¿LA AWETAʼM sulaʼ wajun ja? Are jun loqʼalaj ja rech kyaʼ uqʼij ri Jehová. Xbʼix tabernáculo che. Ri tinamit xukʼis ubʼanik pa jun junabʼ chiʼ e elinaq chi bʼi Egipto. ¿La awetaʼm chin xraj xbʼan wariʼ?

Are ri Jehová. Chiʼ ri Moisés kʼo ajsik pa ri juyubʼ (jïbʼ), Jehová xubʼij che su uyakik kubʼano, rajawaxik kubʼan che ri ja che kʼäx ta ujachik ribʼ. Rech kekunik kkekʼam bʼi pa jun chik lugar, tekʼuriʼ rech kekunik kkenukʼ chik. Rumal laʼ, chiʼ ri israelitas kkejal kilugar, kkekʼam bʼi kukʼ wajun loqʼalaj ja riʼ.

Chawilampeʼ wajun alaj ja kʼo che kʼisbʼal re ri jun loqʼalaj ja, kʼo jun koxon chupam. Pa jun koxon kʼolom wi ri täq utaqonik ri Jehová. Kʼo kebʼ täq ángeles e bʼanom che qʼan pwäq e kʼo puwiʼ ri koxon. Ri Ajawaxel xutzʼibʼaj jumul chik ri Lajuj Utaqonik chuwäch ri kebʼ tzʼalam uwäch täq abʼaj, rumal che ri Moisés xupaxij ri kebʼ kʼo ojer. Wa kebʼ abʼaj xekʼol pa ri koxon. Xuqujeʼ chilaʼ xkʼol wi jun xaro maná. ¿La kpe na pa ajolom sulaʼ ri maná?

Ri Jehová xuchaʼ ri Aarón ri rachalal ri Moisés rech kubʼan jun ajkojol tabʼal toqʼobʼ. Are ajkʼamal bʼe che ri tinamit rech uyaʼik uqʼij ri Jehová. Xuqujeʼ ri täq ukʼojol ri Aarón xketoʼo.

Chawilampeʼ ri jun chik nim ja kʼo chupam ri loqʼalaj ja. Kebʼ unimal che ri jun alaj ja. Chawilaʼ ri jun alaj koxon tijan kel lo sibʼ chupam. Are ri altar kkekoj ri ajkojol tabʼal toqʼobʼ, chilaʼ kkeporoj ri incienso, wariʼ sibʼalaj kʼokʼ kel bʼik. Xuqujeʼ chawilaʼ ri takʼlebʼal re ri kantela, kʼo wuqubʼ uqʼabʼ. Ri urox kʼo pa ri loqʼalaj ja are jun mesa, puwiʼ kʼo 12 kaxlanwa.

Chuwäch ri tabernáculo kʼo jun kʼolbʼal, nojinäq che jaʼ. Ri ajkojol tabʼal toqʼobʼ kkekojo rech kkechʼaj kibʼ. Xuqujeʼ chilaʼ kʼo wi ri nimalaj altar. Chilaʼ kkeporoj ri täq chiköp e kamnäq chik rech tabʼal toqʼobʼ che Jehová. Wajun loqʼalaj ja kʼo pa nikʼaj che ri tinamit, chirij e kʼo wi täq kachoch ri israelitas.