41 CAJ YACHACHICUY
13 CAJ CANCIÓN Jesuspita yachacushun
Imataj yachacunchi cielupa manaraj cuticur Jesús rurashganpita
“Wanushqanpita kawarirkamurmi chusku chunka (40) junaqyaq paykunata yuriparqan. [...] Tayta Dios mandaykashqanpitapis shumaq tantiyatsirqan” (HECH. 1:3).
¿IMATAJ YACHACUSHUN?
Yachacushun cielupa manaraj cuticur Jesús ima rurashgancunata, noganchipis payno rurananchipaj.
1, 2. ¿Imataj pasargan Jesuspa ishcay discipuluncunawan Emaús marcapa aywarcaycashgancho?
33 WATA, 16 nisán junajmi cargan. Jesuspa discipuluncuna manchacash y pasaypa laquishga carcaycargan. Paycunapita ishcay cajmi Emaús marcapa aywapäcurgan, Jerusalenpitaga ishcay leguano chayananpaj cargan. Jesús wanushganpita laquicurmi caycargan y salvanantapis shuyarpaycargan. Canan ichanga wanushga caycargan. Pero, ¿imataj pasananpaj caycargan?
2 Aywarcaycashgancho juc runa taripargan. Junto japarcaycaptinna chay discipulucuna wilapan Jesuswan ima pasashganta. Chaypitana chay runapis wilacamun mana gonganapaj cajcunata. Aumi, “Moisés qelqashqanpita qalaykur profëtakuna qelqashqanyaq paykunata tantiyatsirqan Cristupaq imata nishqantapis”. Emaús marcaman chayaycurna cuentata gocärin chay jäpa runa cawarimoj Jesús cashganta. Pasaypachi cushicärergan Jesús cawarimushganta ricar (Luc. 24:13-35).
3, 4. 1) Jesús discipuluncunata yuripaptenga, ¿imanonataj paycuna ricacärergan? (Hechos 1:3). 2) ¿Imatataj canan yachacushun?
3 Jesús wanushganpita cawarimurga achca cuti discipuluncunata yuripargan (leiriy Hechos 1:3). Jucnin jucnintami shacyächergan, chaypitaga laquicärergannachu ni manchacärergannachu, valurcharcur y ganas ganaslanami Diospa gobiernunpita wilacärergan. a
4 Imayca caycan yachacunapaj Jesús cielupa manaraj cuticur ima rurashganpita. Caycunatami rurargan: 1) discipuluncunata shacyächergan, 2) Diospa Palabranpita shumaj tantiachicush y 3) yachachicurgan waquincunapis cargucunata chasquinanpaj. Jesús rurashganno noganchipis ruranapaj yachacushunmi.
IMANOTAJ WAQUINCUNATA SHACYÄCHISHWAN
5. ¿Imanirtaj Jesuspa discipuluncunaga shacyächishga cananta necesitargan?
5 ¿Imanirtaj Jesuspa discipuluncunaga pilapis shacyächinanta necesitargan? Paycunaga Jesusta gatinanraycu wasincunata, familiancunata y negociuncunatapis jaguiripäcushga cargan (Mat. 19:27). Waquincunana Jesusta gatipäcushganraycu chiquishga capäcurgan (Juan 9:22). Imaycatapis aguantapäcurgan Diosninchi mandamushgan salvacoj Cristo cashganta creirmi (Mat. 16:16). Pero Jesusta wanuchipäcushganpita, pasaypa laquicur yarpachacärergan ima pasanapaj cajta mana musyar.
6. ¿Jesús imataj rurargan wanushganpita cawarircamur?
6 Jesusman jinala yäracuycaptinpis discipuluncunaga pay wanushganpita laquishga carcaycargan y chaytaga Jesús ali musyargan. Chaymi cawarimushgan hora amiguncunata shacyächergan. Pamparaycashgan uchcucho María Magdalena wagaycaptin Jesús yuripargan (Juan 20:11, 16). Emaús marcaman aywaj discipuluncunata y Pedrutapis yuripargan (Luc. 24:34). ¿Imatataj yachacunchi Jesús rurashganpita? María Magdalenata yuripashganpita yachacushun.
7. Jesús manaraj yuripaptin, ¿imatataj ruraycargan María y imatataj Jesús rurargan? (Juan 20:11-16; dibujutapis ricay).
7 (Leiriy Juan 20:11-16). 16 nisán junajcho, tutala warmicuna aywargan Jesús pamparaycashgan cajman (Luc. 24:1, 10). Jucnin cajpa jutin cargan María Magdalena. Pamparaycashgan machayman yaycuriptenga Jesuspa ayanta tarirganchu, jinan hora waracayla aywargan Pedrutawan Juanta wilapänanpaj. Paycunapis corriyla aywargan chay machayman y Mariapis guepanta aywargan. Chayaycur Pedruwan Juan chunyaraycan uchcuta ricaycur wasinpa cuticärergan. Ichanga María wagaycar quedacurgan. Wagaycajta ricar, Jesús laquipargan. Y cawarimushganpita: ali wilacuyta discipuluncunata wilananpaj nergan (Juan 20:17, 18).
Jesusno rurashun, pilapis nacaycaptenga imanolapapis shacyächinapaj. (7 caj parrafuta ricay).
8. ¿Imanotaj Jesús rurashganno rurananchi?
8 ¿Imatataj rurashwan Jesús rurashganno? Hermanunchicuna Jehovata sirvinanpaj jucnin jucninta shacyächishun. Chaypäga Jesusno alcäbula caycäshun laquicuycaj hermanunchicunata yanapänanchipaj. Jocelyn hermananchipita parlarishun, paypa hermananshi accidenticho wanurgan. Paymi cayno wilacun: “Noga achca quillapa laquishga caycargä”. Juc hermano warminwan wasinman invitargan, laquiparshi shumaj wiyargan imano sienticushganta, ‘Jehovaga cuyayculäshunqui’ nerganshi. Caytapis nin: “Lamarpa chaupincho undicashganomi caycargä, chaypita paycuna jorgamajnomi cargan. Jehovami paycunawan yanapämashga chaynopa yapay payta cushishgala sirvinäpaj”. Waquincunata shacyächinapaj laquicushgancunapita wilapämaptinchi shumaj wiyashun, paycunapis valurcharcur cushi cushila Jehovata sirviycänanpaj (Rom. 12:15).
IMANOTAJ WAQUINCUNATA DIOSPA PALABRANTA TANTIACHISHWAN
9. ¿Imataj sasaraj cargan Jesuspa discipuluncuna tantiananpaj y imanotaj payga yanapargan?
9 Jesuspa discipuluncunaga Diospa Palabranmanmi yäracurgan y cäsucurganpis (Juan 17:6). Chayno captinpis, paycunaga pantashgami carcaycargan Jesús wanuchicoj runano imanir wanushganpita. Jesusga musyarganmi gatejnincuna ali shonguyoj cashganta, ichanga waquin yachacuycunataga alirämi tantiacärinan cargan (Luc. 9:44, 45; Juan 20:9). Chaymi Jesusga tantiachinanraj cargan Bibliacho ima leipäcushganta entiendinanpaj. Yachacushun Emaús marcaman aywaj discipuluncunata Jesús imano tantiachicushganta.
10. ¿Imanotaj Jesús discipuluncunata tantiachergan profeciacuna paycho imano cumplicashganta? (Lucas 24:18-27).
10 (Leiriy Lucas 24:18-27). Emauspa aywaj ishcay discipuluncunata Jesús manami nerganchu pï cashganta, chaypa trucanga tapupargan paycuna ima yarpashganta parlacaramunanpaj. Paycuna shuyarpaycargan Romapa maquinpita judiucunata Jesús librananta. Chayta wiyaycurna, Jesusga paypita wilacamoj profeciacunata shumaj tantiachicurgan. b Chacaychona waquin discipuluncunatapis profeciacuna imano cumplicuycashganta tantiachergan (Luc. 24:33-48). ¿Caycunapita imataj yachacunchi?
11, 12. 1) ¿Imataj yachacunchi Jesús Bibliacho profeciacunata imano tantiachicushganpita? (Fotucunatapis ricay). 2) ¿Felipitaga imanotaj Bibliawan yachachejnin yanapargan?
11 ¿Imanotaj Jesús rurashganno rurananchi? Pilatapis Bibliapita yachachicuycarga, tapupashwanmi imacuna yarpashgantapis wilapämänanchipaj (Prov. 20:5). Chaypitana ‘cayta wacta ruray’ ninayquipaj trucanga yachachinquiman ima textulamanpis yarpaycänanpaj. Y imano cawaynincho yanapänanpaj alichi canman cutin cutinraj Biblia ima yachachicushganta tapupaptinchi y ali tantiaycur cawaynincho cäsucunanpaj. Yachacushun Ghana naciunpita Felipe hermanupita.
12 Payga 16 watayoj caycar Bibliapita yachacur galaycurgan. Chayraycu familiancuna pasaypa rabiacurgan. Jinala Bibliapita yachacunanpäga yachachejnin hermanushi Mateo 10 caj capituluta leipargan, chaycho tantiachergan Diosta sirvishganraycu cristianucuna chiquishga cananpaj. Felipe cayno nin: “Familiäcuna chiquimashganta ricarga masraj cuentata gocurgä rasunpa caj religiuncho caycashgäta”. Jina Mateo 10:16 textutapis tantiacherganmi waquincuna lutanta parlapaptinpis creencianpita respetulawan parlananpaj. Bautizacurir, Felipe precursor cayta munargan, papänin ichanga universidäman aywananta munargan. Yachachejninta wilapaptenga payga nerganchu ‘cayta wacta ruray’; tapucuycunata rurarshi Bibliawan tantiachergan quiquin decidinanpaj. Felipe precursor regularno yanapacur galaycurgan. Chayraycu papäninga wasinpita gargurergan. Chaypa pasashganpita caynomi nin: “Ali decidishgäpita alapa cushicö”. Waquincunata Bibliapita shumaj tantiachiptinchega, ali cristiano cananpämi yanapaycanchi (Efes. 3:16-19).
Jesús rurashganno, waquincunata yanapäshun Bibliapita ali tantiachicuylapa yachacärinanpaj. (11 caj parrafuta ricay). e
IMANOTAJ HERMANUCUNATA YACHACHISHWAN JUC BENDICIUNNO CANANPAJ
13. ¿Imataj Jesús rurashga discipuluncuna jinala Jehovapa voluntäninta rurarcaycänanpaj? (Efesios 4:8).
13 Jesús cay Pachachoraj caycar Taytanpa voluntäninta lapanta rurargan (Juan 17:4). Jesús manami nerganchu ‘imapis ali ruracänanpäga nogarämi ruräman’ nir. Chaypa trucanga discipuluncunata yachachergan Diospa voluntäninta rurar siguipäcunanpaj y paycunamanga Jesús confiacurganmi. 30 watayoj manaraj caycaptinpis mandargan may chaychopis Diospa Palabranpita yachachinanpaj, jina juc michicojno hermanucunata cuidananpaj (leiriy Efesios 4:8). Cay discipulucunaga Jesuswan juntu mana yamacaylapa Diosta sirvipäcurgan. Chayno captinpis, Jesús cielupa manaraj cuticur, paycunata masraj yachachergan waquincunapa jatun bendiciunno cananpaj. Ricärishun chayta imano rurashganta.
14. Jesús cielupa manaraj cuticur, ¿imatataj discipuluncunata yachachergan? (Dibujutapis ricay).
14 Jesús discipuluncunataga cuyapaylapa consejargan. Juc cuticho Jesús consejacunanraj cargan, pay cawarimushganta mana criejcunata (Luc. 24:25-27; Juan 20:27). Jina mandargan cristiano masincunata cuidananpaj y guellaylata ashir mana cacärinanpaj (Juan 21:15). Yachachicurganpis cargucunata chasquipäcuptin jamurpänacur mana carcaycänanpaj (Juan 21:20-22). Diospa Gobiernunpita parlar pantarcaycänanpaj trucan, Diospita yachachicuycarla carcaycänanpaj nergan (Hech. 1:6-8). Ancianucunaga, ¿imatataj Jesuspita yachacunman?
Jesusno waquincunata yanapäshun más cargucunata chasquinanpaj. (14 caj parrafuta ricay).
15, 16. 1) ¿Ancianucunaga imanotaj Jesús rurashganno ruranman? 2) ¿Imanotaj Patriciuta yanapargan chasquicushgan consejucuna?
15 Ancianucunaga, ¿imanotaj Jesús rurashganno ruranman? Hermanucunata ali yachachir yanapacunman y joven cajcunatapis congregaciuncho más cargucunata chasquinanpaj. c Ancianucunaga tantiacunmanmi lapanchi juchayoj cashganchita. Mozucunataga cuyapaylapami parlapanman paycuna humilde y yäracuypaj car waquincunata yanapänanpäpis (1 Tim. 3:1; 2 Tim. 2:2; 1 Ped. 5:5).
16 Patricio jutiyoj hermanunchipita parlarishun. Mozuyaycaptinshi, olgucunata y warmicunatapis toscuypa parlapaj, chayta ricaycur juc anciano ali shimilapa corrigirgan. Chaypita Patricio nin: “Payta agradecicömi. Waquincunala ima cargutapis chasquiptenga rabiacoj cämi. Chay anciano consejamashganga yanapämargan imalachopis hermanucunata yanapänäpaj y cargulata mana shuyaränäpaj”. Chaypitana, Patricio anciano carguta chasquergan 23 watayojla caycar (Prov. 27:9).
17. ¿Jesús discipuluncunaman yäracur imata rurananpätaj mandargan?
17 Jesusga manami predicananlapächu discipuluncunata mandargan, sinoga ali tantiachicuylapa Bibliapita yachachicunanpäpis (ricay nota de estudio “Enséñenles”, de Mateo 28:20 en español). Discipuluncunapäga sasa imachi cargan Jesús mandashganta cumplinanpaj, pero Jesús chayta mandacurgan paycunaman yäracurmi. Chaymi caytapis nergan: “Taytä kachamashqannölami noqapis qamkunata kachaykä” (Juan 20:21).
18. ¿Ancianucunaga Jesús rurashganno imatataj ruranman?
18 ¿Imanotaj ancianucunaga Jesús rurashganno ruranman? Ali tantiaj ancianucunaga manami japalancunala congregaciuncunata atiendinmanchu, waquincunata yachachinanpäga listo carcaycanman (Filip. 2:19-22). Jovincunata ninman Salón alchachiycho yanapacunanpaj. Ima trabajulatapis paycunata goshgana carga ali cumplipäcunanpämi yäracärin. Chaylaraj ancianuno yanapacoj Mateo hermano agradecicunshi ancianucuna imaycacho yachachishganpita, jina ‘ali trabajuta rurashcanqui’ nipäcushganpitapis. Chaypaj parlar cayno nin: “Pantaptëpis jinala yanapäcaman; nircur masraj yachachipäcaman mejoranäpaj”. d
19. ¿Imata rurananchipätaj listo caycashwan?
19 Jesús cielupa manaraj cuticur discipuluncunata shacyächergan. Diospa Palabranpita ali tantiachergan y cargucunata chasquinanpäpis yachachergan. Mana gongaylapa Jesús rurashganno ruraycäshun (1 Ped. 2:21). Ushanancama yanapämänanchipaj paymi cayta aunimanchi: “Noqaqa qamkunawanmi imaypis kaykäshaq” (Mat. 28:20).
15 CAJ CANCIÓN Jehovapa Churinta cantarcushun
a Mateo, Marcos, Lucas y Juan librucuna y Bibliacho waquin librucunapis wilacamun achca cuti Jesús discipuluncunata yuripashganta: María Magdalena (Juan 20:11-18); waquin warmicunata (Mat. 28:8-10; Luc. 24:8-11); ishcay discipuluncunata (Luc. 24:13-15); Pedruta (Luc. 24:34); apostulcunata, chaycho caycashgachu Tomás (Juan 20:19-24); apostulcunata y chaycho caycashgana Tomás (Juan 20:26); ganchis discipuluncunata (Juan 21:1, 2); 500 discipuluncunapitapis masta (Mat. 28:16; 1 Cor. 15:6); Santiago wauguinta (1 Cor. 15:7); lapan apostulcunata (Hech. 1:4), y Betania cay laduncho apostulcunatapis (Luc. 24:50-52). Más cuticunapis Jesús yuriparganchi discipuluncunata, Bibliaga chaypita wilacunchu (Juan 21:25).
b Jesuspita parlaj profeciacunapita yachacuyta munarga jw.org paginaman yaycur cay temata ashiy: “¿Prueban las profecías de la Biblia que Jesús fue el Mesías?”.
c Öraga waquin hermanucunaga 30 wataman manaraj chayashga captinpis congregaciunta watucunanpaj carguta chasquiyta puedinmanmi, pero mayna experienciayoj anciano caycanman.
d Mozucuna cargucunata chasquinanpaj imano yanapänayquipaj La Atalaya revistacho tarinqui 2018 wata, agosto quilla, 11 y 12 paginacuna, 15-17 parrafucuna; jina 2015 wata, 15 abril quilla, 3-13 paginacuna.
e FOTUCUNAPA WILACUY: Juc hermano estudiantinta yanapan Biblia nishganta ali tantiananpaj, estudiantenga Navidäpa adornuncunata basuraman jitarin.
