Ri apóstoles xkinimaj ri taqanik xuya kan ri Jesús rech kkikʼam bʼi ri utzalaj taq tzij re ri Dios cho ronojel ri uwach Ulew. Pa ri junabʼ 47, ri e qachalal re Antioquía xkitaq bʼi ri Pablo xuqujeʼ Bernabé rech kebʼe che utzijoxik ri utzalaj taq tzij. Ri e kebʼ rukʼ kikotemal xkiya ubʼixik ri utzalaj taq tzij are chiʼ xebʼe pa ronojel Asia Menor pa ri lugares re Derbe, Listra xuqujeʼ Iconio.

Pablo xuqujeʼ Bernabé xkitzijoj ri utzalaj taq tzij chke konojel ri winaq: chke e qʼinomabʼ xuqujeʼ e mebʼayibʼ, alabʼom alitomabʼ xuqujeʼ ri e nim chi kijunabʼ. E kʼi xkikʼam ri qastzij re ri Cristo. Pablo xuqujeʼ Bernabé xkitzijoj ri utzij ri Dios che ri ajawinel re Chipre, ubʼiʼ Sergio Paulo, are kʼu jun ajqʼij xraj xuqʼatej kiwach. Ri Pablo xubʼij che ri ajqʼij: «Kimik kkʼajisax awach rumal ri Jehová». Pa ri hora riʼ, ri ajqʼij xmoyirik. Are chiʼ xril wariʼ, ri ajawinel Sergio Paulo xux cristiano.

Pablo xuqujeʼ Bernabé xkitzijoj ri utzij ri Dios pa ronojel lugar: chuchiʼ taq ja, pa ri kʼaybʼal pa ri e bʼe, xuqujeʼ pa ri sinagogas. Jumul, xkikunaj jun winaq pa ri tinamit Listra che kkun taj kbʼinik. Ri e winaq che xkilo xkikojo che e areʼ e dioses xuqujeʼ xkaj kekiqʼijilaj. Pablo xuqujeʼ Bernabé xkiya ta bʼe chke che kkibʼan wariʼ, xaneʼ xkibʼij chke: «¡Xaq xiw kqʼijilax ri Dios! Oj nim ta qabʼanik xa oj winaq». Tekʼuriʼ xeʼopan jujun judíos che xkibʼan chke ri winaq che kkibʼan kikʼulel che ri Pablo. Ri winaq xkichʼay rukʼ abʼaj xuqujeʼ xkijururej bʼi chrij ri tinamit xkichomaj che kaminaq chik. ¡Are kʼu Pablo kʼa kʼasal na! Tekʼuriʼ, xepe jujun qachalal che utoʼik xuqujeʼ xkikʼam chi bʼi jumul pa ri tinamit. Tekʼuriʼ, Pablo xtzalij bʼi pa Antioquía.

Pa ri junabʼ 49, Pablo xubʼan chi jun bʼinem. Xbʼe che kilik ri e qachalal re ri tinamit re Asia Menor tekʼuriʼ xutzijoj ri utzalaj taq utzij ri Dios pa  nikʼaj chi tinamit, pa Europa. Xbʼe pa Atenas, Éfeso, Filipos, Tesalónica xuqujeʼ nikʼaj chi lugares. Pa ri bʼinem riʼ xebʼe ri Silas, Lucas xuqujeʼ jun ala ubʼiʼ Timoteo. Junam xechakunik rech xkiyak e kʼakʼ congregaciones xuqujeʼ xetobʼanik rech keʼux ko. Pablo xuqujeʼ xkanaj kan pa Corinto jun junabʼ rukʼ nikʼaj rech kuya kichuqʼabʼ ri e qachalal. Kutzijoj ri utzij ri Dios, kuya tijonik xuqujeʼ xutzʼibʼaj ri e wuj chke e kʼi congregaciones. Xuqujeʼ xechakun che ubʼanik alaj taq ja re atzʼyaq. Qʼaxinaq chi ri Tiempo, Pablo xtzalij pa Antioquía.

Qʼaxinaq chi ri tiempo, pa ri junabʼ 52, Pablo xubʼan ri urox bʼinem, che xumaj pa ri tinamit re Asia Menor. Xbʼe pa ri norte, kʼa pa Filipos, tekʼuriʼ xbʼe kʼa pa Corinto. Pablo xuqujeʼ xkʼojiʼ kʼi junabʼ pa Éfeso rech xuya tijonik, xeʼukunaj winaq xuqujeʼ xuya tobʼanik che ri congregación. Xuqujeʼ, ronojel qʼij xuya chʼabʼal chke konojel winaq pa jun ja re chʼabʼal re jun tijobʼal. Sibʼalaj kʼi winaq xkinimaj ri xkita xuqujeʼ xkikʼex ri kikʼaslemal. Kʼisbʼal re, are chiʼ ubʼim chi ri utzij ri Dios pa nikʼaj chi tinamit, Pablo xbʼe pa Jerusalén.