Salmos 41:1-13
(1) Cantaqkunapa mandaqninpaqmi. David qelqashqan salmu.
41 (2) Kushishqami kawan waktsakunata yanapaq runaqa.*Paytaqa imay nakaycho kaptinpis TAYTA DIOSMI yanapan.
2 (3) Nacionnincho kushishqa kawananpaqmi ali rikan.Contran sharkuq runakunapitapis tsapanmi.
3 (4) Qeshyar jitaraptinpis aliyätsinmi.Ima qeshyawan qeshyaptinpis kutikätsinmi.
4 (5) Tayta Diostami manakushqä kayno nir:“Kuyapaykalämay, TAYTA DIOS.Qamta rabyanätsir jutsatami rurashqä.Perdonamashpayki aliyaykatsilämay”.
5 (6) Chikimaqnïkunapis wanunäta munarmi kayno nirkaykan:“¡Imayraq payqa wanunqa!”
6 (7) Watukamaq shamushpanpis shimilanmi ali tupäman.Shonqunchöqa nanaparaykämanmi.Tsaymi nawpäpita yarqurirqa wasäna rimar purirkaykan.
7 (8) Juntakaykurmi wasäta rimapäkun.Jutsa rurashqäpita nakaykashqäta yarparmi kayno nirkaykan:
8 (9) “Diablu qeshyatsiptinmi nakaykan.Cämanpitaqa mananami imaypis sharkunqapaqnatsu”.
9 (10) Kuyanakushqä amïgüpis conträmi rikakushqa.Noqawan juntu mikuykarmi conträ sharkushqa.*
10 (11) Kuyapaykalämay, TAYTA DIOS.Chikimaqnï runakunawan musyanakunäpaq aliyaykatsilämay.
11 (12) Aliyätsimashqaykita rikarmi chikimaqnïkuna mana kushipämanqanatsu.Tsaynöpami tantiyakushaq kuyamashqaykita.
12 (13) Noqaqa manami imatapis lutanta rurashqätsu.Makikiwan imaypis jancharaykalämay.Nawpaykicho imaypis tsararaykalämay.
13 (14) Adorashqantsi TAYTA DIOS kananpis imaypis alabashqa kaykulätsun.¡Amén! ¡Tsayno kaykulätsun!*
