1. ¿Imanirtaj ninchi Diospa Palabran Jesuspaj alapa ali cashganta?

 ¿YARPACHACUSHCANQUICU imanoraj cargan Jesús yachachicuycaptin wiyarga? Diospa Palabranpita umachicushganpitami imaypis parlaj. Chaycunatami ricächicun bautizacushgan junaj imacunata parlashganta, jina wanushgan junaj imacuna parlashgantapis (Deut. 8:3; Sal. 31:5; Luc. 4:4; 23:46). b Quimsa watacuna masraj yachachicushgan wichan Jesusga Bibliapitami parlaj o liej y tantiachicojpis (Mat. 5:17, 18, 21, 22, 27, 28; Luc. 4:16-20).

2. ¿Imataj Jesusta yanapargan winashgan tupu Diospa Palabranta shumaj reguinanpaj? (Garancho caycaj dibujuta ricäriy).

² Jesús runacunata manaraj yachachicur, imaypis Diospa Palabranta liej y waquincuna leishganta y parlashgantapis wiyaj. Jina José Mariawan Bibliapita familianwan parlapacärishgantapis Jesusga wiyarganchi (Deut. 6:6, 7). c Sábado junajcunachopis sinagogaman familianwan aywaj y Diospa Palabranta leishgantapis atentula wiyaj (Luc. 4:16). Y tiempuwanga quiquilanmi Bibliapita yachacoj. Chay lapancuna rurashganpitami Jesús Diospa Palabranta alapa cuyaj y cawaynincho practicaman churaj. Tantiarcunapaj, yarparcushun 12 watayoj caycaptin templucho ima pasashganta. Moisespa leynincuna alapa yachaj runacuna “almirasha carcaycaran alli yarpaysapa captin tapushancunata alli yachaptin” (Luc. 2:46, 47, 52).

3. ¿Imatataj cay yachachicuycho yachacushun?

 ³ Noganchipis Diospa Palabranta cutin cutin leir shumaj tantiacushpanchi cäsucunapaj imaypis calpachacushunmi. Ichanga, ¿imatataj rurashwan Diospa Palabranta leiptinchi shumaj tantiarcunapaj? Chayta musyanapaj, ricärishun Jesús imataj nergan escribacunata, fariseucunata y saduceucunata, paycunaga Diospa Leyninpita alapami yachaj cargan. Chay pushacoj religiosucuna Diospa Palabranta cada cadala leipäcuptinpis, manami shumajga tantiapäcojchu cäsucunanpaj. Chayta logrananpäga Jesusga quimsa cajcunapita parlargan. Jesús nishganga noganchitapis yanapämäshunmi caycunacho: 1) leiycashganchita más aliraj tantianapaj, 2) ali yachachicuycunata tarinapaj y 3) Diospa Palabran cawayninchicho yanapämänanchipaj.

4. ¿Imataj yachachimanchi Lucas 10:25-29 Bibliata leishganchipita?

⁴ Bibliacho leiycashganchitaga shumaj tantiacuyta munayculanchi, chaynopa cawayninchicho practicaman churanapaj. Yarparcushun juc cuticho Jesús “ley yachatsiq” runawan parlashganman (leiriy Lucas 10:25-29). Chay runaga imaycamapis cawacuyta munarmi imata rurananpaj tantiacuyta munargan, Jesusnami tantiachinanpaj Diospa Palabranman yarpachacunanpaj cayno nergan: “¿Ima niykantaq Tayta Diospa leynincho? Liyir ¿imatataq tantiyanki?”. Chay runaga alimi contestargan. Diospa Palabranpita parlarmi nergan Diosta cuyanapaj y runa masinchitapis (Lev. 19:18; Deut. 6:5). Nircur tapucurgan: “¿Pitaq tsay runa mayïqa?”. Chayno tapucur ricächicurgan Leyta mana shumaj tantiashganta. Chaymi musyarganchu cawaynincho Diospa Palabranta imano cäsucunanpaj.

5. ¿Imanirtaj mañacuptinchi y despaciula leiptinchi yanapämanchi Biblia wilacushganta shumaj tantiarcunapaj?

⁵ Bibliata cada cadala leiptinchega más alirämi tantiarcushun. Ruranapaj achcami caycan. Puntata, manaraj leir mañacushwanmi. Jehová mana yanapämaptinchega Bibliata manami tantiarcushunchu, chaymi payta ruwacushwan santo espiritunta leiptinchi tantiarcunapaj. Nircur leiyta galaycuy, despaciula shumaj tantiarcunayquipaj. Jina fuertipa leishwan o grabaciunta churarcurpis leishwanmi. Chaynopa wilacuyta leiycashganchicho caycashganchino ricacushun y yachacushganchega shongunchicama chayanga y manami gongashunchu (Jos. 1:8). Leiyta usharcurna yapay mañacushun Jehovata agradecicunapaj tantiacushganchipita y practicaman churanapaj yanapämänanchipäpis.

6. ¿Imanotaj yanapämanchi Bibliata leishganchi hora anotarcuptinchi y tapucuycunata ruracuptinchi? (Fotucunatapis ricay).

⁶ ¿Ima mastaj yanapämäshun Bibliata leiptinchi shumaj tantiarcunapaj? Leiycashganchipita tapucuptinchimi. Tantiarinapaj, ¿pïcunataj chay wilacuycho yurin?, ¿pitaj parlaycan?, ¿pitataj parlapan y imanir?, ¿imay y maychotaj chayga pasashga? Chayno tapucuptinchimi ali yachachicuycunata tantiarcunapämi yanapämäshun. Jina walca palabracunawan anotarcuycushwanmi, chayga yanapämäshun masraj tantiarcunapaj y umachicunapäpis. ¿Imacunataj anotarcushwan? Canman imacuna tapucushganchipita, respuestacunata, yarpänapaj cajcunata, waquincunata imano yanapänapaj y leishganchi hora imano sienticushganchitapis. Bibliata  leishganchi hora chayno ruraptinchega Jehová parlapaycämashganchinomi sienticushun.

7. ¿Imanirtaj shumaj tantiacoj cananchi Bibliata leiptinchi? (Mateo 24:15).

⁷ Jesusmi wilacurgan Bibliata tantiarcunapaj imata necesitashganchita, chayga caycan shumaj tantiacoj canapaj (leiriy Mateo 24:15). Shumaj tantiacoj cäga, ¿imataj ruran? Leishgancunata jucnin jucninwan tincuchin ali tantiarcunanpaj. Jina rasla mana tantiacajcunatami tantian. Jesús nishgannomi shumaj tantiacoj captinchega cuentata gocushun Bibliapita waquin profeciacuna imano cumplicuycashganta. Chaura tantiacoj cananchi Bibliata leiptinchi más aliraj provechanapaj.

8. ¿Imataj rurashwan shumaj tantiapaycur leinapaj?

⁸ Jehovami sirvejnincunata tantiacoj cananpaj yanapan. Chaymi mañacushwan tantiacoj cananchipaj (Prov. 2:6). Ichanga manami mañacushwanlachu, sinoga unay yachacuycashganchipita chaylaraj yachacushganchiwan imano tincushganta cuentata gocushwan. Chayta ruranapaj achca publicaciuncunami can, jucmi Guía de estudio para los testigos de Jehová nishganmi caycan. Chaywan waquin publicaciuncunata leiptinchega, Biblia wilacushganta más aliraj tantiarcushun y imano practicaman churanapäpis musyashunmi (Heb. 5:14). Shumaj tantiapaycur Bibliata leiptinchega cada cadalami masraj tantiarcushun.

9. ¿Ima ali yachachicuytaj saduceucunaga mana chasquicurganchu?

⁹ Saduceo religiosucuna Bibliapita galanan pichga librucunapita alapa musyaycarpis, chay librucunacho Dios imata yachachicushganta manami tantiapäcojchu. Cayman yarpay, juc cutichomi wanushgacuna cawarimunanpaj yachachicuywan Jesusta pantachiyta munargan. Chaymi Jesús paycunata cayno tapurgan:  “¿Manaku Moisés qelqashqanta liyipäkushqanki? Rupaykaq shirakapitami Moisésta Tayta Dios kayno nirqan: ‘Noqaqa Abrahampa, Isaacpa y Jacobpa Diosninmi kaykä’” (Mar. 12:18, 26). Chayta saduceucunaga achca cutichi leirgan, ichanga Jesús tapucushganga ricächicun paycuna chay ali yachachicuyta wanushgacuna cawarimunanpaj mana chasquicushganta (Mar. 12:27; Luc. 20:38). d

10. ¿Imanirtaj nawinchicuna y rinrinchicuna mayaj mayajla caycanman Bibliata leiptinchi?

¹⁰ ¿Imataj yachacunchi chay wilacuypita? Bibliata leiptinchega nawinchicuna y rinrinchicuna mayaj mayajla caycanman juc versiculuta o wilacuyta leishganchita shumaj tantiarcunapaj. Manami janalan janalanlata yachacushwanchu, pamparaycaj guellayta ashishganchino Bibliachopis pacaraycaj yachachicuycunata y tantiachicuycunatapis ashishun.

11. 2 Timoteo 3:16, 17 textucuna nishganno, ¿imacunata rurartaj Bibliacho ali yachachicuycunata ashishwan?

¹¹ Chay ali yachachicuycunata, ¿imanotaj Bibliacho tariycushwan? 2 Timoteo 3:16, 17 (leiriy) textucunata tantiarcushun. Chaycho nin “lapan qelqaraykaqkunaqa […] ali kaykan” caycunata ruranapaj: “Yachatsinantsipaq, tantiyatsinantsipaq, corriginantsipaq y Tayta Dios munashqanno kawanantsipaq”. Bibliapita waquin ichic librucunapis chaycunacho yanapämanchimi. Bibliata leiptinchega tantiarcushwan imataj yachachimanchi Jehovapita, ima munashganpita o tantiachicuynincunapitapis. Ima leiycashganchi tantiachimänanchipaj shumaj leipar cuentata gocushwan shongunchicho imata yarpaycashganchita o imacunata ruraycashganchi, mana ali captenga mana ruranapäna y Jehovata sirviycarla caycänapaj. Jina yarpachacushwan imanotaj chay wilacuyga yanapämanchi corregicunapaj predicaptinchi runacuna lutala parlashganman mana yarparänapaj. Y Jehová munashganno cawacunapaj pay imano yarpashganta tantiarcushwan. Chay chuscu cajcunata yarparar leiptinchega ali yachachicuycunatami tarishun.

12. ¿Imanirtaj Jesusga fariseucunata tapucurgan “¿Manachu Tayta Diospa palabrancho liguishcanqui?” nir?

¹² Fariseucunaga Bibliata leir yachaj tucärejmi. Chaymi paycuna chayno cashganta Jesús ricächinanpaj cayno tapucurgan: “¿Manachu Tayta Diospa palabrancho liguishcanqui?” (Mat. 12:1-7). e Juc cuticho chay fariseucunami Jesuspa discipuluncunata culpachargan  sábado junajpita leyta mana cäsucärishganta. Chaymanmi Jesusga paycunata ishcay tantiachicuycunawan parlargan y Oseas librupita wilacurgan. Chaycunawanmi Jesusga ricächicurgan fariseucuna Diospa Palabran nishganta mana cäsucärishganta y runa masincunata mana laquipashganta. Chay runacunaga Bibliata leipäcojmi, ichanga shumaj mana tantiarcur manami cäsucärejchu. Paycunaga ali tucärirmi leipäcoj waquincunata jamurpänanlapaj. Rumi shongu capäcuptinmi leishgancunata shumaj tantiapäcojchu (Mat. 23:23; Juan 5:39, 40).

13. ¿Imanotaj shongunchi canman Bibliata leiptinchi, y imanir?

¹³ Jesús parlashganga yachachimanchi ñanpu shongulanchiwan Bibliata leinapaj. Fariseucunanoga ama cashunchu. Chaypa trucanga ñanpu shongu car Jehová pushamänanchipaj permitiycushun. Santiago 1:21 nishganno, “wilakuyninta shonquykikunaman Tayta Dios murushqa kaykaptinqa wilakuyninta shumaq cäsukäriy”. Chayno carga Diospa Palabran shongunchicama chayanga. Bibliata leiptinchega manami ali tucärishwanchu ni waquincuna pantashgancunaman yarparaycashwanchu. Chaynoparämi yachacushganchi shongunchicama chayaptin laquipäcoj, cuyapäcoj y cuyacoj cashun.

14. ¿Imanotaj musyashwan Bibliapita yachacushganchi cäsucuycashganchita? (Fotucunata ricay).

¹⁴ Waquincunata imano tratashganchichomi ricacan Bibliapita yachacushganchi cäsucuycashganchita o mana. Fariseucunapa shonguncuna chucru captinmi Diospa Palabranta tantiapäcojchu y ali runacunata culpachargan (Mat. 12:7). Chauraga cuentata gocushun, ¿imanotaj waquincunata ricanchi y tratanchi? Tantiarinapaj, ¿waquincuna alicunata rurashganpitacu imaypis parlanchi o pantashgancunapitacu? ¿Imaypis perdunacojchu canchi o jamurpacoj y jagayashgala  caycanchi? Chaycunata imata contestashganchitami ricächimäshun Bibliapita yachacushganchi shongunchiman chayaycancush y cäsucuycashganchita o manapis (1 Tim. 4:12, 15; Heb. 4:12).

15. ¿Imanotaj Jesusga Diospa Palabranta ricaj?

¹⁵ Jesusga cuyajmi Diospa Palabranta. Aumi, Salmo 40:8 mayna wilacurgan imano valurananpaj: “Tayta Dios, gam munashayquita rurarmi cushicö. Layniquicunatapis llapantami yarparaycä”. Alapa cuyaptinmi yanapargan cushi cushila Jehovata sirviycarla caycänanpaj. Noganchipis chaynolami caycäshun cada cadala Diospa Palabranta leinapaj y cuyanapaj calpachacuptinchi (Sal. 1:1-3).

16. ¿Imatataj ruranquiman Bibliata leiptiqui aliraj provechanayquipaj? (“ Jesús parlashgancunami yanapämanchi leishganchita tantianapaj” recuadruta ricäriy).

¹⁶ Jesús yachachishgan y imano cawacushganmi yanapämanchi Bibliapita aliraj leinapaj y yachacunapäpis. Leishganchita shumaj tantianapäga Jehovata mañacushun, despaciula leishun, tapucuycunata ruracushun y yarpänapaj cajta walcalata anotarcushun. Tantiapaylapa leinapäga, wilacuyta leicashganchita despaciula leishun y waquin publicaciunninchicunachopis chaypita maslata ashishwan. Bibliata shumaj reguinapäga, leiptinchi ali yachachicuycunata ashishun, ichic wilacuycunachopis chayta tarishun. Y Diospa Palabran shongunchicama chayananpäga, ñanpu shongulanchiwan leircushun. Chay lapancunata rurarga, Bibliata leiptinchi alimi provechashun y Jehovamanpis masraj guelicushun (Sal. 119:17, 18; Sant. 4:8).