OJER chiʼ majaʼ kbʼe Esdras Jerusalén. Mardoqueo xuqujeʼ Ester aj israelitas sibʼalaj nim kibʼantajik e kʼo pa ri ajawbʼäl rech Persia. Ester are rixoqil ri ajawinel Asuero xuqujeʼ ri uprimo Mardoqueo are kʼo ukabʼ nim utaqonik pa ri ajawbʼäl. Chqilaʼ suche xbʼantaj wariʼ.

Xekam ri utat unan ri Ester chiʼ alaj na, rumal laʼ Mardoqueo xukʼiysaj ri ali. Asuero, ri ajawinel rech Persia, kʼo rachoch pa ri tinamit Susa, Mardoqueo ajpatanel pa rachoch Asuero. Xopan jun qʼij che ri rixoqil ubʼiʼ Vasti xniman ta che, rumal laʼ ri ajawinel xuchaʼ chi jun chik rixoqil. ¿La awetaʼm jachin laʼ xuchaʼo? Jeʼ, are ri jeʼlikalaj ali Ester.

¿La kawil wajun achi kubʼan nim che ribʼ tijan kubʼan chike ri winaq che kexukeʼ chuwäch? Are ri Hamán, jun achi sibʼalaj nim ubʼantajik rech Persia. Areʼ kraj che Mardoqueo, ri kawil pa ri wachbʼäl che kuʼlik, o tʼulik, kxukeʼ chuwäch Hamán. Tekʼuriʼ Mardoqueo Kubʼan ta wariʼ. Rumal utz ta krilo che kxukeʼ chuwäch jun achi che sibʼalaj itzel. Hamán sibʼalaj xpe riwal. Chawilampeʼ su kubʼano.

Hamán xubʼij molon täq tzij chikij ri täq israelitas. ‹E itzel täq winaq xuqujeʼ kkenimaj ta ri ataqonik›, xchaʼ. ‹Rajawaxik che kekamik.› Asuero retaʼm täj che ri rixoqil are israelita. Rumal laʼ xuta ri xubʼij ri Hamán che, tekʼuriʼ xubʼan jun taqonik che kubʼij che rajawaxik kekamsax ronojel ri täq israelitas.

Chiʼ Mardoqueo xuta wajun taqonik, sibʼalaj xuxibʼij ribʼ. Xutaq bʼi jun wuj rukʼ Ester, kubʼij wariʼ che: ‹Chatchʼaw rukʼ ri ajawinel, xuqujeʼ chata che, che kojutoʼ›. Ri taqonik rech Persia kubʼij che kʼot nijun kkunik kbʼe che rilik ri ajawinel, xaq xiw we ksikʼix ri winaq. Tekʼuriʼ Ester xbʼek. Ri ajawinel xuyek ri uvara rech qʼan pwäq, wariʼ kraj kubʼij che kkekamsaj täj. Ester xusikʼij ri ajawinel xuqujeʼ ri Hamán rech kketij kiwa. Chilaʼ ri ajawinel xuta che Ester su toqʼobʼ kraj. Ester xubʼij che, che kubʼij che we kepe chi na che ukabʼ qʼij che utijawik kiwa.

Pa wajun waʼim Ester xubʼij che ri ajawinel: ‹Kkamsax ri nutinamit xuqujeʼ kinkamsax in›. Ri ajawinel sibʼalaj xpe riwal. ‹¿Jachin kraj kubʼan wariʼ?› Xchaʼ.

‹¡Are ri achi, ri kʼulel, are wajun achi Hamán!› Xchaʼ Ester.

Kimik ri ajawinel sibʼalaj xpe riwal. Xutaq ukamsaxik ri Hamán. Tekʼuriʼ, ri ajawinel xukoj ri Mardoqueo che ukabʼ nim utaqonik pa ri ajawbʼäl. Mardoqueo xubʼano che xkoj jun kʼakʼ taqonik, wajun taqonik kuyaʼo che ri täq israelitas kekunik kkechʼojij ri kikʼaslemal pa ri qʼij che kekamsaxik. Rumal che Mardoqueo sibʼalaj nim ubʼantajik kimik, sibʼalaj kʼi täq winaq xketoʼ ri täq israelitas, tekʼuriʼ ri täq kikʼulel xekun täj xkekamsaj.