28 CAJ YACHACHICUY
123 CAJ CANCIÓN Ali shongulanchiwan casucushun
¿Musyanquichu maygantaj rasunpa cashganta y maygantaj lula cashganta?
“Wachkuykiqa rasun kaqlata parlashqaykimi kaykan” (EFES. 6:14).
¿IMATAJ YACHACUSHUN?
Imanotaj cuentata gocushwan maygantaj Jehovapita rasunpa cajta y maygantaj Satanaspita y enemigunchicunapita lula cajcunata.
1. ¿Imanotaj sienticunqui rasunpa cajta musyar?
JEHOVAPA sirvejnincunaga paypa Palabranta cuyanchi. Lapan yachachicuyninchicuna chaypitami shamun (Rom. 10:17). Noganchega yäracunchimi Jehovapa congregaciunnincho rasunpa cajta yachachimashganta y ‘lutan yachatsikuqkunata corregishgantapis’ (1 Tim. 3:15). Pushacoj hermanunchicunata cäsucunchi. Paycunaga Bibliawan yachachimanchi rasunpa cajta, chaynopa Dios munashganta rurananchipaj (Heb. 13:17).
2. Rasunpa cajta musyarpis, ¿imaraj pasamashwan? (Santiago 5:19).
2 Rasunpa cajta musyarpis y pushacoj hermanucunata cäsucuptinchipis öraga gongashwanmi, y Jehovapitapis raquicäcushwanmi (leiriy Santiago 5:19). Satanasga munan Bibliaman y pushacoj hermanucuna nimashganchicunaman manana yäracunanchipaj (Efes. 4:14).
3. ¿Imanirtaj calpachacunanchirämi rasunpa cajta yachacunanchipaj? (Efesios 6:13, 14).
3 (Leiriy Efesios 6:13, 14). Ichiclachona Satanás lulacur maychicaj runacunata engañanga Jehovapa contrancho churacänanpaj (Apoc. 16:13, 14). Y mana chaylachu, Diabluga Diospa sirvejnincunatapis engañayta munanga (Apoc. 12:9). Chaymi calpachacunanchirämi rasunpa cajta yachacunanchipaj, chaynopa imaypis Jehová nishganta cäsucunanchipaj (Rom. 6:17; 1 Ped. 1:22). Chayta rurarga jatun nacay shamuptinpis salvacushunpämi.
4. ¿Imatataj canan yachacushun?
4 Cananga yachacushun ishcay yanapacuycuna Bibliapita y pushacoj hermanucunapita rasunpa caj nishgancunata chasquinanchipaj. Quimsa yachacuytapis ricärishun rasun cajlaman yäracur Jehovapita mana raquicäcunapaj.
IMACUNATAJ YANAPÄMÄSHUN RASUNPA CAJTA CHASQUINANCHIPAJ
5. Jehovata laquichiyta mana munarga, ¿imatataj rurananchi?
5 Jehovata laquichiyta mana munanchichu. Jehovata alapa cuyashganchiraycu, paytaga imaypis cäsucunchi mana laquichinapaj. Musyayta munanchi maygantaj rasun cashganta y maygantaj lula cashganta, chayta ruraptinchi Taytalanchi Jehová ali nawilanwan ricamäshun (Prov. 2:3-6; Heb. 5:14). Runacuna munashganga öraga manami Jehová munashgannochu caycan, chauraga ni yarpaylapis yarpashwanchu runacunata manchacur Jehovata mana cäsucunapaj.
6. ¿Imatataj rurargan chunca ricapacojcuna cananeocunata manchacur?
6 Runacunata manchacur paycuna Jehovapa contrancho lula parlashganta creiyta galaycushwan. Ricärishun israelitacuna imapa pasashganta. Juc cutichoshi paycuna mandargan 12 runacunata Jehová aunishgan naciunta ricapäcunanpaj. Chunca ricapacojcuna cananeo runacunata pasaypa manchacur Jehová munashganta gongaycärergan, chaymi cayno nipäcurgan: “Tsay runakunata ¿imapaqtaq achäquita ashipäshun? ¡Paykunaqa noqantsipitapis mas atskaqmi karkaykan!” (Núm. 13:27-31). Rasunpa cajchoga, cananeo runacuna Israel runacunapita más achcajmi y más calpayoj cargan. Ichanga ‘vencimäshunmi’ nir yarpapäcuptin Jehová yanapashganpitami gongacärergan. Jehová ima munashganman manami yarpapäcurganchu. Yarparanmanmi cargan Jehová chaylaraj paycunata yanapacushganman, chaynopa cuentata gocunanpaj cananeo runacunapita Jehovaga más poderyoj cashganta. Ichanga Josuewan Caleb manami paycunanochu cargan, paycunaga Jehovaman yäracur munashganta rurananpaj munapäcurgan. Chaymi israelitacunata nipäcurgan: “TAYTA DIOSMI kuyamashpantsi tsay nacionman yaykatsimäshun” (Núm. 14:6-9).
7. Jehovata laquichiyta mana munarga, ¿imataraj rurashun? (Dibujutapis ricay).
7 Manaraj imatapis rurar yarpachacunanchirämi Jehová ima munashganta (Sal. 16:8). Bibliata leishgayqui hora, cayno tapucunquiman: “Chaycho caycaptë, ¿imataraj ruräman?”. Cayman yarpariy, chunca mana ali ricapacojcunapa wilacuyninta wiyaycanquish, ¿runacunata manchacur creinquimanchu nishgancunaman? ¿O Jehovata alapa cuyar pay munashgalanta ruranquiman? Maychicaj israelitacuna shumaj tantiapäcurganchu Josuewan Caleb rasunpa cajta parlashganta. Chayno rurashganpita Dios prometishgan marcaman manami yaycupäcurganchu (Núm. 14:10, 22, 23).
¿Gamga, pïmanraj yäracunquiman cargan? (7 caj parrafuta ricay).
8. ¿Imano runa canapätaj calpachacushwan, y imanir?
8 Humilde cashwan. Jehovaga humilde cajcunata rasunpa cajta tantiachicun (Mat. 11:25). Chaylaraj Bibliapita yachacur, yachachimashganchita ali shongulanchiwan chasquishganchi (Hech. 8:30, 31). Chayno captinpis, tiempuwanga mana cuentata gocur ali tucojman ticraycushwan. Orgulloso captinchega cayno yarpar galaycushwan, ‘yarpashgäcuna más valejnomi caycan Bibliapita y hermanucuna nishgancunapitapis’.
9. ¿Imata yanapämäshun humilde cananchipaj?
9 Humilde cananchipäga yarpänanchi Jehovaga noganchipita más jatun y poderyoj cashganta (Sal. 8:3, 4). Jina calpachacunanchirämi humilde y wiyacoj runa cananchipaj. Jehovaga yanapämäshun pay yarpashganno yarpänapaj, chaypäga publicaciuncuna y Bibliatapis gomanchi. Bibliata leirga yarpachacunanchi humilde cajcunataga Jehová cuyanmi y orgullosucunataga chiquinmi. Chauraga, jatun carguyoj captiquipis calpachacunquiman mana orgulloso runano canayquipaj.
IMATA RURASHWAN RASUN CAJMAN IMAYPIS YÄRACUNANCHIPAJ
10. ¿Pïcunataj Jehová acrashgan marcanta pushananpaj?
10 Pushamänanchipaj Jehová acrashgan hermanucunaman yäracushwan. Naupa tiempucho Jehová acrargan Moisés y Josueta israelitacunata pushananpaj (Jos. 1:16, 17). Jehová acrashgan runacunata cäsucurga, israelitacunaga shumajmi cawapäcurgan. Tiempo pasariptinna unay cristianucunapa wichan 12 apostulcuna cristianucunata pushaj (Hech. 8:14, 15). Nircurpis, waquin ancianucunata acrargan congregaciunta pushananpaj. Chay pushacoj hermanucunata cäsucuptin “wawqi panikuna waranlan waranlan atskayarqan” (Hech. 16:4, 5). Canan wichanpis, pushamänanchipaj Jehová hermanucunata acrashganta cäsucuptinchi alimi cawacunchi. Chauraga, ¿imanopataj Jehová sienticunman acrashga hermanucunata mana cäsucuptinchi? Mä ricärishun imataj pasargan israelitacunata Dios aunishgan marcaman manaraj chayaptin.
11. ¿Imataj pasargan marcanta pushananpaj Jehová acrashgan runacunata mana cäsucuptin? (Dibujutapis ricay).
11 Israelitacunaga Jehová aunishgan marcaman manaraj chayaycur, waquin autoridäyoj runacunaga Moisesta chiquir galaycurgan, mandajnin manana cananpaj nergan. Cayno nergan: “Lapantsimi TAYTA DIOSPAQ santu kantsi. Lapantsitami yanapaykämantsipis” (Núm. 16:1-3). Rasunmi, lapancunaga Jehovapa santo caycargan, pero Jehovaga acrargan Moiseslata marcanta pushananpaj (Núm. 16:28). Chauraga, israelitacuna Moisespa contrancho parlarga, rasun cajchoga Jehovapa contrancho caycargan. Orgulloso cashganraycu Jehová munashganno rurananpaj trucanga quiquincuna munashgannomi rurapäcurgan. Chay orgulloso runacunata gatirajnin waquin israelitacunatapis Jehová ushacächergan (Núm. 16:30-35, 41, 49). Canan wichanpis pushamänanchipaj Jehová acrashgan runacunata mana cäsucurga Jehovatami laquichinchi.
¿Gamga, pïcunatataj yanapanquiman cargan? (11 caj parrafuta ricay).
12. ¿Imanirtaj Jehová acrashgan pushacoj hermanucunaman imaypis yäracunchi?
12 Canan wichanpis lapan shongunchiwan Jehová acrashgan pushacoj hermanucunaman yäracunchi. Jehovapa marcanta pushacojcuna ima yachachicuycuna shumaj mana tantiacuptenga, paycunaga calpachacären shumajraj tantiarcur yachachimänanchipaj (Prov. 4:18). Chaytaga rurapäcun Jehovata cushichiyta munar. Imata decidinanpäpis Biblia nishgannomi rurapäcun, y noganchipis chaynolami rurananchi.
13. ¿Imataj caycan “Jesucristupa wilakuynin”, y imatataj rurananchi?
13 ‘Jesucristupa wilakuyninta yachatsishqannöla’ yachachishwan (2 Tim. 1:13). Chaycunaga caycan cristianucunapaj Bibliacho yachachicuycuna (Juan 17:17). Lapan creishganchicunaga Bibliapitami shamun. Pushacoj hermanunchicunaga yachachimanchi imaypis chayman yäracunanchipaj. Chayta rurarga Jehovaga bendicimäshun.
14. ¿Imanotaj waquin cristianucunaga rasun cajman manana yäracärerganchu?
14 ¿Imaraj pasanman Biblia nishganlaman mana yäracuptinchi? Ricärishun imata pasargan naupa cristianucunapa wichan. Waquin cristianucuna wilacärergan ‘Diospa junajnin chayamushgana’ nir. Waquincuna nipäcurgan juc cartacho Pablo chayta guelgashganta. Paycunaga shumaj tantiarganchu chay carta lula cashganta, y chaynopa runacunatapis yachachej. Pablo paycunawan caycar shumaj yachachishganta yarparga manami ishquinmanchu cargan chay lula wilacuycunaman (2 Tes. 2:1-5). Pablo nerganpis lula cajcunaman mana creipäcunanpaj. Chayta yapay mana pasananpaj ishcay cartanpa ushanancho nergan: “Kay cartata [...] noqa Pablumi qelqarkamü. Lapan cartata apatsishqäkunachöpis ushanantaqa kikïmi qelqä” (2 Tes. 3:17).
15. Lula cajcuna rasun cashganno ricacuptinpis, ¿imatataj rurashwan mana tuninanchipaj? Tantiachicamuy. (Fotucunatapis ricay).
15 Tesalónica hermanucunata Pablo guelgashganpita, ¿imataj yachacunchi? Maychopis wiyar o ricar luta yachachicuycunata, shumajraj tantiananchi maypita shamushganta. Unay Unión Soviética naciunchoshi juc lula wilacuycunata purichipäcurgan, ‘cayga shamuycan Estados Unidos Betelpita’ nir. Y chaycho niycarganshi Jehovapa testiguncuna ishcay marcaman raquicärinanpaj. Rasun cashganno ricacuptinpis yäracoj hermanunchicunaga chay trampaman ishquirganchu. Cuentata gocurirgan Biblia nishganno mana cashganta. Canan wichanpis internetcho luta yachachicuycuna caycan. Chaycunapita chiquimajninchicuna valicuyta munan Diospa sirvejnincuna juc shongunola manana caycänanchipaj, chaycunaman mana tuninanchipaj shumajraj tantiacunanchi Biblia nishgannochu caycan o mana (2 Tes. 2:2; 1 Juan 4:1).
Lula cajcunaga rasunpa cajno wiyacaptinpis, chaycunaman mana yäracunquimanchu. (15 caj parrafuta ricay). a
16. ¿Imatataj rurananchi pipis rasun cajlaman manana yäracuptin? (Romanos 16:17, 18).
16 Yäracoj masinchicunawan jucnola cashwan. Diosga munan lapan sirvejnincuna juc shongunola payta adurananchipaj, chaypäga lapanchimi rasun cajlaman yäracunanchi. Rasun cajlaman manana yäracojcunaga Diospita raquicärinanchitami munapäcun. Chaymi paycunapita witicunanchimi (leiriy Romanos 16:17, 18).
17. ¿Imanotaj caycäshun rasun cajlaman yäracuptinchi?
17 Rasunpa cajta musyar chaylaman yäracuptinchi manami imaypis ni pipis Jehovapita raquichimäshunchu (Efes. 4:15, 16). Lulacunata y Satanaspa luta yachachicuynincunata mana creirga jatun nacay chayamuptin Taytalanchi Jehovaga chapämäshunmi. Rasun cajlaman yäracuptiquega “imaypis ali kawapäkunaykipaq Tayta Dios yanapashunki” (Filip. 4:8, 9).
122 CAJ CANCIÓN ¡Guepaman mana cutiypa Diosta sirviycäshun!
a FOTUCUNAPA WILACUY: Actuación. Unay Unión Soviética nishganpita hermanucuna juc cartata chasquiycur yarpapäcurgan Estados Unidos Betelpita cashganta, ichanga chiquimajninchicunapita cargan. Canan wichanpis chiquimajninchicuna internetcho imayca mana alicunata Diospa marcanpita parlan pantachimänanchita munar.
