Salmos 64:1-10
(1) Cantaqkunapa mandaqninpaqmi. David qelqashqan.
64 (2) Tayta Dios, lakikur manakamushqäta mayaykalämay.Mantsakuypaq chikimaqnïkunapita tsapaykalämay.
2 (3) Fiyu runakuna atacamänanpaq parlakuptin pakaykalämay.Conträ sharkunanpaq wilanakushqanpita salvaykalämay.
3 (4) Paykuna conträ rimashqanqa afilashqa espädanöraqmi shonqüman chayaykun.Tsaynöpis venënuyuq flëchata jitaqnömi lutala ashlipäkaman.
4 (5) Jutsaynaq runatami manakaqkunata jitapan.Mana mantsakuypami lutala pitapis tumpan.
5 (6) Kikinpura parlakurmi shakyätsinakärin mana alita rurananpaq.Pitapis trampata churapänanpaqmi wilanakärin.
Paykunaqa yarpapäkun pipis mana rikashqantami.
6 (7) Tsaynöpis yarpapäkun pipis mana taripänanpaq kashqantami.¡Paykunaqa pasaypa mana alitami yarpapäkun!
7 (8) Tsaymi flëchanwan Tayta Dios flëchanqapaq.Paykunataqa elaqpitami qorinqapaq.
8 (9) Kikinkunapa shimilanpitami chikipashqa kanqapaq.Tsayno kaykaqta rikashpanmi paykunata asipanqapaq.
9 (10) Tayta Dios castigashqanta musyarmi lapan runakuna mantsakanqapaq.Tsaymi Tayta Dios imata rurashqankunatapis wilakärinqapaq.Lapantapis Tayta Dios kamakätsishqantami tantiyakärinqapaq.
10 (11) Ali runaqa TAYTA DIOS yanapashqanpitami kushikunqa.Imapita tsapänanpaqpis paylamanmi yärakunqa.Tayta Dios munashqanno kawaq runakunaqa kushikärinqami.
