1, 2. 1) ¿Imanirtaj waquin bibliapita yachacojcuna Testigo cananpaj manaraj decidirganchu? 2) ¿Imata yachacushun cay yachachicuycho?

 TESTIGUNO bautizacunayquipaj sasachi canman cargan. Capaz manchacushgayqui aroj masiquicuna, amiguyquicuna y familiayquicunapis contrayquicho churacäriptin. O capaz yarpashgayqui ‘Jehová mandamashganta cumpliyta puedishächu’ nir. Gam yarpachacushgayquino waquin bibliapita yachacojcunapis yarpachacun, chaymi paycunata yanapanqui Jehová sirviyta decidinanpaj.

² Jesús musyargan pipis manchacächicushgalaman yarparäcuptin imayca chapacuna canman Jehovata sirvinanpaj (Mat. 13:20-22). Jesuspa tiempuncho waquin runacuna runa masinta manchacushpan, paypa discipulunman ticrarganchu. Chayno carpis Jesús paycunata yanapargan discipuluncunaman ticrananpaj. Jesusno noganchipis bibliapita yachacojcunata caycunata rurananpaj yanapashwan: 1) cuentata gocunanpaj ima chapacuna caycan Jehovata sirvinanpaj, 2) Jehovata shongupita cuyananpaj, 3) cawaynincho Jehovata sirvishganta puntaman churananpaj y 4) imata rurananpaj Bibliapita yachacushganta pipis chiquipaptin. Jesusno ali yachachicoj cananchipaj, ¿imanotaj Cushishgala imaypis cawanapaj libruwan yanapashwan pilapis Testigo cananpaj?

BIBLIAPITA YACHACOJTA YANAPAY CUENTATA GOCUNANPAJ IMA CHAPACUNA CAYCAN BAUTIZACUNANPAJ

3. Nicodemo Jesuspa discipulun cayta munarpis, ¿imapita manchacurgan?

³ Judío runacunacho Nicodemo respetashga runami cargan. Payga Jesuspa discipulun cayta munarpis Israel autoridäcunata  manchacurgan. Jesus sojta quillacunala predicar galaycushganpita, Nicodemo cuentata gocurgan pay Mesías cashganta (Juan 3:1, 2). Chayta musyarpis Israel autoridäcunata manchacushganraycu Jesusta pacaylapa ashergan parlapananpaj (Juan 7:13; 12:42). Nicodemo capazchi yarpargan ‘Jesuspa discipulunman ticraptëga cargüta guechumanga’ nir. a

4. ¿Imanotaj Jesús yanapargan Nicodemuta discipulun ticrananpaj?

⁴ Nicodemo Moisespa Leynincunata shumaj yachaj carpis, pilapis yachachinanraj cargan Jehovapa voluntäninta musyananpaj cajta. ¿Imanotaj chayta Jesús rurargan? Jesús listo caycargan payta yanapänanpaj, chacaylapa paywan parlananpäpis tiempunta raquirgan. Jina yachachergan paypa discipulun ticrananpaj caycunata ruranan cargan: juchancunapita arrepenticunanpaj, yacucho bautizacunanpaj y Diospa churinman yäracunanpajpis (Juan 3:5, 14-21).

5. ¿Imanotaj yanapashun bibliata yachacojta Jehovata sirvinanpaj?

⁵ Cayman yarpay, juc bibliapita yachacoj capazchi Bibliapita ali yachan. Chaynopis manami decidicunrajchu Jehovata sirvinanpaj, aruyninraycu o familian michacushganraycu. Chaymi pilapis tantiachinan cuentata gocunanpaj ima chapacuna caycan Jehovata sirvinanpaj. Jesusno gampis tiempuyquita ranquinquiman bibliapita yachacojwan pasiaj yargunayquipaj o wasiquiman imalatapis micunayquipaj apaptiqui. Chayta ruraptiqui facil-lami canga wilapashunayquipaj imanir Jehovata sirvinanpaj decidicunrajchu. Chay horacho tantiachinqui cawaynincho ima cambiucunata rurananpaj, jina yarpachinquiman ‘ima cambiucunatapis Jehovata cuyashpayquega ruranayqui, manami noga nishgaläpitachu’ nir.

6. ¿Imanotaj bibliapita yachacojta yanapanquiman yachacushganpita practicaman churananpaj? (1 Corintios 16:13).

⁶ Bibliapita yachacojcuna cawaynincho cambiucunata rurananpaj convencidumi caycanan Jehová yanapänanpaj cajta (leiriy 1 Corintios 16:13). Ali profesurga alumnunta shumajmi yachachin y yanapanga yachacuyta puedishganta yarpänanpaj. Chaynolami Bibliapita ali yachachicojga yachacojta tantiachenga Jehová munashganno cawananpaj, jina ninquiman ‘ima cambiucuna sasa captenga Jehovami yanapäshunqui’. Chauraga, ¿imanopataj bibliapita yachacojta yanapanquiman?

BIBLIAPITA YACHACOJTA YANAPAY SHONGUPITA JEHOVATA CUYANANPAJ

7. ¿Imanotaj Jesús runacunata yanapargan Jehovata shongupita cuyananpaj?

⁷ Jesús musyargan discipuluncuna Taytanta más cuyaptin, más facilmi canman cargan Taytanpa voluntäninta rurananpaj. Chaymi cutin cutin yachachergan Jehová ali Dios cashganta, chaynopa payta más cuyananpaj. Juc cuticho Taytanta tincuchergan cuyacoj ali taytano wamrancunata más ali cajta goshganta (Mat. 7:9-11). Jesús yachachicushgan tiempucho waquincunapa taytan manami cuyacoj carganchu. Chaymi, ¿imanoraj sienticärergan Jesús wilapaptin juc mana ali wamra papänin cuyacuywan arrepenticushganpita chasquiptin? Chay wilacuywan Jesús tantiachergan Jehová alapa runacunata cuyashganta y yanapayta munashgantapis (Luc. 15:20-24).

8. ¿Imanopataj bibliapita yachacojta shongupita Jehovata cuyananpaj yanapanquiman?

⁸ Gampis bibliapita yachacojcunata Jehovata shongupita cuyananpaj yanapay. Chaymi cada cadala Bibliapita yachachicur Jehová cuyapäcoj, laquipäcoj cashganpita parlapanayqui,  caynopis ninquiman: “Jehová cuyashushgayquipitami lapan yachacushgayquega caycan”. Jesús wanushganpita parlaptiquega tantiachiy cayno nir: “Manami lapan runacunalapajchu wanurgan sinoga gampajpis” (Rom. 5:8; 1 Juan 4:10). Bibliapita yachacoj chayta tantiaptenga shongupita Jehovatami cuyangapaj (Gál. 2:20).

9. ¿Imata Michaelta yanapashga cawaynincho cambiucunata rurananpaj?

⁹ Indonesia naciunpita Michael ima pasashganpita yachacushun. Payshi wamrala cashganpita Bibliapita yachacurgan ichanga manami bautizacurganchu. 18 watayojna caycar carruta manejar aruyninraycu juc naciunman aywacurgan. Tiempuwanna Indonesia naciunman cutimurgan. Chaycho casaracurgan, wamranpis cargan, pero aruyninraycu japalan juc naciunman aywacurgan. Michael juc naciuncho caycar warmin y wamran Bibliapita yachacur cambiucunatapis rurargan. Michaelpa maman wanuptin yapay wasinman cutimurgan taytanta cuidananpaj y paypis Bibliapita yachacur galaycurgan Cushishgala imaypis cawanapaj nej libruwan. 27 caj yachacuyman chayar “Shumaj yachacurcunapaj” nejpita, pay yarpargan ‘imanoraj Jehová alapa laquicurgan cuyashga wamran nacar wanuptin’ y chaypita wagargan. Jehová y Jesús payta alapa cuyashganpita yachacur, agradecido caycar cawaynincho cambiucunata rurargan nircur bautizacurganpis.

BIBLIAPITA YACHACOJTA VIDANCHO JEHOVATA SIRVIR PUNTAMAN CHURANANPAJ YANAPAY

10. ¿Imataraj rurargan Jesús discipuluncuna Jehovata sirvinanpaj? (Lucas 5:5-11, dibujutapis ricay).

¹⁰ Punta caj discipuluncuna cuentata gocärergan Jesús Mesías cashganta, pero paycuna tantianan cargan Jehovata sirvinanpäga predicanan cargan. Pedro y Andrés Jesuspa discipuluncunano caycaptinna, Jesús paycunata nergan imaycancunatapis jaguirir lapan tiempunwan payta gatinanpaj (Mat. 4:18, 19). Pedro, Andrés, Santiago y Juan pescadorcunami  cargan, ali negociuyojpis cargan (Mar. 1:16-20). Pedro y Andrés Jesusta gatinanpaj imaycancunata jaguirirpis manami familiancunata jaguirirganchu, sinoga nestashgancunata camariparganmi. ¿Imanirtaj negociuncunata jaguirinanpaj listo carcaycargan? Jesús milagrucunata rurashganta ricaycur cuentata gocurgan Jehovapa cajman puntata churaptin, nestashgancunata camaripänanpaj cajmanmi seguro caycarganmi (leiriy Lucas 5:5-11).

11. ¿Imanotaj yanapashwan bibliapita yachacojcunata yäracuynin sinchiyananpaj?

¹¹ Noganchega Jesusno manami milagrucunata ruranchichu, ichanga bibliapita yachacojcunata wilapashwan imano Jehová waquincunata yanapashga cawaynincho payta sirvishganta puntaman churaptin. Pasashgayquipitapis wilapanquiman imano Jehová yanapäshushgayqui reuniunman aywar galaycuptiqui. Capazchi patrunniquiwan parlar nishcanqui lapan junaj mana arunayquipaj reuniuncunaman aywanayquipaj. Jina bibliapita yachacojcunata tantiachiy cawayniquicho Jehovata sirvir puntaman churaptiquega imano gamtapis yanapäshushgayquita y yäracuyniquipis sinchiyashganta.

12. 1) Bibliapita yachacojwan yachacushganchi hora, ¿imanirtaj waquin hermanunchicunata nirishwan yanagamänanchipaj? 2) Bibliapita yachacoj Jehovata sirvir puntaman churananpaj, ¿imacunataraj más ruranquiman?

¹² Waquin hermanunchicuna imano Jehovata sirvir galaycushganpita wilapaptin bibliapita yachacojta yanapanga. Chaypäga bibliapita yachacojwan yachacushganchi hora waquin hermanunchicunata nirishwan yanagamänanchipaj, imano paycuna Jehovata sirvir puntaman churar cushishga caycashganpita wilapänanpaj. Jina Cushishgala imaypis cawanapaj libruta yachacur “Shumaj yachacurcunapaj” y “Maslata yachacunayquipaj” nej cajpita videucunatapis ricachiy. 37 caj yachacuypita yachacur Jehovaga imatapis faltachimäshunchu nej videuta ricachiy nircur parlacunqui imacunata ruranan Jehovata sirvir puntaman churananpaj.

BIBLIAPITA YACHACOJTA YACHACHIY PIPIS CHIQUIPAPTIN IMATA RURANANPAJ

13. ¿Imata nergan Jesús discipuluncunata chiquicojcunapita?

¹³ Jesús achca cuticho discipuluncunata nergan chiquishga cananpaj cajta hasta familiancunapis (Mat. 5:11; 10:22, 36). Ichiclana wanunanpaj pishiycaptin Jesús discipuluncunata wilapargan cawaynintapis ogrananpaj cajta (Mat. 24:9; Juan 15:20; 16:2). Jina nergan yachachicur siguinanpaj achäquita ashipajcunawan mana peliananpaj cajta, sinoga ali tantiacoj runa cananpaj.

14. ¿Imanotaj yanapashun bibliapita yachacojcunata pipis chiquipashga captin camaricushgala caycänanpaj? (2 Timoteo 3:12).

¹⁴ Jesús rurashganno noganchipis bibliapita yachacojcunata wilapananchi familiancuna o aroj masincuna Bibliapita yachacushganraycu chiquishga cananpaj cajta (leiriy 2 Timoteo 3:12). Bibliapita yachacushganraycu y Jehová munashganno cawar galaycuptin capazchi familiancuna o aroj masincunapis burlacur asipanga y jamurpangapis. Chaymi alimi canman yachachicushganchi hora chaypita parlapänanchipaj, chaynopa paycuna camaricushgala caycanga chiquipaptin imata rurananpaj y imata parlananpajpis.

15. Bibliapita yachacojcunata familiancuna chiquipaptin, ¿imata rurananchi yanapänanchipaj?

¹⁵ Bibliapita yachacojcuna familiancuna chiquipaptin, chay hora yanapanqui yarpänanpaj imanir familiancuna rabiashga caycan. Capazchi familiancunaga yarpanga Testigucunaga fiyu cashganchita o lutanta yachachicuycashganchitapis. Jesustapis familiancuna chiquipar locuyashga caycashganta yarpargan (Mar. 3:21; Juan 7:5). Bibliapita yachacojcuna yachacunan  cuyacuywan respetuwan familianta y waquincunatapis parlapänanpaj.

16. ¿Imanotaj yanapashwan Bibliapita yachacojcunata yachacushganpita familiancunata yachaylapa parlapänanpaj?

¹⁶ Bibliapita yachacojpa familiancuna Bibliapita yachacuyta munaptin manami lapantaraj yachachinmanchu, chayno yachachiptenga yapaychopis wiyayta munanganachu. Chaypa trucanga yachachiy pay ichiclata parlananpaj chayta ruraptenga familiancuna yapaychopis wiyayta munanga (Col. 4:6). Jina bibliapita yachacojcuna yachachenga familiancunata imanopa jw.org paginanchiman yaycunanpaj, chaynopa paycuna imay horapis yaycunga Jehovapa testiguncuna imano cashganchita más musyananpaj.

17. Bibliapita yachacojcunata Testigucunapa creenciancunapita tapucuptin, ¿imanotaj yanapashwan ali contestananpaj? (Fotutapis ricay).

¹⁷ Bibliapita yachacojcunata yachachinqui jw.org “Preguntas frecuentes” nishganman yaycunanpaj, chaypita sencillo y claro yachachinanpaj familianta o aroj masintapis (2 Tim. 2:24, 25). Cushishgala imaypis cawanapaj nej librupa ushanancho “Waquincuna nipäcun” nej yachacushgancho yachacojta shacyächiy yarpashganpita contestananpaj, mana shumaj contestaptenga yanapay más ali contestananpaj y ishcayniqui yachacuy imano contestananpäpis. Chaynopa mana manchacuypa ali tantiachicur yäracuyninta defendinga.

18. Bibliapita yachacoj wasin wasin yachachicoj yargunanpaj, ¿imanotaj yanapashwan? (Mateo 10:27).

¹⁸ Jesús discipuluncunata mandargan lapan runacunata ali wilacuyta wilananpaj (leiriy Mateo 10:27). Bibliapita yachacojcuna wasin wasin hermanunchicunawan yachachicoj yarguptin yäracuynin sinchiyanga y ricangapis Jehová yanapashganta. Chauraga, ¿imanotaj yanapashwan yachachicoj yargunanpaj? Congregaciuncho campaña cananpaj wilacamuptenga Jesuspa wanuyninta yarpänanchipaj o runacunata invitananchipaj jatun asambleanchipaj, estudiantinchita parlapashwan imacunata rurananpaj cajta yachachicoj yargur galaycunanpaj. Tantiachinquipis chay campañacho yachachicoj yargurga más facil-la canga runacunata parlapänanpaj. Jina reuniunninchicho naupaman yargur parlacamuptin más facil-la canga mana manchacuypa yachachicunanpaj.

BIBLIAPITA YACHACOJTA MUSYACHIY JEHOVATA SIRVIR PUEDISHGANTA

19. ¿Imanotaj Jesús discipuluncunaman yäracurgan, y chaypita imata yachacunchi?

¹⁹ Jesús cieluman manaraj aywar discipuluncunata nergan paywan yapay caycänanpaj. Chay horacho Jesús nishganta manami tantiarganrajchu, ichanga Jesús musyargan discipuluncuna  Jehovata cushichinanpaj cajta (Juan 14:1-5, 8). Jesús musyarganpis discipuluncuna tiempuwanraj yachachishganpita tantianan cargan, cielucho cawapäcunanpaj cajta y mastapis (Juan 16:12). Noganchipis Bibliapita yachacojman yäracunchi Jehovata sirvinanpaj cajman.

20. ¿Imata rurartaj hermananchi Chifundo Alinafe jipashman yäracurgan ali cajta rurananpaj?

²⁰ Bibliapita yachacoj ali cajta rurananpaj cajman yäracunchi. Malaui naciunpita, Chifundo hermananchi Alinafe jipashwan Bibliapita yachacur galaycurgan, payga catolicami cargan. Cushishgala imaypis cawanapaj libruwan yachachicuptin 14 caj yachacuycho hermananchi jipashta tapucurgan ‘¿Y gamga ima ninquitaj santucunawanraj runacuna Diosta adurapäcuptin?’. Alinafe rabiacurir nergan: “¡Quiquëpitami chayga canga!”. Chayta wiyarir Chifundo yarpargan ‘cananga Bibliapita yachacuyta munanganachu’ nir, ichanga hermananchi Bibliapita yachachiyta jaguirganchu, pacienciawan shuyarargan tiempuwanna Alinafe tantiananpaj santucunawan Diosta adorayga mana ali cashganta. Quillacuna pasariptinna Chifundo, librupita 34 caj yachacuypita tapurirgan: “¿Bibliapita y Jehovapita yachacuycashgayquega imanotaj yanapaycäshunqui?”. Chifundo wilacun: “Alinafe Testigucunapita alicunata parlargan, y pay nerganpis ‘Testigucuna Biblia nishganlatami ruran’ “. Chaypitana cay jipash santucunata adurayta jaguirgan y Testiguno bautizargan.

21. ¿Imata rurashun bibliapita yachacojcuna Jehovata sirviyta decidinanpaj?

²¹ Bibliapita yachacojcuna Diosta sirvinanpaj quiquin Jehovami “winatsimun”, chayno captinpis noganchi yanapanchimi (1 Cor. 3:7). Pilatapis Bibliapita yachachicurga Dios munashganno cawananpaj tantiachinchi pero masrämi munanchi Diosta shongupita cuyananpaj. Jina yachachicunchi cawaynincho Jehovata sirvishganta puntaman churananpaj y pipis chiquipaptin Jehovaman yäracunanpaj. Bibliapita yachacojcunata ‘gam Jehová munashganno cawayta puedinquimi’ nir shacyächiptinchega yanapäcuycanchi mana manchacuypa Jehovata sirviyta decidinanpaj.