1940 wata mayo quilla, 19 junajmi yurirgä Amiún (Líbano) marcacho. Ichic tiempo pasaptin aywacärirgä Trípoli marcaman. Taytäcunaga Diostami cuyapäcoj, imaycata nogatapis yachachipäcamargan. Wasicho pichga hermanucunami capäcurgä, shulca cajmi noga cargä. Taytäcunaga manami guellayta ashicurlachu cacärej, Bibliatami masga cuyapäcoj, reuniunmanpis mana gongaypa aywapäcoj y waquincunatapis Bibliapita yachachej.

Congregaciunninchichoga achca ungiducunami capäcoj. Jucnin cajpa jutin cargan Michel Aboud, paymi yanapacoj juc libruta estudianapaj. Payga Nueva York marcachomi Bibliata estudiar galaycurgan, 1920 wata wichanna Líbano naciunpa yachachicoj shamurgan. Ricargämi imano Anne y Gwen Beavor panicunata cuyapaylapa tratashganta, cay panicunaga Galaad Escuelapitami yargamushga cargan y familiäwan reguinacushpanmi ali cawacärirgä. Tiempuwan Estados Unidos naciuncho Anne paniwan tincurirgä; chaypäga Gwen panipis casaracushgana cargan Wilfred Gooch wawguiwan, ishcan Londres (Inglaterra) sucursalcho sirvircaycargan.

Wamralaraj cashgä wichanga walcajcunalami Testigo capäcurgä. Pero pï maytapis yachachipäcurgämi Bibliapita. Chayta ricarga piñacärejmi chaycho caycaj pushacoj religiosucuna. Canancamapis yarpaycärämi imacuna ruramashganchita.

Juc cutimi Sana panëwan juc edificio rurincho predicaycargä. Chaychomi ilajpita juc sacerdote yuriycamurgan y Sana panëta insultar galaycurgan, mana chaylachu, gradacunapapis tangarirganmi. Pilapis gayashgachi cargan policiacunata, paycunaga cuyapaylapami panëta yanapaycurgan. Chay sacerdotitaga comisariamanmi apapäcurgan y armash caycashganta ricapäcurgan. Chayna policiaga cayno tapurgan: “¿Gamga, pushacoj religiosucu canqui o pandillerucunapa pushajnincu?”.

Jina yarparaycämi congregaciunnëwan juc marcapa predicar aywapäcushgäta. Chay marcachoga alimi Diospita parlarcaycargä pero juc sacerdote ricaycamashpanchega juclami mana ali runacunata shuntargan atacamänanchipaj. Sagmarmi galaycärirgan, papänëpa umantapis paquipäcurgan, caranpis yawartash caycargan. Mamänëwan shuyaraycaj carruman aywacurgan y nogacunapis guepanta aywacärirgä. Caranta pichapar mamänë ima nishgantapis manami gongächu, cayno nergan: “Jehová, perdunayculay imatapis mana musyarmi chayta rurapäcush”.

Juc cutichopis awilücunata watucar aywapäcurgä. Chayarcäriptëmi chaycho caycänaj juc reguishga sacerdote. Payga musyarganmi taytäcuna Jehovapa testigun cashganta. Chay wichanga sojta watayojlarämi caycargä pero chay sacerdote nimargan: “Gamga ¿imanirtaj bautizacunquirächu?”. “Wamralaraj caycä bautizacunäpäga, Bibliapitami aliraj yachacunä yaracuynëpis ali cananpaj” nergä. Chayno niptëmi alapa piñacurgan, ‘cay wamra alapa lisu’ nir awilüta nergan.

Manami waran waranchu chaycunapaga pasargä. Waquin Líbano runacunaga ali shongu y ali runami capäcoj, predicar yarguptinchipis cushi cushila chasquipäcamaj. Y achca runacunatami Bibliapita yachachipäcurgä.

Escuelacho caycashgä wichanmi Venezuelapita juc hermano shamurgan. Reuniuncunaman shamurmi Wafa panëwan reguinacurgan. Tiempuwan casacärirgan y Venezuelapa aywacärirgan. Wafa panëga Venezuelapitami cartacamoj y taytäcunata laquipar ruwacoj chay naciunpa aywacunanchipaj. Ruwacushgannola ruracargan, aywacärirgämi.

 Venezuelaman chayapacurgä 1953 watacho. Caracas marcachomi cawar galaycärirgä, cercalachomi caycargan presidentipa mandacushgan wasi. Mozularaj caycaptëchi presidentita carrunwan puriycajta ricar cushicurgä. Chaycho cawanapäga sasanomi taytäcunapa cargan, juc rimayniyoj y costumbriyoj marca cargan, micuynincunapis jucmi jucmi cargan. Yachacänäpänami carcaycargä pero ilajpita mana yarpashgäcuna pasargan.

Papänë ilajpitami mana ali ricacurgan. ‘Imanirtaj pero, payga calpayoj y ali saludyoj runataj cargan’ nirmi yarpachacärirgä. Cáncer gueshyami chariycurgan y operacunanraj cargan. Pero juc semana pasarishganlacho wanucurgan.

Amatarmi shongücunapis nanaycurgan, pasaypami laquicärirgä. Chay wichanpäga 13 watayoj caycargä. Runan mana captenga mamänëpaga sasa cawaynin ticracurirgan. Pero calpachacärirgä Jehovapa jutincho guepaman mana cutipäcunäpaj. 16 watayoj caycaptëmi estudiaycashgäta ushaycashcäna y yarpargä familiäta imano manteninäpaj.

Chay wichanchoga Sana panëpis Rubén Araujo wawguiwan casacurirgan, paypis Galaad Escuelapitami yargamurgan y Venezuelapa cuticamurgan. Nircurna Nueva York marcapa aywacärirgan. Universidächo estudianäpaj familiä nimaptinmi nogapis aywacurgä Nueva York marcapa. Sana panëwan y runanwanpis cawarga yanapämarganmi espiritual cajcho ali caycänäpaj. Brooklyn Spanish congregaciunchopis achca pogushga hermanucunatami reguirgä. Jucnincuna cargan Brooklyn Betelcho yanapacoj Milton Henschel y Frederick Franz wawguicuna.

Universidächo juc watata estudiaycaptëmi alapa yarpachacurgä Diosta sirvinapaj imata ruraycashgäta. La Atalaya revistata leirmi cuentata gocurgä imacho más arunapaj. Congregaciunnëcho precursorcunatapis betelitacunatapis cushishga carcaycajta ricargä, paycunanola cayta munargä. Chay wichanpäga manarämi bautizacurgärächu pero cuentata gocurgä jucla chayta ruranapaj, Jehovalata sirvinäpaj awnicunäpaj. Y bautizacurgämi, chayga cargan 1957 wata, marzo quilla, 30 junaj.

Bautizacurishgälachomi yarpachacurgä lapan tiempüwan Diosta sirvinäpaj. Sasano ricacuptinpis precursorno yanapäcunapämi munaycargä. Universidächo caycaptë y precursorno yanapacuptë ‘imanoraj canga’ nirmi yarpachacurgä. Venezuelacho caycaj familiäwanga cartacunata apachicurmi carcaycargä, paycunata wilapaycargämi  universidäta jaguinapaj y Venezuelapa cuticur precursorno yanapacunäpaj.

1957 wata junio quilla Caracas marcapa cuticurgä. Familiäga pipis gastuncunacho yanapänantarämi necesitaycargan. ‘¿Imataraj ruräman?’ nirmi tapucurgä. Bancucho arunapaj nipäcamargan, pero imataraj ruräman, nogaga Venezuelapa cuticurgä precursorno yanapacunäpämi. Pero ishcancho arurgä, bancucho arurpis precursornopis yanapacurgämi. Diospaj arurga alapami cushichimargan.

Sylvia panipis Alemaniapita chayamuptenga cushicuypämi cargan, payga taytancunawanmi shacamurgan, Jehovataga cushi cushilami sirvipäcoj. Tiempuwan casacärirgä y wamräcunaga cargan Michel y Samira. Mamätapis nogacunawan cawacunanpaj nipäcurgä. Familiäta manteninäraycurmi precursorno mana yanapacurgänachu pero Diostaga precursor japuymi sirvirgä. Tiempo captenga Sylviawan ishcäcunami precursor auxiliarno yanapacärirgä.

Galanancho wilacamushgä wichanga cargan wamräcuna escuelacho caycaptinmi. Chay wichanga imaycäcunami cargan, bancucho arojmasëcunapis respetapäcamarganmi. Pero nogaga munargä Diospa sirvejnintano pipis ricamänantami. Chaylamanmi más yarpachacurgä. Sylviawan ishcäcunami imata ruranäpaj yarpachacärirgä. Bancupita witicuptëga achca guellayta chasquinä cargan. Pipa jaganpis manami carganchichu, chaymi nipäcurgä ‘walcalawan cawacurga guellayninchega aypamäshunmi’ nir.

Chay lapanta ruranapäga sasanomi cargan. Pero mamänëwan warmëpis ‘alitami ruraycanqui’ nipäcamargan. Chauras ali tiempo cargan yapay precursorno yanapacunäpaj. ¡Cushicuypaj cargan! Lapanpis alimi yarguycargan. Chay wichanlacho yapay mana yarpashgäcuna pasargan.

Juc junaj nipäcamargan wamrayoj yapay capäcunäpaj, Sylvia yapay gueshyacunanpäga yarpaylapis yarpargächu. Cushicärirgämi, pero precursor canäpäga yarparaycargämi. ‘¿Puedishächuraj o manachuraj?’ nirmi tapucurgä. Imano captinpis wamralä chayamunganmanmi cushi  cushila yarpaycargä. Pero, ¿tiempüga camacanmanchuraj Diosta lapan tiempüwan sirvinapaj?

Imata rurapäcunäpaj shumaj ricaycurmi nipäcurgä ‘yarpashganchitaga rurashunmi’. 1985 watachomi Gabriel wamralä yuriycurgan. Y chay wataga bancucho arushgäpitapis yargucurgämi y precursorno yapay galaycurgä. Tiempuwanga Sucursalcunata ricaj wawguicunawan arurgä. Caracas marcapita 80 kilometrustarämi sucursalga caycash, chaymi semanacho ishcay o quimsa cutiraj viajaj cä.

La Victoria marcachomi sucursalga caycargan, chaymi chaycho tiyapäcunäpaj aywacärirgä. Familiächoga manami pipis nirganchu ‘imapätaj chayman aywashun’ nir, chayno lapancuna cashganpitaga alapami agradecicö. Baha jutiyoj panëmi mamänëta cuidananpaj nimargan. Mike wamraläga casacushgana cargan, pero Samirawan Gabrielga nogacunawanrämi carcaycargan. Caracascho caycaj amiguncunatapis jaguiripäcurganmi. Sylvia warmiläpis unay wasinta jaguirir ichic marcaman cushi cushila nogawan shacamurgan. Cananga yachacänanchimi cargan juc ichic wasilachona. Awmi, La Victoria marcapa aywacärinäpäga imaycacunarämi pasargan.

Tiempuwanga Gabrielpis casacurgan, y Samirapis juc lädupa cawar aywacurgan. 2007 watachoga Sylviatawan nogatami invitapäcamargan Betelman, chaychoga cananyajmi sirviycanchi. Mike wamraläga ancianunomi yanapacun, Mónica warminwanpis precursor capäcun. Gabrielpis ancianunomi yanapacun, Ambra warminwanmi Italia naciuncho sirvircaycan. Samira warmi wamräpis precursorami y tiempunta camacächin Beteltapis yanapacunanpaj.

Cawaynëchoga imaycata ruranapämi cargan, Diospa cajta rurashgäcunapitaga manami laquicöchu, cushicömi lapanpita. Jehovata sirvir imacuna pasashganpitaga agradecicömi. Imapitapis Jehovapa nawpancho ali caycashganchimi alapa ali caycan; chaypäga ali cajtami imaypis acrananchi y Jehovaga ‘mana yarpachacuypa allillana cawananchipaj’ yanapämanchi (Filip. 4:6, 7). Warmilä Sylviawanga cushi cushilami yanapacurcaycä Betelcho. Cawayninchichoga imaycacunami pasashga, pero lapanpis ali cashga Jehovaman yaracur munashganta rurapäcushgäraycurmi.