1. ¿Imanotaj juc cuyapäcoj runaga?

JUC cuyapäcoj runaga ali shongulanwanmi imatapis cuyapaylapa ruran. Chayno runapitami juc cuticho Jesús wilacamurgan, cay runaga Samariapitash cargan y cuyapaylapa yanapargan wanushgano jitaraycajta Judá marcapita runa masinta. Y mana chaylachu cuyapashganraycurmi jampicunanpaj mastaraj payraycur rurargan (Luc. 10:29-37). Cayno Jesús wilacamushganchomi yachacunchi Taytalanchi Jehová alapa cuyapäcoj cashganta, payga goyay goyaymi ricaycachilämanchi cuyapämashganchita y perdunamashganchita.

2. ¿Imatataj ruranchi cuyapäcoj y perdunacoj captinchega?

² Cuyapäcoj y perdunacoj runapis cashun, pitapis castiganapaj caycaptin perdunaycuptinchimi. Chayga rasunmi, Taytalanchi Jehovapis chaytami ruran, chaypaj parlarmi Biblia cayno nin: “Manami jutsata rurashqantsiman tuputsu castigamantsi” (Sal. 103:10). Chayno captinpis juchata rurashganraycur pitapis castiganapaj captenga Diosninchega cuyapashpanmi castigangapaj.

3. ¿Ima tapucuycunapitataj canan yachacushun?

³ Cananmi yachacurishun cay quimsa tapucuycunapita Biblia ima wilacamushganta: ¿imanirtaj cuyapäcoj car perdunamanchi Jehová?, ¿ima nishwantaj Jehová imano cuyaycalämashganchipita y anyapamashganchipita?, y ¿imanotaj Taytanchi Jehovanola cuyapäcoj cashwan?

4. ¿Imanirtaj Jehová perdunaycalämanchi?

⁴ Cuyapämashpanchi. Apóstol Pabluga wilacamurgan Tayta Dios “cuyapäcoj” cashgantami. Chaytaga Pablo nergan,  Dios acrashgancuna cielucho cawapäcunanpaj parlarmi (Efes. 2:4-7). Pero Diosninchega manami paycunalatachu ali nawilanwan rican, Palabranmi cayno nin: “TAYTA DIOSGA pï-maypäpis allimi. Ima rurashancunatapis cuyarmi rican” (Sal. 145:9). Lapanwan cuyapäcoj captinmi pipis arrepenticuptenga cuyapar perdunaycun.

5. ¿Imanotaj Jesús yachacurgan Taytan perdunacoj cashganta?

⁵ Jehová Diosninchi runacunata cuyapar perdunashgantaga mayraj Jesús ricargan. Payga achca tiempupami Papäninwan cielucho cawapäcurgan (Prov. 8:30, 31). Diosninchega achca cutimi juchasapa runacunata perdunaycurgan, chaytapis ricarganchi Jesús (Sal. 78:37-42). Chayno cuyapäcoj Taytan cashgantaga, cay Pachacho caycarmi Jesús yachachicurgan.

6. ¿Imapitataj Jesús wilacamurgan Taytan cuyacoj y perdunacoj cashganta musyanapaj?

⁶ Guepa caj yachachicuycho ricashganchino Jesusmi wilacamurgan juc aywacoj mozupita, chaycho yachacurganchi imanomi Jehovaga cuyapäcoj y perdunacoj cashganta. Chay mozuga wasinpita aywacurgan caru marcapa, “chaychönashi munashanta rurashpan llapan guellayninta manacajcunacho usharan” (Luc. 15:13). Tiempuwanga, lutanta rurashganpita arrepenticurgan y wasinman cuticamurgan. ¿Taytanga chasquirganchu? Aumi, chaytaga ricanchi Jesús wilacamushganchomi. Cayno nergan: “Papänenga caruta aywaycämojllatana ricärir cushicushpan cörriylla aywaran. Taripaycushpan macallacurcur cuyapar” muchargan. Papänenga ichiclapis pengacächirganchu; cuyapashpanmi, perdunashpanmi cushi cushila wasinman yaycachergan. Chay mozuga arrepenticurganmi pasaypa mana alicunata rurashganpita. Cay cuyapäcoj taytapita Jesús parlamurga, Taytanpitami yachaycächimashcanchi. Payga perdunacojmi, cuyapäcojmi lapan arrepenticojcunawan (Luc. 15:17-24).

7. ¿Imanotaj Jehová yachaj cashganga, cuyacoj cashganwan tincun?

⁷ Alapa yachaj carmi. Jehová yachaj cashganga alapa cuyacoj cashganwanmi tincun. Chaymi Palabran cayno nin: “Tayta Dios yachayta qomaptintsimi […] pïmaywanpis ali kawantsi, kuyanakuntsi” (Sant. 3:17). Taytanchi Jehová ali nawilanwan ricaycalämaptinchega alilami cawacunchi (Sal. 103:13; Is. 49:15). Juchasapa carpis  alapa laquicunchinachu. Alapa yachaj captinmi pipis arrepenticuptenga cuyapashpan jucla perdunaycun. Jina musyanmi öraga pitapis mana perdunananpaj. Mana alicuna ruracashgantaga manami ricaräcungalachu.

8. ¿Öraga imataj ruracanman mana arrepenticojcunawan, y imanir?

⁸ Imaraj canman Diosta sirvej runa juchalacuycarla cawacuptenga. Chaypaj parlarmi “chayno runacunawan […] ama gotucaychu” Biblia nin (1 Cor. 5:11). Mana arrepenticojcunaga congregaciunpitami gargushga capäcun. Gargushga captenga hermanunchicunami chapashga canga y Jehová Dios Santo cashganpis ricacämungami. Ichanga waquincuna nipäcunman mana cuyacoj captinmi congregaciunpita gargupäcun. ¿Chayga rasunpachuraj? Mä ricärishun.

9, 10. Hebreos 12:5, 6 textucuna wilacushganno, ¿imanirtaj nishwan pitapis congregaciunpita gargurga rasunpa cuyapaycashganchita? Tantiachicamuy juc uysherupita parlar.

⁹ Laquicuypämi congregaciuncho pilapis manana Testigo cashganta wilacäriptenga. Öraga pilapis tapucunman ‘¿gargunmanracu cargan?’ nir. Chauraga pilapis gargushga captenga, ¿ricächiycanchichu cuyapashganchita?, aumi. Chayta mana rurarga juchayojta manami yanapaycashwanchu ni yachajpis ni cuyapäcojpis caycashwanchu (Prov. 13:24). Waquincunaga gargushga captinrämi Dios munashganno cawar arrepenticushpan cuticamun. Chaymi paycuna nipäcushga ‘gargapäcamaptinrämi cuentata gocushcä mana ali caminucho caycashgäta y yanapämargan Taytalä Jehovaman cuticamunäpaj’ (leiriy Hebreos 12:5, 6).

¹⁰ Yarparcushun juc michicoj runaman. Maygan uyshalanpis gueshyaycashganta cuentata gocurga, raquiycunmi waquincunata mana contagiananpaj. ¿Nishwanchuraj mana ali runa cashpan chayta rurashganta?, manami. Gueshyanpita cuticänanta munarmi chayta ruran. Aumi, chay gueshyaycaj uysha castancunawan puriyta munarpis y gaparaycaptinpis, chay michicoj runaga raquinanrämi chay gueshya waquincunata mana charinanpaj (Levítico 13:3, 4 textuwan tincuchiy).

11. 1) ¿Imanirtaj nishwan congregaciunpita gargushga cajcunaga gueshyacaj uysha japuyno cashganta? 2) ¿Imatataj gargushga cajcunaga rurapäcunman aliyarcunanpaj?

¹¹ Pipis congregaciunpita raquicäcuptenga chay gueshyaycaj uysha japuymi canman (Sant. 5:14). Espiritual cajcho ali caycänapäga alimi canga chay uyshero rurashganno ruraptinchi. Congregaciuncho mana arrepenticoj jucha rurajcunaga gargushgaraj caycanman. Chayno cananpaj Palabrancho Jehová mandacuptenga, quiquin juchayojta y congregaciuntapis cuyashpanmi mandacun. Gargushga caycarpis reuniunmanga shacarämunmanmi, chaycho yaracuynin yapay sinchiyarcunanpaj. Publicaciuncunatapis mañacäramunmanmi y JW Broadcasting^® programatapis ricapäcunmanmi, ancianucunapis yanaparcunmanmi. Ali cajcunata rurapäcushganta ricarga parlapärinmanmi masraj calpachacärinanpaj y nircur Jehovata sirvir yapay galaycärinanpaj. *

12. Jucha rurajcuna mana arrepenticuptin, ¿imatataj ancianucuna rurapäcun paycunata cuyashpan?

¹² Ama gongashunchu, congregaciunpitaga gargushga caycan juchancunapita mana  arrepenticojcunalami. Gargushga cananpaj o mana gargushga cananpäpis ancianucunaga shumajraj yarpachacärinan. Musyapäcunmi Jehovaga pitapis castigan ‘jutsata rurashqanman tupumi’ (Jer. 30:11). Jina ancianucunaga cuyayculanmi hermanuncunata. Pero mayganpis juchaman ishquishga car mana arrepenticuptenga gargupäcunmi.

13. ¿Imanirtaj Corinto congregaciunpita gargupäcurgan juc juchayoj runata?

¹³ Apóstol Pablupita parlarcushun. ¿Imatataj rurargan jatun juchanpita juc cristiano mana arrepenticuptin? Cay Corinto marca runaga quiquin taytanpa warminwanmi cacuycargan. Pasaypa mana ali cargan, pengayninlapis mana carganchu. Jehovaga unaynami Israel marcanta cayno mandacurgan: “Pipis märistanwan cacorga papänintami manacajman churan. Chay-niraj runataga märistantinta wañuchenga” (Lev. 20:11). Pabluga manami niycarganchu Corinto congregación chay runata wanuchinanpaj, pero mandacurganmi congregaciunpita gargupäcunanpaj. Chay runa pasaypa mana alicunata rurashganga waquincunatapis Diospitash raquicaycächergan. Waquincunapis nipäcurganshi ‘chayga manami alapa juchachu’ nir (1 Cor. 5:1, 2, 13).

14. ¿Imata rurartaj Pabluga laquipargan Corinto marcapita juchayoj runata, y imanir? (2 Corintios 2:5-8, 11).

¹⁴ ¿Juchanlachochu chay runaga wanurgan?, manami. Pablo wilacun tiempuwanga arrepenticurganshi. Juchancunaraycur congregaciunnin mana ali ricacushga carpis, Pabluga ancianucunatami nergan chay runata mana alapa castiganapaj. Cayta rurapäcunanpaj nergan: “Cananga perdunaycärir shacyächiyna. Fiyupa llaquishalla carga imamanpis chayanmanmi”. Aumi, Pablo laquiparganmi chay runata, mana munarganchu chayno laquishgala cacunanta y chayraycur Jehovapa perdunninta mana ashinanpaj (leiriy 2 Corintios 2:5-8, 11).

15. ¿Imata rurartaj ancianucunaga juchata rurajcunata piñapanman o cuyapashpan perdunanmanpis?

¹⁵ Imanomi cuyapäcoj y perdunacoj caycan Taytalanchi Jehová, chaynola cananpämi ancianucunapis calpachacärin. Piñapänapaj captenga pitapis piñapanmi, perdunanapaj captenga maygan juchayoj arrepenticuptenga perdunapäcunmi. Gargushga mana captenga congregaciuncho  mana alicuna pasacunantachi ancianucuna permitiycanman. Chauraga, ¿ancianucunalachu juchata rurajcunawan cuyapäcoj y perdunacoj canman?

16. Proverbios 21:13 wilacushganno, ¿imataraj ruranga Jehová yanapänanpaj ruwacaycämojcunata pipis mana casupaptenga?

¹⁶ Lapanchicunami calpachacushwan Jehovanola cuyapäcoj canapaj. ¿Imanirtaj chayta ninchi? Palabranmi nin waquincunata mana cuyaparga mañacushganchicunatapis mana wiyamänanchipaj (leiriy Proverbios 21:13). Chauraga wiyamänanchipäga waquincunatapis cuyapashpanchimi ali shimilapa parlapashwan. Chaymi pipis nacaycar ‘ruwacur mañacuptenga’ juclami yanapaycunchi. Cawayninchichoga Biblia cayno nishgantami casucunchi: “Runa-masinchïta mana cuyapaptinchëga Tayta Diosninchïpis mana cuyapaypami castigamäshunpaj” (Sant. 2:13). Ñanpu shongu carga munayculanchimi cuyapämashpanchi Taytalanchi Jehová perdunaycalämänanchita, chaynopa noganchipis waquincunawan ruranapaj. Chayno cuyapäcoj carga ali shongulanchiwanmi congregaciunman cuticamojcunata chasquishun.

17. ¿Imatataj David rurargan ali shonguyoj cashpan?

¹⁷ Bibliachoga wilamanchi cuyapäcoj y perdunacoj runacunapita, jucninmi cargan rey David. Payga ali shongulanwanshi runa masincunata cuyapaj. Chayno cashganga ricacämurgan Saulta wanuchinanpaj caycaptinpis perdunashganchomi, payga manami vengacurganchu (1 Sam. 24:9-12, 18, 19).

18, 19. ¿Imacunachotaj Davidga mana cuyapäcoj chucru shongu cashgan ricacämurgan?

¹⁸ Pero juc cutichoga cuyapäcoj cashganta Davidga gongaycurgan. Chayga pasargan Nabal jutiyoj runa pasaypa ashlipar imalatapis mana garaycuptinmi, chaynami David nergan Nabaltawan lapan wasincho caycajcunata wanuchinanpaj. Chay hora Nabalpa warmin, Abigailga, imaycancunata alistapacur jucla Davidpa naupanman aywargan, ruwacunanpaj ima yarpashgantapis mana rurananpaj (1 Sam. 25:9-22, 32-35).

¹⁹ Juc cutichona, profeta Natán Davidta wilapargan juc rico runash waccha runapa juclayla uyshanta suwapargan. Pasaypa piñacurishpanshi David cayno nergan: “TAYTA DIOSPA jutinchömi kayno nï: ¡Tsayno rurashqanpita tsay runata jukla wanutsitsun!” (2 Sam. 12:1-6). Davidga musyarganmi Moisespa Leynincho chayno nishganta, pipis juc uyshata suwacurga trucanchomi gonan chuscu uyshata paguno (Éx. 22:1). Chucru shongu cashgan imachi chayta musyarcarpis Davidga nergan chay runa wanuchun. Chaytaga Natán wilacamurgan quiquin David cuentata gocunanpaj Diospa naupancho pasaypa mana alicunata rurashganta. Chauraga Davidga ichiclapis cuyapaycarganchu Natán wilacamushgan runata. Tayta Jehová ichanga  alapa cuyapäcoj y perdunacoj caycargan Davidwan (2 Sam. 12:7-13).

20. ¿Imatataj Davidpita yachacunchi?

²⁰ Pasaypa piñacurishgan horami Davidga nergan Nabaltawan yanagajnincunatawan wanuchinanpaj cajta. Nircurpis wanuchinanpaj nergan Natán wilacamushgan suwacoj runata. Ichanga tapucunapaj caycan ‘¿imanirtaj Davidga cuyapäcoj caycarpis öraga shongun chucrucäcurgan?’. Yarparcushun chay hora imacunapa pasaycashganman. Chaylarämi jatun juchata rurashga cargan y espiritual cajcho mana ali caycargan. Chaynolami noganchicunatapis pasamashwan, espiritual cajcho mana ali caycar pitapis mana cuyaparmi chucru shongu cashganchi ricacämunman. Chaypaj parlarmi Jesús cayno nergan: “Tayta Dios mana juzgashunaykipaq runa mayikita ama juzgaytsu. Runa mayikita juzgaptikiqa Tayta Dios qamkunatapis juzgashunkipaqmi” (Mat. 7:1, 2). Chauraga alapa ali canga Tayta Diosninchinola lapanwanpis cuyapäcoj y perdunacoj captinchi.

21, 22. ¿Imacunata rurartaj ricacämunga cuyapäcoj y perdunacoj cashganchi?

²¹ Cuyapäcoj y perdunacoj carga manami shimilapitachu canman. Ali shongulanchiwanmi shumajraj yarpachacunanchi picunata yanapänapaj, familianchita, congregaciuncho caycajcunata o waquin runa masinchicunatapis. Chayno yanapacurga cuentatami gocushun rurashganchicuna ali cashganta. ¿Musyanchichu canan hora pilapis laquishga caycajta?, ¿imalantapis apapashwanchuraj micunanpaj?; gargushga cashganpita congregaciunman cuticamojcunacho ¿mayganlapis caycanchu shacyächinapaj?; ¿Diospa ali wilacuyninta apapashwanchuraj waquin runa masinchicunata? Cay lapanta rurarga rasunpa cuyapäcoj caycanchi waquincunawan (Job 29:12, 13; Rom. 10:14, 15; Sant. 1:27).

²² Waquincunaman yarparcurga, cuentatami gocushun paycunaraycur cuyapäcoj canapaj calpachacunapaj. Chayno cuyapäcoj y perdunacoj runa carga Taytalanchi Jehovatami cushichishun, payga “alapa cuyapäcojmi”.