1. Jehovapa testiguncunala, ¿imata rurapäcun?

 JEHOVAPA testiguncunalami ganas ganaslawan runacunata yachachinchi, chaytaga lutan religiuncuna manami ruranchu (Tito 2:14). Chayno captinpis öraga predicaciunman yargunapaj capaz ni ganasninchipis cangachu. Chaypita juc ali anciano cayno nin: “Ayvecisga predicanäpaj yargushgä hora ganasnëpis carganchu”. Noganchipis öraga payno sienticushwan.

2. ¿Imanirtaj öraga ganasninchipis canchu predicanapaj?

² Cushi cushila predicaciunman yarguyta munarpis capazchi jucnopapis Diosta sirviyta munashwanmi. ¿Imanir? Saluncunata sharcachiycho aruptinchi, hermanucunata shacyächinchi o imalachopis yanapaycunchi. Ima aruyninchipis manami yangalapächu caycan. Jina hermanunchicunawanpis juntula arur jucninchi jucninchipis shacyächinacunchi. Waquincuna rurashganchita valuraptin alapa cushichimanchi. Pero predicaciunchoga cutin cutin predicaptinchipis waquin runacuna wiyamanchichu, hasta waquin runacunapis ashlipar gayapämanchi. Último tiempucho cawaycashganchita musyar runacunaga masmi chiquimäshun (Mat. 10:22). Sasa o aja captinpis, ¿imacunata yanapämäshun runacunata Bibliapita ganas ganaslawan yachachinapaj?

3. ¿Imata yachacunchi Lucas 13:6-9 Jesús wilacushganpita?

³ Ganas ganaslawan Bibliapita runacunata yachachinapaj Jesús rurashganpita yachacushun. Payga runacunata yachachir manami guelanacurganchu sinoga más ganas ganaslawan runacunata yachachergan (leiriy Lucas 13:6-9). Jesús juc runapita wilacurgan, payshi yöranta quimsa watacunano uryarpis wayuynin carganchu. Chaynolami Jesús quimsa watacunano judío runacunata yachachergan y walca runacunalami discipuluncunaman ticrash. Jina Jesús nergan chay  runashi mana guelanar shuyarargan yörapa wayuynin yurimunancama. Chayno Jesuspis manami guelanacurganchu sinoga calpachacurgan runacunata yachachir shongunman chayananpaj.

4. ¿Imata yachacushun Jesús rurashganpita?

⁴ Jesús sojta quillacunano wanunanpäna caycaptin más ganas ganaslawan runacunata yachachergan (Lucas 10:1). Canan yachacushun imacunata Jesús rurargan: 1) Diospa voluntäninta puntaman churargan, 2) Bibliapa profeciancuna cumplicushganta tantiar cawargan, 3) Jehovaman yäracurgan runacunata yanapänanpaj y 4) payga musyargan waquin runacuna Diospita yachacuyta munapäcunanpaj cajta.

DIOSPA VOLUNTÄNINTA PUNTAMAN CHURARGAN

5. ¿Imata rurartaj Jesús Taytanpa voluntäninta rurargan?

⁵ Taytanpa voluntäninta musyar waquin marcacunachopis Jesús ganas ganaslawan Diospa wilacuyninta wilacurgan (Luc. 4:43). Jesuspäga runacunata Diospita yachachinanpaj más importante aruy cargan, chaymi payga ‘markakunapa y jalqakunapapis yachatsir pasarqan’ (Luc. 13:22). Jina waquin discipuluncunatapis yachachergan marcan marcan aywar runacunata Diospita yachachinanpaj, pay rurashganno rurapäcunanpaj (Luc. 10:1).

6. Jehovapa marcancho imalachopis aruptinchi, ¿imanotaj runacunata yanapaycanchi Diospita yachacunanpaj? (Fotucunatapis ricay).

⁶ Canan wichanpis Jehová y Jesús munapäcun Diospa ali wilacuyninta may chaycho runacunata yachachinanchipaj (Mat. 24:14; 28:19, 20). Jehovapa marcancho imalachopis aruptinchi runacunata yanapaycanchi Diospita yachacunanpaj. Saluncunata sharcachinchi runacuna Bibliapita yachacur chaycho Jehovata alabapäcunanpaj. Betelchopis arur o waquin localcunachopis aruptinchi runacunata yanapaycanchi Diospita yachacunanpaj. Y ima desgraciacunapa pasashgan hermanucunata nestashgancho yanapaycunchi, paycuna yapay reuniuncunaman aywapäcunanpaj y predicapäcunanpajpis. Pero ama gongashunchu ima aruywanpis predicaciuntaga trucachishwanchu, chayno yarparga yanapämäshun más  ganas ganaslawan predicananchipaj. Hungría naciunpita juc anciano János jutiyoj nin: “Cutin cutinmi yarpä predicaciunga manami ima aruywanpis tincunchu. Diospita wilacunäpaj imapitapis más importantimi caycan”.

7. ¿Imanirtaj Jehová munaycan jinala runacunata Bibliapita yachachinanchipaj?

⁷ Jehová munan tucuy runacuna ali wilacuyninpita yachacunanpaj, chayman yarpaptinchi yanapämäshun más cushi cushila predicananchipaj (leiriy 1 Timoteo 2:3, 4). Diospa wilacuyninpita yachacur runacunaga salvacäringami, chaymi Jehová yachachimanchi ali yachachicoj cananchipaj. Cuyashpanchimi yachachicunchi nej folleto yanapämanchi imano runacunata Bibliapita yachachinanchipaj y wiyaycajcuna Diospa wilacuyninta chasquicur bautizacärinanpaj. Canan tiempucho Diospa wilacuyninta yachachiptinchi runacuna mana chasquirpis capaz tiempuwan chasquipäcunmanmi, chayno mana captenga nacay wichancho chasquipäcunmanpis. Chaymi jinala runacunata yachachishwan.

BIBLIAPA PROFECIANCUNA CUMPLICUSHGANTA TANTIAR CAWARGAN

8. Bibliapa profeciancuna cumplicunanpaj cajta musyar, ¿imanopataj Jesusta yanapargan?

⁸ Jesusga musyargan Bibliapa profeciancuna imano cumplicunanpaj cajta, chaymi tantiargan quimsa wata y sojta quillacunala tiempun cashganta runacunata yachachinanpaj (Dan. 9:26, 27). Musyarganpis Diospa palabrancho guelgarashgana caycashganta imay y imano wanunanpaj cajta (Luc. 18:31-34). Bibliapa wilacuynincuna imano cumplicänanpaj musyar Jesusta yanapargan Diosta cäsucur runacunata yachachinanpaj.

9. Bibliapa profeciancunata shumaj tantiarga, ¿imanotaj yanapämanchi cushishgala predicananchipaj?

⁹ Bibliapa profeciancuna cumplicuycashganta tantiar noganchitapis yanapämanchi ganas ganaslawan runacunata yachachinanchipaj. Último tiempucho Biblia nishgannopis cawaycanchi, chaymi ricaycanchi runacuna más peor caycashganta. Y tantiaycanchipis Bibliapa profecian imano cumplicuycashganta sur caj rey (Reino Unido y Estados Unidos) norte caj reywan (Rusia yanagajnincunawan) chiquinacärishganta (Dan. 11:40). Jina Daniel 2:43-45 textupita tantianchi monumentupa chaquincuna mitupita rurashga parlaycämun Reino Unido y Estados Unidos naciuncunapaj. Cay profeciapita masta yachacuptinchi yanapämäshun ali tantiananchipaj walca tiempulacho Jehovapa Gobiernun chipyaypa ushacächenga runacunapa gobiernuncunata. Cay lapan profeciacuna tantiachimanchi ushacaj tiempulachona cawaycashganchita, chaymi tiempunchita shumaj provechashwan ganas ganaslawan runacunata Bibliapita yachachinanchipaj.

10. ¿Imanopataj Bibliapa profeciancuna yanapämanchi ganas ganaslawan runacunata yachachinapaj?

¹⁰ Bibliapa wilacuynincuna shamoj tiempupaj cumplicunanpaj cajta musyar runacunata yachachiyta munanchi. República Dominicana naciunpita Carrie cristianaga cayno nin: “Shamoj tiempupaj Jehovapa shumaj aunicuynincunaman yarparga waquin runacunata yachachiyta munä. Y runacunata nacashganta ricar yarpä paycunapajpis Diospa aunicuynincuna caycan manami nogalapächu”. Bibliapa profeciancuna cumplicushganta yarpächimanchi Jehová noganchiwan caycashganta. Jehová munan lapan runacuna paypita yachacunanpaj. Hungría naciuncho tiyaj Leila hermananchi cayno nin: “Isaías 11:6-9 texto yachachiman sasa captinpis pï runatapis Jehová yanapanga caway vidanta cambiananpaj, chaymi pï runapis mana wiyayta munaptin jinala yachachinäpaj”. Zambia naciunpita Christopher hermanupis cayno nin:  “Marcos 13:10, texto canan wichan cumplicuycan, entero Pachacho runacuna Diospa ali wilacuycunapita yachacuycan, chaypita nogapis cushicö cay profecía cumplicunanpaj runacunata Bibliapita yachachiptë”. Y gamtaga, ¿maygan Bibliapa profeciancuna yanapäshunqui ganas ganaslawan runacunata yachachinayquipaj?

JEHOVAMAN YÄRACURGAN RUNACUNATA YANAPÄNANPAJ

11. ¿Imanirtaj Jesús Jehovaman yäracunan cargan mana jaguiypa runacunata yachachinanpaj? (Lucas 12:49, 53).

¹¹ Jesús runacunata cuyacuywan yachachirpis musyargan ashlipananpaj y chiquinanpajpis. Pero pay yäracurgan Taytan Jehová yanapänanpaj cajta chayraycu jinala runacunata yachachergan (leiriy Lucas 12:49, 53). Jina religioso runacunapis predicashganraycu chiquir wanuchiyta munapäcurgan (Juan 8:59; 10:31, 39). Chayno captinpis, Jesús yachachiyta jaguirganchu. Payga musyargan taytan Jehová paywan caycashganta, chaymi cayno nergan: ‘Kachamaqnï Taytä noqawan imaypis kaptinmi [...] rasun kaqlata niykä’ (Juan 8:16). Caynopis nergan: “Kachamaqnïqa imaypis noqawanmi kaykan. Pay munashqalanta imaypis ruraptïmi kikilätaqa mana kachaykamantsu” (Juan 8:29).

12. ¿Imanotaj Jesús discipuluncunata yachachergan michäcuptinpis jinala predicananpaj?

¹² Jesús musyargan discipuluncunapis gaticachashga cananpaj, chayraycu yarpächergan Jehovaman yäracärinanpaj y yanapänanpaj cajtapis. Cutin cutin discipuluncunata nergan paycunawan Jehová caycänanpaj (Mat. 10:18-20; Luc. 12:11, 12). Jina nergan alcäbula caycänanpaj (Mat. 10:16; Luc. 10:3). Y yachacherganpis pipis wilacuyta wiyayta mana munaptin mana obligananpaj cajta (Luc. 10:10, 11). Consejarganpis gaticachashga caycaptin gueshpir aywacärinanpaj (Mat. 10:23). Jesús Jehovaman yäracurgan y cushi cushila predicargan chayno captinpis cawayninta peligruman churarganchu (Juan 11:53, 54).

13. ¿Imanirtaj seguro caycanqui Jehová yanapäshunayquipaj?

¹³ Canan wichanpis Jehovapa sirvejnincuna predicanapaj michämaptinchi necesitanchi Jehová yanapämänanchipaj, chayno jinala cushishga runacunata yachachinanchipaj (Apoc. 12:17). Seguro caycanchi jucninchi jucninchita Jehová yanapämänanchipaj cajta. ¿Imanir? Juan 17 caj capitulucho Jesús  Taytanta mañacurgan discipuluncunata yanapänanpaj y Jehová wiyarganmi. Hechos librucho wilacun Jesuspa discipuluncuna gaticachashga caycaptin imano Jehová yanapargan jinala runacunata yachachinanpaj. Jesús Taytanta mañacurgan discipuluncuna wilacärishganta chasquiycur runacunatapis Jehová yanapänanpaj, chaymi seguro caycanchi noganchipajpis mañacushganta. Chauraga Jesuspa gatejnincunata yanapashganno Jehová noganchitapis yanapämäshun (Juan 17:11, 15, 20).

14. ¿Imanirtaj seguro caycanchi sasa tiempuchopis jinala predicayta puedishganchita? (Fotutapis ricay).

¹⁴ Nacay tiempo manaraj chayamuptin sasachi canga predicanapaj. Chayno captinpis, quiquin Jesusmi nimashganchi yanapämänanchipaj (Luc. 21:12-15). Jesús y gatejnincuna rurashganno noganchipis pï runa wiyayta mana munaptin manami obligashunchu ni piwanpis rimanacushunchu. Waquin marcacunacho autoridäcuna michäcuptinpis hermanunchicuna quiquilanman manami yäracärinchu, sinoga Jehovaman yäracur mana manchacuypa predicarcaycan. Naupa caj cristianucunata yanapashganno canan tiempuchopis Jehová ali wilacuyninta wilacunanchipaj yanapämanchi, pay munashgancama predicaycäshun (2 Tim. 4:17). Chauraga ama gongashunchu, Jehovaman yäracuptinchi mana jaguiypa ganas ganaslawan predicaycäshun.

MUSYARGAN WAQUIN RUNACUNA DIOSPITA YACHACUYTA MUNASHGANTA

15. ¿Imata Jesús runacunapita yarpargan ganas ganaslawan yachachinanpaj?

¹⁵ Jesús musyarganmi waquin runacuna Diospita yachacuyta munashganta, chaymi ganas ganaslawan runacunata Diospa ali wilacuyninta yachachergan. Jesús shamushganpita 30 watacho ushariptinna, pay nergan chacracho micuycuna shuntanapaj caycashganno, achca runacuna caycargan Bibliapita yachacunanpaj (Juan 4:35). Juc watano pasariptinmi, Jesús discipuluncunata nergan: ‘Cosëcha shuntaypaq kaykaqnömi tsaytsika runakuna kaykashganta’ (Mat. 9:37, 38). Nircurpis caytami nergan: “Walkaqlami wilakuqkuna karkaykan. Tayta Diosta manakäriy wilakuqkunata kachananpaq” (Luc. 10:2). Jesús musyarganmi waquin runacuna Diospa ali wilacuyninta chasquinanpaj  cajta, chaymi pilapis wiyaptin alapa cushicoj (Luc. 10:21).

16. ¿Ima tincuchicuycunawan Jesús discipuluncunata yachachergan mana guelanaypa runacunata yachachinanpaj? (Lucas 13:18-21; fotutapis ricay).

¹⁶ Jesús discipuluncunata yachachergan mana guelanaypa runacunata yachachinanpaj. Canan yachacushun ishcay tincuchicuycunapita (leiriy Lucas 13:18-21). Jesusmi tincuchergan Diospa ali wilacuynin ichichaj muruno caycashganta. Chayno yachachergan achca runacuna Diospa wilacuyninta chasquinanpaj imapis michanmanchu. Jinamanpis tincuchergan Diospa ali wilacuynin levadurano caycashganta. Cay tincuchicuywan tantiachergan ali wilacuycuna may chaycho marcacunaman chayananpaj y tucuy runacuna Diospita yachacur cawaynincho cambiucunata rurananpaj, waquincuna mana cuentata gocäriptinpis. Chayno Jesús discipuluncunata yachachergan tucuy runacuna Diospita yachacuyta munashganta.

17. ¿Imanirtaj mana yamacaypa predicashwan?

¹⁷ Diospa ali wilacuynin imano achca runacunata yanapaycashganta yarpaptinchi, noganchipis mana yamacaypa runacunata yachachiyta munanchi. Cada wata Conmemoraciunman chaychica runacuna aywapäcun y noganchiwan Bibliapita yachacurcaycan. Chaychicaj runacunapis noganchiwan predicarcaycan y waquincuna bautizacurcaycan. Manami musyanchichu ayca runacuna ali wilacuycunata wiyananpaj pishiycashganta. Pero musyanchimi mana atipaypaj chaychica runacunata Jehová shuntaycashganta. Paycuna jatun nacay tiempo pasariptin mushoj pachacho cawapäcunga (Apoc. 7:9, 14). Predicaciunta pushaj Jehovami ricaycan maychicaj runacunaraj wilacuyninta chasquinanpaj cajta. Chaymi jinala Bibliapita yachachishun.

18. Rasunpa cristianucunaga, ¿imanotaj runacunata yachachinchi?

¹⁸ Rasunpa caj cristianucunaga Jesús nishganno cushi cushila runacunata yachachinchi. Chaymi naupa caj cristianucunata ganas ganaslawan y valurwan predicashganta ricar, chay wichan runacuna tantiyapäcurgan paycuna “Jesúspa discïpulunkuna kashqanta” (Hech. 4:13). Noganchipis ganas ganaslawan Diospita yachachiptinchi runacuna cuentata gocärin Jesús yachachicushganno yachachicuycashganchita.