1, 2. 1) ¿Imanirtaj nishwan sasa tiempucunapa pasar japalanchega caycanchichu? 2) ¿Imatataj canan yachacushun?

 SASA tiempucunapa pasarga capazchi sienticushwan japalanchi, jäcoj jircacho caycashganchino. Ichanga manami japalanchichu caycanchi, Taytalanchi Jehovaga musyanmi mana alipa pasaycashganchita, chaymi aunimanchi noganchiwan imaypis caycashganta. Yäracoj sirvejnincunataga nin: “Imaypis yanapashayki” (Is. 41:10).

² Canan yachacushun chuscu yanapacuycunata: 1) Jehová pushamanchi, 2) nestashganchicunata camaripämanchi, 3) chapämanchi y 4) shogamanchipis. Payga aunimashganchi imaypis mana gongamänanchipaj y mana jaguimänanchipäpis. Chaymi mana japalanchega caycäshunchu.

JEHOVÁ PUSHAMANCHI

3, 4. ¿Imanotaj Jehová pushamanchi? (Salmo 48:14).

³ (Leiriy Salmo 48:14, TDI). Jehovaga musyanmi quiquilanchipitaga imatapis alchayta mana puedishganchita, chaymi Pay pushamänanchita nestanchi. ¿Imanotaj pushamanchi? Palabran Bibliawanmi yanapämanchi ali cajta decidinanchipaj y ali runa cananchipaj, chaynopa canan wichanpis cushishga canchi y shamoj tiempuchopis imaycamayajpis cawacushun (Sal. 119:105). a Payga yachachimanchi perdunacoj y honrado cananchipaj, jina jucninchi jucninchi shongupita cuyanacunanchipaj (Sal.  37:8; Heb. 13:18; 1 Ped. 1:22). Chaycunata rurar ali tayta, ali mama, ali maja y ali amigo cashun.

⁴ Jehová musyachimanchi Palabran Bibliacho unay sirvejnincunapis noganchino sasa tiempucunapa pasashganpita (1 Cor. 10:13; Sant. 5:17). Paycuna rurashgancunapita yachacuptinchega tantiacunchi manami noganchicunalachu nacashganchita, sinoga achca hermanunchicuna valiente car imayca problemacunata aguantaycan Jehovapa yanapacuyninwan (1 Ped. 5:9). Jina yachacunchipis mana alicunapa pasar cushishgala aguantananchipaj (Rom. 15:4).

5. ¿Pïcunatataj Jehová acrash pushamänanchipaj?

⁵ Jehová hermanunchicunawanpis pushamanchi. b Chaypäga congregaciunta watucamoj hermanunchicuna discursuncunawan yanapämanchi y shacyächimanchi, chaynopa cuyanacur juc shongula cananchipaj (Hech. 15:40–16:5). Ancianucunapis listo caycan jucninchi jucninchita yanapämänanchipaj (1 Ped. 5:2, 3). Jina taytacunapis wamrancunata yachachin Jehovata cuyananpaj, Bibliata estudiananpaj y ali cajta acrananpäpis (Prov. 22:6). Espiritual cajcho pogush hermananchicunapis jipash hermanacunata yanapan ali ejempluncunawan, ali consejuncunawan y ali parlacuyninwanpis shacyächin (Tito 2:3-5).

6. ¿Imata rurashun Jehová pushamänanchipaj?

⁶ Jehová noganchipaj imaycacunata rurash, ali cajta acrananchipaj y cushi cushila cawananchipaj. Yanapacuyninpita y consejuncunapitapis agradecido caycarga, ¿imataraj rurashwan? Proverbios 3:5, 6 (TDI) nin: “Llapan shonguyquipa TAYTA DIOSMAN yäracuy. Quiquiqui yachashayquimanga ama yäracuychu”. ¿Chayga imanotaj yanapämäshun? “Paymi alli caminupa pusharäshunquipaj” nin. Cay textucuna tantiachimanchi pantashganchicunaman mana ishquinanchipaj, chaynopa cushi cushila cawananchipaj. ¡Alapa agradecido caycanchi Jehová cuyamashganchipita y shumaj consejuncunata gomashganchipitapis! (Sal. 32:8).

JEHOVÁ NESTASHGANCHICUNATA CAMARIPÄMANCHI

7. Filipenses 4:19 nishganno, ¿imanotaj Jehová yanapämäshun?

⁷ (Leiriy Filipenses 4:19). Jehovaga manami espiritual cajlatachu camaripämanchi, sinoga nestashganchicunatapis camaripämanchimi: ropanchita, micuyninchita y maycho tiyananchipäpis (Mat. 6:33; 2 Tes. 3:12). Alimi canman nestashganchicunaman yarpänanchipaj, ichanga Jehová mana munanchu chaycunalaman alapa yarpachacunanchipaj (Mat. 6:8, 25; Heb. 13:5). Seguro caycanchi Jehovaga nestashganchicunata manami imaypis pishichimäshunchu, y nishgancunataga imaypis cumplingami.

8. ¿Imanotaj Jehová Davidta yanapargan?

⁸ Yarpäshun David ima pasashganman. Rey Saúl gaticachaptin Davidta y soldaduncunatapis Jehová nestashgancunata camaripargan, chay pasashgancunaman yarpar David cayno nergan: “Wamra kashqäpita awkinyashqäyaq manami imaypis rikashqätsu ali runa muchuqta. Tsaynöpis manami rikashqätsu  wamrankunatapis manapakur puriykaqta” (Sal. 37:25). Öraga ricashcanquichi gamta hermanunchicunatapis Jehová ima nestashgayquitapis camaripäshushgayquita.

9. ¿Imanotaj Jehová yanapan canan wichanpis sirvejnincunata? (Fotucunatapis ricay).

⁹ Jehová yanapan sirvejnincunata desgraciacunapa pasashgan hora. Punta cristianucuna wichancho muchuy captin, tucuy marcacunapita cristianucunaga micuycunata shuntarcur Jerusalencho caj cristianucunapaj apachicorgan (Hech. 11:27-30; Rom. 15:25, 26). Canan wichanpis unaynola Jehovapa testiguncuna desgraciacunapa pasashgancho yanapacuycan jampicunawan, yacuwan, micuycunawan y ropacunawanpis. Jina hermanunchicuna juchushga wasincunata y Saluncunatapis yapay sharcachipäcun, y wasiyniynaj quedajcunata, familian wanupacushgacunatapis Bibliawan shogan y shacyächicun. c

10, 11. ¿Imata yachacunchi Boris runapita?

¹⁰ Jehovaga mana sirvejnincunatapis yanapanmi, y noganchipis calpachacunchi Jehovano paycunata yanapananchipaj (Gál. 6:10). Chayno rurashganchipita runacunapis ali nawilanwan ricamäshun y Jehovapitapis yachacunga. Ucrania naciunpita colegiucho aroj Boris jutiyoj directorpita parlarcushun. Payga mana Testigo caycarpis Testigo alumnuncunata alimi trataj. Guerra galaycuptin chay marcapita juc marcaman  gueshpicurgan, chaypäga hermanunchicuna alimi yanapargan. Tiempuwanna Jesuspa wanuyninta Yarpänapaj reuniunman aywargan. Hermanucuna yanapacushganman yarpar, pay nin: “Testigo hermanucunaga cuyacuywan yanapämargan y cuidamarganpis, chaypita alapami agradecicö”.

¹¹ Lapanchimi Jehovano cuyacuywan yanapacuyta puedinchi mana Testigo runacunatapis (Luc. 6:31, 36). Cuyacuywan paycunata tratashganchipita tiempuwanga capazchi Jehovata sirvir galaycunga noganchicunawan (1 Ped. 2:12). Paycuna Jehovata sirviptinpis mana sirviptinpis yanapacushganchipitaga cushicunchimi, ¿imanir? Hechos 20:35 nin: “Mas kushikuypaqmi kaykan pitapis yanapashqantsi”.

JEHOVÁ CHAPÄMANCHI

12. ¿Imata Jehová sirvejnincunata aunimanchi? (Salmo 91:1, 2, 14).

¹² (Leiriy Salmo 91:1, 2, 14). Jehová sirvejnincunata aunimanchi chapämänanchipaj Paypita mana raquicänanchipaj. Paypa yanapacuyninwan Satanasga manami michamäshunchu Jehová munashganno adurananchipaj (Juan 17:15). Jatun nacay galaycuptin Taytalanchi Jehová tucuynopa sirvejnincunata chapämäshun (Apoc. 7:9, 14).

13. ¿Imanotaj cada ununchita Jehová chapämanchi?

¹³ ¿Imanotaj Jehová sirvejnincunata jucnin jucnintapis chapan? Chaypäga Palabran Bibliata gomashcanchi, ali cajta y mana ali cajta acrananchipaj (Heb. 5:14). Jehovapita yachacushganchita practicaman churaptinchega chapaycanchi paywan amistäninchita y cawayninchitapis (Sal. 91:4). Jina Jehová chapämanchi hermanunchicunawanpis (Is. 32:1, 2). Aumi, Jehovata cuyajcunawan y cäsucojcunawan juntacuptinchi shacyächimäshun y yanapämäshun mana alicunaman mana ishquinanchipaj (Prov. 13:20).

14. 1) ¿Imanirtaj Jehová lapan problemanchicunata ushacächinrächu? 2) ¿Imata aunimanchi Salmo 9:10? (Wilacuytapis ricay).

¹⁴ Jehová unaychoga waquin sirvejnincunata chapargan peligrupita wanuypitapis. Ichanga manami imaypis chayno cangachu, chaymi Biblia nimanchi “runatapis desgracia elaqpita pasan” (Ecl. 9:11, 12). Unay tiempuno canan tiempupis Jehová sirvejnincunata permitiycan imaycanopa nacananpaj, chaynopa musyachicuycan Satanás lula cashganta (Job 2:4-6; Mat. 23:34). Nacachimashganchicunata y problemanchicunata Jehová canan wichan manami alchachinmanchu, ichanga seguro caycanchi payga imaypis jaguimäshunchu (Sal. 9:10). d

JEHOVÁ SHOGAMANCHI

15. ¿Imanotaj Jehová shogamanchi? (2 Corintios 1:3, 4).

¹⁵ (Leiriy 2 Corintios 1:3, 4). Canan tiempuchoga lapanchimi mana alicunapa pasanchi: öraga waganchi, calpaynaj ricacunchi, o alapa laquishga sienticunchi. Capazchi canan hora chaycunapa pasaycanchi, chayraycu japalanchi sienticunchi y ‘pipis tantiamanchu’ nir yarpashwan. Ichanga Taytalanchi Jehová musyanmi imano sienticushganchita y listo caycan shogamänanchipaj.  ¿Imanopataj shogamanchi? Shongupita mañacuptinchi Payga wiyamäshunmi. Chaytami Bibliapis nin: “Paymi shonquykitapis yarpaynikitapis cuidanqa” (Filip. 4:6, 7). Jina Palabran Bibliawanmi yachachimanchi alapa cuyamashganchita y imano ali cawananchipaj, jina shamoj tiempucho ali cawayta tarichimänanchipaj cajta. Hermanunchicunawanpis Jehová shogamanchi, reuniuncho paycunawan caycar Palabran Bibliawan shacyächimanchi y alapa cuyamashganchita musyachimanchi.

16. ¿Imata yachacunqui Nathan y Priscillapita?

¹⁶ Musyananchipäga imano Jehová Palabran Bibliawan shogamashganchita, parlarcushun Estados Unidos naciunpita Nathan y Priscilla hermanunchicunapita. Paycuna decidirgan juc marcaman runacunata yachachej aywananpaj. Chayta ruranapaj yäracärergan Jehová decisiunninta bendicinanpaj cajta, pero mushoj congregaciunman chayaptin gueshyargan y aruytapis tarirganchu. Chayraycu marcanman cutipäcurgan, y chaychopis problemancuna manami ushacarganchu. Nathan nin: “Yarpachacärergä, ¿imanirtaj Jehová mana bendicimashganchichu? Jina yarpargä ‘capazchi mana alita rurashcä’ nir”. Tiempuwanga paycuna cuentata gocärergan Jehová imaypis mana jaguishganta. Nathan caynopis nin: “Chay sasa tiempucunapa pasaycashgä hora Bibliata leipäcuptë Jehová shacyächimargan juc amigo yanapamashgantano. Mana alicunapa pasar yachacärergä problemanchicunalamanga mana yarparanäpaj. Shamoj tiempucunacho ima problemapa pasaptinchipis Jehová yanapämäshunmi”.

17. ¿Imanotaj Helga hermananchita Jehová yanapash? (Fotucunatapis ricay).

¹⁷ Musyashganchinopis Jehová hermanunchicunawan shogamanchi. Canan parlashun Hungría nacion Helga hermananchipita. Payga achca watacunapa  problemacunapa pasar laquishga caycargan, pipis mana cuyashganta yarpargan. Pero cananga chay pasashganman yarpar cuentata gocun Jehová hermanunchicunawan shacyächishganta. Pay nin: “Jehová imaypis yanapaycämashga mana puedishgäcunacho, calpata gomashga gueshyaj wamräta cuidanäpaj y imaycacunachopis arunäpaj. 30 watacunapa Jehová imaypis jaguimashgachu, ricashgämi Pay achca cuti shogaycamashganta. Jehová hermanucunawanpis yanapämashga. ¡Paycuna shacyächimashga cartacunawan, mensajicunawan y ali parlacuynincunawanpis!”.

18. ¿Imanotaj waquincunata shogashun?

¹⁸ Taytalanchi Jehovano noganchipis waquincunata shacyächinchi. Chaycunataga ruranchi paycunata shumaj wiyaptinchi, cuyapaylapa parlapaptinchi y imalachopis yanaparcuptinchi (Prov. 3:27). Manami hermanunchicunalawanchu chayta ruranchi, sinoga Jehovata mana sirvejcunawanpis. Paycuna gueshyaptin, castancuna wanuptin o ima problemacunapa pasaptin watucunchi, shumaj wiyanchi y Bibliawanpis shacyächinchi. Jehovano shogacoj captinchi hermanunchicunata yanapashun problemancunata aguantananpaj, jina Diosta mana reguej runacunatapis yanapashun Diospita yachacunanpaj (Mat. 5:16).

JEHOVAGA IMAYPIS CACHAMÄSHUNCHU

19. ¿Imata ruran Jehová noganchipaj, y pay rurashganno imatataj rurashwan?

¹⁹ Jehovaga sirvejnincunata shongupita pasaypami cuyan, chaymi problemacunapa pasaptinchi manami payga imaypis cachamäshunchu. Juc cuyacoj taytano cuidamanchi y cuyamanchipis; jina pushamanchi, nestashganchicunata camaripämanchi, chapämanchi y shogamanchipis. Noganchipis Pay rurashganno pruebacunapa pasajcunata yanapashun, shacyächishun y shogashun. Ima problemacunapa pasaptinchipis Jehovaga imaypis noganchiwan caycanga, chaymi quiquinmi cayno aunimanchi: “Qamkunawan kaykaptïqa ama mantsakäriytsu” (Is. 41:10). ¡Jehovaga manami imaypis jaguimäshunchu, y chayta musyar alapa cushicunchimi!