1. ¿Imatataj Jobta yanapargan Jehovata masraj reguinanpaj?

 JOB cawaynincho lapan parlashganpita, Jehovawan parlashgantaga masrächi yarpargan. Jehovaga Jobta nergan lapan camashgancunata ricar yarpachacunanpaj. Chayga yanapanmanmi cargan Jehová alapa yachaj cashganta musyananpaj y sirvejnincunatapis cuidananpaj seguro caycänanpaj. Chayta rurar Jobga ricargan Jehová lapan uywacunata micuyninta goycuycaptenga, paytapis yanapänanpaj cajta puedishganta (Job 38:39-41; 39:1, 5, 13-16). Jehová camashgancunaman yarpachacur, Jobga yachacurgan Dios imano cashganta.

2. ¿Imanirtaj öraga manami facilchu Jehová camashgancunata ricaycunapaj?

² Noganchipis Jehovata masraj reguishwan camashgancunata ricar. Ichanga öraga sasami canman chayta ruranapaj. Ciudächo tiyarga capaz waytacunapis yoracunapis manami alapa canchu ricänapaj. Jina jalgacho o chacrachopis tiyar öraga capaz tiempunchi canmanchu chaycunata ricaycunapaj. Chaymi canan ricärishun imanirtaj alapa ali caycan tiempunchita jorgunapaj Jehová camashgancunata ricaycunapaj. Chaypitapis yachacushun imano Jehovawan Jesús chaycunawan yachachimashcanchi y imataj noganchipis rurashwan Jehová camashgancunapita maslata yachacunapaj.

3. ¿Imanirtaj ninchi Jehová munashganta camashgancunata ricar Adán cushi cushila cawacunanpaj?

³ Jehová munargan camashgancunata ricar Adán cushi cushila cawacunanpaj. Chaymi Adanta juc shumaj huertacho churargan tiyananpaj, arunanpaj y jatunyächinanpäpis  (Gén. 2:8, 9, 15). Payga alapachi cushicurgan ima murupis jegaycashganta y plantacunapis tuctuycashganta ricar. Edén huertata cuidarga, shumaj aruymi cargan. Jina Jehová Adanta nergan uywacunapaj jutincunatapis churananpaj (Gén. 2:19, 20). Quiquin Jehová chay lapanta ruranmanchi cargan, ichanga Adanta nergan rurananpaj. Chaypäga Adán shumajchi lapan uywacunata ricargan imano rurashga cashganta y comportacushganta, chaynoparaj jucnin jucninpa jutinta churananpaj. Chayta rurar payga ricarganchi Jehová alapa yachaj, poderyoj y imaycatapis ruraj cashganta.

4. 1) ¿Imanir mastaj Jehová camashgancunata ricar yarpachacushwan? 2) ¿Jehová lapan camashgancunapita maygantaj más gustashunqui?

⁴ ¿Imanir mastaj Jehová camashgancunata ricar yarpachacushwan? Pay munaptinmi. Chaymi cayno nimanchi: “Syëluman ñuquircushpayqui masqui ricchacuriy”. Nircur tapucun: “¿Pitaj llapan chaycunata rurasha?” (Is. 40:26). Jehovaga manami cielucho caycajcunalatachu shumajta camashga, sinoga Pachacho y lamarcho caycajcunatapis; y chaycunapitaga imaycacunata yachacunchimi (Sal. 104:24, 25). Noganchitapis Diosninchi shumajta ruramashcanchi tucuy plantacunata, waytacunata o micuycunatapis ricar cushicärinapaj. Chaypitapis nawiyojta, sengayojta, shimiyojta, rinriyojta y maquiyojta camamashcanchi.

5. Romanos 1:20 nishganno, ¿imanotaj yanapämanchi Jehová camashgancunata ricar yarpachacuptinchi?

⁵ Bibliaga nimanchi imanir mastaj Jehová camashgancunata ricar yarpachacunapaj, chayga yanapämanchi reguinapaj Jehová imano cashganta (leiriy Romanos 1:20). Pachacho caycajcunata ricarga tantianchimi Diosninchi alapa yachaj cashganta. Tucuy micuycuna cashganga musyachimanchi Jehová cuyamashganchita. Diosninchi camashgancunata ricar yarpachacurga yanapämanchi payta masraj reguinapaj y guelicunapäpis. Canan ricärishun imano Jehová camashgancunawan shumaj yachachimanchi.

6. ¿Imataj yachacunchi ciguëña avicunapita?

⁶ Jehová tiempulancho imatapis ruran. Lapan watacunacho, febrero quilla ushaycho y mayo quilla pulancho, israelitacuna ricapäcurgan cigüeña avicuna norte cajpa aywacushganta. Jehová israelitacunata nergan: “Cigüeñaqa usya tiempu y tamya tiempu mayman aywananpaq kashqantapis musyanmi” (Jer. 8:7). Jehová avicunata chayno camashga  captenga, chaynolami camacächishga imaytaj juiciunta apamunanpaj cajtapis. Chauraga avicuna caypa o wacläman aywacushganta ricarga yarpächimanchi ‘höran chayamuptin’ Jehová cay mundupa ushacayninta apamunanpaj y chayga rasunpami canga (Hab. 2:3).

7. ¿Imataj yachacunchi avicuna vuelashgancunapita? (Isaías 40:31).

⁷ Sirvejnincunata Jehová calpata goycun. Wilacojnin Isaiaswanmi Jehová sirvejnincunata aunirgan calpaynaj ricacuptin calpata gonanpaj, chaynopa ‘anca buylaycajno aywananpaj’ (leiriy Isaías 40:31). Israelitacunaga ricarganchi imano ancacuna wayra caycashganman churacushganta vuelananpaj. Cayga yarpächimanchi imano Jehová chay ancacunata yanapashganno, sirvejnincunatapis yanapan y calpayojyächin. Chauraga gampis avicuna mana sapsapyar vuelashganta ricaptiquega, yarparay Jehová yanapäshunayquita puedishganta problemayquicunata aguantanayquipaj.

8. 1) ¿Imataj Job yachacurgan Jehová camashgancunapita? 2) ¿Imataj noganchi yachacunchi?

⁸ Jehovaga yäracuypämi. Jobwan parlashganchomi yanapargan Payman masraj yäracunanpaj (Job 32:2; 40:6-8). Chay cuticho camashgancunapita parlargan, goylarcunapita, pucutaypita, ilagu o ilguypitapis. Jina uywacunapita parlargan, cawallupita y chucaru torupitapis (Job 38:32-35; 39:9, 19, 20). Cay lapancunaga Jobta yanapargan manami Jehovapa poderninlatachu ricänanpaj, sinoga cuyacoj y yachaj cashgantapis. Chayga Jobta yanapargan Jehovaman unaypitapis masraj yäracunanpaj (Job 42:1-6). Noganchipis Jehová camashgancunapita yachacur yarpächimanchi Pay fiyupa yachaj y poderyoj cashganta. Chaymi ichiclacho lapan problemanchicunata ushacächenga. Chayman yarparga payman masraj yäracunchimi.

9, 10. ¿Intipa achquin y tamyapis imataj yachachimanchi Jehovapita?

⁹ Jesusga ali reguirgan Taytan camashgancunata. Payga cielucho y Pachacho caycajcunata camananpaj Taytanta ‘yanaparmi tsaycho kaykarqan’ (Prov. 8:30). Nircur Pachachona caycaptin chaycunawan discipuluncunata Taytan imano cashganta yachachergan. Waquilanlata ricärishun.

¹⁰ Pï maytapis Jehová cuyanmi. Jesús yachachicushgan jircacho discipuluncunata parlapargan intipa achicyayninpita y tamyapitapis. Caycunaga alapa yanapacun cawacunapaj. Jehovaga ali runacunapaj y mana ali runacunapäpis intita yargachimun y tamyachimunpis. ¿Imanir? Cuyacoj captin, payga munan lapancuna chaycunata chasquinanpaj (Mat. 5:43-45). Jesús chaywan discipuluncunata yachachiycargan Jehová munashganta lapan runacunata cuyanapaj. Chauraga inti jegaycaptin shumaj achicyaycashganta ricar o tamyapis captin, yarpäshun Jehová cuyacoj y lapancunata igual ricashganta. Chayga yanapämäshun tucuy clase runacunata cuyar Diospita yachachicunapaj.

11. ¿Imanotaj shacyächimanchi avicunata ricaycurga?

¹¹ Cawacunapaj necesitashganchi Jehová camaripämanchi. Jesús yachachicushgan jircacho caytapis nergan: “Masqui yarpachacuy äbicuna imano cawashantapis. Manami murupacunchu. Manami shuntapacunchu. Manami micuyta shuntanchu churananpaj. Chaycunataga Tayta Diosmi micuyta tarichin”. Jesús parlaycaptin wiyaycajcunaga ricarganchi avicuna vuelaycashganta, nircur Jesús cayno nergan: “Tayta  Diospäga chay äbicunapita masmi gamcuna bälinqui” (Mat. 6:26). Chaywan Jesús cuyacuywan yarpächimanchi Jehová lapan necesitashganchi cajcunata camaripämänanchipaj (Mat. 6:31, 32). Jesús yachachicushganga canan wichanpis waquin Diospa sirvejnincunata alapa shacyächinmi. Españapita juc precursora cristianash laquishgano caycargan maycho tiyananpaj wasita mana tariptin. Ichanga pishgucuna murucunata y ichic frutacuna micuycajta ricar más alinash ricacurgan. Payga nin: “Chayga yarpächimargan Jehová paycunata cuidaptenga, nogatapis cuidamänanpaj cajta”. Ichic tiempo pasariptinlash juc wasita tarergan maycho tiyananpaj.

12. Mateo 10:29-31 nishganno, ¿imataj yachachimanchi pishgucunaga Jehovapita?

¹² Jehová jucninchi jucninchitami valuramanchi. Predicaciunman aywananpaj manaraj cachaycur Jesús discipuluncunata yanapargan chiquishga captin mana manchacunanpaj (leiriy Mateo 10:29-31). Chaypäga Israelcho caycaj pishgucunapita parlapargan. Chay wichan pishgucunaga manami alapa chaniyojchu cargan. Ichanga Jesús discipuluncunata nergan: “Tsayno kaptinpis manami ni juklaylapis wanuntsu Taytayki mana munaptinqa”. Caytapis nergan: “Qamkunaqa tsaytsika pishqupitapis masmi välipäkunki”. Chaynopa yachachiycargan Jehová jucnin jucninta valurashganta. Chayga paycunata yanapargan mana manchacunanpaj chiquishga captinpis. Discipuluncuna marcacunacho, jalgacunacho Diospita yachachicur pishgucunata ricaycurga Jesús parlashgantami yarparganchi. Chaynolami gampis juc pishguta ricaptiquega, Jehová gamta valurashganta yarpay, gampis ‘tsaytsika pishqupitapis masmi välinki’. Chayga yanapäshunqui chiquishga captiquipis valurcharcur Jehovata sirvinayquipaj (Sal. 118:6).

13. ¿Imataj rurashwan Dios camashgancunapita maslata yachacunapaj?

¹³ Jehovapita maslata yachacunapäga camashgancunata ricaycushwan. Chaypäga tiempunchita jorgushwan imayca caycajcunata ricaycunapaj y yarpachacunapaj imataj Diospita yachachimanchi. Öraga cayta ruranapaj manami facilchu canman. Camerunpita Géraldine jutiyoj cristiana nin: “Ciudächo winashga car calpachacunärämi caycan plantacunata, uywacunata o mascunatapis ricaycunäpaj”. Juc anciano Alfonso jutiyojpis nin: “Nogataga yanapämashga tiempöta raquiptë japalä caycänäpaj y Jehová camashgancunata ricaycur yarpachacunäpaj imata paypita yachachimashganta”.

14. ¿Imataj David yachacurgan Dios camashgancunaman yarpachacur?

¹⁴ Rey Davidga Jehová camashgancunaman yarpachacoj. Chaymi Jehovata nergan: “Jana patsatapis dëduykiwanmi rurashqanki.  Killata y qoylarkunatapis makikiwanmi kamashqanki. […] ¿Imanataq runa kaykan tsayjinanpa paypaq yarpachakunaykipaq?” (Sal. 8:3, 4). Davidga manami ricaräcurganlachu cielo shumaj achicyaycamushganta, sinoga yarpachacurgan imataj goylarcuna Jehovapita yachachishganta. Cuentata gocurgan Jehová alapa munayniyoj cashganta. Jina mamanpa pachancho imano formacashga cashganmanpis yarpachacurgan. Chay lapancunaman yarpachacur alapa cushicurgan Jehová alapa yachaj cashganta musyar (Sal. 139:14-17).

15. ¿Imataj ricashcanqui Jehová camashgancunata ricaycur? Wilacamuy (Salmo 148:7-10).

¹⁵ David rurashganno, manami carutarächu aywashwan Jehová camashgancunaman yarpachacunapaj. Cercalayquicho caycajcunata ricaycurpis yachacunquimanmi Jehová imano cashganta. Inti alapa shanaptin o acaptin yarpachacuy imano Jehová alapa poderyoj cashganta (Jer. 31:35). Juc pishgu gueshwanta ruraycajta ricar yarpachacuy Diosninchi alapa yachaj cashganta. Y juc algu chupanwan puclaycajta ricar yarparay Jehovapis cushicoj Dios cashganta. Jina Jehová cuyacoj cashganta agradecicuy ricaptiqui juc mama iti wamranwan puclaycajta. Imaycacunata ricaycur Taytanchi Jehovapita yachacuyta puedinchimi, Pay camashgancuna jatun o ichisaj captin may chaycho caycaptinpis alabashga cananpämi caycan (leiriy Salmo 148:7-10).

16. ¿Imata ruranapätaj camacächishwan?

¹⁶ Manami pipis canchu Diosninchino cuyacoj, alapa yachaj y poderyoj. Chay lapantaga ricanchi Pachacho caycajcunata ricaycur, y chaycunaga cercalanchicho caycan. Chaymi cada cadala tiempunchita jorgushwan Jehová camashgancunata ricaycur yarpachacunapaj imata paypita yachachimanchi. Chayta rurashpanchega Camacoj Diosninchiman masraj guelicushun (Sant. 4:8). Gatejnin yachacuychoga ricashun imano taytacuna wamrancunata yachachinman Dios camashgancunawan payman guelicamunanpaj.