1, 2. 1) ¿Ima captintaj sasa canman perdunanapaj? 2) María perdunacoj car, ¿imatataj rurargan?

 PILAPIS pasaypa laquichimaptinchega sasami canman perdunanapaj, chayno captinpis perdunanacuyta puedinchimi. María jutiyoj cristianapita parlarcushun, payga juc cuticho ali shongulanwan juc runata perdunargan. a 2017 watachomi familianwan visitaj aywargan Jehovapa testiguncunapa mushoj localninman, chayga caycan Estados Unidos naciuncho. Nircur wasinpana cutircaycaptinshi juc carro paycunata chocaripäcurgan. Panilanchi desmayacashganpita riccharamurga wamranta ricargan pasaypa mana ali caycashganta y runanpis wanushga caycargan. Pasashganman yarpar María cayno wilacun: “‘Imanacuyculätaj, cananga imanäshäraj’ nirmi laquishga caycargä”. Carruta manejaj runaga drogado o shincashgapis manashi caycarganchu. Mariaga imalapitapis masga Jehovalatash ruwacurgan tranquilala caycänanpaj.

² Carruta manejaj runapitaga autoridäcuna nipäcurgan adrede chayta mana rurashga captinpis carcelman aywananpaj. Ichanga policiacunata mandajmi paninchita nergan ‘maquiquichomi caycan chay runa carcelman chayananpaj o manapis’. María caytapis nin: “Pasashgä desgracia yapay yarpächimaptenga pasaypa laquicurgä, heridäman cachita garpuycashganno cargan”. Juc ishcay semanacuna pasarcuptenga, juiciuchona carruta manejaj runaga caycaptinpis, María autoridäcunata nergan chay runata perdunananpaj. b Parlacaramushganta wiyar, juezga wagar cayno nergan: “25 watacunanona juezno  aruycä, pero imaylapis ricashgächu gamno perdunacoj warmita. Wanupacushga familiaga manami perdunta mañacunchu maygan culpayoj runapäga, gam ichanga cay runapaj perdunta mañacur cuyapaylapa parlacamushcanqui”.

3. ¿Imamantaj María yarpachacurgan perdunananpaj?

³ ¿Imamantaj María yarpachacurgan perdunananpaj? Jehová perdunacoj cashganmanshi yarpachacurgan (Miq. 7:18). Noganchipis Jehová perdunacoj cashganta agradecicuptinchega waquincunata perdunashunmi.

4. ¿Imata rurananchitataj Jehová munan? (Efesios 4:32).

⁴ Jehovaga cuyapaylapa cutin cutin perdunamanchi, y noganchipis chaynola rurananchipaj munan (leiriy Efesios 4:32). Mayraj Jehová cushicunga ofendimajninchicunata perdunaptinchi (Sal. 86:5; Luc. 17:4). Perdunacoj imano canapaj quimsa cajcunata canan yachacushun.

‘CHAYNOLA ALIYÄCUSHÄMI’ NIR YARPASHWANCHU

5. ¿Imanotaj sienticushwan pilapis ofendimaptinchi? (Proverbios 12:18).

⁵ Pilapis ofendimaptinchega shongulanchi nananmanchi, masraj maygan amigulapis o castanchipis culpayoj captin (Sal. 55:12-14). Shongunchicho laquicuycarla caycarga, cuchilluwan tucsimashganchino nanaycanman (leiriy Proverbios 12:18). Pipis ninmanchi ‘laquichimashganman manami yarpashänachu’ nir. Chayga canman guerinchicho imapis tucsicamaptinchega mana jampishganchinomi. ‘Chaynola aliyäcushämi’ nirla cacuptinchega laquicuy manami ilacangachu.

6. ¿Öraga imanotaj ricacunchi pipis ofendimaptinchi?

⁶ Pipis ofendimaptinchega öraga juclami rabiacurinchi, chayno cashgantaga Biblia wilacunmi. Jinapis nin rabiashgala mana cacunapaj (Sal. 4:4; Efes. 4:26). Pilawanpis jagayashgala caycarga imatapis rurarishwanchi. Aumi, mana alimanmi chayashwan (Sant. 1:20). Imalapitapis jucla rabiacushwanchi, ichanga chaynola manami cacushwanchu.

7. Pipis nacachimaptinchega, ¿imanotaj sienticushwan?

⁷ Pipis nacachimaptinchega, pasaypa laquicur jucnopapis sienticushwanmi. Ana jutiyoj hermananchi cayno nin: “Wamralaraj cashgä wichan papänëga mamänëta jaguirir ashmamaj warmiwan casaracurgan. Chay wichanga japalämi ricacurgä, más piyur-raj papänëpa wamrancuna yuriptin, ‘pipis cuyaycalämanchu’ nirmi winargä”. Gregoria jutiyoj cristianapa runanpis juc warmiwanshi aywacurgan, payga cayno wilacun: “Shongulächoga nanaylami caycargan, wamralapitami paywan reguinacurgä, ishcäcunami precursornopis yanapacurgä”. Naomi jutiyoj cristianapis caytami nin: “Yarpaylapis yarpashgächu runä pacaylapa pornografiata ricaracushganta, traiciunamashgannomi sienticurgä”.

8. 1) ¿Imanirtaj perdunacoj cananchi? 2) ¿Imanonataj ricacushun waquincunata perdunarga? (“ Pipis nacachimaptinchi perdunanapaj sasa captin” nej recuadrutapis ricay).

⁸ Pilapis contranchicho imatapis ruraptenga  maquinchichomi caycan ofendishgala cacunapaj o manapis. Taytalanchi Jehovata cuyarga alichi canman pay munashganno perdunacoj cananchipaj. Pero pitapis nanaparaycarla cawaycarga, gueshyashwanchi o upa runanopis mana alita rurarishwanchi (Prov. 14:17, 29, 30). Cristina jutiyoj hermana cayno nin: “Pitapis mana perdunaptëga asicuytapis micuytapis munächu, punuytapis puedëchu, imalapitapis rasla rabiacö, chayraycu runätapis gayapä y waquincunatapis mana alipa tratar galaycö”.

9. ¿Imanirtaj piwanpis jagayashgala caycashwanchu?

⁹ Ofendimashganchicuna perdunta mana mañamaptinchega, ¿imatataj rurashwan jagayashgala mana caycänapaj? Naga parlashganchi Gregoria cristiana cayno nin: “Sasa captinpis calpachacurgämi unay caj runäta manana nanaparänäpaj. Chayta rurashpäga jaucalana sienticurgä”. Jagayashgala caycarga imaypis rabiashgala caycashwan, ichanga perdunaptinchega cushi cushilami cawacushun (Prov. 11:17). Pero shongulanchicho jinala laquicuycaptinchega, sasami canman perdunananchipaj. Chauraga, ¿imataraj rurashwan?

RABIASHLA MANA CACUNANCHIPAJ CALPACHACUSHWAN

10. ¿Imanirtaj tiempuraj pasarcunman shongupita perdunaycunapaj? (Dibujucunatapis ricay).

¹⁰ Pipis ofendimaptinchega tiemputarämi necesitanchi jagayashgala mana cacunapaj. Pilapis accidentacuptin juclaga manami aliyarcunchu, chaynolami pilawanpis resentido caycaptinchega tiempuraj pasarcunman shongupita perdunaycunapaj (Ecl. 3:3; 1 Ped. 1:22).

11. ¿Imanirtaj Jehovata ruwacushwan perdunacoj cananchipaj?

¹¹ Jehovatapis ruwacuy más perdunacoj canayquipaj. c Naga parlashganchi Ana cristiana wilacun Diosta mañacushganpita más fácil cargan perdunananpaj, cayno nin: “Jehovata ruwacurgä nogata y familiätapis perdunamänanpaj ima mana alilatapis rurapäcushgäpita. Nircur cartata escribirgä papänëtawan warminta perdunashgäta wilapänäpaj”. Perdunananpäga sasa captinpis paymi nin: “Tayta Jehovanola perdunacoj canäpaj calpachacushgäraycu imaylapis capaz papänë warminwanpis Jehovata sirvir galaycunman”.

12. ¿Imanirtaj quiquinchi yarpashganchitaga rurashwanchu? (Proverbios 3:5, 6).

 ¹² Jina ama yarparaychu jagayashgala cashgayquimi ali cashganta. Quiquinchi yarpashganchinoga ruranapaj trucan Jehová perdunanapaj nimashganchita cäsucushun (leiriy Proverbios 3:5, 6). Jehovaga musyanmi imacunata rurartaj ali cawacushwan (Is. 55:8, 9). Payga yarpaylapis yarpanchu nacachimänanchipaj. Chauraga pitapis perdunanapaj mandamaptinchega, quiquinchi ali cawacunapämi canga (Sal. 40:4; Is. 48:17, 18). Ichanga imano sienticushganchilaman yarpararga sasami canga pitapis perdunanapaj (Prov. 14:12; Jer. 17:9). Naomi cristiana caytapis ninmi: “Runä pornografiata ricashganraycu galananlachoga perdunayta munargächu, perdunaptëga yapay nacachimänanta manchacurgä. ‘Jehová musyanmi imanir mana perdunashgäta’ nir yarpachacurgä, pero tiempuwan cuentata gocurgä yarpashgäga Diospa nawinpaj mana ali cashganta. Imapa pasashgäpita pasaypa laquicushgäta Jehová musyarpis, payga munan perdunacoj canäta”. d

ALI CAJCUNALAMAN YARPAR GALAYCUSHWAN

13. Romanos 12:18-21 texto wilacushganno, ¿imatataj rurananchi?

¹³ Pasaypa laquichimajninchicunata perdunaptinchega ¿‘shongücho perdonashgänami’ nishwanlachu? Manami. Cristiano masinchi captenga amistänacuytami masga munayculanchi (Mat. 5:23, 24). Ajayashgala cacunapaj trucanga maquinchichomi caycan ali shongulanchiwan perdunaycunapaj (leiriy Romanos 12:18-21; 1 Ped. 3:9). ¿Imata ruraptinchitaj shongupita perdunashun?

14. ¿Imata ruranapätaj calpachacushwan?

¹⁴ Jehovaga shongunchicho ali cajcunalatami rican, chaynola ofendimajninchicunata ali shongulanchiwan ricashwan  (2 Crón. 16:9; Sal. 130:3). Waquincuna pantashganlaman yarparaptinchega ali cajcunata rurashganta gongashwanchi, ichanga ali rurashgancunaman yarparaptinchi pantashgancunalata ricashunnachu, chaynopa más fácil canga perdunanapaj. Chaypaj parlar Javier jutiyoj cristiano cayno nin: “Waquincuna pantashgancunalaman yarpänapaj trucanga ali cajta rurashganlaman yarpämi, chaynopa más facilmi caycan perdunanäpaj”.

15. Pitapis perdunarga, ¿imanirtaj ‘gamta perdunashcänami’ nishwan?

¹⁵ Pitapis perdunaptinchega, ‘gamta perdunashcänami’ nishwanmi. ¿Imanir? Naomi cristiana cayno nin: “Runämi tapumargan ‘¿perdunamashcanquinachu?’, chay hora ‘aumi’ ninäpäga manami contestaytapis puedirgächu, shongulächo nanaparaycashgärämi. Tiempuwanraj ‘gamta perdunashcänami’ nergä, chayno nishgäpita runaläga wagashgarämi, y nogapis  más jaucalana ricacurgä. Chaypitaga más cushi cushilami ishcäcuna cawar galaycärergä. Cananga payman masraj confiacö y yapay ali amigucunanona puricärë”.

16. ¿Imatataj yachacushcanchi perdunacoj canapaj?

¹⁶ Jehová munaycanmi perdunacoj cananchita (Col. 3:13). Chayta ruranapäga fácil mana captinpis, pilapis laquichimaptinchi ‘chaynolami aliyäcushaj’ nir yarpashwanchu, jina rabiashla cacunapaj trucanga ali cajcunalaman yarpar galaycushwan (cay recuadrutapis ricäriy: “ Perdunacoj canapaj caycunatami rurananchi”).

¿IMANORAJ RICACUSHUN PERDUNACOJ CAPTINCHI?

17. ¿Imanonataj goyäcushun perdunacoj carga?

¹⁷ ¿Imanirtaj perdunacoj cananchi? Perdunacoj captinchega cuyapäcoj Taytalanchi Jehovanomi cashun (Luc. 6:36). Jina noganchiwan Jehová perdunacoj cashganpitami agradecicuycäshun (Mat. 6:12). Saludninchipis ali caycanga y waquincunawanpis ali amigo cashun.

18, 19. ¿Imaraj pasanga perdunacoj captinchi?

¹⁸ Pitapis perdunaptinchega öraga mana shuyarashganchi bendiciuncunatapis chasquishwan. Galanancho parlashganchi María cristianapita yapay parlarcushun, payga manami musyarganchu carruta manejaj runa juicio ushariptin wanuchicunanpaj yarpaycashganta. Ichanga María perdunaycushganpita Jehovapa testiguncunawan Bibliata estudiar galaycurgan.

¹⁹ Cawayninchichopis ajachi o sasachi canman pitapis perdunanapaj. Pero perdunacuptinchega cawayninchicho más jaucalana ricacushwan (Mat. 5:7). Chauraga, Taytalanchi Jehovanola calpachacushun pitapis shongupita perdunanapaj.