Salmos 31:1-24
(1) Cantaqkunapa mandaqninpaqmi. David qelqashqan salmu.
31 (2) TAYTA DIOS, qamlamanmi yärakamü.Runakuna mana penqapämänanpaq ama kachaykalämaytsu.Alilata ruraq kashpayki salvaykalämay.
2 (3) Manakamushqäta mayaykalämay.Jukla salvaykalämay.Jatun qaqano kar tsapaykalämay.Pakakuna machayno kar salvaykalämay.
3 (4) Qammi kanki tsapämaqnï qaqa.Qammi kanki amparakunä törri.Ima peligrupitapis tsapaykalämay.Promitimashqaykino salvaykalämay.
4 (5) Conträkuna trampata churapämashqanpita salvaykalämay.Qamlami ali rikamaqnï kaykanki.
5 (6) Makikimanmi almäta kachaykamü.*Promitishqaykita cumpliq TAYTA DIOS, salvaykalämay.
6 (7) Ïdulukunaman yärakuqkunata pasaypami chikï.Qamlamanmi yärakamü, TAYTA DIOS.
7 (8) Kuyamashqaykita tantiyarmi pasaypa kushikü.Kuyamarmi imano lakikuykashqätapis rikamashqanki.Musyankimi imano nakaykashqätapis.
8 (9) Conträkunapa makinmanqa manami kachaykamashqankitsu.Jawkala kawanäpaqmi salvamashqanki.
9 (10) Pasaypa lakikuykaptïqa kuyapaykalämay, TAYTA DIOS.Waqaylawanmi nawïpis nawi niraqnatsu.Shonqüpis shonqu niraqnatsu.
10 (11) Wata wata waqaylawanmi awkisyarküpis.Lakikuptïmi kalpäpis ushakaykan.Intëru cuerpüpis pasaypami qotukaykan.
11 (12) Conträkunapis pasaypami jamurpäman.Vecïnükunapis pasaypami asipäman.Reqinakushqäkunapis noqawan tinkuyta manami munannatsu.Cällicho rikamarpis juk lädupami tumakurin.*
12 (13) Wanushqatanömi pasaypa qonqaykamashqa.Shalushqa puyñutanömi rikarpaykäman.
13 (14) Lapanpis contralämi rimarkaykan.Maypa aywarpis mantsa mantsalami purï.Lapanpis wanutsimänanpaqmi wilanakurkaykan.*
14 (15) Qamlamanmi yärakamü, TAYTA DIOS.Qam japalayki Diosnï kashqaykitami niykä.
15 (16) Qampa makikichömi kaykä.Conträkuna qatikachämaptinpis salvaykalämay.
16 (17) Kuyapämashpayki salvaykalämay.Noqaqa qampa sirviqnikimi kaykä.
17 (18) Qammanmi qayakamü, TAYTA DIOS.Pipis mana penqapämänanpaq ama kachaykalämaytsu.Fiyu runakunata itsanqa penqayman churaykulay.Paykunataqa lapanta ushakaykatsilay.
18 (19) Jutsaynaq runakunata asiparmi contran rimarkaykan.Tsayno rimaqkunataqa lapanta ushakaykatsilay.
19 (20) ¡Pasaypa kuyakuqmi kaykanki, Tayta Dios!*Mantsakushuqnikikunapaqmi kuyakuynikita tesörutano churaraykätsinki.Tsaytami runakuna rikaykaptin yärakushuqniki runakunata aypuykanki.
20 (21) Kikiki yanaqarmi runakuna contran sharkuptin salvanki.Contran sharkunanpaq wilanakuptinpis imapis mana pasananpaqmi tsapaykanki.
21 (22) TAYTA DIOS alabashqa kaykulätsun.Pasaypa nakaycho kaykaptïmi kuyapäkuq kashpan yanapamashqa.
22 (23) Fiyupa lakikurmi kacharimashqaykita yarparqä.Yanapamänaykipaq manakamuptïmi yanapamashqanki.
23 (24) TAYTA DIOSMAN yärakuqkuna, lapayki payta kuyapäkuy.Payta cäsukuqkunataqa imaypis cuidanmi.Runa tukuqkunatami itsanqa imanöpis kawashqanman tupu castigan.
24 (25) TAYTA DIOSMAN yärakuqkunaqa, mana kachaypa imaypis payman yärakäriy.
Ichic wilacuycuna
^ 31.5 Luc. 23.46; Hech. 7.59.
^ 31.11 Job 19.13; Sal. 38.11; 69.8; 88.18.
^ 31.13 Jer. 20.10.
^ mantsakuy, Diosta mantsakuy Tayta Diosta mantsakurqa tantiyantsi kuyakuq y perdonakuq karpis jutsa rurayta mana kachariqkunata castigashqantami (Éxo. 34.6; Heb. 10.31). Tayta Dios munayniyuq kashqanta rikar Israel runakunapis payta mantsakurqanmi (Éxo. 14.31; Jos. 4.24; 1Sam. 12.18). Tsaymi Tayta Diosta mantsakur payta adorar cäsukuntsi (Deut. 5.29; 10.12-13; Jos. 24.14) y runa mayintsiwan ali kawantsi (Lev. 25.17, 36, 43). Tayta Diosqa payta mantsakuqkunapa amïgunmi kaykan (Sal. 25.14).
