1. ¿Imanotaj cawargan Babiloniacho caycaj judiucuna?

 BABILONIACHO caycaj judiucunaman yarpäshun, paycunaga Jerusalén marcata ushacächishganta ricapäcurgan. Jina unay ayluncuna y quiquincuna juchata rurashganpita Babiloniapa presutano apacärergan (2 Crón. 36:15, 16, 20, 21). Ichanga chay marcacho caycarpis wasincuna y chacrancuna carganmi, chayno captinpis Babiloniacho cawayga manami Israel marcannochu cargan (Jer. 29:4-7). Chayraycu pasaypachi laquicärergan. Chaymi “Babiloniacho kaykaq mayukuna kuchunman jamaykurmi Siónpaq yarparkur” waquincuna wagarganshi (Sal. 137:1). Chauraga, ¿piraj judiucunata shacyächinman cargan?

2, 3. 1) ¿Imanotaj Jehová Babiloniacho caycaj judiucunata shacyächergan? 2) ¿Imatataj canan yachacushun?

² Taytalanchi Jehová “imaypis shakyätsimantsi” (2 Cor. 1:3). Payga sirvejnincunata cuyar shacyächiyta munan. Waquin judiucuna juchanta cacharir arrepenticärinanpaj Jehová musyargan (Is. 59:20). Chaymi pachac (100) watacunano judiucuna Babiloniaman manaraj apashga captinmi, Isaías profetata Jehová cayno wilacunanpaj nergan: “Kuyashqä runakunata shoqaykulay” (Is. 40:1). Aumi, profeta Isaiasta escribichishganwan Jehová Babiloniacho caycaj judiucunata shogayta munargan.

³ Öraga noganchipis shacyächimänanchita necesitanchi.  Cananga yachacushun imanotaj Jehová Babiloniacho caycaj judiucunata shacyächergan: 1) juchanpita arrepentido caycajcunata perdunananpaj aunirgan, 2) marcanman cutinanpaj aunirgan, 3) jina mana manchacunanpaj yanapargan. Chaycunapita canan yachacurmi tantiarcushun imano canan tiempuchopis Jehová shacyächimanchi.

JEHOVÁ CUYAPÄCOJ CAR PERDUNAMANCHI

4. Jehová cuyapäcoj car, ¿imatataj judiucunata nergan? (Isaías 55:7).

⁴ Jehovaga “kuyapämantsi” (2 Cor. 1:3). Chaymi Babiloniacho caycaj judiucunata aunirgan juchanpita arrepenticäriptin perdunananpaj (leiriy Isaías 55:7). Paymi nergan: “Kananpitaqa imaypis kuyapäshaykimi” (Is. 54:8). Juchasapa cashganpita judiucuna Babiloniaman apashga caycarpis, Jehovaga aunirgan yapay marcanman cutimunanpaj cajta (Is. 40:2). Chayta musyarga judiucunaga cushicurganchi, ¿au?

5. Unay judiucunapitapis, ¿imanirtaj más seguro caycanchi Jehová perdunacoj cashganpita?

⁵ ¿Imataj yachacunchi? Cutin cutin pantarcuptinchipis Jehovaga perdunamäshun. Babiloniacho caycaj judiucunatano noganchitapis Jehová perdunamänanchipaj seguro caycashwan. Payga imaycacunata rurashga perdunamänanchipaj. ¿Imata rurashga? Jehová perdunacoj cashganta Isaías wilacamushganpita achca watacuna pasarcuptenga, Diosninchega wamran Jesucristuta cay Pachaman cachamurgan noganchiraycu wanunanpaj. Chayraycu juchanchicunata chipyaypa Jehová perdunamanchi (Hech. 3:19; Is. 1:18; Efes. 1:7). ¡Alapa cushicunchimi Jehová perdunacoj cashganpita!

6. ¿Imanirtaj Jehová cuyapäcoj cashganman yarpashwan? (Fotucunatapis ricay).

⁶ Unay ima jucha rurashganchipita Dios perdunamashganchina captinpis öraga culpayoj ricacushwan, chayno ricacuptinchega Isaías 55:7 nishganga shacyächimäshunmi. Waquincuna ima jucha rurashganpita nacaycanrämi, chaypita alapa laquicärinraj. Juchanchicunata wilacur arrepenticushgana carga musyanchina Jehová perdunamashganchita. Aumi, jucha rurashganchipita manami yarpannachu (Jeremías 31:34 textuwan tincuchiy). Chauraga noganchipis  jucha rurashganchicunaman yarparashwannachu. Jehovapa nawilanga canan ali caj rurashganchicunalata ricaycan (Ezeq. 33:14-16). Ichiclachona juchanchicunapita nacashunnachu, cuyapäcoj Taytalanchi Jehovami libramäshun.

7. ¿Imamantaj yarpashwan ima juchanchicunapita ancianucunata wilacunapaj?

⁷ ¿Imatataj rurashwan jatun juchata ruraycur upälala cacuycarga? Bibliaga nimanchi ancianucunata wilanapaj (Sant. 5:14, 15). Chayta ruranapaj mana fácil captinpis, yarpäshun quiquin Jehová ancianucunata acrashganta. Jehová y ancianucuna cuyamashganchiman yarpar mana manchacuypana juchanchicunata wilapäshun. Ricärishun imano Jehová ancianucunawan shacyächergan Arthur wauguilanchita. a Paymi wilacun: “Juc watanomi pornografiata ricargä. Pero juc discursuta wiyar tantiargä rurashgäga mana ali cashganta, chaymi warmïlata y ancianucunatapis wilapargä. Chayta rurarga alinami ricacurgä, ichanga rurashgäcunaman yarpar jinala laquicuywan caycargä. Ancianucunaga yarpächimargan Jehová amiguntano ricamashganta y cuyapämar corrigimashganta”. Cananga Arthur precursor regularno y siervo ministerialno sirviycan. Arrepenticuptinchega Jehová perdunamanchimi, ¡chayga cushicuypämi!

SHAMOJ TIEMPUPAJ JEHOVÁ ALI CAJTA AUNIMANCHI

8. 1) ¿Imatataj Jehová aunicurgan Babiloniacho caycaj judiucunata? 2) Isaías 40:29-31 texto nishganno, ¿imanotaj chay judiucuna ricacärergan Jehová aunicushganta musyar?

⁸ Babiloniucunaga presuncunata manami imaypis librajchu. Chayraycu judiucuna yarparganchi Jerusalenman manana cutinanpaj (Is. 14:17). Pero Jehová aunicurgan Jerusalenman cutipäcunanpaj. ¡Manami imapis michanmanchu cargan! (Is. 44:26; 55:12). Jehovapäga Babilonia cargan wayra apacoj polvunomi, pipis pucaycuptin mana ricacannachu (Is. 40:15). Chayta musyapäcushganga Babiloniacho caycaj judiucunata cushichirganchi. Chaypita parlar profeta Isaías cayno nergan: “TAYTA DIOSMAN yärakuqkunami itsanqa kalpayuq rikakun” (leiriy Isaías 40:29-31). Dios aunicushganman yäracurmi judiucunaga mana uticaypa anca vuelashganno calpayoj capäcunman cargan.

9. ¿Imanirtaj judiucuna Jehová aunicushganta cumplinanpaj cajman yäracurgan?

⁹ Judiucunaga yäracunan cargan Jehová paycunata yanapänanpaj cajta. ¿Imanir? Jehová ima nishgantapis cumplirganmi. Paycunaga musyapäcurganmi Asiria nación unay Israelpa norte caj laduncho tiyajcunata preso apacärishganta (Is. 8:4). Ricapäcurgan babiloniucuna Jerusalenta ushacächishganta, quiquincunapis apashga cargan Babilonia marcaman (Is. 39:5-7). Jina Babilonia marcapa reynin, Sedequías reytami ishcay nawinta jorgurcur cadenawan watarcur Babiloniaman preso apacärergan, chaytapis musyapäcurganmi (Jer. 39:7; Ezeq. 12:12, 13). Jehová naupata wilacushgannolami lapanpis cumplicashga (Is. 42:9; 46:10). Chay lapanta ricaycurga masrächi yäracärergan paycunatapis Jehová librananpaj.

10. Sasacunapa pasaycarpis, ¿imaraj yanapämäshun Jehová aunicushganta cushi cushila shuyaränapaj?

¹⁰ ¿Imataj yachacunchi? Laquesawan o ima yarpachacuycunawan caycar Jehová aunicushganman yarparga calpata tarishun. Sasa tiempo cawaycanchi y chiquimajninchicunapis  caycan, chayno captinpis manami ajayashwanchu. Jehovapa aunicuynincunaman yäracur imaypis gongashwanchu shamoj tiempucho cushi cushila cawacunanchipaj. Ventanapis ganra captin imacunatapis manami shumaj ricanchichu, cutin cutin pichapänanchiraj; chaynolami waran waran shamoj tiempulaman yarpachacuptinchi clarumi ricashun chay wichan imano cawacunapaj. Chaypäga Jehovapa aunicuyninpita parlaj canciuncunata wiyashwan, videucunata ricashwan y revistacunatapis leishwan. Jina Jehovapa aunicuynincuna maygan gustashushgayquita pilatapis wilapay.

11. Fiyu gueshyawan caycaj cristianaga, ¿imataj rurargan calpata tarinanpaj?

¹¹ Joy cristianapita parlarcushun, payga fiyu gueshyawan nacaycan. Payshi Jehovapa aunicuynincunaman yarparga calpayoj ricacun, cayno nin: “Calpaynaj ricacuptë lapan laquicushgäcunata Jehovata wilapä, payga imano sienticushgätapis tantiaycanmi. Jina calpantapis gomashga aguantanäpaj” (2 Cor. 4:7). Joy hermananchega imaypis yarparan shamoj tiempucho Paraisuchona cawaycashganman, chaychoga “manami mayqanpis ‘qeshyaykämi’ ninqapaqtsu” (Is. 33:24). Noganchipis imano sienticushganchita Jehovata wilapaptinchi y pay aunicushgancunaman yarparaptinchi calpayojmi ricacushun.

12. ¿Imanirtaj Jehová aunicushgancunaman masraj yäracunanchi? (Fotucunatapis ricay).

¹² Babiloniacho caycaj judiucunanomi noganchipis Dios aunicushgancunaman yäracushwan. Jehová unaycho wilacächishgannolami canan wichan lapanmi cumplicaycan. Ricaycanchimi lapan Pachacho más munayniyoj ‘naciunga fuerte cashganta y ayvecis mituno débil cashganta’ (Dan. 2:42, 43). Jina ‘terremotupis may chaycho caycan’, y ‘Diospa ali wilacuyninta may chay nacioncunachopis’ wilacuycanchi (Mat. 24:7, 14). Jehová lapan wilacushgancunata imano cumplicashganta ricarmi masraj yäracunchi shamoj tiempucho lapanta cumplinanpäpis.

 JEHOVAGA YANAPÄMANCHI MANA MANCHACUNAPAJ

13. 1) Judiucuna marcanman cutimunanpäna caycaptin, ¿imacunapataj pasanan cargan? 2) Isaías 41:10-13 textucunacho, ¿imataj nergan Jehová judiucunata shacyächinanpaj?

¹³ Babiloniacho caycaj judiucunataga shacyächirmi Jehová wilapargan marcanman cutimunanpaj cajta, ichanga chay junaj chayamunanpäna caycaptenga imayca sasacunaparämi pasanan cargan. Jehová wilacushgana cargan achca naciuncuna y Babilonia marcapis ushacänanpaj cajta (Is. 41:2-5). Chaymi unaypitana Jehovaga judiucunata mana manchacunanpaj cayno nir shacyächergan: “Qamkunawan kaykaptïqa ama mantsakäriytsu. Diosniki kaykaptïqa ama lakikäriytsu” (leiriy Isaías 41:10-13). ‘Diosniqui caycä’ Jehová niptenga, yarpaycächergan paycunata imaypis yanapänanpaj cajta (Sal. 118:6).

14. ¿Imacunatataj más Jehová rurargan judiucunata yanapänanpaj?

¹⁴ Jehovaga judiucuna mana manchacunanpaj alapa poderyoj y yachaj cashganta yarpächergan. Cielupa nuquircur goylarcunata ricananpaj nergan, ‘lapantapis jutinpa jutinpami reguë’ nir yarpächergan (Is. 40:25-28). Chaynolami Jehová lapan sirvejnincunata jutinpa reguin. Y goylarcunata camananpaj podernin captenga, ¿manachuraj sirvejnincunata yanapanman? Chauraga judiucunaga manami manchacunmanchu cargan.

15. ¿Imatataj Jehová rurargan judiucuna listo carcaycänanpaj?

¹⁵ Jehová judiucunata wilapargan ima pasaptinpis paycuna listo carcaycänanpaj, Isaías librucho cayno nergan: “Wayikikunaman yaykur punkuykikunata wichqakamuy. Tayta Diospa rabyaynin pasashqanyaq pakarpäkuy” (Is. 26:20). Chayga cumplicurganchi Babilonia marcata rey Ciro ushacächinanpaj caycaptin. Grecia naciunpita unay estudioso runa wilacushganno, Ciro Babiloniata ushacächiptinshi “soldaduncunata mandargan lapan wasincho mana caycajcunata wanuchinanpaj”. ¡Babiloniucunaga pasaypa manchacurganchi! Ichanga  judiucunaga Jehovata cäsucärishganraycu salvashgami capäcunman cargan.

16. ¿Imanirtaj manchacushwanchu jatun nacay chayamunanpaj cajman yarpar? (Fotutapis ricay).

¹⁶ ¿Imataj yachacunchi? Ichiclachona jatun nacay galaycamuptin runacuna alapami manchacärenga. Pero noganchega Jehová Diosninchilaman yäracur mana manchacushunchu. Segurumi caycäshun Jehová salvamänanchipaj cajta (Luc. 21:28). Shamoj tiempucho achca naciuncuna atacamaptinchipis, Jehová Diosninchilaman mana jaguiypa yäracuycäshun. Chay wichanga angelnincunawan Jehová chapämäshun y imata ruranapäpis wilacuycunata gomäshunmi. ¿Imaraj chay wilacuycuna canga? Manami musyanchirächu. Capazchi congregaciuncho caycaj pushacoj hermanucunawan wilamäshunmi. Chay wilacuycunaga Biblia nishgannopis pacacuna wasinopis cangachi. Chay tiempo chayamuptin listo caycänanchipaj hermanunchicunawan junto caycäshun, pushacoj hermanunchicuna mandamashganchicunata cäsucushun, jina quiquin Jehová marcanta pushaycashganman yäracushun (Heb. 10:24, 25; 13:17).

17. ¿Imatataj rurananchi Jehová yanapämänanchipaj?

¹⁷ Babiloniacho caycaj judiucunapa cawaynin fácil mana captinpis, Jehová paycunata yanaparganmi; noganchitapis yanapämänanchipaj cajman yäracushun. Diosninchega cuyapäcoj carmi ali cawayta apamunanpaj cajman waran waran yarpäshun. Jehovaga Taytalanchimi caycan, chaymi imatapis manchacushwanchu.