Jehovaga cushicunmi casaracushgacuna cushi cushila cawapäcuptin (Mr 10:9). Juc cristiano casado vidancho ali cawacuyta munarga, Bibliacho caycaj consejucunatami cäsucunman, chaynopa shumaj acranga piwan casaracunanpaj.

Bibliaga consejaycun pipis “majachacunanpänuyna watan” captinraj piwanpis reguinacunanpaj, chay edächoga imatapis shumaj tantiaycurna alita acranga, y manami shongun munashgalanta rurangachu (1Co 7:36). Y chay tiempo chayamunancama japalan cashpayqui calpachacuy Jehovawan ali amigo canayquipaj y Biblia nishganno más ali cristianuman ticranayquipaj. Chayga yanapäshunqui ali warmi o ali runa canayquipaj casaracuptiqui.

Piwanpis jucla ama casaracuychu, sinoga calpachacuy juc tiempuraj payta reguinayquipaj, masraj shonguncho imano runa cashganta reguiy (1Pe 3:4). Y imalapitapis seguro mana caycarga, paywan chaycunapita parlapacäriy. Casaracuyta munarga, ‘imano majäta yanapäman’ nir yarpachacunayqui, ama shuyaraychu gamlata yanapäshunayquipaj cajta (Flp 2:3, 4). Japalanraj caycar Bibliapa consejuncunata cäsucuptiquega, yanapäshunqui casado vidachopis chayta ruranayquipaj. Chayno captenga casado vidayqui alimi canga, ishcaniqui cushi cushila goyapäcunqui.

CAY VIDEUTA RICÄRIY: CASARACUYTA MUNAJCUNAPAJ 3 CAJ: ‘SHUMAJRÄMI YARPACHACUY’. NIRCUR CAY TAPUCUYCUNAPITA PARLACAMUY:

• ¿Ima nishwantaj paninchi y Julio imano reguinacuycashganpita?

• ¿Imapitataj paninchi cuentata gocurgan Julio imano cashganpita?

• ¿Imanotaj taytancuna yanapargan y imataj pay rurargan?