Salmos 59:1-17
(1) Cantaqkunapa mandaqninpaqmi. Ama ushakätsiytsu nishqan tönuwan kay salmuta cantapäkunki. Payta wanutsinanpaq wayinman Saúl kachashqanta yarparmi kay salmuta David qelqarqan.*
59 (2) Tayta Diosnilä, chikimaqnïkunapa makinpita salvaykalämay.Atacamaq runakunapita tsapaykalämay.
2 (3) Fiyu runakunapita qeshpiykatsilämay.Wanutsikuq runakunapita salvaykalämay.
3 (4) TAYTA DIOS, ima jutsatapis mana ruraykaptïmi munayniyuq runakuna wanutsimänanpaq shuyarpaykäman.
4 (5) Imatapis lutanta mana ruraykaptïmi conträkuna atacamänanpaq kamarikurkaykan.¡Jukla yanapaykalämay!¡Imano kaykashqätapis rikaykalämay!
5 (6) Lapanta mandaq TAYTA DIOS, qammi kaykanki Israel runakunata kuyaq Dios.Mana cäsukuq fiyu runakunata castigaykulay.Paykunataqa ama kuyapaytsu. Selah
6 (7) Paykunaqa tsakaypa kutimur kanikuq alqunömi markatapis olqur tumaparkaykan.
7 (8) Rabyar poqshaytapis aqtunraqmi.Mana mayashqaykita yarparmi runa mayinta tukuynöpa ashlipäkun.
8 (9) Paykunataqa kushipankimi, TAYTA DIOS.Qamman mana yärakamuqkunataqa asipankimi.*
9 (10) Qammi kanki tsapämaqnï.Qammi kanki ali rikamaqnï.
10 (11) Qamqa kuyamaqnï Tayta Diosmi kaykanki.Noqa musyämi yanapamänaykipaq kashqanta.Favornï sharkuptikimi chikimaqnïkunata ushakätsishqaykita rikashaq.
11 (12) Tsay runakunata lapantaqa ama wanuykatsilaytsu.Munaynikiwan maytsaypapis qarquykulay.Tsaynöpami castigashqaykita imaypis mana qonqapäkushaqtsu.¡Tayta Dios, tsapämaqnï escüdumi kaykanki!
12 (13) Paykunaqa imata rimarpis mana alitami parlapäkun.Runa tukushqanpita y lula kashqanpita ima nakaymanpis chayatsun.
13 (14) Rabyashpayki chipyaq ushakaykatsilay.Paykunataqa jukla elqaykatsilay.Tsaynöpami pïmaypis musyapäkunqa Jacobpita miraqkunacho y maytsay nacionchöpis rey kashqaykita. Selah
14 (15) Tsay fiyu runakunaqa tsakaypa kutimur kanikuq alqunömi markatapis olqur tumaparkaykan.
15 (16) Wakpa kaypami mikuyta ashir purirkaykan.Mikuyta tarishqanwan mana saksarmi alqu aulaqnöraq qaparpaykan.
16 (17) Noqami itsanqa munayniyuq kashqaykipita cantapäshayki.Kuyakuq kashqaykipitami waraq waraq alabashayki.Qammi kanki imapitapis tsapämaqnï.Qammi kanki lakikushqä höra pakakunä.
17 (18) Tayta Dios, qamtami alabashayki.Qammi kanki tsapämaqnï y pakakunä.Qammi kanki kuyamaq Diosnï.
