Jehová xuchaʼ Jeremías rech kux ajqʼaxal tzij pa ri tinamit Judá. Xubʼij che, che kutzijoj ri utzij chke ri winaq che e kʼo chilaʼ xuqujeʼ xubʼij chke che rajawaxik kkiya kan ubʼanik ri itzel taq jastaq. Are kʼu Jeremías xubʼij che Jehová: «Kʼa in akʼal na, kinkun taj kintzijon chkiwach ri winaq». Jehová xubʼij che: «Kaxibʼij ta awibʼ, in katintoʼ xuqujeʼ kinbʼij chawe ri katzijoj».

Jehová xubʼij che Jeremías che keʼumulij ri ajkʼamal taq bʼe re ri tinamit, xupaxij jun xaruʼ chkiwach xuqujeʼ kubʼij chke: «Jeʼ wariʼ kkʼulmataj rukʼ Jerusalén». Are chiʼ Jeremías xubʼan wariʼ, ri ajkʼamal taq bʼe sibʼalaj xpe koyowal. Jun ajkojol tabʼal toqʼobʼ ubʼiʼ Pasjur xuchʼay ri Jeremías xuqujeʼ xukoj ri raqan xuqujeʼ ri uqʼabʼ pa cheʼ. Jeremías xkun taj xsilabʼ pa ronojel ri chaqʼabʼ. Pasjur xutzoqopij bʼi chukabʼ qʼij. Tekʼuriʼ Jeremías xubʼij: «Kinchʼij ta chik. Kinya kan utzijoxik ri utzij ri Dios». Are kʼu ¿la qastzij xubʼan ri xuchomaj? Xubʼan taj. Jeremías qas xuchomaj tekʼuriʼ xubʼij: «Ri utzij ri Jehová kjunamataj rukʼ jun qʼaqʼ che kʼo chnupam. Kinkun taj kinya kan utzijoxik». Rumal laʼ Jeremías xuya ta kan ubʼixik chke ri winaq.

Xqʼax kʼi junabʼ xok chi jun ajawinel che uqʼatik tzij pa Judá. Ri ajkojol taq tabʼal toqʼobʼ xuqujeʼ ri ajqʼaxal taq tzij che e qastzij taj itzel kkita ri kutzijoj Jeremías. Rumal laʼ xkibʼij chke ri e ukʼojol ri ajawinel: «Wajun achi riʼ taqal che kkamik». Jeremías xubʼij: «We kinikamisaj, kikamisaj jun achi che kʼo ta umak. In kinbʼij ri kubʼij Jehová chwe, are ta ri kinchomaj in». Are chiʼ ri e ukʼojol ri ajawinel xkita wariʼ, xkibʼij: «Wajun achi riʼ taqal ta che kkamik».

 Jeremías xuya ta kan utzijoxik ri utzij ri Dios, are kʼu kimik ri e ukʼojol ri ajawinel sibʼalaj xpe koyowal xkibʼij che ri ajawinel che kkamisax Jeremías. Ri ajawinel xubʼij chke che kekunik kkibʼan ri kkaj. Rumal laʼ xkichap Jeremías tekʼuriʼ xkikʼaq pa jun nimal jul nojinaq che xaqʼoʼl rech kkam chilaʼ. Nojim, nojim, Jeremías xqaj bʼi pa ri xaqʼoʼl.

Tekʼuriʼ jun kinimal ri qʼatbʼal tzij ubʼiʼ Ébed-Mélec xubʼij che ri ajawinel: «Ri e ukʼojol ri ajawinel xkikʼaq Jeremías pa jun jul. We kqaya kan chilaʼ, kkam laʼ». Ri ajawinel xutaq Ébed-Mélec che keʼukʼam bʼi 30 achijabʼ rech kkesaj lo Jeremías pa ri jul. Kʼo ta xqʼatem ri Jeremías che utzijoxik ri utzij. ¿La qastzij kawaj kabʼan awe at ri xubʼan areʼ?