1. ¿Imanirtaj alapa cushicunchi Jehovapa testiguncuna?

¡ALAPAMI cushicuycunchi Jehovapa testigun carga! Jutintami apanchi, y Testigunpis caycanchi runacunata paypita parlaparmi. Cushicunchimi Jehovapa testigunman ticrananpaj yachachishganchicunata ‘ali shongulanwan chasquicojcunata’ yanapaptinchi (Hech. 13:48). Noganchipis Jesusnola ricacunchi, payga espíritu santupa munayninwan cushicurgan gatejnincuna predicacushganpita ali wilacuyta apamur chayamushganpita (Luc. 10:1, 17, 21).

2. ¿Imanirtaj ninchi predicaciunninchega puntacho caycashganta?

² Predicaciunninchitaga puntamanmi churanchi. Apóstol Pabluga caytami Timoteuta nergan: “Jutsa rurayman paqta tuninkiman. Tsaynöpis paqta lutankuna imata yachaykätsinkiman”. Jina caytapis nerganmi: “Tsayno kawashpaykimi kikikipis salvakunki y yachatsishqaykita chaskikuqkunapis salvakärinqa” (1 Tim. 4:16). Caycho tantianchi runacunapa cawaynin maquinchicho caycashganta. Diospa Gobiernunpa mandatuncho cawaycarga calpachacunchimi ali cawacunapaj. Ima ruraycashganchicunachopis ricacämunmi Jehovata respetaycashganchita y alapami yaracunchi ali wilacuyta apashganchi cumplicänanpaj cajta (Filip. 1:27). Y ali yachachicojga canchi predicaciunman manaraj aywar shumaj preparacuptinchi y chaypaj Jehovata ruwacurmi.

3. ¿Lapan runacunacho yachachishganchita jucla chasquicun? Juc naciuncho ima pasashgantapis wilacamuy.

³ Öraga alapa calpachacurpis runacunaga manami chasquicärinchu Diospa Gobiernunpita wilapashganchita. Georg Lindal wauguiga, 1929 watapita 1947 watacamash, Islandia naciuncho japalan yachachicurgan. Chay naciunchoga maychicaj publicaciuncunatami runacunata aypurgan pero jucninlapis Testiguman ticrarganchu. Paymi cayno nergan: “Waquincunaga piñacärishgami yachachicushgäraycur, pero casi lapancunami  wiyaj tucushgala”. Tiempuwan Galaadpita misionerucuna chay naciunman chayaptinpis runacunaga chucru shongulash carcaycargan. Isgun watacuna pasarcuptinräshi, walca walca runacuna bautizacärergan y Jehovata sirvir galaycärergan. *

4. ¿Imanotaj ricacushwan Diospita yachachishganchicunata runacuna mana chasquicuptin?

⁴ Predicacushganchita pipis wiyayta mana munaptenga laquinäcurinchimi. Ichanga Pablunopis ricacushwan, payga nergan: “Fiyupa llaquicuyllawanmi shongöpis nanaycan”. Chayno nergan judiucuna Mesiastano Jesusta mana chasquishganraycurmi (Rom. 9:1-3). Alapa calpachacuycarpis, Bibliata estudiaycaj runa ima cambiulatapis mana ruraptenga y chayraycur mana yachachinapäna payta nerga; o pilatapis bautismuman mana chayachishga carga, ¿‘culpäraycur estudiantë pogunchu, Diospis manami bendicimanchu’, nirchuraj caycashwan? Cananmi cay ishcay tapucuycunapita yachacushun: ¿imano yachachicushpanchitaj Diosga ‘ali caycan’ nimäshun? Y predicaycaptinchi imapis munashganchino mana camacaptenga, ¿imanotaj ricacushwan?

5. ¿Öraga imanirtaj Diosta sirvir lapanpis munashganchino camacangachu?

⁵ Diospa munayninta rurajcunapaj parlarmi Biblia cayno nin: “Lapan rurashqankunapis alimi yarqapan” (Sal. 1:3). Pero chaywanga manami niycanchichu lapanpis munashganchino camacänanpaj. Imalachopis pantarcunchimi y Bibliapis ninmi “fiyupami nakan” runacunaga (Job 14:1). Jina chiquimajninchicunapis imaycatami ruranman ali predicacuycashganchita michamänanchipaj (1 Cor. 16:9; 1 Tes. 2:18). Chauraga ¿imano predicacuycanchitataj Jehovaga ‘ali caycan’ nimäshun? Mä ricärishun imanotaj Diospa Palabran caypita tantiachicun.

6. ¿Imano yachachicushpanchitaj Jehovaga ‘ali caycan’ nimäshun?

⁶ Jehovapäga ali canga mana yamacaypa sirviptinchimi. Payga ‘alita ruraycanqui’ nimäshun runacunata cuyar predicaciuncho calpachacuptinchi, chasquicäriptin o manapis. Pablo cayno escribergan: “Imano ñacarpis payman yäracushayquitaga Tayta Diosninchi manami gongangachu. Manami gongangachu [jutinraycur] ermänucunawan cuyanacur yanapänacushayquitapis” (Heb. 6:10). Jehovaga manami gongangachu calpachacushganchita y cuyacoj cashganchitapis; valuranmi lapan rurashganchita. Noganchipäpis ali caycan Corinto cristianucunata Pablo gelgapashgan, cayno nergan: “Sirbishanchëga manami manacajllapächu caycan” (1 Cor. 15:58). Aumi, Diospita yachachicur imapis mana camacaptenga manami mana cajlapachu canga.

7. ¿Imatataj yachacunchi Diospita yachachicunanpaj Pablo ima nishganpita?

⁷ Apóstol Pabluga may chaychomi Diospita  yachachicurgan y congregaciuncuna quichacämunanpäpis yanapacurganmi. Yachaj tucoj cristianucuna ‘gamga imatapis musyanquichu’ nir ashliptinpis, payga manami nirganchu ayca runacunata bautizacunanpaj yanapashganta. Ichanga caytasï nirganmi: “May-chaychöpis masmi willacushcä” (2 Cor. 11:23). Pablunola mana yamacaypa Diospita yachachicuycäshun, chaypitaga Diosninchi cushicungami.

8. ¿Imatataj mana gongashwanchu Diospita yachachicuycarga?

⁸ May chaycho yachachicushganchega cushichinmi Jehovata. Juc cutichomi Jesusga 70 gatejnincunata mandargan Diospa Gobiernunpita wilacärinanpaj. Biblia wilacun “discïpulunkuna kushishqa kutiykur” Jesusta cayno nishganta: “Jutikicho qarquptï ¡supaykunapis wiyakamashqami, tayta!”. Nircur Jesusga cayno anyapargan: “Supaykuna wiyakärishushqaykipita kushikurpis mas kushikäriy jana patsacho jutikikuna qelqaraykashqanpita” (Luc. 10:17-20). Jesusga musyarganmi Diospita yachachicur öraga imacunapis munashganchino mana camacänanpaj. Chay 70 discipulucuna yachachicushganraycurga cashgachi cristianuman ticraj runacuna. Jesuspa gatejnincunaga manami cushicunmanchu cargan runacuna chasquicushganraycurla, paycunaga cushicärinman cargan calpachacushganta ali nawilanwan Jehová ricashganpitami.

9. Gálatas 6:7-9 wilacushganno, ¿imatataj chasquishun mana yamacaypa Diospita yachachicuycarga?

⁹ Diospita yachachicushpanchiraycurmi mana wanuypa cawaytapis chasquishun. Diospa Palabrancho caycaj rasunpa cajcunata muruycashganchino calpachacuycarga “espíritu santu munashanno” ruraycanchi, espíritu santumi lapan cawayninchicho caycanman. “Mana yamacashaga”, mana wanuypa cawanapaj bendiciuntami Diosninchi gomäshun, y chayga manami cangachu aycajta bautismuman apashganchipita (leiriy Gálatas 6:7-9).

10. Yachachicushganchicunata runacuna chasquicunanpäga, ¿imapitataj canga?

¹⁰ Runacuna chasquicunanpaj o mana chasquicunanpäpis shongunpitami canga. Juc murucoj runapaj parlarmi chayta Jesús tantiachicurgan. Cay runash tucuy alpayoj chacracunacho murupacurgan, pero ali caj alpalachoshi murucuna jegamurgan (Luc. 8:5-8). Tucuy alpacunapaj parlarga, Jesusga runacunapa shonguncunapämi parlaycargan, ali shongu cajcunaga alimi chasquicun Diospa palabranta (Luc. 8:11-15). Murucoj runawan pasashgannopis, noganchicunaga manami musyanchichu maygan shonguman Diospa Palabran yaycunanpaj. Chayno captinpis, ali murucoj runanopis calpachacuycanchimi Diospa Gobiernunpita ali wilacuyninta may chayman chayachinapaj. Apóstol Pablo wilacushgannopis Diosninchega yachachicojcunata “arushqanman tupu päganqa”, manami imata lograshganraycurchu (1 Cor. 3:8).

11. ¿Imanirtaj nishwan Noé ali yachachicushganta Diosninchi chasquishganta? (Garancho caycaj dibujuta ricäriy).

¹¹ Unaypitana Jehovapa sirvejnincuna yachachicushga chasquicuyta mana munaj runacunata. Jucnin cajmi cargan Noé, payga achca watacunapa mana yamacaypa Diospita yachachicurgan (2 Ped. 2:5). Noega yarpachacurganchi runacuna ali shongulanwan chasquicunanpaj, pero manami chaynochu cargan. Jehovapis manami wilaparganchu chaypita. Ichanga caytasï wilapargan: “Tsaymi arcaman yaykapäkunki qam, warmiki y  tsurikikuna warmintin” (Gén. 6:18). Y arcapa tamañun imano cananpaj Jehová wilapaptenga, Noega tantiarganchi walcaj runacunala chasquicunanpaj (Gén. 6:15). Chaynomi cargan. Alapa chucru shongu cashpanmi mayganlapis wilapashganta casucärirganchu (Gén. 7:7). ¿Nirganchuraj Jehová, Noepa culpan cashganta?, manami. Diosninchipa nawilanpäga mana yamacaypami arurgan y lapanchomi casucurgan (Gén. 6:22).

12. ¿Imatataj rurargan Jeremías Diospita cushi cushila yachachicuycänanpaj contrancho caycaj runacuna chasquicuyta mana munaptinpis?

¹² Profeta Jeremiaspis achca watacunapa Diospita yachachicurgan, runacuna mana wiyayta munaptinpis. Burlacärishganraycur y ashlipäcushganraycur yarpachacurganrächi Diospita manana parlananpaj (Jer. 20:8, 9). Pero chayta rurarganchu. ¿Imataj yanapargan guepaman mana cutir Diospita yachachicuycarla caycänanpaj? Cay ishcaycuna yanapargan: juc, Diospita yachachicushganga runacuna ‘ali goyacunanpaj’ canman cargan (Jer. 29:11). Ishcay, quiquin Jehovami mandargan jutinpita yachachicunanpaj cajta (Jer. 15:16). Noganchipis Jehovapa testigun cashpanchimi cay chacaraycaj munducho Diospa ali wilacuyninta apaycanchi y Taytanchipa jutinpitapis pï mayta yachachiycanchi. Caycunaman yarparga cushi cushila Diosninchipita yachachicuycäshun runacuna chasquicuptin o mana chasquicuptinpis.

13. ¿Imatataj yachacunchi Marcos 4:26-29 textucho Jesús ima yachachicushganpita?

¹³ Pipis cristianuman ticrananpäga öraga tiempuraj pasanan. Chaypaj parlarmi Jesús yachachicurgan juc punuycaj murucoj runapaj (leiriy Marcos 4:26-29). Cay murucoj runash imatapis mana rurar shuyaraycashgala ichiclapa ichiclapa murushgancuna jegamunanpaj cajta. Chay japuyla maygan estudiantipis cristianuman ticrananpäga o yachacushgannola cawananpäga öraga tiempuraj pasanan. Imanomi chacrayoj runacunapis murushgancunata walca junajcunalacho poguchingachu, chaynolami noganchipis estudiantinchicunataga munashganchino obligashunchu espiritual cajcho pogunanpaj. Chaymi laquicuycäshunchu Diosta sirvir manaraj galaycushganpita, jinala calpachacuycäshun. Plantacunatapis uriapänapaj, discipulucunatapis ruranapäga pacienciacoj cashganchipitami canga (Sant. 5:7, 8).

14. Runacuna jucla mana chasquicuptinpis, ¿imaraj tiempuwan pasanman?

¹⁴ Waquin marcacunachoga achca watacunapami predicaycanchi, pero runacunaga manami chasquicärinchu. Parlarcushun Cánada naciunpita Gladys y Ruby Allen paninchicunapita. 1959 watami precursor regularcunano aywapäcurgan Quebec urancho yanapacunanpaj. * Chay marcacho runacunaga manash chasquicuyta munarganchu, iglesiancunapa sacerdotincunata y waquin runacunatapis manchacur. Gladys pani cayno wilacun: “Ishcay watapami tutapita tardicama puncun puncun aywapäcurganchi, pero maygan runalapis chasquimashcanchichu. Ventanancunapa watgarcarcamurmi nircur pacacärej. Chayno captinpis nirgunchichu cuticamunanchipaj”. Tiempuwanga runacunapa shongunga ñanpurcurgannami y chasquicärirgannami Diospa Palabranta. Cananga quimsa congregaciuncuna chaycho caycan (Is. 60:22).

15. ¿Imatataj yachachimanchi 1 Corintios 3:6, 7 texto discipuluta ruranapaj cajpita?

¹⁵ Discipulucunata ruranapäga maqui maqui arushganchipitami canga. Congregaciuncho lapan yanapacamushganpitaräshi  pipis bautismuman chayan (leiriy 1 Corintios 3:6, 7). Öraga maygan hermanupis pilatapis goycunman juc trataduta o juc revistata. Imaraj canman watucaj cutinanpaj mana camäpacurga, juc hermanutachi ruwacunman trucancho aywananpaj. Watucaj aywashgan hermanuga Bibliapita yachachir galaycun y tiempuwanga yanagänanpaj jucta jucta pushacurcur aywan. Achca hermanucuna aywaptenga yacuta gaycapaycajnomi caycanman, estudiaycaj runapis más shacya shacyalanachi ricacun. Chaynomi Jesús wilacamushgannopis, muroj cajpis, cosechaj cajpis cushicarcärinmi pipis Diosta sirvinanpaj yanapacärishganraycur (Juan 4:35-38).

16. Calpayqui ushacaycaptinpis o mana ali ricacurpis, ¿imanirtaj cushicunquiman imanolapapis predicaciuncho yanapacamushgayquipita?

¹⁶ ¿Y saludniquiraycur unayno Diospita manana yachachicuycaptiquega? Chayno captinpis cushicuy, ichiclapis yanapacaycämunquimi. Davidwan y soldaduncunawan ima pasashganta ricärishun. Familiancunatapis y ima ayca charashgancunatapis amalequitacunash apacärergan. Chaynash paycunaga chay amalequitacuna guepanta aywapäcurgan. Aywarcaycaptinshi 200 soldaducuna uticashga caycar, guepicunata täpar quedacärergan. Guerrachoga ganapäcurganmi y imayca tarishgancunata lapancuna raquipänacunanpämi David nergan (1 Sam. 30:21-25). Canan wichanpis chaynolami caycan Diosta reguinanpaj runacunata yanapaptinchi. May chaychopis lapanchicunami cushicurcunchi runacuna salvacunanpaj yanapacuptinchi; walcalata rurashga carpis yanapacushcanchimi rasunpa caj caminuta taripäcunanpaj.

17. ¿Imanirtaj ‘graciaslä’ nishwan Tayta Jehovata?

¹⁷ ‘Graciaslä’ ninchimi Tayta Jehovata, payga cuyapämashpanchimi ‘alimi yanapaycamunqui’ nimanchi. Payga musyanmi,öraga munashganchino imapis mana camacänanpaj. Pero ricaycanmi imano calpachacuycashganchita y runacunata cuyapar predicaycashganchita; cay lapancunaraycur bendiciunnintapis tarichimanchi. Discipulucunata rurar imano cushi cushila caycanapäpis Diosninchega yachachimanchimi (Juan 14:12). Aumi, mana yamacaypa sirviycarga Jehovapa naupanchoga ali ricashgami caycäshun.