1. ¿Imanirtaj Taytanta Jesús ruwacurgan gatejnincunata chapänanpaj?

WANUNANPAJ ichicla pishiycaptinmi, Jesusga alapa yarpachacurgan gatejnincunapaj, paycunata cuyashpanmi Taytanta ruwacurgan Satanaspita chapänanpaj (Juan 17:14, 15). Jesusga musyarganmi Diosta sirvejnincunata Satanás alapa chiquinganta. Chayno captinga manachi japalanchiga Satanaswan luchayta puedishwanchu.

2. ¿Imanirtaj mañacushganchicunata Jehová wiyamäshun?

² Jehovaga churin Jesusta alapa cuyaj, chaymi ruwacamushganta wiyargan. Noganchitapis cuyapämashpanchimi Diablupita chapämänanchipaj ruwacushganchita wiyamäshun. Jehovaga amatar cuyacoj car jucninchi jucninchita cuyamanchi. Chaytaga ruran jutinraycur y awnicushgancunaraycurmi.

3. ¿Imacunapitataj Jehová chapaycamänanchitataj munanchi?

³ Cay Pachacho Satanás rabiash puricachaycaptenga imaypitapis cananmi Diosta ruwacushwan yanapämänanchipaj (Apoc. 12:12). Diabluga jucnopami runacunata tantiachish, paycunaga ‘Tayta Diospa alita ruraycanchi’ nir, rasunpa cristianucunata chiquir gaticachan (Juan 16:2). Waquincunana chiquimanchi cay mundo rurashganta mana ruraptinchi. Imano captinpis noganchicunaga manami manchacurlachu cawacunchi. Biblia cayno nin: ‘Tayta Diosninchëga imaypis yanapaycäshunqui [...]. Ricaycäshunqui imatapis Satanás mana rurashunayquipaj’ (2 Tes. 3:3). Imano chapämashganchipita ishcaylata ricarishun.

4. Chapämänanchipäga, ¿imatataj Jehová gomashcanchi Efesios 6:13-17 wilacushganno?

⁴ Diabluta mana ricaycarpis paywan luchaycanchimi, chaymi Jehovaga juc soldadutano imaycata gomanchi (leiriy Efesios 6:13-17). Juc soldado guerraman jinayla aywarga wanurpis wanunmanmi, chaynola noganchicunapis guerra japuyno caycarga Jehová imayca gomashganchicunata jaguirishwanchu. Juc soldado apashganno, ¿imatataj Jehová gomashcanchi?

5. ¿Imapitataj Biblia parlaycan juc soldadupa wachcunpita parlarga y imanirtaj noganchicunapis apashwan?

⁵ Soldadupa wachcunpaj Biblia parlarga rasunpa caj yachachicuynincunapämi parlaycan. ¿Imanirtaj juc soldaduno ali wachcushga caycashwan? Satanás pasaypa lulacoj captinmi (Juan 8:44). Payga más unay caj lulacojmi, canan wichanpis maychicaj runacunata engañarmi juc caminupa apaycan (Apoc. 12:9). Bibliacho yachacushganchicunaga lulacojcunapitami chapämäshun. ¿Imata rurartaj ali wachcushga soldaduno caycäshun? Jehovapita rasunpa cajta yachacurmi, paylata adurarmi y imatapis lutanta mana rurarmi (Juan 4:24; Efes. 4:25; Heb. 13:18).

6. Juc soldadupa chalecunpaj Biblia parlarga, ¿imapätaj parlaycan, y imanirtaj jaticushwan?

⁶ Soldadupa chalecunpaj Biblia parlarga Jehovapa mandamientuncunapämi parlaycan. ¿Imanirtaj jaticushwan noganchicunapis?, imanomi juc soldado guerraman aywananpäga chalecuntaraj apaj pechunta y wajtanta cuidananpaj, chaynolami Jehovapa mandamientuncunata shumaj wiyacorga shongunchicho yarpashganchicunami chapashga canga (Prov. 4:23). Jehovaga munan paylata sirvinanchita y shongunchipis paylapaj cananpämi (Mat. 22:36, 37). Satanasga imaypis munanga shongunchi mana alicunata yarpanantami, Dios chiquinganta ruranapämi munanga (Sant. 4:4; 1 Juan 2:15, 16). Canan hora Diosta casucuycashpanchipis, payga imaycatami ruranga imalachopis ishquinapaj.

7. ¿Imata rurartaj chalecunchi jaticushgano cawacunchi?

⁷ Dios nimashganchicunataga lapantami chasquicunchi chaynopami chay chalecuta ali jaticushga japuy caycäshun (Sal. 97:10). Öraga waquin runacuna nipäcunman ‘Diospa mandamientuncunata casucurga mananami munacushgäta ruracushächu’; noganchicuna ichanga Diospa mandamientuncunata casucunchi. ¿Imaraj canman chalecuyniynaj juc soldado guerraman aywaptin?, wanurpis wanunmanmi. O guerrachona caycarga ‘chaleco lasaycan’ ¿nirchuraj jorgurir jitarinman? Manami. Chaynola noganchicunapäpis Diospa mandatuncunaga manami cawayninchichoga sasa o aja canmanchu ruranapaj (1 Juan 5:3).

8. Juc soldadupa llanguinpa parlarga, ¿imata ruranapätaj yarpächimanchi?

⁸ Juc soldadupa llanguinpaj Pablo yachachicorga, ¿imapätaj parlaycargan? Parlaycargan Diospa Gobiernunpita yachachicunapämi. Bibliapita pï maytapis yachachicorga quiquinchipaj yaracuyninchipis sinchiyanmi. Cushicuypämi, may chaycho caycarpis Jehovapa testiguncunaga ali wilacuyta apaycanchi. Mayna yachachicuycanchi trabajunchicho, waquincunaga escuelancho, mana testigo caj familiancunata, mercaducunacho, puncun puncun aywar, rantipacoj aywar, vecinuncunata o wasinpita yarguyta mana puedirga  telefunulapa yachachicärin. Runacunata manchacurla mana yachachicorga mana alichi canman, chayga canman cay soldaduno: ¿imaraj canman guerracho cashgan hora llanguinta jorgucuptin?, cashatapis jarurinmanmi, caypa wacpa puriytapis puedinmanchu, capitannin mandashgantapis casucuyta puedinmannachu.

9. Yaracuyninchi escudo japuy caycaptenga, ¿imanirtaj may chaypa aywarpis mana jaguirishwanchu?

⁹ Bibliacho jatun escudupa parlarga Jehovaman yaracunanchipämi parlaycan. Noganchicunaga yaracunchi Dios ima awnicushgancunata apamunanpämi. Jina cay yaracuyninchimi “chapämanchi dyablu mana allicunaman chayachimänanchïta”. May chaypa aywarpis escudunchi aptarashga purishwan, chaymi chapämäshun contranchicho caycajcunapita y apóstatas nishgancunapitapis. Ali yaracoj carmi waquincunatapis cayno nishun ‘nogaga Diosnï mandamashgantami imaypis casucushaj’ nir (1 Ped. 3:15). Chayta rurashpanchiga yaracuyninchiga chapaycämäshunmi. Ichanga pilapis mayna niycamanchi ‘nogalapaj aruy, masta pagashayqui’, chayno captinga ali yaracushganchiga yanapämäshun ali cajta acranapaj (Heb. 13:5, 6). Pipis Diosman  yaracushganchiraycur chiquimashwanmi, chayno captinpis Diosninchipitaga mana imapis raquimashwanchu (1 Tes. 2:2).

10. ¿Imatataj tantianchi soldadupa cascunpaj Biblia parlaptin, y imanirtaj jaticushgala purishwan?

¹⁰ Soldadupa cascunpaj parlarga tantiaycächimanchi shamoj tiempucho imata chasquinapämi, cananlapitanami chayta shuyaraycanchi (1 Tes. 5:8; 1 Tim. 4:10; Tito 1:1, 2). Imanomi juc soldado salvashga cananpaj cascushgaraj canman, chaynolami chasquinapaj cajta shuyarashganchiga yanapämäshun ali yarpayniyoj canapaj. ¿Imanotaj yanapämanchi ali yarpayniyoj runa canapaj? Jucta jucta yarpachacunapaj trucanga, Diosninchi awnicushganlaman yarpachacurmi. Imayca mana alicuna pasashgancunaman mana yarpachacurpis, ¿imanotaj juc soldadunopis ali cascushga caycashwan?, Jehová mañamashganchita rurarmi, y Jehovaga mañamanchi ushacaj riquezacunalaman yaracunapaj trucanga paylaman yaracunanchitami (Sal. 26:2; 104:34; 1 Tim. 6:17).

11. ¿Imatataj tantianchi espadapaj parlarga, y imanirtaj aptarashgala cawashwan?

¹¹ Juc espadapa Biblia parlarga, Diospa Palabranpämi parlaycan. Caywanmi pipis Diosta reguinanpäga cuentata gocunga maygantaj rasunpa caj yachachicuycuna y maygantaj luta caj yachachicuycuna, Bibliapis yanapacunmi pipis mana alicunata jaguinanpaj (2 Cor. 10:4, 5; 2 Tim. 3:16, 17; Heb. 4:12). Diospa Palabranpitaga shumaj yachachicushun, quiquinchicunaraj cutin cutin leipärir leipärir tantiarcuptinchi y encargado hermanucuna yachachicamushganta casucurpis (2 Tim. 2:15). Pero manami cay lapan nishganchicunalawanchu Jehovaga yanapämanchi, masraj caycan. Ricarishun.

12. ¿Pïcunataj yanapämäshun, y imanir?

¹² Guerrachoga manami juclaylachu gananga contrancho caycaptin chaychicaj soldaducuna. Chay japuyla noganchicunapa contranchichopis caycan cay mundo y gobernantin Diablupis, vencinapäga ladu ladu mana raquicaypa caycashwan hermanunchicunawan. Paycunaga yanapämäshunmi, Jehovami goycalämashcanchi paycunata (1 Ped. 2:17).

13. ¿Imanotaj reuniuncuna yanapämanchi Hebreos 10:24, 25 textucuna nishganno?

¹³ Reuniunman aywarmi hermanunchicunaga yanapaycalämanchi (leiriy Hebreos 10:24, 25). Imapitapis laquicuycar imarga, reuniunchoga shacyächinacunchimi. Reuniunchoga wiyanchi waquincuna comentamushganta, discursamushganta, demostraciunnin ruramushganta y cay lapancunami calpata gomanchi Jehovata sirvir caycänapaj. Reunión manaraj galaycuptin hermanunchicunawan cushi cushila parlapacurishganchipis yanapämäshunmi (1 Tes. 5:14). Juntacashga caycarga quiquinchipis yanapanchimi waquincunata (Hech. 20:35; Rom. 1:11, 12). Mana chaylachu, reuniuncunaga ali yachachicoj canapaj yanapämanchi, imayca yanapacuycuna caycan chaypäga. Chauras, alapa ali canga reuniuncunaman manaraj aywar nawpalapitana yachacunapaj cajta leipaptinchi o reuniunchona caycar mayaj mayajla caycaptinchi. Cay lapanta rurarga, “juc alli suldäru imano ñacarpis awantashanno” caycäshun (2 Tim. 2:3).

14. ¿Pïcuna mastaj noganchicunawan caycan?

¹⁴ Mayraj yanapämashwan juc angil-lapis noganchicunawan caycaptenga, pero Bibliaga wilacun yupaytapis mana atipaypaj chaychicaj angelcuna noganchicunawan  caycashganta (Is. 37:36). Manami runacunapis, supaycunapis Jehovapa tropancunapa jananninpa canmanchu. Awmi, maychicaj contranchicho caycaptinpis, Jehovawan caycarga manami vencimäshunchu (Juec. 6:16). Trabajunchichopis o escuelanchichopis pipis chiquimashwanmi o mana testigo caj familianchipis rabiashpanmi ashlimashwan. Pero ama gongashunchu Jehová pushaycämashganchita, paypa mandätunchomi caycanchi.

15. Isaías 54:15, 17 textucuna nishganno, ¿imanirtaj pipis upälachimäshunchu?

¹⁵ Cay munduwan mana talucashganchiraycur y guerracunaman mana aywashganchiraycurmi Diospa contrancho caycajcunaga chiquiycämäshun, pero Diabluga manami imaypis upälachimäshunchu. Diospa jutinpitaga yachachicur caycäshunmi, Gobiernun ali cawayta apamunanpaj cajpitapis parlaycäshunmi; y cay mundo lulacoj y wanuchicoj Diablupa maquincho caycashgantapis parlaycäshunmi (Juan 8:44). Y mana chaylachu, cay mundo ushacänanpäna caycashgantapis pï mayta wilapaycäshunmi. Awmi, Taytalanchi Jehovapitaga mana imapis raquichimäshunchu. Canancamaga imaycatami Diablo rurashga, chayno captinpis Diospa ali wilacuyninga may chaymanmi chayashga y imayca alicunapis ruracaycämun Jehová chapaycämashganchiraycurmi (leiriy Isaías 54:15, 17).

16. ¿Imanotaj Jehová yanapaycämäshun Jatun nacanapaj tiempo chayaramuptin?

¹⁶ ¿Imataj pasananpäna caycan? Jatun nacay tiempo chayaramuptinga Jehovaga yanapaycämäshunmi. Nawpataga, salvaycalämäshun politicocuna Jatuncaray Babiloniata ushacächishgan wichanmi (Apoc. 17:16-18; 18:2, 4). Nircurpis, Taytalanchi Diosga salvaycalämäshun Armagedón nishgan guerra pashtaycamuptinmi. Chay wichanga lapan chiquimajninchicuna ushacanga (Apoc. 7:9, 10; 16:14, 16).

17. ¿Imanirtaj Jehovapitaga mana imaypis raquicashwanchu?

¹⁷ Jehovapita mana imaypis raquicarga manami ishquishunchu Diablupa maquincho. Awmi, musyanchimi quiquin Diablo ichiclachona ushacashga cananpaj (Rom. 16:20). Juc soldado imaycancunata apacurcur guerraman aywajno caycäshun, ama jaguirishunchu. Cristiano masinchicunapitapis ama raquicäshunchu y Jehovapa mandätuncho caycäshun. Chayno captinga, Jehovaga calpalanta goycalämäshun y imaypis chapämäshunmi (Is. 41:10).