1, 2. ¿Imacunapitataj canan yachacurishun?

IMARAJ canman paytacushganchita wasinchiman pipis mana chayachimuptin, ichanga ‘imay horataj shamunga’ nirchi caypa wacpa ricachacur caycashwan. Chaychi Bibliacho Proverbios 13:12 textucho cayno nin: “Yarpashqanno mana kamakaptinqa pipis pasaypami lakikun”. Y pipis ‘shaycämunna’ nimaptinchega mana laquicurnachi shuyaraycashwan.

² Cay yachachicuycho parlarcushun Biblia ima wilacushganta mana piñacuylapa Jehovata shuyaraycänapaj (Miq. 7:7). Nircurpis yachacushun imacunapa pasartaj jauca jaucala shuyaraycashwan. Ushanapäna ricaycushun calpachacushganchiraycur ima bendiciuncunata chasquinapaj.

3. ¿Imatataj yachacunchi Santiago 5:7 textucho?

³ Santiago 5:7 texto parlamun imano runa canapaj. Chaycho nin: “Mana ajayaypa shuyarpay. Chakra aruqkunapis murunanpaq tamyataraqmi shuyarpan. Cosëchata shuntananpaqpis usyataraqmi shuyarpan”. Chauras imatapis tarinapäga, jucla imatapis ruracachärishganchipitachu canga. Shumaj wilacuy chayga caycan.

4. ¿Imatataj tantiachicamun Proverbios 4:18 texto?

⁴ Ali runacunapaj parlarmi Proverbios 4:18 texto cayno nin: “Alita ruraq runakuna kawashqanqa patsa waraptin  atsikyashqannömi kaykan”. Caypita yachacunchi sirvejnincunataga Jehová imatapis tantiachin ichiclapa ichiclapami. Jina yachacunchi espiritual cajcho cristianucuna ichiclapa ichiclapa imano pogunanpäpis. Biblia yachachicushganta yapay yapaypis leiycur tantiaparga y cawayninchicho casucurga, Jesús imano runa cashgannomi cashun y Jehovapa amigunmanpis chayashunmi. Mä ricaycushun imano Jesús caypita tantiachicamushganta.

5. ¿Imapita parlartaj Jesús tantiachicamurgan ali cristianuman ticranapaj ichiclapa ichiclapa cashganta?

⁵ Juc cuticho Jesús parlamurgan Diospa Gobiernunpita yachachicushganchi, runacunapa ali shonguncho ichic muruno winamuycashganno cashganta. Cayno nergan: “Muruykuptinqa paqaspapis junaqpapis winakamunmi. Imano winashqanta tsay runa mana tantiyaptinpis tsay trïgu puntata qewanölami jeqamun. Atayarkurnami espijayta qalaykur poqun” (Mar. 4:27, 28). Caywanga Jesús yachachicuycargan pipis ali wilacuyta chasquicuptenga guewanopis ichiclapa ichiclapa shonguncho jegamunanpaj. Cayga ricacämun estudianticuna ali runaman ticraycur Jehovata sirvir galaycushgancho (Efes. 4:22-24). Chayno estudianticunapa guepanchoga Jehovami caycan, paymi poguchin (1 Cor. 3:7).

6, 7. ¿Imatataj yachacunchi cay Pachata Jehová imano camashganpita?

⁶ Jehová imatapis camacächinanpäga manami jucla imatapis ruracachärinchu. Jutinraycur y waquincunaraycurmi imatapis pacienciawanraj ruran. Cay Pachata imano camashgancho chayta ricärishun.

⁷ Cay Pachata Jehová camashganpaj parlarmi Biblia wilacun ‘tamañunpaj’, ‘cordilwan chutashganpaj’ y imano ‘taquiaränanpäpis’ (Job 38:5, 6). Jina Diosninchega yarpachacurganräshi lapan camashgancunaman (Gén. 1:10, 12). Mayraj angelcunapis cushicarcärergan Jehová lapan  camashgancunata ricar. Cushicuypitaga cantaparganräshi Tayta Diosninchita (Job 38:7). ¿Imatataj yachacunchi? Cieluchopis, Pachachopis lapanta Jehová camananpäga achca watacunami pasashga y camashgancunata ricarga ‘pasaypa ali cashganta’ Jehová nergan (Gén. 1:31).

8. ¿Imatataj canan yachacurishun?

⁸ Chauras Bibliaga tantiachicunmi pacienciacoj runa canapaj ali cashganta. Canan ishcay caycan yachacunapaj, mä imanoshi Jehovalacho shuyacushwan.

9. ¿Imacunapa pasartaj Jehová yanapämänanchita shuyarcushwan?

⁹ Shuyaraycashwanchu Diosta ruwacushganchino imapis jucla ruracänanta. Ima ayca pruebacunapa pasar Diosninchi yanapämänanchipaj cutin cutin ruwacuptinchipis calpalanta mana chasquiycashganchita ricarga, ichanga yarpashwan Diosga mana wiyaycämashganchita. ¿Imanirtaj Jehovaga ruwacushganchino imatapis jucla rurarimunchu?

10. Diosta mañacurga, ¿imanirtaj imatapis jucla goycalämänanchipaj nishwanchu?

¹⁰ Mañacushganchicunataga quiquin Jehovami wiyaycalämanchi (Sal. 65:2). Yaracoj cashganchita ricarmi wiyaycalämanchi (Heb. 11:6). Casucoj o mana casucoj cashganchitapis musyayta munaycanmi, y munayninta ruranapaj calpachacushganchitapis (1 Juan 3:22). Umanchipita shongunchipita ima mana alilatapis jorgunapaj calpachacurga mañacuycäshunla, Diosga yanapämäshunmi. Mana yamacaypa mañacunapaj parlarmi Jesús cayno nergan: “Mañacuptiquega Tayta Dios tarichishunquimi. Asherga tarinquimi. Gayacur puncuta tacaptiquega quichapäshunquimi. Mañacoj cäga chasquinmi. Ashej cäga tarinmi. Gayacur puncuta tacaj cajtaga quichapanmi” (Mat. 7:7, 8). Caycho nishgannola cutin cutinpis ruwacurga Taytalanchi Jehovaga mañacushganchita goycalämäshunmi (Col. 4:2).

11. ¿Imatataj tantiachicun Hebreos 4:16 texto?

¹¹ Öraga nishwanmi ‘Diosga manami wiyamanchu’, pero Taytalanchi Jehovaga musyanmi mañacushganchita imay hora goycalämänanchipaj (leiriy Hebreos 4:16). Manami imaypis yarpashwanchu mañacushganchita Jehová mana casupashganta. Unaypitana Diosta sirvejcunapis mañacurcaycanla Diospa Gobiernun lapan mana alicunata ushacächinanpaj. Quiquin Jesusmi chayta ruwacunapaj wilacurgan (Mat. 6:10). Pero laquicuypächi canman achca watapana shuyaraycar ‘Diospa Gobiernun shamunchu’ nir Paypita witicuptinchi (Hab. 2:3; Mat. 24:44). Chauras alapa ali canga, cay munduta ushacächinanpaj quiquin Jehová tiempunta camacächishganta shuyarcuptinchi. Yaracuycäshunla, chay junajga chayaramungami. ¡Mayraj cushicushun chay wichan! (Mat. 24:36; 2 Ped. 3:15).

12. ¿Imapa pasartaj quiquinchiraj imatapis jucla alchariyta munashwan?

¹² Mana alicunapa pasaptinchi. Canan wichan runacunaga chiquinacärin colornincunaraycur, castancunaraycur, maypita cashganraycur y imacunawan nacashganraycurpis. Jehovapa testiguncunatana chiquipäcun Diosta imano adurashganraycur.  Mayganchipis chaypa pasaycarga Biblia cayno nishganmi shacyächimäshun: “Wanunanyaq yarakamaqkunaqa salvashqami kanqa” (Mat. 24:13). ¿Y congregaciuncho pilapis jucha rurashganta ricashga carga?, y ancianucuna musyaycaptinnaga ¿pacienciacurchuraj shuyaräshun paycunata yanapar Jehová pushaycashganta?

13. Congregaciuncho pilapis juchata rurarishga carga, ancianucuna ¿ima ruranantataj Jehová munan?

¹³ Congregaciuncho pilapis jatun juchata rurarishganta ancianucuna musyarcuptenga, Jehovatami ruwacärin yachayninwan yanapänanpaj (Sant. 3:17). Ancianucunaga imaycatami ruran juchayoj caj lutan caminunpita cuticamunanpaj (Sant. 5:19, 20). Jina calpachacärinmi congregaciuncho lapancunapis jauca jaucala cacärinanpaj y laquishga caycajcunatapis shacyächinanpaj (2 Cor. 1:3, 4). Ima juchapis rasunpa o mana rasunpa cashgantami ancianucunaga lapantaraj musyapacaramun. Chaypitapis ancianucunaga mañacärinraj juchayoj cajta Bibliawan anyapänanraj y oraga piñapänanraj (Jer. 30:11). Aumi, ancianucunaga shumajchi tiempunta camacächenga caycunacho yanapacunanpaj. Jehovata mañacurcur ancianucuna lapanta ruraptenga congregaciunchopis lapancuna jauca jaucalami carcaycanga. Chayno captinpis juchayojpa culpanraycur pilapis nacaycaptenga o quiquinchi chaypa pasaycarga, ¿imataraj rurashwan?

14. Jucpa culpanraycur laquishga caycarga, ¿pipitataj yachacushwan yanapämänanchipaj?

¹⁴ ¿Imaylapis jucpa culpanraycur pasaypa laquicushcanchichu? Chayno carga Diospa Palabranmi yanapämäshun laquichimashganchicunata Jehovapa maquinman cachaycunapaj. Chaytami rurargan José; wauguincuna chiquircaycaptinpis y contrancho imaycata rurashga captinpis, payga manami laquishgalaga cacurganchu. Payga Jehovapa naupanchomi mana yamacaypa alicunalata rurar cushi cushila caycargan. Y chayraycur achca bendiciuncunata tarirgan (Gén. 39:21). Tiempuwanpis perdunarganmi wauguincunata y masraj chasquirgan Diospa bendiciunnincunata (Gén. 45:5). Noganchipis  Josenolami cushi cushila caycänapaj ima laquichimashganchicunatapis Jehovapa maquinman churaycushwan (Sal. 7:17; 73:28).

15. ¿Imatataj juc paninchi rurargan arojmasinnin wajtancho lutancunata parlaycaptinpis?

¹⁵ Ichanga noganchicunaga pasashunchu José pasashganpa. Pipis mana alita ruraycamaptinchega laquicunchimi, pero Diospa Palabranga yanapämanchimi, pilawanpis ofendinacushga carpis yanapämäshunmi (Filip. 2:3, 4). Ricärishun canan mä imatash yachacunchi juc panipita; paypitash arojmasinnin mana rasun cajcunata parlacachaycargan. Cayga laquichirganshi paninchita, pero nanaparänanpa trucanga Jesusmanshi yarpachacurgan, payga upalacurganshi waquincuna mayjinanpa ashliycaptinpis (1 Ped. 2:21, 23). Jinamanpis paninchega manash imapa pasashganlamanga yarparäcur cacurganchu. Chaypitanash cuentata gocurgan arojmasinnin gueshyashganraycur lutancunata parlashganta. ‘Shongulanchoga manachi chiquimanchu’ nirna paninchega yarpachacurgan. Jesusnopis upälala cacushganpitaga alipami cargan, cushicurganmi jucla mana piñacurcushganpita.

16. ¿Imamantaj yarpashwan imayca mana alicunaraycur nacaycarga? (1 Pedro 3:12).

¹⁶ Waquincunapa culpanraycur imayca laquesacunapa pasaycarga, cayno Biblia wilacushganmi yanapämäshun: “Llaquicuycajcunapa ñaupanchomi caycan TAYTA DIOSGA” (Sal. 34:18). Jehovaga cuyaycalämäshunmi pacienciacoj captinchi y payman yaracur lapanta wilapaptinchi (Sal. 55:22). Payga lapanta rican y juezninchi japuy caycan (leiriy 1 Pedro 3:12). Chauras imacunapis calpanchiwanraj mana alchacänanpaj captenga Taytalanchi Jehovata shuyaräshun yanapämänanchipaj.

17. ¿Imatataj Taytalanchi Jehová aunimanchi Isaías 30:18 textucho?

¹⁷ Ichiclanami pishiycan Gobiernunwan Tayta Jehová bendecimänanchipaj. Isaías  30:18 texto cayno nin: “Tayta Diosman yärakuyta mana munaptikipis kuyapäkuq y ali kaqlata ruraq karmi payman yärakärinaykita shuyaraykäshunki. Payman yärakäriptikiqa kuyapäshushpaykimi yanapashunkipaq. Payman yärakuqkunaqa ali kawaytami taripäkunqapaq”. Jehovalaman yaracur shuyarajcunaga canan tiempupis y shamoj tiempuchopis maychicaj bendiciuncunatami taripäcunga.

18. ¿Imano cawaytaj chayamunanpäna caycan?

¹⁸ Mushoj Pachachona caycarga jauca jaucalana cawacushun, imacunapis laquichimäshunnachu, pipis nenganachu ‘caycunaraycur nacaycä’ (Apoc. 21:4). Pipis nenganachu ‘imataraj micushaj, imataraj upushaj’; cawanapäga jalgachopis, ragrachopis imaycami mururaycanga (Sal. 72:16; Is. 54:13). Alapa shumaj ¿au?

19. ¿Imanotaj Jehová cananlapitana yanapaycämanchi?

¹⁹ Chay junaj manaraj chayamushgancamaga cananlapitana Tayta Dios yanapaycämanchi mana alicunata jaguiycur ali runaman ticranapaj. Ama guepaman cutishunchu, Diospa Gobiernunga chayaycalämungami. Ali caway chayamunanpaj caycaptenga, mana yamacaypa ali cajcunalata rurar pacienciacur Dios aunicushganta shuyaraycäshun.