3 CAJ YACHACUY
Bibliapa ali wilakuyninga, ¿Diospitaku shamun?
1. ¿Pitaj Bibliata escribichishga?
Patsacho mana wanuypa kawanapaj ali wilakuyga Bibliachömi kaykan (Salmo 37:29). Dios akrashgan 40 runakunanömi 66 librukunata escribiyashga, chay lapanmi Bibliacho kaykan. Galanan kaj pichga librukunataga Moisesmi escribirgan pasashgan 3.500 watakunachönöna, y último kajtanami 1.900 watakunachönöna apóstol Juan escribirgan. Bibliacho kaykaj yachachikuykunaga Diospitami shamun. Espíritu santunwanmi yanapargan Bibliata escribiyänampaj (2 Samuel 23:2). Chaymi kay runakunaga Diospa yarpaylanta escribiyargan, manami kikinkunapataga. Chaurasga, Bibliata escribichejga Jehovami. Lei 2 Timoteo 3:16 y 2 Pedro 1:20, 21.
Cay videuta ricäriy: ¿Pitaj Bibliata escribichishga?
2. ¿Imanirtaj Biblia ninganman confiakushwan?
Bibliata Diosninchi escribichishga kaptinmi. Y chayga rasumpami, porque ima pasanampaj kajta wilakunganga lapanmi cumplikan, y chaytaga ¿pipis ruranmanku? Manami (Josué 23:14). Lapanta puedej Dioslami chaytaga ruran. Lei Isaías 42:9 y 46:10.
Kikin Diospita shamoj libruga manami imawampis igualanchu. Bibliataga tukuy idiumakunachömi maychikajta jorgakämushga. Unay libro karpis kanan wichan cientificukuna niyanganwanga igualanmi. Jina 40 runakunano escribishga karpis manami contranakuyanchu. * Entero Bibliachömi Diospa kuyakuynin rikakun, jina kanan wichampis runakunapa kawayninta cambiayta puedinmi. Chaymi maychikaj runakuna niyan Bibliaga Diospa Palabran kanganta. Lei 1 Tesalonicenses 2:13.
Cay videuta ricäriy: ¿Imanirtaj yaracushwan rasumpa cajta Biblia nishganman?
3. ¿Imapitataj yachachikun Biblia?
Runakunapa imayka alikunata Dios munangantami Bibliaga wilakamun. ¡Chayga alapa shumajmi! Jina wilapämanchimi Adanwan Eva shumaj huertacho kawayta imanir ograyanganta y imano yapay Diosninchi alchanampaj kajta. Lei Apocalipsis 21:4, 5.
Diosninchipa Palabranchömi leykuna, tantiachikuykuna y consejukuna kan. Jina wilakunmi runakunata Diosninchi imano tratanganta, chaynöpa Payta más reguinapaj y imano kanganta musyanapaj. Manami chaylachu, yachachimanchimi amigun imano kananchipajpis. Lei Salmo 19:7, 11; Santiago 2:23, y 4:8.
4. ¿Imataj yanapämashwan Bibliata más entiendinapaj?
Bibliata entiendichikunanraykurmi Jesusga versiculukunata liej y nirkur yachachej ima ninan kanganta. Chaynölami kay folletupis yanapämashun Biblia yachachikunganta alej claro entiendinapaj. Lei Lucas 24:27, 45.
Diospa ali wilakuynin kushichishunaykipaj kajpitaga segurumi kaykäyä. Chayno kaptimpis, wakinkunataga manami gustayanchu, hasta rabiakuyanmi chaypita parlapashgaga. Pero ama casupaychu. Porque Biblia nishgannöpis, Diospita yachakojkunaga mana wanuypa kawaytami chaskiyanga. Lei Juan 17:3.
^ par. 3 La Biblia... ¿la Palabra de Dios, o palabra del hombre? nishgan libruta leiriy.
