42 CAJ YACHACUY
¿Ima nintaj Biblia solterucunapaj y casaducunapaj?
Waquin marcacunachoga runacuna nipäcun cushishga cawacunapäga pipis casacunmanraj. Pero cay caway vidachoga casado caycarpis o soltero caycarpis öraga imalapitapis laquicunchi. Imano captinpis, soltero o casado caypaj parlarmi Bibliaga nin juc regalo japuy cashganta.
1. ¿Ima alicunataj caycan pipis soltero captin?
Bibliaga ninmi warmita “ashirpis allitami ruraycan. Ichanga mas allimi canman japalla goyäcuptin” (leiriy 1 Corintios 7:32, 33, 38). ¿Ima ninantaj mana casacuptin “allimi canman” nerga? Soltero cristianucunaga manami yarpachacärinchu ‘imanoraj majäta atiendishaj’ nir; tiempuncunataga imapäpis camacächinmi. Diosta masla sirvinanraycurpis mayna juc marcacunapa aywacärin. Chayno imaycata rurapäcushganwanmi Jehovata cushichipäcun.
2. ¿Ima alicunatataj tarin pipis casacuriptin?
Casaducunapis bendiciuncunatami tarin caway vidancunacho. Bibliaga ninmi “jucnayllapitaga ishcaj caymi mas alli” (Eclesiastés 4:9). Rasunpami chayga, y masraj Diosta cäsucäriptenga. Autoridäcunaman aywaycur casacojcuna auninacärin cuyanacärinanpaj, respetanacärinanpaj y waylupänacur cawapäcunanpaj. Ichanga mana casado caycar cawajcunaga öraga raquicaymanpis chayapäcunmi. Casaducunaga wamrancunata alimi ashmapäcun.
3. ¿Ima nintaj Jehová casado cawaypaj?
Adantawan Evata juclachishganchomi Diosninchi cayno nergan: “Runaga mamanpa taytanpa maquinpita yargun warminwan mana raquicaypa tiyananpa” (Génesis 2:24). Jehovaga munan casaducuna mana raquicaypa cawacärinanta. Y divorciuga canmanshi pipis majanta traiciunashganraycur-raj; pero quiquincunapitana canga, öraga waquincuna perdunanacärinmi (Mateo 19:9). a Jehovapa ricayninpäga mana alichi canman pipis casado caycarna jucwanraj casacuyta munaptin (1 Timoteo 3:2).
SHUMAJ YACHACURCUNAPAJ
Yachacushun imanotaj soltero o casado caycarpis cushi cushila caycashwan, Jehovatapis imanotaj cushichishwan.
4. Soltero carga imaycapis ruranapaj caycan
Jesusga ichiclapis laquicurganchu soltero cashganpita (Mateo 19:11, 12). Leipäcuy Mateo 4:23 y caypita parlapacäriy:
-
Soltero cashganraycur, ¿imanotaj Jesusga Taytanta masraj sirvergan, y waquincunatapis alapa yanapargan?
Cushishgala Diosta sirvinanpäga, soltero cristianucunaga Jesusnola tiempunta ali camacächin. VIDEUTA ricapäcuy y caypita parlapacäriy:
-
¿Imacunata rurartaj solterucunaga Diosta masraj sirvinman?
¿Mayashcanquichu?
Bibliaga manami ninchu ayca watayoj caycar pipis casacunanpaj. Pero ninmi ‘edäninchöraj’ cananpaj; ali tantiaj y yarpayniyoj cashgan wichan (1 Corintios 7:36).
5. Yarpachacuyraj majayquita acranayquipaj
Piwan casaracunapaj acrashganchipitami canga nircur imano cawacunapaj. Leipäcuy Mateo 19:4-6, 9 y caypita parlapacäriy:
-
¿Imanirtaj juc cristianuga aliraj yarpachacunman casacunanpaj?
Bibliaga yanapäshunquimi musyanayquipaj imanotaj canman juc ali warmi o juc ali runa. Jehovata amatar cuyajta ashiy. b Leipäcuy 1 Corintios 7:39 y 2 Corintios 6:14. Nircur caycunapita parlapacäriy:
-
Maygan hermanulanchi casacuyta munaptenga, ¿imanirtaj paynola Diosta sirviycajta ashinman?
-
Jehovata mana sirvejwan casacurga, ¿imanoraj Pay ricacunga?
Juc toruta juc animalwan arucherga ishcancunami nacapäcun, chaynola Diosta mana sirvejcunawan casacuptenga mala vidatami pasapäcunga.
6. Casado vidaga Jehová munashganno canman
Unay Israel marcacho runacunaga warmincunapita imalapitapis divorciacärej. Leipäcuy Malaquías 2:13, 14, 16 y caypita parlapacäriy:
-
¿Imanirtaj Jehová munanchu imalapitapis pipis divorciacärinanta?
Pipis majanta traiciunaptin y chayraycur divorcio captinpis laquicuypämi majanpaj y wamrancunapäpis.
VIDEUTA ricapäcuy y caypita parlapacäriy:
-
Majayqui Diosta mana sirviptinpis, ¿imataraj ruranquiman cushishgala paywan cawacunayquipaj?
7. Casadocuna Dios nishganta cäsucunman
Öraga sasami canman casado vidanchicho Dios nishganta ruranapaj. c Pero calpachacuptinchega bendiciunnintami chasquishun. VIDEUTA ricapäcuy.
Leipäcuy Hebreos 13:4 y caypita parlapacäriy:
-
¿Sasachuraj cumplinapaj caycan, casaducunapaj Bibliacho mandatucunaga? ¿Imanir chayno nishgayquita tantiachicamuy?
Jehovaga mandacun casacunapaj o divorciacunapaj autoridäcunaman aywaycur-raj guelgachinapaj; leycunapis chaytami mandacun. Leipäcuy Tito 3:1 y caypita parlapacäriy:
-
Casado captiquega, ¿autoridäcunaman aywaycur guelgachishgayqui papelniquicuna caycanchu?
WAQUINCUNA NIPÄCUN: “Majäwan waran waran rabiashgala canäpaj trucanga, mejortaga raquicäcurëman”.
-
¿Ima ninquimanraj gamga?
ICHIC YACHACUY
Soltero cajta, casado cajtapis ishcantami Jehová bendecin. Cushishgalaga cawacunchi Diosninchita cäsucur paylata sirvirmi, casado o soltero caycarpis.
Yarpänapaj
-
¿Soltero cajcunaga imanotaj tiempunta ali camacächinman?
-
¿Imanirtaj Bibliaga nin cristianupurala casacunapaj cajta?
-
¿Ima nintaj Bibliaga imaraycur divorciacunapaj cajpita?
MASLATA YACHACUNAYQUIPAJ
¿Ima ninantaj ‘Jesusta chasquicojlawan’ majachacänapaj?
Yachacunayquipaj ali caycan, imanotaj noviucunapis o casaducunapis imano cawapäcunanpaj ali decidipäcun.
Yachacuy imanotaj juc hermano guepacho jaguishganpitapis más bendiciuncunataraj Jehová tarichergan.
Juc cristiano manaraj divorciacur, ¿imamanrätaj ali yarpachacunman?
‘Dios jucllachashantaga respetaypämi’ (Wilacamoj, diciembre 2018)
a Cay chuscu caj nota parlaycämun raquinacuypita (adulterio mana captin).
b Waquin marcacunachoga taytancunami wamrancunata ashipan piwan casacunanpaj. Chay taytacunaga Jehovata cuyaj cajcunatami acrapäcunman. Manachi ayca guellayta chasquinanpaj cajlamanchu yarpachacärinman.
c Manaraj casaracur pilawanpis cawaycarga, quiquiquipitami canga jucla casacunayquipaj o raquicäcunayquipaj.
