¿LA AWETAʼM, jachin wa täq achijabʼ riʼ xuqujeʼ su tijan kebʼano? Kebʼe pa chʼoj, ri achijabʼ e nabʼe che kiwäch tijan kebʼixonik. Weneʼ kabʼij wariʼ: ‹¿Suche kʼot kichʼichʼ rech kkebʼan chʼoj ri tijan kebʼixonik?› Chaqilaʼ suche.

Jehosafat are ajawinel che ri kebʼ tribus rech Israel. Xkʼase pa täq uqʼij ri Acab rukʼ Jezabel ri ajawinel rech ajawbʼäl che 10 tribus. Jehosafat are jun utzalaj ajawinel xuqujeʼ ri utat ubʼiʼ Asá, sibʼalaj utz. Rumal laʼ pa kʼi täq junabʼ ri winaq rech ri kebʼ tribus sibʼalaj kʼo kikotemal che kixoʼl.

Tekʼuriʼ kʼo jun qʼij chiʼ ri winaq sibʼalaj xkexibʼij kibʼ. Rumal che nikʼaj täq qʼaxal tzij xkebʼij wariʼ che Jehosafat: ‹E petinäq kʼi täq ajchʼoj chawij rech ri tinamit Moab, Amón xuqujeʼ Seír›. E kʼi täq israelitas xkemol kibʼ pa Jerusalén rech xketa che Jehová che keʼuto. Xebʼe pa loqʼalaj ja, chilaʼ Jehosafat xubʼan jun uchʼawem: ‹Oh Jehová qaDios wetaʼm täj su kinbʼano. Kojkun täj kqabʼan chʼoj rukʼ wa täq ajchʼoj riʼ chojatoʼo at›, xchaʼ.

Jehová xeʼuto, rumal laʼ xubʼano che jun ajpatanel xubʼij wariʼ chike ri tinamit: ‹Ri chʼoj iwech täj, rech ri Ajawaxel. Ix kibʼan ta chʼoj. Xaq xiw chiwilaʼ, chiʼ Jehová kixukʼolo›.

Rumal laʼ chiʼ saqarik che jun qʼij chik Jehosafat xubʼij chike ri winaq: ‹¡Chikubʼsaj ikʼuʼx chirij Jehová!› Tekʼuriʼ xukoj ajbʼixonel che kiwäch ri täq ajchʼoj, wariʼ tijan kebʼinik xuqujeʼ kebʼixon che Jehová. ¿La awetaʼm su xbʼanik chiʼ xeʼopan che unaqaj ni, o jachiʼ, kbʼan wi ri chʼoj? Jehová xubʼan chike ri täq achijabʼ che kkekamsaj kibʼ. ¡Chiʼ xeʼopan ri täq israelitas, konojel ri täq kikʼulel e kamnäq chik!

Jehosafat sibʼalaj kʼo unoʼj chiʼ xukubʼsaj ukʼuʼx chirij ri Ajawaxel, ¿la qastzij? We kqabʼan qe, xuqujeʼ kʼo qanoʼj.