1. Apocalipsis libro wilacushganno, ¿imataj Satanás ruran Diosta sirvejcunata?

 APOCALIPSIS libruga wilacun Diospa Gobiernun cielucho mayna mandacur galaycushganta, y Satanás cay Pachaman gargushga cashganta (Apoc. 12:1-9). Chauraga cielucho caycajcunaga cushishga carcaycan, Pachacho caycajcuna ichanga masraj nacaycanchi. ¿Imanir? Satanasga pasaypa rabiashga puriycan y Diospa sirvejnincunata alapa chiquir imaycacunata ruran nacachinanpaj (Apoc. 12:12, 15, 17).

2. ¿Imaraj yanapämäshun Diosman yäracuycarla caycänapaj?

² Satanás alapa chiquimaptinchipis, ¿imaraj yanapämäshun Diosman yäracuycarla caycänapaj? (Apoc. 13:10). Chayta musyanapäga tantiarcushun shamoj tiempucho ima pasananpaj cajta. Apocalipsis librucho apóstol Juan wilacun ima bendiciuncunata chasquinapaj. Juc bendición caycan Diospa chiquejnincunaga mana canganachu. Ricärishun Apocalipsis wilacushganta y Diospa chiquejnincuna imano ushacächishga cananpaj.

3. ¿Ima tincuchicuycunapitataj Apocalipsis libro wilacun?

³ Apocalipsis librupa galaycunancho nin cay librucho guelgaraycajcunaga tincuchicuycunawan cashganta (Apoc. 1:1). Diospa chiquejnincunata tincuchin manchariypaj fiyu uywa nirajcunawan. Tantiarinapaj, cay librucho wilacun: “Lamarpita manchacuypag fiyu uywa nirag ganchris umayog y chrunca  wagrayog yargaycämogta” (Apoc. 13:1, Biblia Ambo Pasco). Jina nin: “Pacha rurinpita manchacuypag fiyu juc uywa nirag yargaycämogta” y “rimaynin dragunpa nirag” cargan; “cielupita ninatapis runacuna ricaycaptin cay pachaman ratachimuran” (Apoc. 13:11-13, Biblia Ambo Pasco). Y manchariypaj puca uywapa janancho juc wayrapacoj warmi montaraycashgantapis wilacun. Chay quimsa manchariypaj uywacunapita parlarga Diospa chiquejnincunapitami parlaycanchi, paycunaga Diospa Gobiernunpa contrancho caycargan. Chaymi ali canga musyanapaj Diospa chiquejnincuna pïcuna cashganta (Apoc. 17:1, 3).

4, 5. ¿Imanotaj yanapämanchi Daniel 7:15-17 wilacushganta Apocalipsis librucho caycaj tincuchicuycunata tantianapaj?

⁴ Diospa chiquejnincuna pïcuna cashganta manaraj yachacur, puntataga cay tincuchicuycuna ima ninantaj tantiarcushun. Chaypäga quiquin Biblia tantiachimäshun. Apocalipsis librucho caycaj tincuchicuycunaga Bibliapa waquin libruncunachopis tarinchimi. Tantiarinapaj, profeta Daniel juc sueñucho ricargan “lamarpitami mantsariypaq jukniraq jukniraq chusku jatusaq uywakuna” yargamushganta (Dan. 7:1-3). Y quiquin Danielmi tantiachicorgan chay manchariypaj uywacunaga “chuscu raycuna” o gobiernucuna cashganta (leiriy Daniel 7:15-17). Chauraga caypita tantiarcunchi Apocalipsis librucho manchariypaj uywacunapita parlaptenga, gobiernucunapämi parlaycan.

⁵ Apocalipsis librucho caycaj tincuchicuycunata shumaj tantiarcushun, chaypäga quiquin Biblia yanapämäshun. Puntataga parlarcushun manchariypaj uywacunapita. Nircur ricashun chaycuna ima ninantaj. Chaypitana parlarcushun chay manchariypaj uywacunata ima pasananpaj. Ushanapäna ricashun imataj caycunapita yachacunchi.

6. Apocalipsis 13:1-4 textucunacho ganchis umayoj uywapita parlaptenga, ¿imapitaj parlaycan?

⁶ ¿Ima nishwantaj ganchis umayoj manchariypaj uywapita? (Leiriy Apocalipsis 13:1-4). Bibliaga wilacun cay manchariypaj uywapa cuerpunga leopardo niraj, chaquincunami osupa niraj, shiminnami liunpa niraj y chunca wagrayoj cashganta. Y Daniel ganchis caj capituluchopis wilacunmi chuscu manchariypaj jucniraj jucniraj uywacunapita. Ichanga Apocalipsis libruga wilacun jucnayla manchariypaj uywapita, pero tincunmi Daniel visiuncho ricashganwan. Chauraga chay manchariypaj uywaga manami ninanchu juc gobiernula o juc naciunla cashganta. Apocalipsis libruga nin munaynicho chararaycan “maytsay trïbu runakunata, maytsay marka runakunata, ima idiömata rimaq runakunata y maytsay nación runakunatapis” (Apoc. 13:7). Chauraga caychoga manami juc gobiernulapächu parlaycan, sinoga unaypita canancama lapan gobiernucunapämi (Ecl. 8:9). *

7. Manchariypaj uywapa ganchis umancunaga, ¿pïcunapätaj parlaycan?

⁷ ¿Ima nishwantaj manchariypaj uywapa ganchis umancunapita? Chaypäga ricärishun Apocalipsis 17 caj capituluta, chaychoga wilacamun 13 caj capitulupita manchariypaj uywapita. Apocalipsis 17:10 nin: “Ganchis mandajcunapita pichga mandajcunaga maynami ushacasha. Jucga cananmi mandaycan. Ganchis caj yurimoj mandajmi ichanga wallca diyalla [tiempula] mandangapis”. Satanaspa maquincho gobiernucunapita ganchis cajcunaga chay manchariypaj uywapa ganchis umancunawan tincun. Chay gobiernucunaga  Diospa sirvejnincunata pasaypa nacachergan. Apóstol Juan cawashgan wichanpäga, pichga naciuncuna mayna ushacashgana cargan: Egipto, Asiria, Babilonia, Medopersia y Grecia. Ichanga Roma caj naciunga chay wichan mandacuycargan. Chauraga, ¿piraj caycan ganchis caj naciunga o último caj umaga?

8. Manchariypaj uywapa ganchis caj umanga, ¿pïmi caycan?

⁸ Daniel librupa profeciancunaga yanapämanchi tantiarcunapaj manchariypaj uywapa ganchis umancunapa último uma pï cashganta. Cay ushanan junajcunachoga, ¿maygan naciunpa munaynincho lapan naciuncuna caycan? (Apoc. 1:10). Reino Unido y Estados Unidos naciuncuna jucnayla naciunno más munayniyoj caycan. Chauraga Apocalipsis 13:1-4 textucunacho manchariypaj uywapa ganchis umanpita parlaptenga, Reino Unido y Estados Unidos naciuncunapaj parlaycan.

9. Uyshapano ishcay wagrayoj manchariypaj uywaga, ¿pitaj caycan?

⁹ Apocalipsis 13 caj capitulucho wilacun manchariypaj uywapa ganchis caj uman imata rurananpaj cajta. Reino Unido y Estados Uniduspita parlarmi juc manchariypaj uywawan tincuchin, y cayno nin: “Uysha-mallwapa-niraj ishcay wagran caran. Ichanga dragonnömi” riman. Cay manchariypaj uywaga imaycacunata ruran, “runacuna ricaycaptinmi syëlupita ninatapis tamyachimuran” (Apoc. 13:11-15). Y Apocalipsis 16 y 19 caj capitulucunaga nin ‘engañacoj profeta’ cashganta (Apoc. 16:13; 19:20). Reino Unido y Estados Uniduspita imata rurananpaj cajpita parlarmi, Danielga nin munashganta rurarmi “illajpitami imatapis illgächenga” (Dan. 8:19, 23, 24). Daniel wilacushganno Ishcay Jatun Guerra wichan chaytami ricashcanchi. Reino Unido y Estados Uniduspita cientificucuna yanapänacärergan y ishcay jatun bombas atómicas nishganta pashtachimurgan. Chayta ruraycurmi Reino Unido y Estados Unidos naciuncuna ‘cielupita ninata tamyachimurgan’.

10. Ganchis umayoj manchariypaj uywa niraj puca uywaga, ¿imataj caycan? (Apocalipsis 13:14, 15; 17:3, 8, 11).

¹⁰ Cananga juc manchariypaj uywapitana parlarcushun. Cay uywapis ganchis umayojmi, ichanga puca coloryojmi. Apocalipsis libruga nin manchariypaj ganchis umayoj uywa niraj o imagen cashganta, y “pusaj caj mandajmi caycan” (leiriy Apocalipsis 13:14, 15; 17:3, 8, 11). * Cay mandajga yurircamur nircur ilacäcorgan y tiempuwanga yapay yurircamorgan. Cay tantiachicuyga tincunmi Organización de las Naciones Unidas nishganwan ima pasashganta, cayga lapan gobiernucunapa maquincho caycan. Galananchoga Sociedad de Naciones nishgan jutin cargan. Pero Ishcay Jatun Guerra wichanchoga ilacäcorgan, tiempuwan ichanga yapay yurimorgan canan reguishganchi jutiwan.

11. ¿Diospa contrancho caycaj gobiernucunaga imataj ruranga, y imanirtaj ama manchacushwanchu?

¹¹ Chauraga Diospa contrancho caycaj gobiernucunaga imaycacunata ruranga runacunata engañananpaj, Jehovapa y sirvejnincunapa contrancho churacänanpaj. Chayta ruraycurmi shuntanga may chay “nasyun mandajcunata suldäruntinta” Armagedón guerrapaj, “Tayta Dios cay pachata jusganan junaj pillyananpaj” (Apoc. 16:13, 14, 16). Ichanga ama manchacushwanchu, Diosnilanchi Jehovaga Gobiernunta yanapacojcunata jucla salvananpämi aywamunga (Ezeq. 38:21-23).

12. ¿Imataj pasanga lapan manchariypaj uywacunata?

 ¹² ¿Imataj pasanga chay manchariypaj uywacunata? Apocalipsis 19:20 (Biblia Ambo Pasco) cayno nin: “Chay manchacuypag fiyu uywa nirag uywa y lutan willacog prësu charisha caran. Chay willacog milagrucunata chay uywapa ñaupagninchru ruraran. Chaynuypa criyichiran uywapa señalninwan señalasha caycagcunata y pay nirag rurasha ïduluta adoragcunata. Chaypitam chay manchacuypag fiyu uywa nirag y lutan willacog azufriyog nina rupaycagman cawaycagta gaycusha caran”. Chauraga mandacuycaptin wichan Diospa chiquejnincunaga ushajpaj ushacächishga canga.

13. ¿Imatataj gobiernucunaga shuyaran, y imanirtaj chayga cristianucunapa sasa canman?

¹³ Imataj yachacunchi. Diospa sirvejnincunaga paylatami aduranman y Gobiernunlata yanapacunman (Juan 18:36). Chauraga runacunapa gobiernuncunataga ama yanapashwanchu ni contranchopis caycashwanchu, jina política asuntucunawanpis talucashwanchu. Cayta ruranapaj ichanga sasami canman. Autoridäcunaga imanopapis munan gobiernunta yanapänapaj, y chayga canman rurayninchicunawan o parlashganchiwanpis. Autoridäcuna munashganta rurajcunaga manchariypaj uywapa señalninwan señalashga caycan (Apoc. 13:16, 17). Chay señalwan caycajcunaga Jehovapa contrancho churacärin, y shamoj tiempucho imaycamapis cawanganachu (Apoc. 14:9, 10; 20:4). Chaymi cuidacunanchi maygan gobiernucunatapis mana yanapänapaj ni contranchopis mana caycänapaj, Diospa Gobiernunlaman lapan shongunchiwan yäracushun.

14. ¿Imataj ricashganpita apóstol Juan almirashga quedacorgan? (Apocalipsis 17:3-5).

¹⁴ ¿Ima mastataj ricashga apóstol Juan almirashga quedacunanpaj? Payga ricargan juc warmi manchariypaj puca uywata montarashga caycajta (Apoc. 17:1, 2, 6). Paytaga wayrapacoj warmiwan tincuchin, y jutinga ‘Jatuncaray Babiloniami’. “Chay warmiga mana pengacuypami mandajcunata chasquisha” (leiriy Apocalipsis 17:3-5).

15, 16. ¿Imataj caycan ‘Jatuncaray Babiloniaga’, y imanotaj chayta musyanchi?

¹⁵ ¿Imataj ‘Jatuncaray Babilonia’? Chay wayrapacoj warmiga manami canmanchu cay munducho caycaj gobiernucuna. ¿Imanir? Apocalipsis libruga nin chay reycuna o politicucunaga chay warmiwan cacushganta (Apoc. 18:9). Y manchariypaj puca uywata montaraycajta captin tantiachicun cay munducho gobiernucunata maquincho charayta munashgantami. Jina manami canmanchu Satanaspa maquincho caycaj jatuncaray negociucuna o organizaciones comerciales nishgancuna. Apocalipsis chaypita parlarmi nin “llapan nigusyanticunapis waganga” (Apoc. 18:11, 15, 16).

¹⁶ Bibliacho pï maywanpis cacojpita y adulteriupita parlaptenga, achca cutimi espiritual cajpämi parlaycan. Capazchi pipis Diosta sirviycar ima idulutapis aduraycanman, o cay mundupa ruraynincunawan imanolapapis talucaycanman (Ezeq. 16:2, 35, 36; Sant. 4:4). Pero Dioslata lapan shongunwan sirviptenga ‘runa yatäni jipashwan’ tincuchin (2 Cor. 11:2; Apoc. 14:4). Unay Babilonia marcachoga chaychicaj luta religiuncunami cashga. Chaymi Jatuncaray Babiloniaga caycan imayca mana ali aduraciuncuna, Dios mana chasquishgan cajcuna. Aumi, cayga tincun entero munducho lapan luta religiuncunawan (Apoc. 17:5, 18; jw.org paginacho ricäriy “¿Qué es Babilonia la Grande?” yachachicuyta).

17. ¿Imataj pasanga Jatuncaray Babiloniata?

¹⁷ ¿Imataj pasanga Jatuncaray Babiloniata? Apocalipsis 17:16, 17 (Biblia Ambo Pasco) nin: “Chay chrunca wagracuna ricangayqui y  manchacuypag fiyu uywa niragmi chriquinga mañösa warmita. Nircur lapanta quïtarir garapachrata jaguiriycäringa. Aychanta micapäcunga y rupachir ushapäcunga. Tayta Diosmi yarpayta gosha pay munanganta rurananpag”. Chauraga Jehová lapan gobernanticunacho yarpayta churanga entero munducho lapan luta religiuncunata chipyaj ushacächinanpaj, y chaytaga ruranga Naciones Unidas nishganwan (Apoc. 18:21-24).

18. ¿Imatataj rurashwan Jatuncaray Babiloniapa ruraynincunawan mana talucänapaj?

¹⁸ Imataj yachacunchi. Alapa alimi caycan seguro caycänapaj Diosta adurashganchega limpio y pay munashganno cananpaj (Sant. 1:27). Chauraga Jatuncaray Babilonia ruraynincunawan ni ichiclapis pantachimänanchipaj permitishunchu, chaycunaga caycan: luta yachachicuycuna, mana ali costumbricuna, Dios chiquishgan ruraycuna y imayca brujería ruraycunapis. Jina runacunatapis niycäshun ‘Babiloniapita aywacäriy, jucla yargucuy’ nir. Paycuna Babiloniapita yargucuptenga Jehová manami castigangachu (Apoc. 18:4).

19. ¿Pitaj caycan “jatuncaray puca” dragonga?

¹⁹ Apocalipsis libruchoga “jatuncaray puca” dragunpitapis wilacun (Apoc. 12:3). Y chay dragonga Jesuspa y angelnincunapa contrancho caycan (Apoc. 12:7-9). Jina Diospa sirvejnincunata imanolapapis atacan, y lapan gobiernucunapis munaynincho caycan (Apoc. 12:17; 13:4). ¿Pitaj caycan chay dragonga? Unay culebra nishgan, Satanás Diablumi (Apoc. 12:9; 20:2). Paypa maquinchomi caycan Diospa lapan chiquejnincuna.

20. ¿Imataj dragonta pasanga?

²⁰ ¿Imataj dragonta pasanga? Apocalipsis 20:1-3 nin juc angelshi Satanasta wanwanyaycaj uchcuman gaycunga waranga (1000) watacuna wichgarashga caycänanpaj runacunata manana engañananpaj. Y chaypitana Tayta Diosga Satanastawan demoniuncunata “gayconga asufriyoj nina rataycaj gochaman”. Cayga ninanmi ushajpaj ushacächishga cananpaj (Apoc. 20:10). Satanaswan demoniucuna manana captenga, ¿imanoraj cawayninchi canga? ¡Chaychoga mayraj cushi cushila cawacushun!

21. ¿Imanirtaj cushicunchi Apocalipsis librucho yachacushganchipita?

²¹ Apocalipsis libro wilacamushganta shumaj tantiarcuptinchega, shacyächimanchi y cushichimanchimi. Canancama yachacushcanchi Jehovapa chiquejnincuna pïcuna cashganta y imataj paycunata pasanga. Chaymi “kushishqami kanqa kay qelqaraykaqkunata liyiqkuna y liyipashqanta mayar cäsukuqkunaqa” (Apoc. 1:3). Chauraga Diospa chiquejnincuna manana captenga, ¿ima bendiciuncunataj chasquenga Diospa sirvejnincunaga? Chaytaga gatejnin yachachicuychona ricashun.