal ri kojol taq tabʼal toqʼobʼ xubʼij: «¡Xqabʼij chiwe che kixchʼaw ta chi chrij ri Jesús!». Pedro xubʼij chke: «Rajawaxik kqanimaj ri Dios che qʼatal tzij che chkiwach ri winaq».

Ri e kʼamal taq bʼe re ri kojonem sibʼalaj petinaq koyowal kkaj kekikamisaj ri e apóstoles. Tekʼuriʼ jun fariseo ubʼiʼ Gamaliel xtakʼiʼk xubʼij: «¡Chichajij iwibʼ! Weneʼ Dios kʼo kukʼ ri achijabʼ riʼ. ¿La kiwaj kixchʼojin rukʼ Dios?». E areʼ xkita ri xubʼij chke. Xekitzoqopij bʼik, pa neʼ nabʼe xekichʼay rukʼ cheʼ xuqujeʼ jumul chik xkibʼij chke che kkitzijoj ta chi ri utzij Dios. Are kʼu ri kʼax riʼ xeʼuqʼatej ta ri apóstoles. Xkiya ta kan utzijoxik rukʼ chuqʼabʼ pa ri rachoch Dios xuqujeʼ chuchiʼ taq ja.